網頁清單

2014年2月22日 星期六

農曆新年慶典 @ 香港迪士尼樂園 Hong Kong Disneyland



25 January 2014, Saturday

繼上次以「食買玩」優惠入香港迪士尼樂園玩咗一轉, 比壽星呃我極速礦車好慢, 令我差點魂斷灰熊山之後, 今日又再來用埋個優惠啦~~~

(Deadline前最後3日, 我地做人真係好忟水, 哈哈)


由於2個月前先剛啱玩完, 今次難免會Hea玩... 成11點半先去到青衣城...  貓兄未到... 我唯有週圍影吓相打發時間, 好彩有12生肖幫手, 總算挨過了...


12點係青衣城赤丸食咗個好難食的午餐... 蒲燒星鰻魚飯 $54 + 凍芒果紅茶 $9... 坦白講, 我未試過一次係青衣城食o野係食到好味的...


上星期日睇完Openrice包場的大夢想家(Saving Mr. Banks)後, 中晒毒... Tom Hanks, 做咩唔企係度迎接我呀?!! 嘩咔咔咔...


貓兄今日唔係第一時間玩極速礦車, 反而捉咗我去迷離大宅... (上次差點魂斷灰熊山之後死都唔肯再相佢玩迷離大宅)




年近歲晚, 好多多多多多人呀!!! 都排咗25分鐘先有得玩...


全程都係坐係車內極速旋轉, 的確係無極速礦車咁恐佈, 算你喇...


轉到你矇, 影到你朦...


食完飯唔夠2個鐘, 又o黎料... 芒果都樂軟杯 $40 @ Jessie's Snack Roundup...


跟住去睇下3D電影, 坐下火車...


畫下卡通人物...


影下米老鼠... 離遠...


繼續離遠影... Duffy (達菲熊)...


農曆新年慶典習中於美國大街...



我地去咗玩巴斯光年, 好多多多多多人... 慶幸我地排隊前後都是舊香港人, 並無身貼身情況出現, 好鬆動... 眼前有5呎唔夠的村婦由頭到尾不停用全身頂實一位排佢前面的6呎幾年輕男士, 我牙痕痕同貓兄講 : 都唔明D人, 你迫都係要等, 迫咗又唔會入到去, 迫o黎做咩?!!
6呎幾年輕男士有怨無路訴, 聽到我咁講, 居然同我地搭訕話所以佢全程用個身頂住佢(唔比佢打尖)... (因為佢有朋友手抱幼童, 我都明佢點解要以身作護盾)
我冷不防佢搭訕, 我笑笑口咁同佢講 : 辛苦你喇~
跟手貓兄細細聲同我講, 問我個年輕男士似唔似CCTVB的主持...
似呀!!! 似呀!!! 似激優一族果類節目的主持....
其實呢... 佢真係好慘... 我真心覺得佢比個村婦非禮緊...
最後我見佢忍無可忍, 終於拎轉身細細聲嚴正警告, 呢類情況, 之後玩其他設施都有發生係我地身上...

貓兄要玩Space Mountain, 我繼續食食食...


之後貓兄去玩極速礦車, 我又再坐係出面等... 今次好耐呀... 剛才Space Mountain排1人隊, 好快有得玩, 今次我地2個一齊見到極速礦車1人隊等候時間係0, 正常隊係30分鐘, 我地竟然一切誤會1人隊Disable了, 哈哈, 超低能勁搞笑, 白白浪費了半小時...

逛下泰山樹屋, 遊下亞馬遜河, 又再食食食... 燒魷魚真係好香呀...


未食完燒魷魚, 又繼續晚餐... 今日嘅主題係食食食!!! 我塊牛扒唔差喎... 清碟...



玩埋咖啡杯, 坐下木馬, 睇埋煙花, 急急返歸... 又一Day...


今日買咗2件小禮物, 打算年初一時送比姪仔姪女...


[ 拍攝器材: Sony Xperia™ Z1, Sony Cybershot DSC-RX100 ]

4 則留言: