網頁清單

2012年7月30日 星期一

潮廷匯 Chao Dynasty : 初嚐團購之味

20 July 2012, Friday

團購經驗以往都有少少嘅, 主要係Art Jam同埋甜品教室之類... 食落肚嘅團購, 今次係第一次...

團購詳情: -

$139一位享用「美麗華潮廷滙8道菜」私房晚餐,舞茸燒汁煮鮑魚、山葵沙律汁焗鮮元貝、蟲草花螺頭花膠湯、金沙脆脆焗大蝦等等,6位以上惠顧更可享芝士焗太平洋龍蝦煎麵,數量有限,把握機會 (原價$278)!
*星期一至五,四位或以上,每位加送奶皇壽包壹隻
*星期一至日,六位或以上,送芝士焗太平洋龍蝦煎麵
每位茶芥及加一$25

潮廷滙分咗2個時段, 6:00-8:00pm, 或8:00-10:00pm... 8點又太晚, 6點又太早... 唉... 點揀好呀?!! 最終... 唯有揀6點...

嘻... 各位E5嘅鄉親父老, 叔伯兄弟, 我第1個到呀))) 準時到呀)))

鑽媽就好啦, 有柴可夫車佢o黎...

係彌敦道入口, 升降機上5樓, 再上1層扶手電梯就到達... 都幾易搵...

餐廳裝修頗新淨, 餐廳2邊都係落地玻璃, 好光猛!!! 仲有天花嘅水晶燈好閃呀...

餐廳外面嘅露天花園經過粉飾, 好適合新人山盟海誓... 何等浪漫...

原來... 想食d咩係可以自選o架!!! 仲唔需要同d friend相同o架!!! 我之前仲以為Set咗係舞茸燒汁煮鮑魚、山葵沙律汁焗鮮元貝、蟲草花螺頭花膠湯、金沙脆脆焗大蝦... 攪錯晒, 哈哈... 因為個團購係貓兄做攪手, 我只係負責食同埋夾錢, 所以事前冇深究內容...

~ 時尚飲品4選1 ~

法國紅酒 / 凍薑蜜可樂 / 美國橙汁 / 柑桔蜜凍雪碧

凍薑蜜可樂 -- 4樣我都唔好... 揀咗凍薑蜜可樂... OK啦, 有薑味嘅可樂汽水, 如果加多片檸檬可能會更好味...

~ 鮑魚前菜2選1 ~

磯煮鮑魚伴海蜇 / 舞茸燒汁煮鮑魚

磯煮鮑魚伴海蜇 -- 嘩!!! 凍嘅!!! 嘩!!! 唔係, 係冰嘅!!! 中招, 餐牌度都冇顯示係涼菜o黎!!! 隻鮑魚仔味道還可以, 淡淡地, 有少少彈牙... 外表唔吸引嘅配菜有海蜇、青瓜、紅蘿蔔, 冇咩味嘅...


舞茸燒汁煮鮑魚 -- 貓兄英明, 揀咗舞茸燒汁煮鮑魚, 係熱嘅!!!

~ 開胃頭盤2選1 ~

山葵沙律汁焗鮮元貝 / 法式果醋鴨胸沙律

山葵沙律汁焗鮮元貝 -- 5個人不約而同選擇咗山葵沙律汁焗鮮元貝, 雖然有原個貝殼上枱, 又有炸米粉墊底, 可惜沙律汁過多過厚, 導致個賣相唔係太吸引... 貓兄試食後提醒我撥走d山葵沙律汁先好食粒帶子, 我用筷子蘸少少試下味, 果然... 中度嘅Wasabi味唔係太嗆鼻, 但個沙律汁酸得o黎同wasabi做唔到朋友... 鮮元貝唔係太鮮, 少少爽口, 走汁後味道尚可, 每位有2粒...


~ 精美湯羹3選1 ~

蟲草花螺頭花膠湯 / 白菌龍皇燴燕窩羹 / 海參竹笙燴素翅

只有龍媽1個食海參竹笙燴素翅, 貓兄笑佢平日已經係屋企煮翅, 出到o黎又食翅, 唔悶嘅咩?!! 龍媽話鐘意食係唔會悶o架!!!

