Ken & Merry 為食男女，遊走世界!!!

2007年4月11日星期三

磨坊咖啡室 Coffee Mill

呢個復活節假期真係冇時停，行山、食薑醋、拜山、、、日日都忙個不停，真係好需要享用一個休閒下午茶作Ending，咁啱第四晚一班飯局鐵腳又約我食Tea Buffet，我又點會放過呢個機會呢，今次更難得有“無敵”加入，好不熱鬧！大家用了幾個鐘頭在Internet搜尋，最後選了“磨坊咖啡室”，只因大家都未去過，價錢又相宜，亦都好眼瞓(搜尋至深夜)。

復活節假期最後一日(2007年4月9日)，3點正到達港威酒店，鑽鑽已在lobby大覺瞓，鑽爸見我一到便離開(開工--趕往交易)。未到3:15pm餐廳完全唔比人入去坐，要係外面等，一到3:15pm突然齊晒人，奇！

餐廳不太大，buffet枱不是太少，食物選擇又不是太少，但食物質素就真係“麻麻哋”得好緊要！

雪糕：雖然係movenpick，有綠茶同薄荷朱古力，但完全冇toppings，淨雪糕--奇！

甜品：有wasabi蛋糕，但冇興趣試！雖然唔難食，但冇一樣想再食second round，對於一個甜品狂嚟講--奇！

沙律：只有生菜、芝士碎、麵包粒及一千零一款沙律醬(類似BB醬)，冇千島醬或義大利醋--奇！
另外仲有菓汁、咖啡/茶、什菓涼粉、西式酥餅、生菓、白菓腐竹糖水、中式點心、雞亦、腸仔、諸如此類。

評分：1粒星！若冇乜地方去，又想揾個地方坐下、傾下歇，都無妨，起碼我地五個女人傾到唔知時間呀！不過... 九龍香格里拉有海景... 好似正d喎！

哈... 有時食神都會入錯鋪頭嘅！

食飽飽，KaKaMa閃先(趕回家見她的心肝椗)，我地仲同鑽鑽去反斗城玩咗陣，最後3位姨姨當然唔夠鑽鑽咁好耐力，要自己閃先喇！

###

地址: 尖沙咀廣東道海港道香港馬可孛羅酒店B1
電話: 2113-0888

2007年4月6日星期五

觀松鼠之行

復活節假期嘅第一日(2007年4月5日，清明節)，我同honey見幾清涼(得16度)，雖然天陰陰，但係都去咗行山。

3:30pm先由鰂魚涌街市出發，去到紅屋循例坐低飲吓水，坐坐吓聽/見到(對到正嗰棵)樹上面d樹枝搖晃得好利害，一般雀仔係冇咁大嘅搖晃度同埋聲音嘅，當我眼定定咁睇咗陣，見到有隻動物係一條樹枝跳到另一條樹枝，再睇睇見到有條毛毛尾，直覺話比我聽呢隻係“松鼠(squirrel)”呢嘅(因為幾年前見過一次)，我即刻壓低聲線同honey講：『松鼠呀！』，honey問係邊，我指比佢睇，佢見到之後叫我攞相機比佢，我真係比佢激死--出門口時問佢帶唔帶相機但佢話唔帶，到攞手機出嚟影時隻松鼠已經走咗！

當時有位郊野公園管理員在埸，佢都落車搭訕，佢話佢坐咗係度45分鐘(泊咗架郊野公園管理車係紅屋觀鳥)先見倒2隻松鼠，我坐咗1分鐘就睇倒真係好彩！跟住佢話係“鍋輪POSE”(都唔知係乜)嗰度先最多松鼠，大家再講下雀，然後就同佢講ByeBye繼續行山。

行行下去到一個亭，嗰度貼咗d通告嘅，我估佢指嘅“鍋輪POSE”可能係呢度。跟住又聽/見到d樹枝搖晃得好利害，睇多陣，見到另一隻松鼠係d樹上面跳嚟跳去，今次可以睇耐d，睇睇下見多隻細d嘅同大嗰隻一齊玩，情況就好似阿媽接細路放學，大家鬥快跑番屋企咁。今日真係大收穫！

我唸係因為今日天陰陰，人流少，所以先見倒咁多隻松鼠，實在太好了！

2007年4月5日星期四

富臨漁港(香港仔)

上星期日(2007年4月1日，愚人節)去咗香港仔富臨漁港飲IC的滿月酒，原本冇乜特別，但係嗰間酒樓嘅服務質素真係前所未見，高潮迭起，所以想係度同大家分享下我哋嘅奇妙經歷！

TO IC：請不要介意，這絕對不是投訴，而係嗰晚實在太“妙”喇，所以先想同大家分享下咁啫...

