網頁清單

2009年10月26日 星期一

大盛日本料理 Otanri Japanese restaurant

16 October 2009, Friday


十月都仲有得食霸王餐? 有咩咁出奇!!! 因為王者永遠都鐘意改期N次, 最高峰果次, 好似改咗14次... 幾日前可能會落雨又唔出, 幾日前天氣可能會凍小小又唔出, 有電視劇睇又唔出, 星期六日又唔出, 冇心情又唔出... 如果佢有一次唔改期, 咁就真係唔正常...


今次呢間食府並唔係我揀嘅, 而係王者之前同朋友食過, 話覺得幾好食, 所以帶我去試下... 因為約咗之前係觀塘返工嘅王者係地鐵站等, 而我近日又忙於耕種, 所以我冇上網check點行去... 結果... 佢竟然帶我遊花園!!!


總共行咗2條天橋, 仲要穿過鬼咁多人嘅巴士站ssssss... 我真係覺得行得好辛苦, 對皮鞋又整到對腳好痛, 空氣又污濁, 仲要唔知佢仲要遊幾耐花園... 問多佢2句, 仲話我"吉頭吉世", 真係激死我!!!



入到間餐廳仲谷氣... 全間鋪得幾枱人, 全部都係2個人坐4人枱, 職員偏偏帶我地去最角落頭嘅2人枱, 又暗又迫, 感覺好Dirty!!! 同職員講要換枱, 佢話冇得換, 但係當時有超過40-50張枱係未有人坐嘅!!! 仲要之後個職員經常企咗係隔離枱, 連緊有嘅光線都比佢遮埋, 天狗食日咁... 上多2碟o野都冇晒位, D職員都唔理得你咁多, 連本應可以放低碗筷嘅位都比佢地擺埋食物...


什錦刺身(松)(6款)--三文魚感覺好奇怪, 同平時食開嘅唔一樣... 吞拿魚除咗冰凍之前, 就食唔到有咩味... 唔知咩貝類海產, 食咗一啖都唔敢再食... 白色嘅唔知咩魚, 口感極劣... 魷魚切絲, 幾爽脆... 甜蝦都唔知點比Comment...


炸軟殼蟹卷(4件)--我鐘意食元氣嘅軟殼蟹手卷多D...
燒銀雪魚(2件)--嘩!!! 大開眼界!!! 片魚竟然可以切到咁薄, 煎完之後, 2面脆, 中間冇晒肉...


鰻魚壽司--唔會要Encore!!!


三文魚壽司--我冇食, No Comment!!!


王者有VIP咭, 有9折!!!


王者, 多謝你請我食飯!!! 等你12月生日, 我地再出o黎搵食啦!!!


是次每人消費約$108元
味道: 2 環境: 2 服務:1 衛生: 2 抵食: 2
###
地址 : 觀塘觀塘道404號時運工業大廈A,B,C舖
電話 : 2264-6111


2009年10月10日 星期六

韓松韓國料理 Hansong Korean Restaurant

6 October 2009, Tuesday


轉眼又到十月之星叙餐!!! 龍爸問龍媽"又食???"... 哈哈哈... 唔止佢有咁嘅疑問, 其他成員同我都有同感...


跟住地圖行到o黎, 先發現係"九州市場"以前的位置... 十年前我地都係坐房, 仲係呢度宣佈人生大事... 估唔到全部人都記得...



席間無敵話我冇交功課(9月之星日式放題 銀座藏人), 其實係佢冇上堂至真呀, 人地一早趕起咗份稿啦...



何超Book咗房, 一閂埋度門, 出面真係咩都聽唔到, 私穩度極高... 房內仲有空氣清新機, 抵讚!!!



每人一碟牛肉汁, 蔥花, 伴肉吃感覺冇咁油膩... 麥茶仲可以要凍嘅, 服務一流...



前菜碟碟都唔錯, 右下角果碟仲從未食過, 估計係牛蒡... 我地9個人比咗18碟, 份量都算足...



每次"睇餐牌環節"通常都搞半粒鐘以上... 攪咗好耐, 臨落Order前先隊個套餐餐牌比我地... 佢個6-8人套餐基本上有齊我地想叫嘅o野, 追加200g牛胸骨肉, 再加海鮮手切麵, 另外餐廳又送2客石鍋蒸雞蛋... 睇落都好夠食...


(餐)石板泡菜五花腩(厚)--原先驚好肥, 但係燒完D油流走咗, 一D都唔肥, 仲幾正添喎...
(餐)醃豬肉--卷得好靚, 燒完又係唔多油, 包住D洋蔥一齊食都唔錯...



