網頁清單

2012年7月19日 星期四

SaVoye Bistro : 法國情懷此中尋

6 July 2012, Friday

今日約咗好耐冇見嘅好朋友食飯, 佢叫我發板去邊樹食, 真係諗到我頭都大埋!!! 平時睇見佢開飯嘅相睇到我流晒口水, 今日居然叫我發板, 我驚我揀d地方失禮佢喎, 嘩咔咔咔... 話晒佢先係識飲識食嘅元祖, 讀書果陣佢已經帶我去Häagen-Dazs專門店食雪糕, 又帶我去九龍酒店食Buffet, 當時我真係大鄉里出城咁呀!!!

思前想後, 尖沙咀同銅鑼灣佢應該食過晒, 都係去天后啦!!! 天后真係唔錯o架, 好多橫街嘅特色小店, 唔似得d商場入面嘅食肆, 集團式經營, 倒模咁... 冇大型商場, 街上面人流唔太多, 冇尖沙咀同銅鑼灣咁人頭湧湧, 有少少似去咗日本搵食咁, 要走入d橫街小巷尋找隱蔽小店... 交通極之方便, 大部分店舖一出地鐵站行2-4個街口就到... 因為地點近銅鑼灣, 雖然係小店經營, 但絕對優質, 價錢仲比銅鑼灣平...

上網做資料搜集, 最終決定試下SaVoye Bistro... 最大原因係... 環境一流, 價錢中肯, 又冇限時段!!! 最憎果d要人食 6-8pm / 8-10pm 嘅食店, 限時限刻, 趕頭趕命, 好冇癮, 食咗都唔消化...

早2日打o黎Book位, 職員話得番門口位, 如果有人Cancel Booking就可以轉枱比我地... 我都明嘅, 星期五晚個個都出街同朋友食飯, 比較好嘅餐廳一早Full晒都係正常嘅, 我地2個又唔係談心, 近門口都OK嘅... 結果今日職員打比我Confirm Booking嘅時候, 佢話轉咗Sofa位比我地, 太好喇!!!

未夠7點o黎到, 一枱客都未有... 夕陽從特大玻璃窗滲透入餐廳內, 呢一刻感覺好寧靜, 成個世界好似停頓咗咁, 好舒服呀!!!


網民推介嘅Nice Place to go果然名不虛傳!!! 餐廳以法國19世紀設計的建築物Villa Savoye為建築藍本, 20呎高嘅樓底, 置身其中, 感覺就好似去咗法國旅行咁... 入夜後, 餐廳點起小臘燭, 加上陰暗嘅燈光, 情調十足~


餐廳內嘅客人以情侶為主, 我地2個阿太由未夠7點坐到10點半, 其間一直雞啄唔斷, 對於有情飲水飽嘅情侶o黎講, 應該會大殺風景, 嘩咔咔咔... 請原諒我地, 我地超過一年冇見o架啦, 緊係有好多心聲要互相傾訴o架啦~

我地Order咗2份Dinner, 每位$238...

頭盤可以選擇 : -
酥炸水牛芝士配鮮茄醬
or 精選是日餐湯
or 自選三湯 (法式洋蔥濃湯/牛尾清湯/蟹肉龍蝦濃湯) (要加$20)

精選是日餐湯 -- 忌廉波菜湯... 打成蓉嘅波菜, 入口細滑, 草青味被忌廉蓋過咗, 怕食菠菜嘅朋友可以一試~


麵包有2款, 暖暖地, 撕開時感受到果份軟熟... 長期唔搽牛油嘅我, 好怕果d切成長方片又冰凍又堅硬又冇牛油味嘅牛油, 之但係見到呢碟牛油切成波浪型, 睇落好軟滑, 忍唔住試咗少少, 好得喎!!! 又香又滑, 味道濃郁, 溫度適中, 蘸麵包好好味呀~ 多幾個麵包都食得落~

主菜可以選擇 : -
炭燒美國頂級安格斯牛扒 (Prime級) (要加$80)
or 炭燒香草羊鞍配原只焗蒜頭
or 法國珍珠雞胸配香燒帶子
or 香煎東星班柳伴白松露油炒野菌西蘭
or 蟹肉白露筍意大利飯

