的士界的高手(害群之馬)

繼早前遇到"持刀"司機及"拒載"司機之後, 上上星期六(2008年2月2日)再遇到高手中嘅高手...

 

事件起因...

我地要由牛頭角去紅磡理工大學...

 

事發經過...

 

上咗車, 講咗目的地, 個司機照開車... 轉咗上觀塘道, 佢先叫我地帶路, 又話自己青衣車, 又乜又物... 之後honey叫佢call台問(當時已過咗彩虹), 連台都反問佢"紅磡理工大學喎?", 之後call台敷衍佢, 叫佢經土瓜灣去, 我心唸"而家咪係土瓜灣囉"... 就係咁... 佢就穿過土瓜灣d舊樓, 去到漆咸道北(當時已經見到理工大學), 佢竟然話自己入錯線要轉線, 明明雙白線都夾硬cut左3條行車線...

 

最後佢發現cut錯線, 仲話"咁而家要過海都冇乎格", 又話收我地60蚊... (當時個錶50幾蚊)...

 

去到隧道口, 明明有路出番尖東, 佢就入線過海, 我地緊係大聲問佢做咩, 跟住佢又dum車, 又cut雙白線, 入咗安運道(過海巴士站隔離)迫我地落車, 但個樹明明唔可以落車, 想我地比車車死咩...

我地唔就範, 佢又駛前d去國際郵件中心, 迫我地落車, 個度落車點行去理工呀, 想我地比車車死咩... 個度根本唔會上落客, 所以連郵差都走過o黎目及下咩事...

之後佢就駛去梳士巴利道, 原本有幾個街口可以駛番入尖東, 我地亦大大聲叫佢跟人地d車轉, 佢都"啋你都傻"嘅死人態度, 一味係咁向前行, honey係咁問佢揸o架車去邊, 佢都唔答我地...

最後, 佢駛入彌敦道, 係半島酒店轉角, 雙白線+斑馬線+行人燈綠公仔迫我地落車, 仲賴可憐咁話收我地50蚊... 我地當時好有修養咁同佢講

"阿伯, 咁老就唔好走出o黎啦, 天寒地凍, 係屋企抖下好過啦, 唔好再出o黎害人啦, 即刻返屋企啦", 仲要特登慢吞吞咁落車, 希望有警察出現, 拉咗呢個害人精...

 

天寒地凍 + 天雨路滑 + 不斷亂dum車亂cut線, 我同honey講, 我地冇發生交通意外, 已經係奇蹟...

 

可憐我地倆個, 仲要由半島酒店行去理工, 咁借問聲, 我地為咩要搭的士呢, 仲要晒咗50蚊, 仲要隨時有生命危險, 仲要咁勞氣... 見佢咁老, 又唔可以大聲丙佢...

當時, 我真係好同情個位X打銀行嘅高層(打女司機被判入獄), 因為有d的士司機實在太劣質... 偏偏我又成日搭的士, 遇到劣質司機嘅次數真係唔少, 所以我呢半年冇咩必要都唔再搭的士, 令到好多好友都覺得難以置信...

新春行大運

今日(2008年2月10日)終於可以休息下, 唔使拜年, 咪同honeyo黎個"新春行大運"囉, 哈哈...

 

魚則魚涌 >> 西灣河 : 午膳

西灣河 >> 赤柱 : 下午茶

赤柱 >> 銅鑼灣 : 純粹見車就上

銅鑼灣 >> 魚則魚涌 : 打道回府

 

æ赤柱市集有鬼佬表演緊用芝士雕刻Cute版老鼠...

æ仲有桃花做背景, 好精細... 仲叫圍觀者試食切咗出o黎個d芝士碎, 嘔, 我就唔敢食喇...

æ之後發現咗條路行去北帝古廟同千年古井, 嘩嘩嘩... 竟然比我見到, 有個婆婆係岸邊捉緊海胆, 收穫仲好豐富咁, 簡直難以相信, 因為聽聞海胆係要係水源乾淨嘅地方先可以生長o架嘛...

æ路過銅鑼灣富豪酒店, 比佢個新開嘅商場個名嚇一嚇, 乜... 香港而家咁前衛嘅...

太古城中心 賀歲雜技迎金鼠

尋日(2008年2月8日)同honey屋企人食完飯, 離開時見到有人表演, 我就緊係即刻停低睇睇啦, 不過大家歸心似箭, 所以我只可以望兩眼...

今日路經時, 剛啱開始有人霸位等睇表演, 咁我見仲有位, 緊係唔執輸霸埋一份啦... 不過由於太精彩, 所以睇到最尾個個表演, 先記得拎個相機影下相, 所以就得呢一張喇...

** 中國杭州雜技團獻藝 **

做埋2月10號喳(有3場--14:30; 16:30; 19:30), 大家有時間記得去睇下呀, 好精彩o架!!!
詳情: http://www.cityplaza.com/chi/hot_promotions/coming_attraction_items/6.htm

 

今年太古城嘅佈置都唔錯...

不過我都唔弱... 呢個荷包花係我年卅晚放咗工之後, 過去維園買o架, 寓意"荷包漲漲", 呵呵呵呵...

你睇個日多人到吖... 仲落緊雨... 任務完成, 即閃...

我的低能之道 I & II

之前已經勁鐘意www.maggiemarket.com d公仔, 上次係會展書展見到第一集勁想買, 之後次次係商務見親都心郁郁... 上星期見力力有第二集, 送埋貼紙, 更加想買...