蟲草花螺頭花膠湯 -- 相當足料, 花膠大大片!!! 湯料有蟲草花、螺頭、花膠、廋肉、雞腳... 湯底都幾鮮甜, 廋肉同雞腳都好軟腍, 係芸芸菜色中比較好味...
 
~ 主打熱葷4選1 ~

香草薄荷汁牛粒 / 金沙脆脆焗中蝦 / 京燒蒜香小黃魚 / 山楂咕嚕黑豚肉

香草薄荷汁牛粒 -- 4樣都想試, 難以決定, 最後跟鑽媽落注, 好彩冇押錯注啫, 哈哈... 牛柳粒軟腍冇根, 薯仔粒好粉好腍, 配埋酸酸甜甜嘅香草薄荷汁, 出奇地好味... 可能係2個頭盤太唔掂, 食到心都寒埋, 打定輸數, 所以佢只係OK好味, 已經覺得好彩幾好味, 哈哈...


金沙脆脆焗中蝦 -- 個樣... 都幾嚇人...

(後) 京燒蒜香小黃魚 -- 都有半條喎...
(前) 山楂咕嚕黑豚肉 -- 試咗1粒, 都OK嘅, 牛粒最抵食...
 
~ 健貽時蔬3選1 ~

鮮枝竹浸時蔬 / 海皇鮮蝦什菜煲 / 野菌金菰灼菜苗

海皇鮮蝦什菜煲 -- 初時見都OK多海鮮, 好似唔錯咁... 一夾起... 嘩!!! 好大團鼻涕(獻)呀!!! 好嘔心呀!!! 係碗中狂洗, 洗極都洗唔甩呀!!! d獻杰到可以夾起一大團固體狀o架, 好恐怖呀!!! 救命呀!!! 處於歇斯底里嘅狀態下食咗呢碗菜, 食而不知其味... (印象中唔難食, 應該係冇咩味)


野菌金菰灼菜苗 -- 一上枱, 鑽媽已經好不肖咁話"呢d邊係菜苗, 明明係白菜"... 見佢只係食咗10分1, 有幾好味, 略知一二...


~ 精選米麵3選1 ~

西都魚蛋新竹米 / 勝瓜什錦泡飯 / 金菰蝦籽炆伊麵
勝瓜什錦泡飯 -- 好大碗喎!!! 配料有勝瓜、魚蛋片切絲、肉鬆、方魚, 湯底清甜, 食完飽晒...
 
金菰蝦籽炆伊麵...

西都魚蛋新竹米...
 
~ 滋潤甜品3選1 ~

鮮椰大丸紫米露 / 鴛鴦凍軟糕 / 紅棗百合燉雪耳

紅棗百合燉雪耳 -- 滋潤之選, 清甜美味, 可惜... 我個碗冇紅棗同百合嘅?!!

六位或以上,送芝士焗太平洋龍蝦煎麵, 我地得5個人, 點解都有得送嘅?!!

芝士焗太平洋龍蝦煎麵 -- 個賣相已經夠差, 成碟都係獻, 好難食, d龍蝦肉邊緣位置發黑, 應該係來自隻龍蝦成長嘅水源, 不送也罷!!!


四位或以上,每位加送奶皇壽包壹隻

奶皇壽包 -- 如果係奶皇餡, 我都OK嘅, 但係佢混咗好多椰絲, d餡又乾又硬, 唔Like...
 
服務員上菜同收碟都好快手, 可能因為冇咩客啦, 又或者因為要趕住8點正埋單清場... 大部分位置圍咗板, 睇唔到實際餐廳有幾大, 而可見的位置只有10多張枱, 而客人只有4枱...

是次每人消費約$165元
味道: 2 環境: 3 服務: 3 衛生: 3 抵食: 4
###
地址 : 尖沙咀彌敦道132號美麗華商場6樓
電話 : 2625 1868

2012年7月27日 星期五

吹水館 Chit Chat Oyster & Grill

15 July 2012, Sunday
今日繼續「鯉景灣巡禮」... 巡邏咗好幾間店舖, 咦... 呢間Chit Chat勁多人係門外等位... 好似好得咁喎... (真係好似o架咋)

夠膽自稱法國菜, 質數應該唔差得去邊啩... 嘿... 呢鋪錯晒... 枉佢仲有面叫"Special Set Lunch"~

餐包嘅黑芝麻味超強勁, 幾好味, 見到有d客係白芝麻款...

