網頁清單

2012年1月5日 星期四

超乎「想像」魔幻騷 Incredible Canadian illusions that boggle your mind

29 December 2011, Thursday

太古城今年聖誕節請咗個來自加拿大嘅斐聲國際魔術手嚟表演, 放工第一時間去睇吓先...

未夠鐘D人已經霸晒好位, 我唯有企係D睇得唔係太清楚嘅位觀賞...

開始啦...

一嚟就放吓火先...

跟住請咗2個細蚊仔上枱一齊表演...


當然唔少得美女啦...


再加多一個小妹妹...


WoW... 好利害呀...


最後出埋鎖鏈...


觀眾當然拍爛手掌啦!!!

### 超乎「想像」魔幻騷 小檔案 ###

日期: 12月28日至30日
時間: 下午1時30分 / 下午3時30分 /  晚上6時30分
地點: 2樓舞台

網址:
http://www.cityplaza.com.hk/chi/hot_promotions/coming_attraction_items/8.htm

2012年1月4日 星期三

行山遇松鼠


27 December 2011, Tuesday
聖誕幾日假期, 連環食咗太多Junk Food, 係時候要消耗吓D熱量啦...

今日個天好清好藍, 咁難得, 真係要望多幾眼...


上山上到一半, 竟然有隻松鼠9秒9由右邊山坡衝咗去左邊山坡, 都未拎得切相機影低佢就已經消失咗... 雖然影唔到, 但係都好開心, 因為對上一次見到松鼠已經係幾年前喇, 好掛住佢地呀...

嗱, 就係行到呢個位見到嘅!!! 你地下次路過記得留意吓有冇松鼠出沒啦...

2012年1月3日 星期二

粵 Yue

26 December 2011, Monday

聖誕長假第三日, 瞓醒一擘大眼, 就係唸去邊度搵食!!!

Honey近日留意到北角城巿花園酒店入面間中菜廳「粵」, 啱啱拎到「2012米芝蓮一星」, 好想去試吓... 由於已經11點幾, 硬係覺得應該會比人Book晒, 冇理由仲有位剩... Honey話都打個電話去試吓啦... 哦... 居然仲Book到位, 唔係咁少人去食呀嘛?!! 事不宜遲, 即刻打的的落去開餐先~

係Honey嘅印象中, 呢間酒店入面嘅中菜廳好殘舊... 點知... 去到原來已經翻新晒, 都OK靚, 似番間酒店!!! 入口度有一排卡位, 好古典, 我好想坐呀)))

我地半個鐘前先訂枱, 有位食已經好好, 所以坐貴賓廳門口嘅路邊位都唔係太介意... 一坐低除咗件外套, 服務員即時拎個衣套幫我地套好, 呢D咪就係酒店級嘅Service囉...


枱面碟小吃唔係用D普通嘅花生, 而係XO醬肉丁, 好得呀, 好好味呀~ 不過壺龍井就冇咩茶味啦...

我地入咗單就影吓相, 上吓網, 飲吓茶, 不經不覺都30分鐘, 隔離枱遲過我地o黎都有得食喇, 搵部長睇睇先... 部長睇咗好耐, 又摷機又摷單, 之後好唔好意思咁埋o黎同我地講, 搵唔到我地張點心紙, 叫我地再掦過... 好彩呢幾日都食滯咗, 唔肚餓, 同埋o黎得酒店食都要Hea耐D先覺得抵, 所以冇勞氣到, 掦過一張, 好快就有得食...

焗叉燒菠蘿包 (廚師推介) --個皮好酥脆, 有D似合桃酥, 入面嘅叉燒餡就少咗D, 都OK~


咖哩魷魚 (廚師推介) -- 大大片新鮮土魷, 咖哩汁點到即止, 冇坊間嘅咁杰撻撻, 都OK~


柚子脆蝦球 (廚師推介) -- 蝦球炸得好乾身, 個皮又薄又脆, 仲一D都唔油淋淋, 最最最正嘅係個柚子汁, 酸酸甜甜, 冇唸過蝦球配柚子汁係可以咁好味o架!!! 可以話係我食過最好味嘅蝦球!!! 招牌菜果然名不虛傳!!! 我比十個讚!!!


