網頁清單

2013年10月22日 星期二

瑞樵閣 Chesa : 浪漫芝味溶流 傾瀉阿爾卑斯

9 October 2013, Wednesday


發生係8月的一段對話...

拉姑 : 我知唔剝唔得...
牙醫 : 一定要剝... 仲要剝埋上面果隻...
拉姑 : (晴天霹靂) 吓?!! 點解呀?!! 上面果隻都無問題?!!
牙醫 : 一剝要上下一Pair剝... (blah blah blah)
拉姑 : (嚇呆了, 欲哭無淚) 哦...  哦... 哦...
牙醫 : 頭2-3日食唔到o野, 要食流質食物, 大約1星期之後可以用另一邊咀嚼...
拉姑 : (行屍走肉) 哦...  哦... 哦...

就係咁, 好天真好傻的拉姑, 信晒牙醫, 以為開刀後一星期就可以食返o野, 懶醒地以為比夠2星期時間個傷口好返, 點知... 2星期後放監同朋友食咗一餐晚飯, 傷口隨即痛足2日2夜, 苦不堪言!!! 眼淚在心裡流  此際  怎麼開口?



拉姑挨緊流質食物果段日子, 無晒心雞, 完完全全無為自己的生日飯張羅, 就係生日前1日, 先臨急抱佛腳搵地方, 打電話訂位, 訂唔到位, 又繼續無晒心雞... 最後... 唯有問吓餐廳, 邊日有位就訂邊日, 結果改遲1個星期先慶祝... 到咗果日, Honey病咗, 結果又要再改遲多1個星期...

~~ 我同牙醫的拔河比賽過程, 待我的傷口不再痛後再發博文 ~~

重要的大日子終於來臨!!! 邊日生日都唔重要, 最重要今晚係我人生中第1次正式到半島酒店食晚飯, 鑼鼓聲響起-ing, 哈哈... 雖然我同Honey都不在狀態, 但已等得不耐煩, 唔想再改期, 頂硬上喇...

搭Lift上到1樓, 由巷頭行到巷尾, 路過露台餐廳、吉地士、嘉麟樓、今佐日本料理, 完全搵唔到瑞樵閣, 點會咁o架?!! 結果我地又行返去巷頭, 由再行返巷尾, 都搵唔到, 實在太困惑, 係古典大樓梯前停下腳步苦惱中, 忽然比我見到呢個小小的金色招牌, 不禁高呼"有無咁隱蔽呀?!!", 已經係入面等緊我地的經理笑說"唔係好隱蔽啫!!!"... 嘿嘿, 無諗過佢會聽到, 醜死怪喇... 我餓咗太耐, 連用咩名訂枱都唔記得, 好彩講到第2個, 中咗...



瑞士有4種官方語言--德語、法語、意大利語、及羅曼語(Romansh), 德語較常用佔70%... 估計牆上的是德文... 這款Old English字形好舊不見, 少時候會係白紙上練習書寫, 相信現今的小孩唔會有這種玩意兒(為考學校而做的是被迫, 不是玩意)... 解讀良久, 大約是"A Schtugg Hbinda trocknat im Maloyamind hat a Chuscht mia a Kuss tum a Hundnerkind", 當中只能翻譯到乾燥同接吻...


餐廳面積不大, 只有十數張枱, 枱櫈及餐櫃全用上原木, 牆身與天花均以原木包裹, 看得出經歷過歷史的洗禮, 天花有些原木已爆裂, 令瑞士阿爾卑斯山小木屋的原始風味有增無減, 保留下來既環保又懷舊... 餐廳內燈光昏暗, 以數盞吊燈及壁燈來照明, 配合粉紅色長燭的搖曳燭光, 浪漫到暈... 


朋友笑我地包場, 我都想, 但Honey邊會咁浮誇喎, 我地都係慳家一族喔, 哈哈... 我地靠牆坐木梳化, 經理要用雙手抬起木枱移開少少空位比我地坐入去, 坐好後佢又將張枱移返好, 當時我腦海出現一個念頭, 張木枱一定係用來對付食霸王餐的客人, 未付清飯錢前, 經理都唔會移開張枱, 咁你就想走都走唔甩啦, 嘩咔咔咔... 坐古董木梳化係有代價的--咪郁呀!!! 只要輕輕轉腰, 木梳化都會發出響亮的嘎嘎聲, 搞到我地2個全晚都坐到直一直, 唔敢亂郁...
 

瑞士必買的手信--牛鈴, 在瑞士好多地方都見到它的踪影, 我家也擺放了一個作裝飾, 奇怪的是, 在這裡見不到它, 只能在枱布中看到, 有點可惜...


