網頁清單

2014年10月11日 星期六

沖繩「婚紗攝影」2014の拍攝當日

14 September 2014, Sunday

多謝Honey送給我的結婚N週年禮物, 還了我多年來的一個無聊心願, 是次體驗絕對一生難忘!!! 就讓這次美好的回憶, 陪隨我們一起走到結婚N+N+N+N週年吧~~~

亦要多謝上天眷顧, 天氣超讚!!! 藍天+白雲, 無得輸!!!

然後, 要多謝「神乎其技」化妝師, 能將我面部缺點修飾之餘, 4個造型4種不同風格, 人亦好Nice, 幸運就是遇到妳, Honey當日已盛讚佢係我用過的化妝師之中化得最好睇的, 轉髮型又快手, 當日我全日無望過鏡, 都唔知自己個樣係點, 好擔心個樣會勁殘, 返港後睇相, WoW, 真係好靚, 係, 我係自吹自擂緊, 嘩咔咔咔... 我笑Honey帶咗4個老婆過去, 點會4個完全唔同款嘅?!! 多謝妳, 化妝師小姐!!!

一不離二, 二不離三的幸運, 是遇上「忘我瞓身」攝影師, 唔係講笑, 無論係波上宮、教堂、沙灘, 攝影師豪不鍚身, 當眾瞓街, 我初時睇到呆了, 後來也習慣了... 當日只感到佢好博命, 經常要喊破喉嚨比指示, 天氣勁熱, 攝影儀器又重, 佢應該比我地辛苦100倍, 十分配服, 萬分感激... 返港後睇相, WoW, 真係影得好靚呀)))))) 相片完全達到我地出發前傾談的要求, 特別係日落晚霞沙灘剪影照, 比坊間見到的廣告照靚好多(自我陶醉-ing)... 多謝你, 攝影師先生!!!

不可不感謝的, 是事前係香港替我揀衫試衫的笑逐顏開」服務員, 我呢隻盲頭烏蠅, 連我自己都唔知自己想要咩, 睇相後亂寫咗幾十個婚紗晚裝Numbers, 佢竟然一眼睇清我個心想要咩, 重點係睇清埋我身形上的優劣, 幫我拖尾婚紗、輕盈婚紗、晚裝每樣揀2套出來比我試, 一試就中我紅心, 件晚裝肥C9都變高挑苗條淑女, It's Magic!!! 除了提供揀衫上的專業意見, 仲供應源源不絕的笑聲及笑面, 寫寫吓Blog, 我開始有少少掛住妳添...

頒獎禮嗎? 咁多人要多謝? 呀哈哈哈...


當然, 最幸運的事, 係N+年前遇上「對我愛不完」的Honey啦!!! 嘩, 好曬呀, 哦呵呵呵~~~

離題 : 回港後, 第1件要做的事... 剪頭髮!!!

無聊 : 為咗儲Priority Pass, 係攝影公司扑鎚時好樣衰咁問人可唔可以比住少少訂金先, 過2日到咗1號先來比埋個大訂金(碌卡)... 人地唔知可能以為我要等出咗糧先有錢比囉...

終於... 入正題... 

出發前每一天早午晚都望天打卦, 狂Cap 7日預報圖... 大家睇睇個變化... 出發前1星期, 話影婚紗相呢日係落雨的, 心情跌至谷底...


到咗尋日飛到來沖繩, 都仲話今日Cloudy無太陽... 咁點都好過落雨多多聲... 仲話之後3日都落雨... 點知...


今日同之後幾日都係曬死無命賠... 人人都話日本天氣預報準到不得了, 準確到以每小時計, 但觀乎呢幾日, 沖繩天文台都拍得住香港天文台...


太陽伯伯, 我愛你!!! 鍚曬你!!!

喂)))))) 夠啦喎, 入正題未呀?!!

哦... 係嘅... 係嘅...

尋晚完全瞓唔到, 今朝8點正就要到化妝師間房, Honey陪完我去到化妝師間房, 佢就輕輕鬆鬆落Lobby食Free Breakfast, 9點半先帶埋2袋禮服返來... (唔制呀!!! 我今日蝕咗個早餐呀!!!)

我著便服落去, 帶埋Tablet去, 將預先係網上搵好的新娘髮型相比化妝師過一過目, 化完妝Set完頭就係化妝師間房換埋和服...