炭燒香草羊鞍配原只焗蒜頭 -- 嘩!!! 外型好靚好吸引呀!!! 係香港好少有機會食到焗蒜頭, 等我試少少先... 噢... I Love It!!! 好味到暈!!! Caramelize嘅蒜片好香好甜, 同大家認識嘅辛辣得o黎仲有少少異味嘅蒜頭簡直係南轅北轍!!! 羊鞍肉嫩味美, 完全冇臊味... 煎過嘅薯仔片作為伴菜亦好出色... 造型嬌小可愛嘅車厘茄好醒胃... 成碟菜整體配搭好Match, 可以睇得出大廚花咗唔少心思, 盡顯法國菜對食物細節極之講究嘅神髓!!!

香煎東星班柳伴白松露油炒野菌西蘭 -- 肉嫩多汁, 味道清淡, 外型相對平實... 朋友食剩咗4份1, 話好飽... 我話"吓?!! 好飽?!! 咁等陣仲點去食甜品呀?!!"... 佢居然諗都唔使諗就好堅定咁答我"食得落", "隔一陣先去食o架嘛, 都落咗格啦", "放心喎, 我食得落o架"... 哈!!! 女人果然係有第2個胃專放甜品嘅...

Cuppacinno -- 餐飲居然可以唔使加錢飲Cuppacinno, 高級餐廳即係高級餐廳!!! 外表平平無奇, 冇話跟潮流玩吓咖啡拉花咁, 原來內裡一d都唔簡單!!! 味道香醇濃郁, fight低香港嘅"Star不"同"太平洋"唔在講, 居然仲好飲過我係意大利米蘭購物街飲果杯Cuppacinno, 真係好好飲呀!!!


Dinner Menu寫住"自家制甜品(一律半價)"... 好奇怪囉, 佢夾咗呢個自家制甜品係餐飲同主菜中間, 令我誤會係晚餐價錢已經包咗甜品, 細問之下, 原來唔包, 不過職員唔係答唔包o架, 佢地強調"包o架, 半價囉"... 呢d係咩道理?!! 係咪而家d學校係咁教o架, 係咪我太Out聽唔明佢講咩... 算啦, 見個後生仔好有熱誠咁答我, 無謂打沉佢嘅熱誠, 我自己唔叫甜品就係啦... 反正我地等陣仲要下場...

環境一流, 服務員又好笑容, 食物質數同味道都唔錯, 價錢又平過尖沙咀同銅鑼灣, 難怪會Full Booking~ 下次要同Honey o黎試吓佢個Tasting Menu先得~

情侶們, 記住啦, 下一站... 天后!!!

是次每人消費約$250元
味道: 4 環境: 5 服務: 4 衛生: 4 抵食: 4
###
地址 : 天后永興街9-11號地下A店
電話 : 2503 3222

2012年7月18日 星期三

添好運點心專門店 Tim Ho Wan, the Dim-Sum Specialists

6 July 2012, Friday

聽聞「添好運」係北角開咗分店, Honey好雀躍, 要第一時間去試下...

10點幾去到, 唔使等位, 直入... 門外有一排櫈比排隊嘅人坐, 我地今次用唔著...


快餐店格局, 光潔鮮明, 招牌開放式廚房, 坐得近嘅客, 唔知會唔會覺得好熱嘅呢... 座位都相當迷你, 叫多幾個點心都放唔落...


酥皮焗叉燒包 -- 必吃招牌菜!!! 脆脆嘅外皮, 包住甜美嘅叉燒餡料, Yummy~

香滑馬拉糕 -- 招牌菜, 味道甘甜, 鬆化可口, 正!!!

潮州蒸粉果 -- 招牌菜, 同出面d酒樓比較, 呢個點心嘅分別最明顯, 能夠明顯食得出切成方塊狀嘅白蘿蔔西芹花生, 真真正正有芹菜味, 餡料唔係一舊糊咁, 好味!!! 比個讚你!!!