餐湯可以揀茶湯或忌廉湯...

忌廉湯 -- 味道麻麻, 湯內有香草同粟米, 勁Creamy...

雜菜湯 -- 味道麻麻...

煎牛仔骨配洋蔥汁 ($63) -- 嘩!!! 個樣好唔開胃... 配菜碎濕濕又多芡... 牛仔骨味道還可以, 但好多肥膏...

爐燒豬仔骨配法蘭克福腸, 薯菜, 燒汁 ($90) -- 配菜碎濕濕又多芡again... 炸薯條乾硬化... 法蘭克福腸完全冇味... 豬仔骨乾柴柴又唔入味... 點會咁o架?!!

餐茶 -- 照舊冷熱檸茶...

原來我個牛仔骨餐係冇甜品o架!!! 有冇搞錯!!! 張餐牌令人好混亂...

意大利芝士蛋糕 -- 有別於一段Tiramisu, 呢度嘅Tiramisu就好似普通嘅海綿蛋糕, 一d都食唔出咖啡酒漿... 後尾Honey發現係有一層超薄嘅咖啡酒漿... Honey竟然鐘意少d咖啡酒漿, 真係各人口味唔同...


離開時已經1:30pm, 門口居然仍然冇好多人等緊位... 點會咁o架?!! 我地頭先就係比呢個景象呃咗...

餐廳對面係海濱長廊, 可以遠眺鯉魚門海峽...

我地坐係入門口第一張枱, 度門成日開開閂閂, 走晒d冷氣, 好熱... 閂門時仲會嘭嘭聲, 成塊落地玻璃都震晒, 好滋擾呀!!!

食物質數唔掂, 收費不菲, 天呀!!! 唔該你話比我聽, 點解會有咁多人去食o架?!!

是次每人消費約$85元
味道: 1 環境: 2 服務:3 衛生: 3 抵食: 1
###
地址 : 西灣河鯉景灣太康街55號A期GA8-9
電話 : 2967 1666 / 5114 3707

2012年7月26日 星期四

囍宴 東‧豐 Xi Yan

13 July 2012, Friday

Happy Friday!!! 又係搵食嘅時候喇~

放工時路經太古城嘅囍宴, 已經有一段時間冇o黎食啦, Honey只係無聊走埋去玻璃窗望吓貼係上面嘅餐牌, 餐廳內嘅服務員飛身撲出, 笑容滿面, 出動埋閃閃眼睛, 極力推薦套餐有幾抵食, 叫我地試吓... 我心諗"我地食過好多次啦", 想轉身走但又唔知點拒絕佢好, 最後無奈地... 入咗去...

全店大部分地方用上落地玻璃, 可以欣賞街景之餘, 又可以透入陽光...

牆上嘅掛畫充滿中國特色...

入座後發現, 剛才服務員極力推薦嘅晚市自選套餐, 原來星期五貴過星期一至四幾十蚊o架!!! 又話好抵食嘅?!! 越諗越唔抵... 最後決定要星期一至日都係一樣價錢嘅「家嚐。滋味」2人套餐("Taste of Home" Set Menu for 2), 某某信用卡5折咗$328~

皮蛋毛豆玉子豆腐 -- 玉子豆腐好滑, 但係味道就同皮蛋毛豆唔係好夾... 皮蛋有少許皮蛋嘅怪味... 怕怕...


話梅花雕醉雞翼 -- 冰冰涼涼, 溫度適中, 係夏天食一流... 話梅味同花雕味同樣出色... 係出色嘅前菜...


零味精私房老火湯 -- 同樣屬於夏天的, 仲有冬瓜湯... 係炎炎夏日可以消暑... 味道不錯...

湯渣只有2舊冬瓜...
 
(右) 私房醬燒骨 -- 醬汁味道不錯, 一字排又乾又硬...
(左) 金不換沙爹蛋黃蝦 -- 冇蛋黃味, 蝦亦唔新鮮...


