網頁清單

2012年5月15日 星期二

西歐「文藝復興」2012の佛羅倫斯, 意大利 (Florence, Italy)

27 April 2012, Friday
 

11oC - 27 oC, Sunny 
~ 佛羅倫斯小檔案 ~

佛羅倫斯是義大利中部托斯卡納大區和佛羅倫斯省的首府,擁有366091名城市人口,是該地區面積最大、人口最多的城市,以及主要的歷史、文化和商業中心,曾一度是義大利統一後的首都(1865—1871年)。
佛羅倫斯被認為是文藝復興運動的誕生地,藝術與建築的搖籃之一,擁有眾多的歷史建築,和藏品豐富的博物館。歷史上有許多文化名人誕生、活動於此地,比較著名的有詩人但丁、畫家李奧納多·達·文西、米開朗基羅、政治理論家馬基維利、雕塑家多納太羅等。佛羅倫斯歷史中心被列為「世界文化遺產(UNESCO World Heritage)」。
徐志摩在詩集《翡冷翠的一夜》中將此城名稱譯為「翡冷翠」。


 


尋晚因為太攰, 瞓到冇晒知覺!!! 今日天氣繼續晴朗, 唔好比佢停呀!!!

出發前影吓間酒店先~


Lobby都幾新淨幾靚吖, 係我鐘意嘅簡約風喎~


係咪覺得d早餐好簡單呢?!! 唉... 可謂低處未算低... 過多幾日你就知味道...

旅遊巴停泊係阿諾河河谷旁邊, 然後步行進入佛羅倫斯歷史中心(於1982年被聯合國教科文組織列為世界遺產)~


觀光前, 領導帶大家入咗一間皮革店「Adrimar-Carlo Carmagnini」, 行程冇寫嘅, 話用吓佢個Toilet喎... 點知入到去, 全部人要入晒一間房仔先, 之後閂閘!!!!!! 三十幾人被困係間房仔入面, 塞到爆晒, 店員有晒準備, Powerpoint講解+師傅現場示範+貨品Sample展示, 嘩!!! 好恐怖!!! 點解好似返咗大陸咁o架?!! 我明明係比足錢去跟一間貴一貴嘅旅行社o架喎?!! 點會變咗好似零團費果d旅行團咁o架?!! 好彩... 呢d事之後幾日都冇再發生過喇... (唔計參觀威尼斯玻璃廠, 呢個行程有講明)

店員強調佢地係100% Hand Made in Firenze, 幾咁巧奪天工, 仲威到係上海世博意大利館, 得佢地同Ferragamo參展佛羅倫斯工匠, blah-blah-blah~

搞咗一陣, 大家真係走晒去用佢個Toilet, 好似都有d團友食完Lunch再返轉頭幫襯~

好!!! 正式開始觀光!!!

位於聖十字廣場嘅聖十字大殿!!! 正面以新哥德式建築, 係佛羅倫斯最大同最靚嘅教堂之一, 米高安哲奴、伽利略都係安葬係呢度~

老橋(古橋)係佛羅倫斯嘅標誌~


老橋(古橋)又稱金橋, 因為好多金鋪~
尋日係羅馬許願池食唔到Gelato, 今日可以補番數啦~


呢間係金橋尾嘅caffe Pontevecchio d Gelato個Presentation真係一流, 好彩尋日冇食到啫~ 朱古力果仁雪糕Cone要4 Euro, 加埋Tiramisu Gelato, 成為5 Euro~ 好香濃嘅Tiramisu味, 好滑, 好好味呀!!!

金橋上面見到好多許願用嘅鎖頭~

離開前從遠處再望多一眼~


大衛像 & 海神噴泉~

Church of Santa Maria Assunta of the Badia Fiorentina & 舊宮~

「Pizzicheria e Canova di Vini」--佛羅倫斯牛排(行程表嘅特色美食之一)好韌呀!!! 就算紅紅地果d都係韌o架, 好神奇o架!!! 伴菜d香草薯仔就好好味!!! 千層麵都好好味!!! 甜品Tiramisu都好正!!! 呢餐好飽呀!!! 係咁多日o黎講, 呢間餐廳環境叫幾好, 仲免費供應埋水同紅酒, 係歐洲o黎講, 算好豪吓!!! 我地同團友林生林太一齊坐, 佢地都幾健談, 之後幾日都會互相幫對方影合照~


食完午餐就上返旅遊巴, 前往佛羅倫斯小山崗上之米高安哲奴廣場, 一覽佛羅倫斯市全景及觀賞複製的大衛像~


從米高安哲奴廣場遠眺金橋, 另有一番味道~

第一次玩「飄浮」, 失敗咗!!! 有d西方伯伯仲睇到忍唔住笑~


匆匆忙忙咁又要上番車, 要坐2個半鐘頭車先去到中途站Autogrill, 之後再坐2個半鐘頭車先去到酒店(Move Hotel)... o黎咗幾次歐洲, 已經習慣晒坐長途車, 見到好多團友坐長途車坐到吽吽聲, 個樣好辛苦咁~

間酒店好新好靚, 第2期仲起緊, 附近係荒山野嶺, 完全冇建築物, 網友形容為Middle of Nowhere~

窗外風景~

8:00PM, 晚餐時間到!!! 今晚嘅晚餐好好味呀!!! 最正係d凍肉, 好有肉味, 香港食到果d同呢度冇得Fight呀!!! 意大行燴飯都好好味, 原來佢地會留d米遲少少落, 咬落會一半腍一半韌, 唔會成碟都腍晒, 好有心意!!! Panna Cotta都好滑呀!!! 豬扒偏淡兼鞋身!!! 呢餐坐大圓枱, 有2 Pair Uncle Aunt, 同埋澳門夫婦, 大家講開Shopping就好鬼好傾, 我提到1.9 Euro買嘅車仔型意大利粉, 大家都好感興趣, 知道我有影相, 仲即刻傳個相機o黎睇, Aunt仲叫我之後幾日一留意到有咩筍o野就第一時間話佢知...


酒店嘅WiFi要比5 Euro, 仲要Lobby先收到Signal... 你地睇, 已經成10:00PM, 呢隻Internet癮君子仲係度Facebook緊~ 聽日仲要晨咁早起身梳洗+執行李+食早餐o架!!!

沒有留言:

張貼留言