Honey就白恤衫+白西褲到來, 到佢化妝Set頭... (我地仲以為男仔唔使化妝Set頭嘅添, 超低能)

10點正可以返房放低便服... 順便偷影咗1張相, 呵呵~ (與攝影團隊住同一間酒店的好處)


然後落Lobby同攝影師傾吓我地想要的景點同埋想要咩"Mood"... 又係預先係網上搵好人地影的婚紗相放落Tablet比攝影師過一過目... 佢只說了一句"嘩, 咁多張都係剪影?!!"...

好, 出發!!!

一上車我就9秒9進入閉目養神Mode, 攝影師一上車即轉身想同我講幾句已經趕唔切, 合埋眼都Feel到佢有少少O咀咁話"咁快瞓咗?!!"

今次化妝師、攝影師、攝影助手都係台灣人, 雖然佢地講普通話我地講廣東話, 但基本上都溝通到8-9成, 唯一係搞爛Gag時大家要畫公仔畫出腸先識笑囉, 我唔識笑有負佢地一番心血... (我的有限公司普通話係間中睇台劇望住字幕聽返來的)

首站... 波上宮!!! 未落車已見到2架大旅遊巴 -- 東XX同美XX, 場面墟冚到暈... 我地唯有係牌坊影住相先...

有疑似X國人, 面無表情甚至有點兇, 問都唔問就舉機影相, 我即時用手掩面, 係唔鍾意比你影吖, 嘿... (全日只此一單)

去手水舍影相時, 有香港姨姨問攝影師邊度來, 攝影師答佢地台灣我地香港, 香港姨姨又問攝影師影唔影得(我地), 攝影師竟然答"可以"... (又一例證, 廣東話同普通話係溝通到的)
我感到有點錯愕, 心諗"喂, 你2位有無問過我感受呀?!! 我自己部相機都無得影喎!!!"...
不過咁, 見香港姨姨咁有修養識得問咗先影, 又笑晒口執到金咁, 我係好Welcome的, 非常配合地擺晒Pose+四萬咁嘅笑容比佢影...


人潮消散, 繼續努力... 咔嚓... 咔嚓... 咔嚓...

攝影團隊話今日係佢地來到沖繩影到第9日以來最好天氣的一日, 亦係最熱的一日...

好曬呀!!! 標晒汗啦已經!!! 第一站已經想暈低, 究竟今日有幾多個站o架?!! 仲要得教堂有冷氣咋, 救命呀!!! (化妝師要不停幫我抺汗, 佢話我好誇張, 未見過人眼袋都標汗)

影完和服相就換拖尾婚紗, 換埋妝同頭, 上車出發去位於沖繩中部的教堂...

今日係星期日, 人多車多, 係公路收費站前塞車塞咗好耐呀, 救命!!!

第2站... Chapel Diamond Ocean @ Okinawa Kariyushi Beach Resort Ocean Spa... 呢3張相唔知Honey幾時影的, 真叻仔...





臨離開教堂時, Honey問攝影師我地可唔可以用自己部相機影1張相(Contract係話明唔得的), 攝影師竟然答應, 太太太開心啦!!! 今晚有得Upload上Facebook開心Share喇~~~ Yo Ho~~~

☆鑑於近日有Blog友於大板影的婚紗相被盜用於八卦雜誌的旅遊廣告, 盜相者毫無悔意, 世風日下, 道德淪亡, 本人在無奈下只好在整張照片狂加水印, 影響相片美感也在所難免☆

更開心的是, 攝影師同我講"我地而家可以去食飯啦", 嘩, 簡直開心到彈起... (原來而家已接近3點啦)

點知... 人算不如天算, 點解今日係星期日, 週圍D餐廳都閂晒門嘅?!! Oh No...

結果... 要影埋大獅子先放午飯... (接近5時) (清注意, 我今朝7點幾食咗1條燕麥Bar咋)



Honey的午晚餐... (税込 735円)


我的午晚餐... (税込 789円)... 食唔夠一半已被Girdle紮到透唔到氣, 有得睇無得食... 浪費了食物, 對不起...


食食吓飯, 有位貌似外國人的日本人走埋來握手說"Congratulations"仲知道我地係結婚N週年, 我好詫異問"Who tell you?"... 之後佢走了, Honey返埋位講返我知, 原來呢位Gentlemen已離開餐廳, 但覺得應該要當面說句恭喜, 又走返入來餐廳... 真係好有修養...

其實呢... 今日所到之處, 除了波上宮, 9成以上見到的都係日本人, 佢地非常Nice, 含蓄一點的會報以微笑同點頭, 熱情一點的會興奮莫明地說Congratulations (攝影師翻譯), 我全部都會報以微笑及點頭, 有說Thank you但唔知對方明唔明, 哈哈... 相比起早上在波上宮所遇到的, 感覺良好得多...