(餐)王牛排--好甜美, 不過何超嫌太熟好UN, 比埋我食... 哈哈... 益咗我...
(餐)醃雞肉--我食完都唔知自己食過雞肉, 返o黎寫BLOG先知... 哈哈...



石板係斜嘅, 將D肉放係高果邊, 矮果邊就放泡菜, D泡菜吸收晒五花腩流出o黎D肉汁... 同埋D肉流出o黎D油都會由上而下咁流走, 唔使攪到D肉油淋淋咁, 即刻覺得健康好多...


(餐)西冷牛排--切到一小塊咁, 入口Size啱啱好, 感覺食極都仲有咁...



全程有韓國小生幫我地燒, 唔使自己落手落腳, 有好有唔好啦...
好嘅就係佢會燒得剛剛好, 唔會燶, 舒舒服服有得食, 又唔會整到D衫一陣味...
唔好嘅就係冇咗果種燒烤嘅氣氛囉, 就連邊一碟係"追加200g牛胸骨肉"我都攪唔清楚...


(餐)海鮮蔥花餅--份量十足, 味道都OK, 同埋唔會成口粉咁...



(餐)韓式辣年糕--嘩))) 好辣呀))) 但係食落又好彈牙, 越食越想食...



(餐)韓式炒粉絲(豬)--呢個味道唔錯, 開頭仲個個都話要加多一客, 後尾大家都飽到唔郁得, 所以先冇再加...



(餐)香菇牛肉火鍋(L)--D牛肉去晒我個碗度, 搞到暈妮投訴話"牛肉鍋冇牛肉嘅"... 哈哈... 唔關我事o架, 唔係我分o架... 同埋太多菇係我果碗, 搞到我好浪費...



(餐)燜牛肋骨--牛肋骨好淋好入味, 蘿蔔仲好味...
(加)海鮮手切麵--呢個冇機會品嚐, 因為Miss Chan Chan抱病出席, 需要食D清淡D嘅食物...



(送)韓式石鍋蒸雞蛋--呢個麻麻地, 又唔似我地中式蒸蛋咁滑溜, 口感似鬆糕...



席間大家不停提及對上一次韓國燒烤嘅不愉快經歷

, 但係又UP唔出間野叫咩名, 所以我就翻查一下紀錄, 比條Link大家重溫下... ( 韓國錦城飯店)
原來對上一次又係暈妮話要食韓燒, 終於發現佢嘅至愛啦 ... 有寫BLOG真方便, 冇寫BLOG就一定唔記得晒LU...


我個人認為, 呢間韓松絕對食得過!!! 價錢唔貴, 食物份量足, 味道又OK, 服務相比好多韓國餐廳算好好, 環境都好舒適!!! 我都要帶Honey o黎試下先...


另外要多謝DD去日本旅遊嘅手信"木筷子", 同埋佢細心挑選嘅當地美食(1盒9塊餅)... 口感似曲奇... 享用時腦海裡面諗起Cookies(9餅女), 不過唔敢講出o黎, 希望我地唔使拆伙變餅碎啦, 哈哈哈哈...


是次每人消費約$178元
味道: 4 環境: 4 服務:4 衛生: 4 抵食: 4
###
地址 : 尖沙咀柯士甸道144號祥景樓地舖B-C及1樓A-B室
電話 : 2736 8670


2009年10月8日 星期四

金不換泰國餐廳 Sweet Basil Thai Cuisine (II)

5 October 2009, Monday


剛食完冇耐嘅金不換又食?!! 皆因見佢幾好味, 環境舒適價錢又唔貴, 就同力仔o黎呢度慶生啦!!! 仲可以邊食邊睇"幻彩FING啷啷", 哈哈...


西柚沙律--今次嘅西柚肉好似乾咗小小...


燒鱔--上次走漏眼, 原來超好食, 肥大肉厚, 味道又好...


咖哩羊--呢個甜甜地嘅咖哩配蒜蓉包一流, 可惜羊肉得好小好小, 仲肥糕多多, 早知叫第2樣肉...


南瓜布甸(凍)--口感唔似布甸, 味道似椰汁糕, 有D失望...
芒果糯米飯(凍)--一人份已經有齊紫米同糯米, Good!!!


多謝力仔嘅生日禮物同賀卡!!!


我地例牌又係傾到人地收工先捨得走, 哈哈哈, 到底邊得o黎咁多o野傾架!!!


