網頁清單

2020年10月7日 星期三

英國「盲衝直撞」2020の相隔9年半再次走難

24 September 2020, Thursday

〖Day 8 & 9 & 10 & 11 & 12〗

Day 8 攝氏7-14度

0600 被叫醒😴💤💤💤

零晨3點幾收到香港親友通知,香港放風話封英國關!!!OMG!!!咁我地點算呀?!😱😱😱

見暈!

311嘅感覺返晒黎!

消息堅定流?唔肯定!但如果堅嘅話就好大鑊,流嘅話大不了再比多1次錢改機票留耐D。

決定改機票,維珍網站改唔到機票,叫你Whaatsapp/Text/Call,我地WhatsApp埋,SMS埋,電話都打埋(話24小時,但疫情期間又話WFH 7點先有聽,到7點又變留言),到第2日英國維珍都無人覆過我地!

好彩同步搵到International 電話List有香港電話,用IP Phone 一打就有人聽,極速改咗9月28日飛返香港,仲有2組孖位比我地揀,Too Lucky!改機票費用承為每人HK$500。

等到藍帶廚神起身即刻同佢講,佢即刻上網Check,10月1號前淨係得聽晚有機票,之後幾日都無機票換啦。確認機位後,急急腳執行李,心煩意亂之際仲堅持煮定2餐比我地翻熱食,無言感激。😭😭😭

垃圾車收垃圾-ing~

藍帶廚神匆忙中不忘切埋佢個蜜瓜黎食同埋Lunch再去Town Centre茶樓食多1次點心…😅

搵埋Local朋友一齊同藍帶廚神Farewell…


Say Goodbye 之後就開始我地嘅宅生活啦!😢

要自己煲飯~

藍帶廚神主理-彩椒炒牛肉!用蒸爐蒸翻熱就食得,正!

落咗幾日雨,天氣開始凍,D衫曬唔乾,嘗試開暖板將D毛巾衫褲放上去,嘩,好快乾架真係,Good,等我狂開洗衣機先!

又一Day! 


Day 9 攝氏5-13度

無咗藍帶廚神係身邊嘅日子,就要自己準備早餐&午餐…


下晝陪新居入伙朋友去附近睇樓。步行十幾分鐘距離~

今日睇得成樓都幾離奇!個Agent完全唔回覆係幾號屋,大家單憑間屋張相係Google Map度做對比,大約鎖定個位置。Send SMS比Agent又唔覆,打電話又落留言。唔Sure係咪Confirmed Appointment嘅情況下跟指定時間去到現場(反正都係步行十幾分鐘啫無樓睇咪當散步囉),一路都唔見Agent出現,直至屋主自己走出黎開門,先知道原來個地產Agent係唔會出現!

我地約咗1230,屋主話1245會有另一班人黎睇樓,我地睇完出返黎,下一Group人就揸車黎到喇,咦,香港人喎。

 HOUSE TOUR稍後會UPLOAD去YOUTUBE~

睇完樓逛吓附近嘅公園、便利店、港式外賣店,大風到癲,夜晚狂流鼻水。

便利店門口排咗好多送貨機械人,好可愛呀!

便利店買嘅下午茶~

晚餐翻熱藍帶廚神尋日煮好嘅豉油雞,自己用雪櫃物資煮雜菜湯,煲個飯,又一Day! 


Day 10 攝氏9-11度 (下晝3點到5點落雨)

無咗廚神係身邊嘅第2個早餐&午餐,我地終於嘗試用焗爐啦!

人生第1焗!(以前係外邊上堂果D唔計啦,老師會幫你開好爐、預熱、調教溫度、放野入去、計時、攞野出黎、熄爐)

早餐就焗個芝士Bagels…加炒煙肉,炒蛋,蒸茄汁蛋…

午餐就焗腸仔+辛辣麵…

廚神入咗好多貨係雪櫃,我都要發揮吓聯想力,睇吓邊樣同邊樣可以煮埋一齊,臨返香港前盡量清咗個雪櫃。

又到陪朋友睇樓時間!下晝經網上Agent約咗1間屋睇吓,估唔到網上Agent反而有Staff到現場。 (HOUSE TOUR稍後會UPLOAD去YOUTUBE)

睇完屋就返歸煮晚餐…

藍帶廚神臨走前煮落2個餸,已經食清光!!!今晚開始要靠自己喇!

藍帶廚神已經交帶落點焗個鴨胸,見有D橙剩,醒起D餐廳好多時都係香橙焗鴨胸,又試吓先~

調味料就唔齊架喇,但味道都okay 嘅~

洗完碗沖埋涼又準備瞓覺,日復日……

無電視睇,無電腦用,加上仲Jetlagged 緊,每日8pm就見眼瞓……係度生活個人應該好快痴呆!

聽朝起身就要Pack行李返「康」港架啦~

Good night~ 



Day 11 攝氏8-13度

地獄廚神廚餘料理-早餐變早午餐嘅…芝士煙肉焗薯!