出發前已做定功課, 拿到餐牌後就向Honey簡介, 服務員可能聽到我地的對話, 所以未有上前提供任何推介... 反之隔離枱的情侶完全無Idea, 服務員細心地逐一介紹...

點菜時, 經理問到芝士火鍋內的烈酒及白酒份量需否減少, 我考慮良久, 仍未能下決定, 經理就打個比喻, 酒精的烈度如中式餐館的醉雞鍋... 嗯... 醉雞鍋係我的至愛, 應該可以接受得到... 最後我決定一試正常的烈酒份量...

鑑於Honey腸胃不適, 而我之前一晚又試食了大量芝士蛋糕有點消化不良, 所以服務員問道我地需唔需要Order餐前飲品時, 我大膽地問有無熱水, 竟然有, 太好喇!!! (免費的, 咔咔)

一籃子餐前麵包... 好美的木盤呀!!! 中間的麵包樣子很可愛, 活像飄零燕卡通內的麵包, 無容置疑一定要先吃它!!! 麵包上有點鹽, 吃時鹹鹹的, 頗特別, 咀嚼時帶點韌勁, 暖一點的話不知會否更好吃... 眼見芝士火鍋跟來更多的麵包, 胃部已容不下其餘2款餐前麵包...


Crab meat pancake with lobster-Armagnac cappuccino $290
-- 綜合網上食評分析出的結果, 蟹肉班戟是必吃的!!! 可惜... 希望越大, 失望越大!!! 其實... 這道菜是好吃的, 只是有網民吹噓到像吃到十幾隻蟹的蟹肉, 未免令我有太大的幻想... 將大約1-2隻蟹的蟹肉拆出, 以pancake皮包裹, 淋上雅瑪邑龍蝦湯, 外型像1條芒果汁腸粉, 哈哈... 切開成3份, 每一口都是滿滿的蟹肉, 充斥了海水的味道, 惜鮮嫩略遜...


主角芝士火鍋準備出場!!! 為隆重其事, 服務員換上超萌芝士碟!!! 哇!!! 芝士黃的碟子佈滿芝士小孔, 蠻可愛喔!!!


Fondue Montagnarde $250
-- 以4種瑞士最流行的芝士--Emmentaler, Appenzeller, Gruyère & Sprinz 調配而成的瑞士Signature Dish芝士火鍋, 加入白葡萄酒及櫻桃烈酒, 還添加了一點點煙肉, 配料則有粒粒麵包、新薯、通心粉, 非常豐富...


黃色的Emmentaler Cheese俗稱瑞士芝士, 硬度中等帶有香味, 佈滿二氧化碳形成的氣孔為其標誌... 呈黃油色Appenzeller Cheese屬硬芝士, 帶有泥土的芳香及水果的香味... 呈黃色Gruyère Cheese, 亦屬硬芝士, 味道甜中帶鹹... 均為硬芝士的Sprinz Cheese, 味道芳香... 4種芝士溶和後, 香味濃郁, 味道醇厚, 口感黏稠綿密, 不偏好芝士的我倆亦非常喜歡... 回想起在瑞士Interlaken吃過的超鹹芝士火鍋, 簡直不堪回首, 今天証實了芝士火鍋唔一定係超鹹的...


正常份量的白酒和櫻桃烈酒的確好哽, 第一口有點抵擋不了, 咳... 咳... 咳... 吃著吃著, 全身及面頰開始發燙, 暖流貫穿全身, 好溫暖呀!!! 口腔內充斥了芝香與酒香, 香氣歷久不衰...

我個人最喜歡被芝士填得滿滿的芝心通心粉, 咬下時熱辣辣的芝士從兩旁竄出, 好過癮... 沾滿了熱辣辣芝士的硬麵包變得腍身, 亦是非常好的配搭, 反之配新薯看似有點奇怪, 但出奇地夾...

努力地吃...  努力地吃... 努力地吃... 吃了一半後, 已經飽至反眼, 還有大半盤麵包, 點算好?!! 我唔想浪費食物呀!!! 經理路過, 問我地鐘唔鐘意呢個芝士火鍋, 我答"好好味, 不過食唔晒", 經理都叫我地留力, 因為仲有另一個Main Course等緊我地...

現場環境昏暗, 芝士火鍋上桌時燒得霹靂啪啦, 弄得我也緊張起來, 怕拍照拍得太耐會燒燶, 最後只拍了一張鬆郁朦的照片, 現在真的好想哭...

Rack of lamb with roasted garlic, fine beans, carrots and gratinated potato $410
-- 半島酒店的Well Done烤羊架早已在露台餐廳見識過, 所以很放心... 朋友們經常都笑我浪費了優質的牛排和羊排, 但我真的吃不下血淋淋的肉, 這裡的羊架是真正的Well Done, 沒有半點血水, 肉質卻保持幼嫩, 不會太韌, 大廚少一點功力亦做不到... 烤焗薯令人驚喜, 薯仔切成薄片, 塗上忌廉汁, 一層疊一層, 壓實後烤焗至表面金黃, 入口粉嫩, 好好味哦... 佐吃的芥末醬有3款, 薄荷醬也有2款, 果真是六星級酒店...