奇人奇事(1)--麻雀：

由於7點已經到達，而又未知坐邊張枱，所以諗住坐係麻雀枱唔使企咁耐！得3個人點打呀？咪係打3人麻雀囉，難唔倒我哋嘅！後尾IC介紹舊同事比我哋識，順便加入我哋嘅戰團。第一鋪鑽媽發現得16楝，何超即時指住我話：『實係拉姑多咗喇，楝牌咁長』，後尾我數過冇多，其他人再數都冇多，都大家以為走咗花時，鑽媽又發現有花，最後大家一致决定換隔籬枱副牌，呵呵呵呵... 換咗副牌之後先發覺... 之前副牌除咗唔見咗4隻之外，仲冇骰，亦冇東南西北o架！

奇人奇事(2)--換碟：
食完白灼蝦，循例換碟，但係個侍應竟然放低成叠碟，仲要我地遞自己隻碟比佢，仲要自己係叠碟度攞碟，都算喇，仲要隻隻碟都好似冇洗過咁，第一隻有蝦殼，第二隻有生菜，唉！仲一d歉意都冇，好似好理所當然咁，唉唉！

奇人奇事(3)--蟹拑：
食炸蟹拑之前，侍應竟然收走用嚟點蟹拑嘅甜酸醬，全枱即時有反應話佢做乜收咗嗰醬，可能佢(已轉身離開)係失聰嘅，所以冇理我哋！後來蟹拑嚟時，問佢攞醬佢又唔理我哋，叫部長攞醬又攞碟紅醋嚟，我哋唔肯就範佢先叫人去攞碟甜酸醬嚟，結果等到其他枱都上晒下一道菜，侍應先攞碟甜酸醬嚟，唉唉唉！

奇人奇事(4)--蟹拑：
大家都未食完蟹拑，侍應又急於上下一道菜，何超隻蟹拑食咗半隻(當時佢係用2隻手指攞住隻拑)，侍應就收走佢d碗碟，攪到何超攞住隻蟹拑都唔知點算，好尷尬，同枱嘅人都睇唔過眼，議論紛紛，何超唯有係冇碗碟嘅情況下，繼續食埋剩番嗰半隻蟹拑喇！唉唉唉唉！

奇人奇事(5)--雪碧：
到差不多尾聲時，侍應又出奇招喇！話說何超係飲緊芬達橙汁嘅，而另一位小姐係飲緊熱水嘅，個侍應竟然問佢地：『係咪飲緊雪碧？』，兩位當事人緊係答：『唔係』喇，個侍應攞住罐雪碧話：『呢隻好飲』，兩位當事人答：『唔要』，但個侍應竟然繼續放低“成罐未開過”嘅雪碧，o係兩位當事人嘅杯側邊(一人一罐)，然後就走咗！飲緊熱水嗰位小姐都唔知發生緊乜嘢事，其他人答佢：『佢話呢隻好飲，介紹比你飲喎！』，飲緊熱水嗰位小姐比嗰侍應激到半死，反晒眼咁話：『唔該晒佢喎』。唉唉唉唉唉！

奇人奇事(6)--影相：
呢單唔關酒樓事！係我哋未同BB影相就坐咗落麻雀枱，跟住我先醒起，但鑽媽話只有長輩及親人先會同BB影相，在坐得鑽媽一個擺過滿月酒，所以佢係呢方嘅說話多少都有d權威性，攪到我唔好意思走去影... 最後都冇去影... 好無奈，帶晒相機，之前仲特登义足電o架嘛！唉！