鮮蝦燒賣皇 -- 招牌菜, 蝦肉爽口, 以杞子點綴, 感覺好養生, 好味~
 
黃沙豬潤腸 -- 同樣係招牌菜, 比之前幾款失色好多... 好記得上次係深水埗包VIP房食私房點心, 一嚐佢嘅招牌菜黃沙豬潤腸, 非常美味, 質數拍得住西苑... 可惜今日滋味不再~


問到職員呢度有冇提供私房點心嘅VIP房, 答案係冇嘅!!! 有d失望...

是次每人消費約$45元
味道: 4 環境: 3 服務: 3 衛生: 3 抵食: 4
###
地址 : 北角和富道2-8號嘉洋大廈地下B,C及D鋪
電話 : 2979 5608

2012年7月17日 星期二

翡翠潮人潮食 Crystal Jade Chao Zhou Kitchen

2 July 2012, Monday

經過尋日嘅辛勞, 今日係攰到嘔!!! 唔想再出外搵食, 近近地去咗康怡廣場新開嘅「翡翠」... 隔離左右嘅餐廳半年前已經開業, 一直以為佢係開「翡翠拉麵小籠包」, 點知... 居然係開潮州菜... Honey好雀躍咁話要試... 唔通佢已經忘記咗上次玉桃軒嘅經歷?!!

門面唔稱得上係潮, 不過都幾Sharp幾簡約~

餐廳內嘅裝修都係行簡約風, 坐落舒適悠閒... 大量Sofa位, 仲有2人Sofa卡位, 枱與枱之間距離都幾遠, 空間感十足, 正!!!

[廚師推介] 正宗星州肉骨茶 -- 阿大廚, 借問聲, 你係咪真係推介呢一個肉骨茶呢?!! Honey好擔心你係咪冇咗味覺喎!!! d湯好好好好好鹹呀!!!!!! 我頂唔順, 叫服務員比杯熱水我, 我要1:1咁溝稀, 都仲係好鹹喎!!! Honey忍唔住, 同經理反映... 嘩!!! 個經理幾勁呀!!! 居然走入廚房拎碗味精水比我地, 話呢個係湯底, 叫我地自行調味, 我真係O晒咀囉!!! 係味應該個廚幫我地調味呀?!! 我點知你地個配方係幾比幾呀?!!

OK, 我Try Try... 基本上, 再將頭先已經用熱水1:1溝稀嘅肉骨茶, 再用湯底1:1咁溝稀, 都仲係好鹹囉!!! 但係都勉強飲得落肚, 之但係... 點解個湯底... 一d藥材味都冇嘅呢?!! 果2舊一字排都仲有藥材味o架喎, 碗湯除咗呢2舊骨, 居然完全冇其他湯料... 究竟邊Part可以稱得上正宗呢?!!

個人o黎講, 我比FAIL!!! 佢唔單止係唔好味咁簡單, 咁鬼鹹, 食咗都驚個腎會有事...


呢碗就係肉骨茶湯底...

芋頭鹹肉粒鮮蝦五穀炒飯 -- 呢個飯就幾美味, 炒得幾甘香, 芋頭又夠粉...
 
銀杏芋泥 -- 嘩!!! 稀到呢!!! 唔可以叫芋泥囉, 極其量係芋糊... 味道偏淡... Below Standard...

Honey話半年後先會再比多一次機會佢...

之後... 又過咗幾日... 有好耐冇見嘅朋友搵我食飯, 叫我發板搵地方... 見面時我同佢講"死喇, 而家d人個個當咗我係食家, 成日叫我搵地方, 其實我早幾日先瀨過o野, Honey仲話係成日都瀨o野", 朋友竟然好抵死咁話"咁咪啱囉, 你成日瀨o野, 咁同你食飯咪少d機會瀨o野囉, 你瀨過果d我咪唔會瀨囉"...