苔菜炸魚柳 -- 魚柳蘸上混入苔菜的炸漿, 炸皮超薄, 入口香脆熱辣, 魚肉鮮嫩, 味道不俗...

金銀蒜花枝片蒸勝瓜 -- 醬汁味道不錯, 可惜份量太小, 粉絲唔夠軟腍, 花枝又太硬...


香蔥煙鴨絲涼拌拉麵 -- 拌勻醬汁, 味道好清新, 夏天食一流... 配料略遜...
 
囍宴特色甜點 -- 牛奶雪糕伴乾橙片, 雪糕入口香滑, 奶味強勁, 甜度適中, 咬一口乾橙片, 苦澀味中和雪糕的甜味, 很好的配搭... 只係花少少心思, 就可以令外型升格, 讚~

幾位服務員都好欣勤...

客人不多, 環境寧願...

連埋茶芥加一, 埋單要$380, 好似唔係幾抵喎... 因為... 只有雪糕係比較滿意... 其餘的總係有少少美中不足... 起碼... 冇一樣係放入口即時瞳孔放大...

以往每次食完行出門口過馬路就已經痰上頸嘅經驗... 今次... 坐係餐廳入面已經痰上頸...

是次每人消費約$185元
味道: 3 環境: 4 服務:4 衛生: 3 抵食: 2
###
地址 : 太古太古城道20號寧安閣地下 505-508號舖
電話 : 2380 0919  

2012年7月25日 星期三

曼谷泰菜 Bangkok Thai Restaurant

11 July 2012, Wednesday

曼谷泰菜屹立北角超過十幾年, 多年前第一次到北角開餐, 就係幫襯佢!!! 係朋友推介, 約我地去食, 印象中樣樣都好好味...

平時好少食泰菜嘅我地, 今日興起重臨舊地...

12點未夠來到, 只有2枱客, 可以好放心咁影吓週圍環境... 如果坐滿咗食客就好難影, 驚其他食客唔鐘意自己入咗鏡嘛...

不過唔好以為佢冇人幫襯喎, 查實佢一早已經Full Booking!!! 只係d客未o黎到...
餐廳座位頗舒適... 裝修走簡約風...

點少得泰國國寶金象做裝飾...

泰式午餐選擇有十幾款...

黃咖喱牛腩飯 ($45) -- 只係一個普通午餐, 都加朵泰國蘭花做裝飾, 好重本喎... 黃咖喱加咗椰汁, 中和咗辛辣味, 提升咗香味, 牛腩同薯仔都好足料!!!

泰式海南雞飯配冬瓜雞湯 ($48) -- 冬瓜雞湯好多芫荽, 怕怕... 海南雞肉比較嚡口, 但味道OK, 醬汁偏辣...

餐飲包咖啡/茶, 加$5可以改青檸梳打/香茅薑蜜/香葉特飲/羅望子特飲, 我地揀咗青檸梳打同埋香茅薑蜜, 香茅薑蜜無論香茅定係薑定係蜜都好強勁, 味道好特別, 幾好飲, 唔知係屋企整唔整到嘅呢...

甜品 -- 餐牌冇寫有包甜品, 埋單時職員送上綠豆爽, 好好飲呀!!! 好多地方都冇得飲綠豆爽啦, 好懷念呀!!!

好味又抵食!!! 估唔到只係隔咗一個地鐵站, 質數可以相差咁遠, 太古坊果邊$55午餐又迫又難食又細碗又唔包飲品, 最衰唔可以成日過o黎北角食啦~

服務員不乏泰國人, 味道冇可能唔地道啦~ 態度欣勤友善, 令人覺得好舒服~

Honey話下次搵機會o黎試吓佢個晚市套餐... 嘻嘻... 又有得食, 我緊係讚好啦~

是次每人消費約$55元
味道: 3 環境: 3 服務: 3 衛生: 3 抵食: 3
###
地址 : 北角英皇道433-437號珠璣大廈地下B舖
電話 : 2856 0818

2012年7月23日 星期一

Jack's Terrazza Ristorante

8 July 2012, Sunday
今日好猛太陽呀!!! 我要同陽光玩遊戲!!! 考慮咗一陣, Honey話不如o黎個「鯉景灣巡禮」, 重新食過晒所有鯉景灣嘅餐廳... 嘩!!! 咁大Project呀?!!

「鯉景灣巡禮」第一站 -- Jack's Terrazza Ristorante!!!

