網頁清單

2011年6月15日 星期三

Caffe Vergnano 1882

13 June 2011, Monday



今晚一眾好友為KaKaMa賀壽, 我大鄉里出城, 第一次o黎到The ONE, 仲要睇地圖先識行, 玩下手D遊客仲熟路過我, 嘩咔咔咔咔...


個商場D冷氣好凍呀, 想凍死人咩... 原來而家UG唔係o係Underground, 而係o係G樓上... 咁奇怪嘅...


餐廳裡面... 呀... 唔係... 應該話Cafe裡面, 3面落地玻璃, 面向九龍公園, 個景都幾開揚... 只可惜D枱櫈, 係方型矮木枱, 梳化都OK好坐, 但係矮咕o臣就麻麻地啦, 同埋張枱太細, 叫多幾樣o野都擺唔到, 根本完全唔適合食晚餐, 只適合飲下o野睇下書Hea時間果亭... 仲有D梳化同後面枱背貼背, 好迫夾, 完全冇High Class格局, 衰過Starbucks同Pacific Coffee...


Insalata Di Capesante Isolane 煎帶子伴小馬鈴薯配紅酒醋汁沙律--個名勁長... 煎帶子都幾新鮮, 入口有彈性, 其他我冇食, 要由好友們留言補充...


Timpano Alla Linguine 香辣雞肉扁意粉--好友們話好辣, 叫我唔好食, 因為我腸胃唔多妥... 好啦, 聽你地話啦, 唔該幫我留言補充...


Crespelle Alla Romana 白汁菠菜芝士煎餅--好多菠菜係入面, 用千層麵夾住, 白汁都好Rich, OK喎...


Salamino Piccante 意式香辣腸蕃茄汁薄餅--腸冇辣味, 薄餅冇茄汁味, 唯一可讚係, 佢係我鐘意果款真係薄嘅薄餅...


Dello Chef 廚師精選薄餅 (火腿, 水牛芝士, 蕃茄, 火箭菜)--腸胃不適, 要了走D火箭菜先可以食個Pizza... Prama ham 都OK鹹香, mozzarella cheese切得太細粒, 唔係好食得出咩味, 火箭菜要靠好友們幫手補充... 奇喇... 又係冇蕃茄味??? 呢間野D蕃茄好珍貴嘅咩??? 落咗等於冇落???


Crostata Al Limone 檸檬撻--好友們話好酸, 我又覺得OK啱啱好喎... 賣相稱得上係精美...


Frutto Della Passione--呢個真係全餐至好味喎, 熱情果蓉味道啱啱好, 甜而不膩, 好清新, 賣相就更加唔使講啦... 靚呀...


Cassata 牛油蛋糕雪糕三文治--個樣... 我唔Buy囉... 雪糕有雲妮拿, 朱古力同士多啤梨, 好友們有D話士多啤梨雪糕酸, 有D又話士多啤梨雪糕好食, 真係個個人嘅口味都唔同... 牛油蛋糕就真係幾好食, 不過食完會好滯囉...


Tiramisu--個賣相OK啦, 有大大個1882 Logo係面... 味道都夠濃, 口感都幾creamy, 唔錯...
Creamino--有個雪糕球浸係咖啡入面, 好友們細細聲話... Starbucks好飲D...


仲有連相都唔想影嘅香蕉咖啡!!! 鑽媽話個樣成杯麥當當咖啡咁, 咁大家就知有幾唔得啦...


整體o黎講, 佢D甜品係最得嘅, 晚餐就真係好壞參半... 建議大家可以搵個黃昏帶埋本書o黎嘆吓佢D甜品, 感覺應該會唔錯...


是次每人消費約$159元
味道: 3 環境: 3 服務: 3 衛生: 3 抵食: 2
###
地址 : 尖沙咀彌敦道100號The ONE UG221號舖 
電話 : 2907-3817


1 則留言:

  1. 當晚很抱歉遲了幾分鐘!
    唔公平啵,人地講明係cafe,係我地夾硬去食晚餐啫,唔好話佢地方細啦,cafe來講好good喇,細枱大sofa!其實我好ok坐死角既無椅背細方櫈,唔會頂住,同隔離位又close啲方便吹水唔使好大聲!
    講返啲食物,沙律ok,帶子真係好得! "啲雞去咗邊意粉"好食,邊個叫你唔好食架,我唔覺辣啵… 白汁菠菜正,超細碟… 兩個pizza都正,同意你無乜蕃茄味,我比較like辣肉腸口味,加埋"辣椒仔"正! 甜品都ok啦,個士多啤梨雪糕真係好味架,偏酸有新鮮果肉,唔知係唔係自家製。 咖啡就…唉~~
    [版主回覆06/17/2011 12:24:00]10分鐘內都係Acceptable!!! (哈哈... 自稱會On Time嘅鑽媽剛好遲咗11分鐘) 冇唔公平, 我都有講"只適合飲下o野睇下書Hea時間果亭..." + "建議大家可以搵個黃昏帶埋本書o黎嘆吓佢D甜品, 感覺應該會唔錯..."
    "啲雞去咗邊意粉"好似係龍媽叫我唔好食...
    多謝你幫手補充!!!

    回覆刪除