網頁清單

2012年5月11日 星期五

西歐「文藝復興」2012の出發喇!!! 趴地企鵝勇闖西歐!!!

25 April 2012, Wednesday

因為Honey近呢一年激忙嘅關係, 所以已經好耐冇出國旅行, 亦都冇唸過今年可以有得去旅行... 但係... 曙光突然出現!!! 原來激忙係會有真空期, 所以我地又急不及待繼續我地嘅環遊向世界大計~

2月尾一見旅行社出價目表就即時報團, 3月13日果晚已經成咗團, 太好啦!!! 唔使成日心掛掛唔知成唔成團~

不過後尾先發現, 原來5月出發嘅團先有得去比薩斜塔o架!!! Oh... 我地係4月最後一團, 即係跟住我地果團就有得去啦...

今次嘅主題係... 「趴地企鵝闖西歐」!!! 隻趴地企鵝係舊年聖誕節去「」飲茶時, 聖誕老人送比我o架!!! Honey話近年掀起咗「趴地」相嘅熱潮, 所以我都要湊吓熱鬧先~



出發前都好多黑仔事... 屋企水喉溜水, 落雨時冷氣機又嚴重入水, 抽濕機又死死吓, 抽氣扇又唔識閂蓋, 咁多o野一齊壞嘅, 搞咩呀?!! 今日銀行仲call我話找卡數嘅支票冇簽名, 要一早趕去補簽...

開茶會時知道有2份1機會同2歲BB同團, 好困擾... 今朝去銀行又遇到d細路發難渣狂喊狂叫, 去食Lunch又遇到d細路發難渣狂喊狂叫, Honey話我地多數都會同2歲BB同團, 呢2單o野係比我地早d適應吓...

天文台Keep住話今日會有雷暴, 好驚搵唔到Taxi, 所以我地今次用信用卡優惠call咗Airport Limousine, 全包都只係HK$250, 好抵, 仲抵過自己坐Taxi去香港站轉機鐵~

不過司機叔叔臨到達前5分鐘先Call我地, 之前打去Hotline又電話錄音, 又唔知司機車牌號碼, 咁嘅安排實在令人提心吊膽, 好驚過晒鐘都冇人出現~

去機場途中冇咩雨, 但係勁閃電~ 轉吓眼已經到達機場~


原本今次打算入去環亞機場貴賓候機室八卦吓, 因為見台灣旅客Blog激讚, 點知原來我冇得免費入, 所以唯有去完旅行返o黎攪攪佢, 等下次出Trip時再八過啦~

冇得入環亞機場貴賓候機室, 唯有去Burger King醫肚, 點知... 竟然冇咗我最鐘意食嘅肥牛漢堡, 唔制呀!!! 咁樣一個BBQ Beef Double都要60蚊, 以後再出Trip都要轉地步啦~

好巧合地, 我嘅老死"黃毛仔"原來都係今日飛呀!!! 我地終於可以一嘗一齊去外國旅行嘅滋味啦~ (不過係唔同目的地, 哈哈哈)

估唔到, 更巧合地, 我嘅兒時老死"阿姬"原來都係今日飛, 仲要係65號閘口, 遲我1個鐘先飛, 結果因為Flight Delay, 所以我地有足夠時間相聚吹水, 未上機已經勁Hyper!!! 咦... Paco同我地同一班機喎原來...

全機場停止運作數小時, 令到我地最後Flight Delay足足3小時, 結果3:50AM先食飛機晚餐!!! 香辣蕃茄醬意式蝴蝶粉幾好味, 雞肉玉米芥末沙律都唔錯, 餐後仲有Haagen Dazs雪糕做甜品, 好滿足呀!!!

飛咗上雲層之後景色幾靚~


今次坐A340, 座位好舒適, 夠晒伸展空間, 仲唔使同陌生人坐埋一齊(座位格式係2-4-2), 我同Honey連睇3場戲 -- 雨果的巴黎奇幻歷險、加勒比海盜:魔盜狂潮、雷神奇俠, 就已經到早餐時間喇, 時間過得真係快哦~

煙三文魚雞蛋梳乎厘伴蛋黃醬配煙肉、馬鈴薯、菠菜及蕃茄 -- 煙三文魚雞蛋梳乎厘好腥呀, 嘔!!! 其他食物都OK~
坐咗12個鐘, 終於到達Aeroporto Leonardo da Vinci啦, Yoho!!!

各位Blog友, 唔知你地有冇試過... 過海關嘅時候, 個關員只係隔住塊玻璃離遠望一望你本Passport, 連入境個Date Chop都冇Chop, 就入咗境?!!

我係咪發緊夢呀?!! 問番導遊, 佢話羅馬機場係咁, 鐘意就Chop, 忙d或者咩就唔Chop... 吓?!! 咁都得?!! 冇咗個入境Date Chop, 會唔會比人當我係非法入境o架?!! Oh No!!! 還番個入境Date Chop比我呀!!!

除此之外, 羅馬機場亦都冇入景嘅行李檢查關卡!!! 入境政策超寬鬆!!!



西歐「文藝復興」2012 の 總匯 http://www.kenmerry.com/2012/08/2012.html


1 則留言:

  1. 我試過,去德國都冇同我蓋印。
    [版主回覆05/11/2012 23:04:22]WoW... 仲以為羅馬d海關偷懶添~

    回覆刪除