進入餐廳後, 通過一條小通道, 通道的尾部放置咗2部電玩, 相信係為晚上o黎飲酒嘅客人提供消遣...



餐廳近落地玻璃窗的一排卡位, 張梳化係凌空吊起o架!!! 好似坐係掛係樹上嘅鞦韆上面進食咁呀!!! 紅白枱仔餐枱布, 好童話式呀!!!


靠牆位置以藍白色為主, 好地中海Feel呀~


Jack's Terrazza Ristorante旁邊係海濱長廊, 被翠綠的樹木包圍...

餐廳內有2位年青女服務員, 再加1位相對年長嘅男服務員...

男服務員神情表演出好不肖, 唔想做咁, 餐牌唔係放係枱面比我地, 係飛埋o黎張枱度!!! 肉刀係掉係枱上, 唔係放!!! 餐牌上面有3個是日精選餐(湯+沙律, 薄餅, 意粉), 冇寫係咩, 咁都唔知係咩緊係要問o架啦, 個男服務員態度敷衍, 唔想答咁, 答完都聽唔清楚佢答咩... 未食都已經一肚氣!!! 比美陸羽茶室同泉章居班性格大叔... 喂, 我唔係o黎受你氣o架!!!

餐包 -- 樣子討好, 味道不俗...


午餐頭盤可以揀 : 是日精選餐湯 or 田園什菜沙律 or 意式田螺茄汁香草蒜蓉汁...

是日精選餐湯 -- 都聽唔到佢講咩, 已經冇晒印象, 只記得好稀薄...


意式田螺茄汁香草蒜蓉汁 -- 好難食!!! 第一次食到咁難食嘅田螺!!! d汁同田螺完全融合唔到!!! 田螺肉又硬又實...
燴紐西蘭羊膝 ($95) -- 羊膝份量十足, 肉質軟腍, 伴碟有薯蓉及蔬菜, 燒汁味道不錯...

大蝦咖喱 ($85)  -- d蝦... 如果冇咗激辛咖哩汁蘸o黎食, 真係食唔落... 大量蔬菜, 配埋咖哩汁, 開胃又健康...

是日精選甜品 -- 全餐最好味!!! 香濃軟滑嘅朱古力慕斯, 包著軟棉棉嘅棉花糖, 面層灑上朱古力粉, 以朱古力醬點綴, 絕對係有Heart之作!!!
午餐仲包埋咖啡或茶...

餐廳內冷氣唔知係咪有問題, 開住把牛角扇, 吹向凌空梳化果邊... 我食到標晒汗... 後尾坐我後面嘅BB喪喊, 懷孕7個月嘅女服務員上前慰問, 父母表示可能因為太熱, 個牛角扇先轉吹我地呢邊... 嘩... 即刻舒服晒... 好o野, BB, 你做得好好!!! 唔該晒!!!

席間享受到日光浴, 離開時居然落起傾盆大雨, 果真天有不測之風雲!!! 無奈下乘的士回家, 下車時又再出太陽, 天呀!!! 你耍我!!!

是次每人消費約$100元
味道: 2 環境: 2 服務: 1 衛生: 3 抵食: 2
###
地址 : 西灣河鯉景灣太康街55號A期GA26-31
電話 : 2885 6728

2012年7月20日 星期五

瀰月屋 Mitsukiya : 甜品屋新星 100%和の味

6 July 2012, Friday

係SaVoye Bistro嘆完法國菜, 10點幾轉場, 行2個街口就去到清風街, 我地今日搵食嘅第2站, 瀰漫日本韻味嘅甜品店--「瀰月屋」!!!


嘩!!! 門口好多人等緊位呀!!! 之前上網做資料搜集, d網民又話全晚先得佢地2個客嘅?!! 點算呀而家?!!