是次每人消費約$190元
味道: 4 環境: 4 服務:3 衛生: 4 抵食: 4


一年容易又中秋, 今年追月復南丫

3 October 2009, Saturday


上星期六要做節, 所以都冇咩節目可言, 唯一嘅節目係返到屋企樓下影下月光...


4 October 2009, Sunday


第二日約咗Honey嘅朋友遊船河追月!!! 5點係銅鑼灣避風塘碼頭上船, 太陽落山, 清風送爽, 好舒服呀...


哈哈... 一上船第一時間"曬冷"!!!


途經早2年鬧得熱烘烘嘅西環泳棚... 坦白講, 我覺得好危險, 水流咁急, 又多船駛過!!!


日落西山... 鹹蛋黃呀!!!


候鳥遷徙... 真係V字型o架喎!!!


原來2年前追月都係去南丫島食海鮮, 如果冇寫BLOG就一定唔記得... (南丫島--海上追月記 http://hk.myblog.yahoo.com/ken-merry/article?mid=953 )


蒜蓉粉絲蒸蟶子--呢個好好味, 哈哈, 因為夠熟 (平時D炒蟶子入口滑潺潺好可怕), 粉絲都好入味...


蒸鮑魚--都好味, 不過有幾隻青BB咁嘅色, 好嚇人, 唔通未洗?


椒鹽鮮魷--都好香口...


花雕蛋白蒸蟹--呢個比較失色, D蛋白都唔係鋪係底嘅, 仲要D蟹殼有D黑色都幾嚇人...


椒鹽賴尿蝦--OK啦, 啖啖肉...


. 灼白菜仔--一般啦, 油咗小小...
. 豉油皇炒麵--一般啦...
. 炸魚蛋--老闆娘"嘉欣"送嘅, 都幾彈牙...
. 自備白酒, 氣酒...
. 敬送果盤--麻麻地...


食飽飯欣賞一下南丫島嘅月色, 然後即走, 拿拿聲上船嘆冷氣... 再嘆自備嘅日本鳥取水晶梨同月餅... 好飽呀, 由頭食到尾!!!


80呎船得6個Guests, 勁舒適... 多謝Honey友人嘅邀請!!!


是次每人消費約$200元
味道: 3 環境: 1 服務: 3 衛生: 1 抵食: 2
###
泰苑魚翅海鮮酒家 Tai Yuen Restaurant
地址 : 南丫島索罟灣第一街15號地下
電話 : 2982-8386/2982-8391


2009年10月1日 星期四

福臨門 Fook Lam Moon

27 September 2009, Sunday


期待已久嘅一餐, 上網做足資料搜集, 未睇menu已經有晒心水... 叉燒包, 蝦餃, 雞札, 百花脆皮腸, 鮑汁荷葉飯... 但係合我地二人之力, 又點可能食到咁多樣吖... 唯有放棄雞札...



蝦餃--果然如網民所言, 好好味, 皮薄餡靚, 絕對食得過...


叉燒包--都好好味, 但係就冇"頂尖級"嘅感覺...


百花脆皮腸--呢個腸粉真係一流, 用腸粉包住腐皮再包住蝦膠, 3重口感!!! 最驚喜係條菜, 竟然又甜又冇渣又軟硬適中, 果然一絲不苟!!!


鮑汁荷葉飯--侍應好好人, 問係咪要影相, 仲建議我地未開荷葉前影一張, 開咗又影一張, 仲自動波幫我地擺好晒靚位影相...


飯粒炒到好入味, 又夠乾身, 食得出師傅嘅功力... 半包都有6-8碗, 真係飽到上心口!!!


原來匯豐卓越理財信用卡同東亞白金卡都有9折, Oh No!!!!!! 無帶東亞白金卡添!!!


服務冇得彈, 車都未停定, 已經有人埋o黎開車門... 知客係帶埋你入Lift, 按埋制, 去到3樓已經有侍應等候... 走果陣經理仲送埋你入Lift... 全程都未按過Lift, "富豪飯堂"美譽並非浪得虛名!!!


食飽飽返到太古, 用咗5分鐘揀咗份禮物, 多謝Honey!!!


是次每人消費約$198元
味道: 5 環境: 4 服務: 5 衛生: 4 抵食: 2
###
地址 : 灣仔莊士敦道35-45號利文樓地下3號舖
電話 : 2866 0663


2009年9月26日 星期六

銀座藏人 Ginza Kurando

23 September 2009, Wednesday


今晚標咗8B月餅會... 呵呵呵呵... 多謝大家!!!