經常瀨o野

是次每人消費約$100元
味道: 1 環境: 4 服務: 3 衛生: 3 抵食: 1
###
地址 : 鰂魚涌康山道1號康怡廣場3樓T4號舖
電話 : 2554 6338

2012年7月13日 星期五

港島香格里拉酒店大堂酒廊 Lobby Lounge

30 June 2012, Saturday
近期興起團購, 我嘅一班死黨亦唔執輸, 熱衷於呢個新玩意... 之但係... 此團購不同彼團購, 哈哈!!! 我地只係一齊上網買衫, 主攻日本嘅Nissen同韓國嘅Gmarket, 夾埋一個Order送貨, 慳運費之餘, 又唔使自己一個人一次過要買太多衫... 最正嘅係... 出o黎提貨時, 又有藉口食食食!!! 呵呵呵呵~

今次嘅搵食目標... 「港島香格里拉」High Tea!!! 網民口碑唔錯, 所以我對佢充滿期望~

尋晚11點掛起8號風球, 今朝起身第一時間睇天氣報告, 嘩!!! 落晒波?!! 有冇走得咁快呀?!! 太好啦, 尋日仲好擔心今日嘅「大食會」會被迫告吹... 好彩受到上天眷顧... 下午仲好鬼猛太陽添...

由於冇得訂位, 2點正開始入座, 先到先得, 所以我地要好準時去到... (最後都冇人準時, 但係我第一個去到, 嘻嘻)

首先講講, 全餐最最最差嘅... 係張枱!!!

事緣... 貓兄話Island Shangri-la個Lobby好Grand, 叫我地去到揀個好位... 我地到達時, 只得幾枱客, 大把位剩, 但係個職員居然帶我地去靠牆邊嘅小圓枱, 冇景之餘, 其他小圓枱只有2張櫈, 果張小圓枱比幅牆頂咗一邊, 仲要放3張櫈?!! 我望一眼張小圓枱, 都計到放唔到3人Afternoon Tea啦, 個職員日日係度返工, 冇可能唔知呀嘛?!!

我同個職員理論, 我個Point好簡單 -- 我地食High Tea, 呢張枱仔點放得落2 Sets High Tea架, 3杯飲品, 3套茶壺, 3隻碟, 3 Sets 餐具?!!

職員聽完, 就話只可以轉坐門口側邊嘅小方枱, d Sofa 長枱係比多人嘅客... 查實張小方枱都唔大得好多, 無奈接受~

後來... 居然有1家3口嘅外國人, 都有得坐Sofa 長枱, 佢地只係幫襯2份High Tea, 點計都係我地付出多d錢啦, 居然要我地做擠迫戶, 對我地好唔公平囉!!!

之後... 居然有1同胞, 都坐Sofa 長枱, 只係飲1杯橙汁!!!

再之後... 有4位本地客人都係坐Sofa 長枱, 但係佢地都只係幫襯2份High Tea, 因為有1個係外傭, 1個係幼童... 睇到佢地張枱鬆動到離奇, 覺得佢地真係嘆緊High Tea, 再望吓自己張枱... 阿職員, 咁算點先?!! 好嬲呀!!!

(右) Traditional Afternoon Tea 傳統下午茶 (HK$428 for 2)
(左) Chocolate and Berry Afternoon Tea 朱古力配香莓下午茶 (HK$238 for 1)

我地Order咗2份傳統下午茶, 同埋1份朱古力配香莓下午茶... 食物送上枱時, 一片混亂!!!

職員明知唔夠位, 夾硬放低2個架, 結果插咗落我地d碟度, 居然仲用架腳推開我地d碟, 唔係用手嘅喎!!! 我覺得自己被2座山圍起, 完全望唔到我嘅朋友, 點傾計呀?!! 係完全冇考慮到我地嘅感受!!! 而且食高級嘅下午茶, 餐具擺位理應好講究, 職員夾硬將朋友d餐具推晒埋去枱角一堆, 朋友們都迫側晒身坐埋去枱角度碟貼碟咁食, 同去繁忙時間嘅茶餐廳完全冇分別!!!

其實張枱細就係緊嘅, 咁人係生o架嘛, 你可唔可以用吓個腦, 擺得好少少呢?!! 有冇玩過俄羅斯方塊呀?!! 如果移一移d位, 將2個High Tea架放晒係右邊冇人坐果邊, 將我d餐具放係左手邊, 成件事會好好多囉!!! d職員果隻夾硬係, 夾硬到一放低即走, 我地係迫到, 郁一郁d餐具就迫到跌咗落地, 未試過食High Tea食得咁唔High囉!!!


唉...