撥開暖簾, 服務員小妹妹係廚房出菜位飛身撲出, 幫我地登記咗姓氏, 同埋手提電話號碼頭4個數目字作為密碼... 我覺得呢個方法好聰明呀!!! 陳李張王何先生小姐太太呢d稱呼比比皆是, 當踫巧有重複的時候, 必有爭拗... 加咗個密碼的話, 就唔使驚輪到我地果時, 會有人走出o黎冒認啦~

查實話全晚先得佢地2個客嘅網民仲話d服務員黑面又唔想做咁, 但係今晚所見又唔係喎... 所以呢... 我都同朋友講, 有時網民寫到天花龍鳳嘅食店, 去到又唔多掂, 反而比網民寫到差到無可再差嘅食店, 去到又OK喎... 搞到我而家都唔敢盡信網民所寫嘅食評, 有時見到d好有特色好想試吓嘅食店, 都會博吓~

等候期間, 留意到門外左邊有電子顯示器, 不斷播放招牌菜的照片, 可以揀定食咩, 又可以消磨時間...

右邊有1個大玻璃窗, 可以望到餐廳內嘅環境... 咦... 咦... 坐Tatami嘅?!! Oh my god!!! 我今日著婆仔鞋, 冇著襪呀!!! 點算呀?!! 好驚除咗鞋之後會有異味喎!!! 朋友好衰咁笑住話"咪當隔離鋪d榴槤布甸嘅味囉, KeKe"... 激死, 笑唔出, 繼續擔心緊之際, 見到原來右邊係榻榻米, 左邊係正常嘅木枱木櫈, 太好喇, 希望我地可以唔使坐榻榻米啦~

仲未到我地, 繼續擔天望地... 位於天橋底嘅清風街, 以前間中會o黎搵食, 多數都係去留家廚房, 有一段時間冇o黎, 真係變咗好多!!! 多咗好多特色食店, 睇o黎可以同Honey係呢條街再進行一次地毯式搜食!!!

等咗20分鐘, 終於都入得啦!!! 係我想要嘅木枱木櫈位呀, 太好啦!!!

落完單就週圍影吓相... 係咪好似去咗小丸子屋企咁呢... 店內陳設係100%懷舊日本Feel!!!

呢部收音機隨時大年紀過我同你呀!!!

牆上貼滿日式海報, 令我真係覺得自己呢一刻係置身係日本之中...


呢個入硬幣嘅粉紅公眾電話唔知係收Yen定收港幣嘅呢, 哈哈哈~


店內座無虛席... 大家都好努力影相同埋傾計... 其實我都好想坐Tatami, 下次同Honey再o黎一定要記得著返對襪...

林擒パイ(蘋果批) -- 即叫即制, 落單後要等15-20分鐘... 我地好好彩, 服務員到廚房落單後通知我地可以即刻有, 我估係有客Order咗又唔等得, 所以走咗啩... 原隻林擒蘋果, 被酥皮全面覆蓋, 外型相當獨特, 連鋪底嘅和紙都靚過人!!! 底部有吉士, 蘋果肉香甜無比, 鬆化嘅酥皮, 1個甜品滿足你3個願望!!! Size特大嘅林擒蘋果, 細食嘅女士們, 可以當正餐食都得喎, 要填飽肚皮絕對綽綽有餘~
 
葛軟糍 -- 見餐牌有原味、黑糖味、荔枝味(夏之限定), 我以為係1碟有晒3隻味, 原來唔係, 1碟只有1隻味... 考慮咗一陣, 決定要黑糖味, 因為見網友讚佢係日本嘅味道... 口感QQ的, 好冰涼, 味道越食越似蔗糖, 蘸唔蘸綠茶粉都一樣咁好味~ 炎炎夏日食呢個甜品, 超級透心涼~

離開時, 服務員又再飛身撲出幫我地埋單, 並唔似網民所講咁, 全部服務員都唔做o野掛住玩電話, 亦冇黑面吖~

食物味道亦唔似網民所講咁難食啫~

咁正嘅環境, 我會再o黎o架!!!

是次每人消費約$45元
味道: 4 環境: 4 服務: 3 衛生: 4 抵食: 4
###
地址 : 天后清風街15號
電話 : 2806 3389