一坐低見到筷子套係百人一朱的, 即時回憶起N年前好鐘意同Honey去新開嘅Hollywood Plaza間百人一朱撐枱腳, 不過已經係好多年前嘅事...


我到達時, 貓兄同DD已經鑽研緊餐牌(寫Number落單), 由於係放題, 所以我地3個先Order 1 Round...


經典位 #1
我地9個人, 佢竟然比張8人枱, 背住牆嘅一邊放5張椅, 椅貼椅, 完全冇隙縫, 都長過張枱半個身位, 試問叫人點坐???


經典位 #2
我地3個坐係最左手邊, D侍應將所有菜上係最右手邊, 試問叫人點夾o黎食??? 就算, 我比D侍應諗住唔想係貓兄同DD中間上菜, 佢都可以係DD身邊上菜吖!!! DD身邊當時都未有人坐!!!
最後要勞動到貓兄逐次叫D侍應將D菜拎過o黎我地呢邊擺... 我懷疑... 因而種下禍根...


~~~ Round 1 ~~~


刺身沙律唔錯, D沙律菜都幾新鮮... 壽司唔係話特別好食, 所以冇Re-Order, 以免浪費個胃嘅空間...


帶子刺身好新鮮, 其他刺身就一般啦, 海螺出奇地細囉... 炙三文魚沙律味道唔錯... 炸蝦好油好硬, 冇再Re-Order...


燒鰻魚都OK啦, 但唔係好肥美果種, 我食咗一半, 竟然冇人肯食埋剩番果一半, 真奇怪...


魚肉豆腐幾好食... 牛膀沙律都幾正, 比我清晒...


牛油焗元貝冇牛油味, 淋GiGi咁, 嗯, 我身為"帶子怪"都唔想再食多一隻... 串燒牛肉好薄好乾, No Good... 前菜茄子冇咩味咁... 卷物我冇掂, 唔知咩環境...


呢個唔知咩沙律同天婦羅蝦我都冇掂...


~~~ Round 2 ~~~


接近8點開始人齊, 好難再影到相... 因為D侍應繼續將所有菜上係最右手邊(即使最右手邊已經堆滿食物, 冇位再攝), 我坐係最左手邊, 一來坐得太遠, 二來未企起身影相已經比人食咗大半碟, 又唔好意思叫停大家, 唯有放棄...


牛柳粒味道都OK, 硬咗少少... 明太子雞翼勁鹹同埋好細隻...


冇上鏡嘅有: -
日本迷你蕃薯天婦羅--都幾特別, 又唔油, 個脆皮仲好薄...
炸芝士薯波--完全冇芝士味可言...
清酒煮蜆--冇清酒味+冇蜆味, 食1粒就夠...
燒鯖魚--味道都OK...
自家制豆腐--同網民所講一樣, 個底係百福... 姊妹們即刻話佢應該標榜"香港自家制"...


每位顧客包一杯汽水, 冇熱飲選擇... 嘩... 點解D忌廉勁苦藥水味嘅...


網民提及有個waiter差d成碟菜倒落佢個身度... 同埋成間餐廳星期日都唔full, 7-8個waiter行行企企都唔識自己收碟, 又唔識主動睇下有冇人落單, 連vip房入面d客都要自己行出o黎幾轉落單...


估唔到... 我地嘅遭遇會同佢一模一樣...


經典位 #3
貌似(高度都似)小學女生的侍應, 竟然係我地埋單後, 收碟時, 倒瀉貓兄杯茶, 成杯淋落貓兄度, 好彩貓兄閃得快, 冇中招...
正常人發生呢D事之後, 應該會提高警戒, 點知... 事件竟然延續到我身上... 個小學女生竟然將Washabi豉油放係一隻碟上面, 再將隻碟放係我隻有骨嘅碟上面, 果碗豉油傾斜40度向住我, 理論上, 佢一收走就冇事, 但係佢竟然將隻碟Chok起又放低, 重複咗十次八次, 我忍唔住問佢"你想點?", 又同其他人講"佢想倒D豉油落我個身度咁囉", 跟住佢先話"對唔住", 仲9秒9收走隻碟, 究竟發生緊咩事??? 大家自己諗諗...


寫Blog時Research資料時回憶起, 其實我去過呢間餐廳嘅中環萬宜大廈分店食晚餐, 印象中果間食物好味好多, 同埋Service都係唔錯... 點解呢間會咁o架???


是次每人消費約$207元
味道: 3 環境: 4 服務:0 零 Zero 衛生: 3 抵食: 2
###
地址 : 灣仔駱克道57-73號香港華美粵海酒店1樓
電話 : 2862 1030