懵人懵事：
是夜要11點幾先散席，散席後我哋係香港仔中心巴士站分道揚鑣，何超搭巴士去銅鑼灣、鑽媽搭巴士去中環、我搭小巴去鰂魚涌。架小巴係數碼港開出，等咗陣見有時間咪睇下幾多分鐘一班車囉，點知越睇越唔對路，原來數碼港嘅尾班車係10:30pm開出o架！Oh No... 即刻跑番轉頭跟何超搭巴士去銅鑼灣，但係佢已經上車坐低咗，架車仲開緊走喇，佢見我唔知乜事，大家用身體語言溝通咗幾下，架巴士就走咗喇！唉！唯有等下一架巴士喇！

真係冇諗過滿月酒要咁夜先散水！飲開嗰d都係7點幾8點就開始，9點就一定散水，所以之前冇check清楚尾班車時間囉！

2007年3月28日星期三

Kowloon Shangri-la Hotel Lobby Lounge & Bar

星期一(2007年3月26日)請咗阿媽、兩個家姐再搭多兩個姪女去飲Afternoon Tea，揾嚟揾去都揾唔到地方，最後揀咗去“九龍香格里拉酒店大堂酒廊”食Tea Buffet。

去到見到Lobby人山人海，仲多人過旺角，唔知係咪有function呢？平時d酒店烏蠅都唔多隻o架嘛，未食已經破壞晒嗰種清閒闊太享用下午茶嘅feel！

坐底之後，大家只見倒一張8呎長左右嘅Buffet枱，上面d食物超零落，總數加起來只有十數碟左右。大家都奇怪地說：『唔係得咁多吖？』，大家姐仲忍唔住繞場一周看看有冇其他Buffet枱，結果係...冇嘅！再問waiter：『係咪得呢度咁多？冇其他？』，waiter竟然點頭答：『係！』，OH NO...... 我連Lunch都冇食呀......

除了豆腐花沒有mood吃及想吃時已沒有了的Tiramasu，全部食物我都有吃了一遍，包括沒上鏡的炸魚手指、煎雞扒、蝦餃燒賣牛肉、白汁蛋麵包、法包上伴了什麼的。你看，我話咁快已經可以列出所有食物喇！呀，仲有一樣，就係姪女問我那個(Buffet開始咗2個鐘)一路都“吉”的熱盤裡的是什麼，我毫不遲疑地答：『冇嘢架，得d熱水o架喳！』，個waiter聽倒之後先至細細聲向住對講機：『快d攞d乜乜上嚟』，呵，原來係鬆餅，你不如等dinner buffet先攞嚟喇！

食物選擇雖然少得可憐，好彩質數尚可。但係4大2小要$6xx，真係去到邊都多嘢食過佢喇！之前見d網民寫到點正點期待，真係有d被網民騙嘅感覺呀！

2007年3月24日星期六

維園花展2007

舊年維園花展last day之前嗰日買咗部新相機，所以last day嗰日即刻去花展試機，不過d花大部份都謝晒。

所以今年唸住早d去，plan咗第四日(星期一)下晏請假去，點知突然有兩個會要開，搞到日日都好忙，結果要等到今日(2007年4月24日)下晏先去倒，d花大部份都好謝吓，去到仲要落咗幾次雨，你話幾黑仔呢！不過去倒已經好過冇得去，而且玩攤位遊戲仲贏咗盆小花--康乃馨，都算唔錯呀！比較可惜嘅係...因為冇太陽，d相好暗，好彩可以用software edit倒喳，不過edit後d相d質數會差d--用嚟放上網同大家分享都尚可接受，但如果曬相就唔多OKo架喇！

今日花師奶全家總動員一齊嚟，好熱鬧，鑽鑽仲成日笑住叫“爸爸姨姨”，好sweet sweet架！有位阿嬸誤會鑽鑽同佢講“ByeBye姨姨”，仲同鑽鑽ByeBye，好搞笑！

原本貓頭夫人同無敵都話嚟，但最終甩拖！貓頭夫人係因為身體狀態不佳嚟唔倒，而無敵就係冇比理由嘅情況下唔嚟！無敵，我會慢慢同你計...

好！等大家嚟睇吓我d作品先喇...