師傅炒香苗 (廚師推介) -- XO醬炒飯配埋叉燒、蛋、蝦肉、芥蘭、葱粒, 仲加埋豆豉o黎炒, 味道比剩係用XO醬香好多冶味好多, D飯濕濕地都幾易入口, 呢個炒飯真係好正... 一句講晒, 好好味!!! 拉姑誠意推介!!!

 

亮點 -- 2011年美食之最大賞點心組金獎, 包括筍尖鮮蝦餃皇、海皇芝心芋角、奶皇金雞酥!!! 賣相真係一流, 頂呱呱!!! 小朋友見到一定開心到飛起... 味道啦喎...

(左) 奶皇金雞酥 -- 外表真係誇啦啦!!! 用白朱古力做嘅雞籠唯妙唯肖, 奶味香濃, 有D唔捨得食... 紅色同橙色部分係糖, Oh... 奶皇酥就一般過一般, 如果冇帶女朋友或細路去, 可以不試....
(中) 筍尖鮮蝦餃皇 -- 水準中規中矩嘅蝦餃一隻...
(右) 海皇芝心芋角 -- 有驚喜!!! 芋角放係炸花同埋米通上面, 旁邊灑D炸脆咗嘅葉, 剩係賣相已經嬴晒!!! 芋泥好粉, 炸皮好薄好鬆化, 入面包住芝士粒粒, 一咬落去D芝士好似拉麵咁拉長, 好搞o野... 除咗芝士粒粒, 仲有蝦乾同肉丁, 好好味... 建議大家可以單獨Order呢味芋角...



NICI小企鵝係聖誕老人送比我呢個大唔透嘅大朋友o架, 好開心呀!!!


酒店仲安排咗聖誕老人同聖誕妹妹派禮物比在場嘅小朋友, 好貼心, 讚!!!


餐廳入口仲有棵聖誕樹, 有D手作嘅藝術品比大家投票, 投咗票有機會被抽中, 幸運兒會收到酒店送出嘅禮物...


酒店方面嘅Marketing好多花招, 顧客即時上Facebook Check-in的話, 每位顧客嘅Check-in可以減10蚊, 不過特別日子不適用...

值得一提嘅係, 佢個Toilet除咗乾淨濶落之外, 仲點埋香芬精油添呀, 好Grand呀!!!

服務又好, 環境又舒適, 食物都唔錯, 我地又多一個飲茶嘅好去處啦!!!

是次每人消費約$150元
味道: 5 環境: 4 服務: 5 衛生: 5 抵食: 3
###
地址 : 北角城市花園道9號城市花園酒店1樓
電話 : 2806 4918

2011年12月30日 星期五

數碼港聖誕嘉年華 Cyberport Christmas Funland 2011

24 December 2011, Saturday


去「南坊」嘆完世界, 就係數碼港四圍逛吓...

到處都係呢隻Rody嘅Poster... 橫掂冇咩做, 就跟佢指示嘅方向去睇睇「數碼港聖誕嘉年華」有咩玩...


行到去露天嘅數碼廣場... 一睇... 嘩... 好大型咁喎...


嘩... 好好玩咁喎... 我都好想玩埋一份呀...


入到數碼港商場內嘅全天候廣場, 嘩... 呢D彈彈馬仔好得意呀, 我都好想玩呀...


好Cool嘅聖誕樹... 我鐘意...


行埋海濱長廊, 就去Starbucks嘆番個下午茶...

渡過咗一個平安嘅下午... 係時間坐車返屋企買餸煮返個愛心平安晚餐啦啦啦...