吃罷1款頭盤+2款主菜, 已經十成飽, 但又好想好想好想吃甜品, 點算好?!! Honey突然大大聲話"試埋啦, 反正都唔會來第2次", 簡直好似踢館咁, 嘩咔咔咔... 唔係話佢唔好味, 只係抱住一生總要豪一次的精神, 加上我地唔係太好芝士, 所以Honey先會咁講, 其實過多幾年, 都有機會重臨的...

好, 連Honey都唔阻撓我, 咁唯有將我的第2個胃搬出來...

Chalet Suisse $170
-- 以瑞士朱古力築起的瑞士小屋, 不用預訂, 可以約客人要求而寫上不同的字句, 小屋有2扇窗, 夏天可以欣賞翠綠山巒環抱的阿爾卑斯, 冬天可以欣賞白雪皚皚的阿爾卑斯, 門前有小籬笆, 連小煙囪也有耶, 太夢幻, 完全係我的Dream House類型... 經理問需唔需要寫名, 我笑說不用了, 心想始終我不是今天生日耶, 只是補祝...


還嫌朱古力瑞士小屋不夠肥嗎?!! 還要加熱朱古力漿?!! 瘋了嗎?!!


嘩!!! 一場大雪, 推倒了我的夢幻小屋呀!!! 救命呀!!! 有救援人員在嗎?!! 雲呢嗱雪糕與忌廉混為一體, 難分難解... 雲呢嗱雪糕很香滑, 不死甜, 上面的黑黑點點可不是污物, 是雲呢嗱籽喔, 是天然香味的來源, 只有高級的純天然雲呢嗱雪糕才會有的喔...


我真是超飽, 連第2個胃都超出負荷, 結帳時店員奉上了免費的飯後小點... 留有半島嘜頭的黑朱古力, 包著紅覆盆果醬, 酸得交關, 酸味退卻後胃部倒覺得飽滯感略退... 香橙玉桂酥硬硬的, 甘香十足... 是不錯的飯後小點...


經理及服務員均非常Nice, 經理每隔一段時間都會逐一與每枱客人傾談, 現場氣氛輕鬆一點也不拘謹, 有別於一般高級餐廳... 請服務員幫忙拍合照, 服務員笑說每一道菜都要影一張相, 我笑說"不需要吧, 未免太誇張"...


芝士火鍋好味, 但食唔晒所有麵包, 好想打包, 又唔好意思開聲, 浪費了食物很內疚...


今晚的晚餐只吃了1道頭盤, 2道主菜, 1道甜品, 埋單$1250... 抵唔抵食見人見至, 服務及環境及食物都是一等一... 現在好多私房菜無服務兼環境衛生均不佳的, 晚餐都要$500以上...要我選擇的話, 當然是帶有光環的半島酒店...

是次每人消費約 $620 元
味道: 5 環境: 5 服務: 5 衛生: 5 抵食: 4
###
地址 : 尖沙咀彌敦道19-21號半島酒店1樓
電話 : 2696 6769

8 則留言:

  1. 好正嘅生日飯!Sweet 到爆炸 <3

    回覆刪除
    回覆
    1. Yeah, 呢度氣氛真係好好! (嘻嘻... 唔係年年都玩咁大的)

      刪除
  2. 好靚概blog, 今後請多多指教

    回覆刪除
    回覆
    1. 多謝你的讚美, 我會繼續努力, 請你都多多指教 :)

      刪除
  3. 先補祝妳生日快樂!
    我去過半島Tea & 飲喜酒咋,無真正食餐!
    妳哩間好出名,好多blog友介紹過,以妳最詳盡!形容得好靚,好好味,好親身食到咁!
    我本身喺瑞士無食過咁靚甜品朱古力屋,芝士就唔識,見

    回覆刪除
    回覆
    1. 我去瑞士都只係食過"特鹹"芝士火鍋, 朱古力小屋都係第一次見 :p

      刪除
  4. 祝妳生日快樂!
    我去半島 tea & 飲喜酒咋!無食過正餐!
    妳介紹好詳盡,好似親身去食,享受咁;-);-)

    回覆刪除
    回覆
    1. 多謝路霸兄的祝福及讚賞, 好開心!!!

      我第一次去半島是大學的Alumni Cocktail Party, 第2次就學人去High Tea, 食正餐都係第一次, 有少少大鄉里出城Feel :p

      刪除