臨離開前, 換埋輕巧婚紗+妝+頭, 原來之後幾個景點先係最高難度的, 又跑又跳, 爬高爬低...


此時3位男士在停車場好努力地Bump緊巨型心心汽球... 白色紫色粉紅色各3個... 去到Uza Beach Yomitan Village 攝影師舉高汽球一馬當先穿過草叢, 居然自爆咗2個, 我忍唔住大笑咗出來, 好衰呀, 唔知佢聽唔聽到, 哈哈...

之後行程應該係咁上下啩...  塗鴉牆, 殘波岬, Aquagrace Chapel外沙灘影日落, 美國村... 今日除咗美國村, 所有取景地點我地都未去過, 當埋觀光, 賺咗...

臨去美國村前換晚裝+妝+頭的地方... 唔好問我係邊, 我自己都唔知... 帶去的GPS又壞壞地, 之後果幾日又正常, 激un...


返到酒店大約9點, 散晒!!! 進入Lobby時有外籍一家四口勁好奇, 小朋友不斷追問媽媽呢個外星人點解會係度(當眾拆假眼睫毛-ing, we're crazy, 哈哈)... 臨上房前, 向一眾攝影團隊致謝, 辛苦大家, Thank You... 亦不忘同外籍媽媽講聲Good Night... (拆咗假眼睫毛, 對眼應該好奇怪, 哈哈)

攰到爆, 都唔再出去食o野喇, 返到房第一時間落妝, 洗頭沖涼, 唯一一晚係呢間酒店瞓得著...

亦係唯一一晚上錯網, 用自己Data, 明明酒店有WiFi (長期Connect唔到), 明明自己有租WiFi蛋, 就係咁都攪得錯, 發現時嚇到成個人彈起, 只係用咗3分鐘, 咁就收我HK$168, 天呀!!! 點會咁o架?!! 我真係攰到傻咗喇)))


zzzZZZ... zzzZZZ... zzzZZZ...

後記 : 返港後1天, 上浪漫一生還衫, 職員話10月1日就有相睇... 吓?!! 咁快嘅?!! 好興奮呀!!!

到咗10月1日... D相真係超超超超超超超靚呀!!!

我之前不知幾擔心呀, 果日鏡都無咩望過, 都唔知自己咩貓樣, 之前一晚完全瞓唔到理論上應該殘爆, 估唔到影出來效果咁好...好感動呀!!! 我好想喊呀!!! 嗚嗚嗚嗚...

揀咗2個幾鐘先由400張Filter到做200張, 幾時得來Filter幾十張落相薄?!! 太難取捨, 1張都不能少, 結果加錢買晒... 10月9日已拎到DVD, 快到無人有, 咁多相, 有排揀落相薄呀!!!


返港後一直忙到透不過氣, 接近1個月先得閒拎2對鞋出來抺沙... 一睇... 嘩嘩嘩!!! 2對鞋果日都係新鞋落地, 個鞋頭傷到吖!!! 證明我地果日真係好辛勞呀!!!

<< 待續 >>


沖繩「婚紗攝影」2014 の 總匯 http://www.kenmerry.com/2014/11/Okinawa.html

10 則留言:

  1. 嘩﹗,嘩﹗好靚呀,個教堂靚,天氣超好,藍天白雲靚,再加上你的造型背影,更加靚,簡直是完美的組合﹗

    回覆刪除
    回覆
    1. 多謝羊羊, 今次真係好幸運, 要感謝的人和事實在太多 :)

      刪除
  2. 嘩!超靚,主角+天氣+環境+藍天+白雲,無得頂呀!

    回覆刪除
    回覆
    1. 多謝Grace, 你的大板婚紗照都超靚 :)
      見完你早2日個POST, 我而家開始好擔心, 可能之後出的婚紗相都要加超大水印, 影響美感都無辦法~

      刪除
  3. 妳老公真好!
    千奇唔好俾我老婆知:-P

    回覆刪除
    回覆
    1. 嘻…
      但佢未喜時:-P
      我先驚:-)

      刪除
    2. 哈哈哈哈... 你地想笑死我咩, 好肚痛呀))) 暫時遇到的男士們都係同路霸兄意見一致 XD

      刪除
  4. 教堂超靚呀,呢度影d相一定勁靚~~ ^^ 期待你地d sweet sweet 相呀

    回覆刪除
    回覆
    1. 嘻嘻... 多謝... 會盡快Upload婚紗相 :)

      刪除