### 數碼港聖誕嘉年華2011 小檔案 ###

日期:  23/12/2011 至 02/01/2012
時間:  11:00 - 19:00
內容:  今年聖誕12月23日至1月2日,數碼港商場請來受小朋友喜愛的人氣充氣玩意RODY洛迪小馬,與市民一同玩轉「數碼港聖誕嘉年華2011」﹗場內特設多項好玩得意的遊戲、娛樂及親子活動,包括全港獨有超巨型戶外充氣彈跳樂園、刺激好玩有獎攤位遊戲、得意可愛動物農莊,還有由十多位本地設計達人齊齊打造的RODY百變造型展覽和多個音樂及雜技表演等精彩節目,讓一家大細跳跳扎歡度「蹦FUN」聖誕及元旦佳節!
網址: 
http://arcade.cyberport.hk/events/

 


2011年12月29日 星期四

南坊 Nam Fong (II)

24 December 2011, Saturday

聖誕長假第一日, 去邊度食Lunch先可以唔使同人迫呢??? 又冇預先Book位, 應該週圍都冇晒位o架啦噃...

Honey話「有, 我唸到!!! 數碼港!!!」... 好, 打去問吓仲有冇位先... 嘩... 居然仲有位喎, 不過所有Discount今日都不適用, 唔緊要啦, 佳節當前, LaLa聲坐車入去先!!!  

12:30PM未夠去到「南坊」, 居然一枱客都未有, 感覺有如包場, 好爽呀!!! 個廳3面都係落地玻璃, 坐邊個角度都可以一邊食一邊欣賞海景, 我最鐘意佢有D似Green House嘅感覺, 可以享受吓陽光嘅溫暖... 




好鐘意佢入口果幾個雀籠嘅裝飾, 好古色古香...


茶芥--花生銀魚仔不是太吸引, 可能係因為隻牙扭緊計嘅關係啦... 不過杯龍井超正, 好有茶味, 比自家泡嘅更香更濃, I Love It~


黑松露蟹肉餃--片黑松露係好大片, 不過冇Gas爐味喎... 除咗金菇之外, 食唔出有蟹味, 但係Honey話有少少腥...


臘味炒腸粉--好好好味呀!!! 比起平時食慣嘅XO炒腸粉更好味, 因為有D茶樓會炒到好辣但冇味... 而呢個臘味炒腸粉一D辣味都冇, 但係就有好香好濃郁嘅臘味味, 滋味無窮, 食多10碟都冇問題~

 

鮑片糯米雞--嘩... 細隻到... 味道還可以...

栗茸焗西米布甸--好味!!! 栗茸唔太甜, 西米布甸甜度適中, 係香港27年o黎最寒冷嘅聖誕節食呢一個甜品, 簡直暖到入心...


D食物咁的骰, 真係好難填得飽我個"餓底"胃... 之但係... 今日所有Discount都唔用得, 再叫多幾個點心食都好貴吓啫... 一於係度Hea多陣, 嘆飽佢嘅一流環境同Service先, 出去海邊散一陣步, 再搵地方嘆埋個下午茶先番屋企...

是次每人消費約$160元
味道: 4 環境: 5 服務: 5 衛生: 4 抵食: 3
###
地址 : 薄扶林數碼港路100號數碼港艾美酒店3樓
電話 : 2980 7410


2011年12月28日 星期三

雅敍一堂 Lis Kitchen (V)

23 December 2011, Friday

聖誕長假開始, 又有得日食夜食啦... Yo!!!

我同Honey近年每逄聖誕節都會避開D專做聖誕大餐嘅餐廳, 因為多數都係又貴又迫又趕又唔好味... 

近期我地經常去「雅敍一堂」, 貪佢有啖住家湯水飲吓, 又冇西苑咁貴咁Heavy... 每次幫襯後仲送1張Coupon, 儲齊4張就送半隻古法太后雞, 都幾抵o架~ 寒冷天氣警告生效緊, 食羊腩煲就最一流!!!



茶芥--最愛佢嘅蜜餞合桃, 甜甜脆脆, 好味又補腦, 讚!!!


住家老火湯--晚晚不同, 足料味美, 1煲都有6碗以上o架, 啱晒我地呢D無飯夫妻~


古法太后雞(半隻)--豉油雞係玫瑰花芯點綴下, 頓時散發高貴嘅氣質, 搖身一變成為太后雞!!! 雞肉嫩滑彈牙, 調味適中, 唔太鹹唔太淡, 啱啱好... 送嘅贈品都咁足料咁好味, 真係抵讚!!!