加咗大量香草,小小鹽&Black Pepper,預熱200度,焗20分鐘,Wonderful!

食完都12點,暫時飽飽地,唔煮午餐啦,趁假期又無落雨,去湖邊散吓步先~

唔駛10分鐘就行到去湖邊~

嘩,好多天鵝呀!!!

嘩,好多豪宅呀!!!


回程有D餓,途經Tesco Express買咗盒蘋果批做下午茶。(有人好似同個焗爐一見鍾情)



食完都仲見餓,叮埋香港製造嘅藍莓五仁月餅配紅茶Tonic水,嗯,正!


個月餅係帶過黎中秋節食嘅,可惜香港忽然封關,我地急急腳改機票聽日就返香港喇,不如而家食埋去啦,費事又帶翻返香港,帶黎帶去。

舉頭望白雲,低頭煮晚餐~

地獄廚神廚餘料理-晚餐……茄汁豬扒!


食飽飽又要繼續執行李啦~ 



Day 12 攝氏11-16度

世事難料…

原本我地係玩多14日先飛返「康」港架…唉…

唔想返到香港要住隔離酒店14日,返到香港係自己屋企隔離都仲可以生活如常吖,又唔想係英國失心瘋咁搵地方做Coronavirus測試,仲要夾準時間起飛前72小時出到Negative Report(初時放風24小時)… 有少少無可能囉…唯有急急腳改機票走人啦~著草呀而家~

最後1日留係英國,我地2個都開始好唔捨得間屋,實在住得太自在喇。

7點幾紮醒,執埋D乾淨衫&污糟衫,同埋好多雜崩冷野……

焗埋幾個Bagels做早餐……芝士、士多啤梨Jam、橙Jam,3種口味~今日上網Research吓,係雪櫃拎出黎攤一陣等佢無咁凍,又抹咗小小水係Bagels面,個包真係好似軟返少少。


繼續執行李……

煮落米,焗一焗個地中海雜菜,Tesco Express 賣£1磅3咋。

尋晚煮咗茄汁豬扒食唔晒,今日Lunch要清埋去,尋日買咗pizza今日都食唔到啦,個pizza £2磅半咋~


繼續執行李……

21:55起飛,朋友幫我地Call咗機場Taxi 16:30黎接我地,承為£60磅~

終於臨走前1個鐘Pack好晒所有旅行喼,食埋個橙補充維他命C先走,點知食完見餓喎,極速煮個辛辣麵快快手食埋洗埋~


原本以為Self Checkout,朋友又趕得切由London返黎Say Goodbye,真係好感激佢地一家人照顧咗我地咁多日,希望快D可以再相聚。

開往Heathrow機場嘅路程尚算暢順,早咗4個鐘到達,已經有人排緊隊等寄行李!(排咗半個鐘龍尾已經去到Terminal個尾,機場職員終於現身將我地打散成1團團蛇餅~


職員要查香港身份證,唔比Self Bag Drop,排咗1個鐘先開始有維珍職員現身!條人龍長到不見尾,大部分都係華人,後面討論緊應該全部人都係改機票早走,有個男人嘅朋友早2日走所以清楚晒所有流程~

順利寄完行李,職員提我到達香港前要上網填檢疫申報表。(我仲以為香港人唔駛填tim)

過X光機先耐,要除鞋行,好Dirty。

Honey全身都BB響,連鏈咀都響,被摸勻全身。

最慘我放咗2支水落佢背囊完全醒唔起,搜查緊個職員又咁啱換班,搞咗好耐,好彩我地有大把時間咋!消毒酒精噴噴要搵儀器檢測,過完1部又第2部,勁嚴謹!奶媽電都逐粒掃描……

搞完晒又未知登機閘口,唯有走去Plaza Premium Lounge坐吓,好彩Honey搵到個超隱閉位置,可以安心坐一陣。

HONEY攞咗個餐牌返黎,完全揀唔落手… HONEY拎完餐返黎,叫我唔好食塊芝士,話個職員徒手拿,仲要無帶手套😱😱😱… 我食完3色豆上到飛機條腸痛咗3個鐘呀,口乾到爆都唔敢飲水,驚會去廁所💩💩~

嘩,個登機閘口係登機前10分鐘先彈出黎,仲要係最最最遠果個,我都唔知D老人家點趕到。

順利登機,噴噴噴噴噴,抹抹抹抹抹!

今日架機超級爆,Premium Class去程中間3個位全吉,左右窗口位都未賣晒,回程中間3個位左右2邊全部坐滿人(最中間個位仍然留空,估計係要Social Distancing)。

遲咗20分鐘先起飛,飛機餐都唔食啦,瞓先~

早餐都係食個熱包,其他唔敢食。

全程唔敢飲水因為唔想去廁所,挨咗11個鐘到食早餐時先敢飲水,飲完水去1次廁所就準備落機。

各位乘客…災難正式開始!

💣TO BE CONTINUED💥


沒有留言:

張貼留言