環境就真係Wonderful嘅... 落地玻璃外面係翠綠嘅公園, 仲有棵百年嘅老榕樹, 係如此靚景之下嘆下午茶原本係人生一大樂事...


2012年7月5日 星期四

千両 Sen-ryo (II)

29 June 2012, Friday

星期五晚去食千両一定要早, 否則... 就好似今日咁, 遲咗少少去, 都要等100分鐘...

好耐冇去千両啦, 今次再去, 一睇... 咦... 先進咗喎!!! 有部Kiosk放係門口, 輕輕按吓個畫面, 就有飛出!!! 仲可以入埋電話號碼, 到咁上下時間就有人Call你返轉頭, 可以安心去行街街... 仲Show埋而家叫到幾多號派到幾多號, 唔使個職員答到口都乾...


2012年7月4日 星期三

牛陣 GyuJin

28 June 2012, Thursday

平時去太子, 多數都係食「和民」, 朋友今次提議食「和民」隔離間「牛陣」, 話唔使排隊, 又平d...

牛肉Shabu Shabu午市套餐+野菜放題只係48蚊起, 限時60分鐘, 好抵食咁喎...

選好牛肉同湯底, 就可以去自助區拎食物... 醬汁都係自行調配... 不過冇晒豉油, 搵職員Refill都攪咗好耐...

任食配料選擇不多, 但係絕對可以食得好飽...



蔬菜選擇不少, 比起多肉少菜嘅午餐, 呢度可以食得好健康...

我的混醬... 落得太多辣椒, 唔小心喘緊, 咳到我死死下, 飲晒d茶超過半小時, d店員都唔Refill...

牛肉質數差強人意, 一放入火鍋內, 即刻縮起到好似起雞皮咁, 形狀好奇怪, 見到都唔開胃...

Dreyer's雪糕任食, 到我出去拎時, 已經冇晒芒果味...


Dreyer's咖啡味雪糕, 綠茶味雪糕, 芝麻味雪糕... 如果60分鐘集中火力食雪糕, 肯定回本~

食物質數一般, 但係價錢絕對超值, 首先一定食得飽先啦, 第二可以食好多蔬菜夠晒健康, 第三可以狂食Dreyer's雪糕乜都抵返晒~ 以今時今日樣樣都貴嘅情況下, 想平平地又食得飽嘅, 都唔敢有太多要求~

是次每人消費約$55元
味道: 2 環境: 2 服務: 2 衛生: 2 抵食: 5
###
地址 : 太子彌敦道750號始創中心地庫
電話 : 2625 9234

2012年7月3日 星期二

西歐「文藝復興」2012の艾菲爾鐵塔的日與夜, 巴黎, 法國 (Eiffel Tower, Paris, France)

1 May 2012, Tuesday
 

9oC - 19oC, Cloudy

~ 巴黎鐵塔小檔案 ~

艾菲爾鐵塔由橋樑工程師居斯塔夫·艾菲爾設計,從1887年1月26日起建,於1889年4月25日建成, 總高324米,分為三樓,分別在離地面57.6米、115.7米和276.1米處,為巴黎最高的建築物。

其中一、二樓設有餐廳,第三樓建有觀景台,從塔座到塔頂共有1711級階梯,共用去鋼鐵7000噸,12000個金屬部件,250萬隻鉚釘,極為壯觀。

遊客可以選擇徒步登塔上第一層和第二層,又或者坐升降機上第一層和第二層及最頂尖。


玩完塞納河船河, 就殺過去艾菲爾鐵塔!!!


2012年6月29日 星期五

螳螳強勢回歸

23 June 2012, Saturday
舊年9月尾颱風「納沙」來襲, 螳螳係我地個窗台外面玩咗幾粒鐘都唔肯走...

今晚唔知係咪吽緊雨, 螳螳又o黎喇!!! 仲大隻咗好多呀!!! 伸直手腳有成15cm咁長, 好驚呀!!! 撞到我塊玻璃窗啪啪聲, 搞咗好耐都唔肯走, 仲一度走入我個蚊網度, 搞到我閂唔到窗... 後尾佢一離開咗個蚊網, 我地即刻9秒9閂窗...

佢由1am玩到我2am都唔走, 我頂佢唔順喇, 我要瞓喇!!!