古法雙冬羊腩煲(加菜)--個煲好似唔係好大, 但係入面好足料, 唔會比個大煲你再加大堆骨... 羊腩炆得好淋, 唔係太重羊味, 完全唔"蘇", 冬菇都好大舊, 馬碲同腐竹都好多, 生菜都好新鮮...

今晚呢餐Pre-Christmas Dinner真係『大滿足』~

是次每人消費約$150元
味道: 3 環境: 3 服務: 3 衛生: 3 抵食: 4
###
地址 : 太古太古城衛星閣地下1008-1009號舖
電話 : 2967 0777


2011年12月25日 星期日

海逸軒 Hoi Yat Heen (II)

21 December 2011, Wednesday

聽日就「冬至」啦, 時間真係過得好快, 咁又一年喇!!! 同事們今日預早一日一齊食返餐, 去咗半年前食過一次嘅「海逸軒」做冬!!!

半年後再食, 今次D櫈加番金色櫈套啦, D酒店味出番晒出o黎, 即時High Class翻晒, 哈哈哈~

同埋今次D服務好過上次好多, 回復酒店級基本水平, 食得開心又稱心~


天寒地凍, 齋食點心點夠飽喎... 好想食煲仔飯... 餐牌話"需時約30分鐘", LaLa聲Order咗先... 不過落單時經理話"今日忙D, 要45分鐘先得"... 查實都有少少驚會好似果日西港城咁o架, 不過真係好想食, 所以最後都Order咗... 結果... 真係45分鐘準時拎出o黎, 抵讚!!!



揀點心時, 同事話一樣價錢, 緊係Order D特別D嘅o野啦... 最後... 我地Order埋D帶子呀, 鮑貝呀, 鵝肝呀, 黑松露呀咁... 嘩嘩嘩... 好豪呀!!!

翡翠帶子豆苗餃--上一次試過覺得幾好味, 今次又再Order, 叫做有D菜食吓嘛... D豆苗好清淡, Good!!! 不過鯨吞咗之後先醒起, 唔記得咗嗒真個帶子呀!!! 帶子呀帶子, 你係咪真係落咗我個肚o架?!!




蟹籽鮑貝燒賣--寫BLOG先見到上次都有食... D鮑貝好明顯, 可以用肉眼見到, 不過冇咩味... 粒燒賣依然結結實實, 穩打穩紮, 可以一試...

鵝肝白玉炸茄子--上枱勁熱, 茄子夾住鵝肝同豆腐炸, 好特別!!! 今次我地好小心咁細細啖食, 以免唔小心一啖就吞咗D鵝肝, 哈哈哈... 食到一半, 終於見到粒鵝肝啦!!! 粒鵝肝都有2cm x 2cm咁大, 算足料, 淡淡嘅鵝味, 唔係太油, 不錯嘅做節之選!!!



香煎松露鮮肉餃--個皮煎到好似咸水角咁, 個餡都幾油, 我地好小心咁食都只係見到D 2-3mm嘅疑似黑松露碎片, 松露味欠奉!!!


馬拉盞蝦乾煲仔飯--估唔到全餐最好味係呢一味!!! 蝦乾係大大隻結結實實, 同事仲讚佢隻蝦乾好有誠意!!! 味道都好好味, 濃濃嘅蝦醬味, 鋪滿飯面嘅梅菜豬肉, Yum Yum!!! 落單時經理話有3碗, 我覺得佢有6-8碗囉, 幾抵食!!! 食到尾開始見到D飯焦, 大大片好脆口, 同事食咗成碗... 拉姑誠意推介!!!

食飽飽, 繼續努力, 期待下一餐大餐!!!

是次每人消費約$130元
味道: 3 環境: 4 服務: 4 衛生: 4 抵食: 3
###
地址 : 北角英皇道665號北角海逸酒店3樓
電話 : 2185 2788


2011年12月22日 星期四

大舞臺飯店 The Grand Stage (II)



18 December 2011, Sunday


舊年食過一次位於西港城嘅「大舞臺飯店 (The Grand Stage)」, 食物美味, 環境優美, 留低咗嘅美好嘅印象...

今日同Honey重回舊地, 對今日發生嘅一點一滴, 實在難以忘懷!!!

由於已經接近2點, 所以唔使等位, 直入...
 
開咗壺龍井, 好好飲, 好濃郁嘅茶味...

1:55PM 已經畫好點心紙, 交咗比服務員A... 

未有o野食, 用iPhone 4S影吓相先...


等食期間, 隔離枱位小朋友不停係枱與枱之間遊走, 好唔耐煩咁話「唉... 45分鐘都埋唔到張單... 做咩o架?!!」... 當時都GET唔到佢講咩...

過咗20分鐘, 仲未有得食, 開始搵服務員A睇睇... 服務員A堅持有入單, 叫我等一陣就有得食...

再過10分鐘, 搵服務員B睇睇, 佢用D唔鹹唔淡嘅廣東話好HILL咁同我講「今日部電腦壞咗, 落單後要半個鐘先有得食, 冇人同你講咩(咩字高8度)???」... (聽完氣頂到不得了)

再過10分鐘, 搵服務員C睇睇, 佢都係象徵式走入廚房走番出o黎, 都係果句「等一陣就有得食」...

再過10分鐘, 搵服務員D睇睇, 佢都係象徵式走入廚房走番出o黎, 連交帶一聲都冇, 就永遠遠離我地張枱... 其他服務員都係一樣, 遊到有咁遠得咁遠... 連附近D枱走咗半粒鐘都唔封枱...

再過5分鐘, 服務員E自己遊埋o黎, 問我想要D咩...

我真係火起喇!!!
 
我餓到暈吓暈吓, 冇力叉腰拍枱, 冇力大大聲講o野, 只可以好虛弱咁丙佢「我想食o野囉!!! 我坐咗係度1個鐘, 1碟o野都未o黎過!!! 我嘅容忍已經到咗極限!!! 如果你5分鐘內拎唔到D食物出o黎, 我即走!!!」...

服務員E急步步入廚房, 跟手唔夠3分鐘, 所有點心一擁而上!!!

豈有此理!!! 我同Honey講, 點解D人咁衰, 係要人發火先肯認真D, 好聲好氣就當你死嘅, 搞到人想高貴D都唔得!!!

係呢D點心拎出o黎之前, 只係見到服務員不停埋單, 廚房一碟食物都冇拎過出o黎...

梅頭叉燒腸--好味o架係, 可惜一肚火, 真係好難用好Enjoy嘅態度去食... Honey話個廚房成粒鐘都冇o野做, 大把時間比佢慢慢整得好味...


瑤柱菜苗餃--又係好食!!! 睇相都睇到D皮有幾薄, D菜苗有幾脆綠... 可惜... 都係氣頂...


古法馬拉糕--又係好食!!! 上枱時服務員將佢HIGH咗落D唔知咩度, 嘩!!! 好唔合衛生啫!!! 佢當冇件事, 我已經虛弱到講多句都冇力, 唯有MET走果PART, LALA聲食完LALA聲走...


金瓜芋絲夾--又係好食, 等咗成個鐘都覺得佢好食, 問你服未?!! 不過可能係因為我地餓過龍, 擺咩入口都覺得好食!!!


極速食完即閃!!! 留多一陣都火滾!!!

而家D人, 冇咗電腦就唔識做o野嘅啦咩?!! 我地入座後, 再入座嘅都唔夠3 PAIR人, 就算要你拎番我地張點心紙出o黎, 重新用白紙寫4個點心嘅名拎入廚房, 都唔係好難啫吓話!!!

冇咗電腦, 當你冇埋計數機, 小學生都識加減數啦, 你用紙筆去計, 都唔使45分鐘都埋唔到單吓話!!!

對住呢D咁高質數嘅香梘人, 只有... 無言!!!

是次每人消費約$90元
味道: 4  環境: 4 服務: 1 衛生: 3 抵食: 2
###
地址 : 上環德輔道中323號西港城2樓
電話 : 2815 2311