 

點知... 今日(2008年1月26日)睇報紙... ... 博益出版集團結業... 有與博益合作的作家稱，出版社關門大吉，又無意將版權售回作者，擔心大量經典暢銷書籍無法再版，從此成為「絕書」... 博益作家「馬仔」在其網誌表示：「一出就大賣，但轉頭又即刻變身成絕版書。」...

 

當時真係好擔心會買唔到... 所以放工即刻跑去商務... 呼... 好彩仲有啫...

 

轉載自...蘋果日報
http://appledaily.atnext.com/template/apple/art_main.cfm?iss_id=20080126&sec_id=4104&subsec_id=11867&art_id=10688347

石磨坊 Shek Mo Fong

前晚(2008年1月21日)同早食完翅, 力力就o黎join我地去食佢大力推介嘅甜品...

 

æ香芒黑糯米芝麻卷 : 招牌菜, 芝麻卷皮煙煙韌韌, 香芒微酸, 配埋份量唔太多嘅黑糯米, 三重口感, 勁特別, 值得再食!!!

æ芝麻糊拼栗子糊 : 好滑, 唔係開粉個隻, 值得再食!!!

æ奶黃蛋白燉鮮奶 :  聽早講, 都幾特別, 幾好味, 值得一試!!!

æ冰糖雪耳燉木瓜 :  力力咩都冇講, 一口氣食晒, 我估唔會難食啩!!!

æd碗碟好kawaii呀, 全部都印咗自家公仔o架, 好想買一套返屋企呀...

 

外傳:
上次食完山田, 坐忘命小巴再轉的士返屋企被拒載後, 今次再度被拒載...
我今次已經醒咗, 上車關門帶埋安全帶, 先至講目的地, 個司機話自己係過海車, 我問"過海車... 點解唔琴旗", 佢"嘖"一聲, 死死地氣開車... 再次呼籲大家, 遇到呢d敗類, 千祈唔好讓步呀!!!

 

是次每人消費約$24元
味道： 4 環境： 1 服務： 1 衛生： 3 抵食： 4

戰鬥指數

###

地址 : 旺角豉油街66號地下
電話 : 2398 9400

魚翅大排檔 Shark's Fin Restaurant

前晚(2008年1月21日)跟早去食翅, 見恆指跌咗千幾點, 以為唔使book位, 點知... 去到冇晒卡位, 仲叫我地坐十字路口位(週圍仲有大把位), 劣!

 

我地一心去試紅燒蟹肉生翅餐($298有翅+2個小菜+飯+糖水), 就緊係唔會錯過啦: -
. 紅燒蟹肉翅 : 砂窩上, 每人都可分兩碗, 都幾多排細翅, 唔錯唔錯;
. 三杯酒焗蟹煲 : 砂窩上熱辣辣, 蟹鉗好大隻, 味道一流, GOOD;
. 鮑片雞煲 : 都係砂窩上, 雞肉鞋過煲湯雞肉, 鮑 片足料, 味道唔錯;
. 薑粒雞蛋炒飯 : 炒得粒粒分明兼唔油, 加埋薑粒, GOOD;
. 紅棗蓮子燉雪蛤 : 清甜滋潤, OK

 

嘻嘻... 我地唔係剩係掛住食o架, 食好o野之前都去咗做d緊要o野o架... 就係去買利是封喇, 係咪好cute呢!!!

 

 

是次每人消費約$170元
味道： 4 環境： 3 服務： 2 衛生： 3 抵食： 3

戰鬥指數

###
地址 : 旺角彌敦道601號創興廣場
電話 : 2395 2000

勁辣派甜甜掌門(北角雞蛋仔)

今日(2008年1月19)去完奶奶大人度食飯, 搭巴士返屋企轉車期間, honey唔知做咩咁好興致, 話要食雞蛋仔, 排隊時仲問使唔使買2底, 唔使呀嘛?!

以前o黎過好多次都係老板joker整o架, 每次見到佢都想笑... 今日唔見咗佢喎, 可能係因為開咗好多分店(尖沙咀, 灣仔, 將軍澳)嘅關係...

大家睇下條龍幾長, 一年365日由早到晚都係咁多人... 排隊時一路都傳出陣陣香味, 好想快d排到... 佢已經有好多個夾蛋機o架啦, 但都係要排咁長龍, 人流可想而知... 裝雞蛋仔個紙袋中間開咗d小孔o架, 隔一陣食都仲好脆, 好細心...

好, 我拉姑係樹同大家拜個早年先, 祝大家身體健康, 荷包漲漲!!! (路過北角新港城時影o既)

###
地址 : 北角英皇道492號
電話 : 2590 9726

Pho Hoa 和越式牛肉粉餐廳

尋晚(2008年1月9日)又要去試菜啦, 好忙呀... 力力大力推介, 同係Toronto食過嘅一模一樣咁話喎... 早仲改咗個好勁嘅外號... 烈女飯局... 哈哈哈哈, 勁呢!!!

 

7點幾去到冇咩人, 可以揀梳化位, 正!!!

 

不過... 全程冇水飲, 明明離遠見到其他枱都有水嘅...

æ主角:生牛河--配料勁多, 又可以自己選擇落幾多, good!!! 湯底味濃, good!!! 牛肉都好嫩, good!!!

æ我叫咗個雜菜烤肉撈檬--d烤肉都唔錯, 但係d汁就好唔得, 好後悔冇叫生牛河... (原本話分d雜菜比力力嘅, 但係見到d雜菜仲小過生牛河d芽菜, 所以冇比到囉, sorry呀);
春卷--yummy;
牛油雞翼--d牛油味... 同平時食開嘅有d唔同, d雞翼放咗好耐先食, 但係一咬開, 依然出晒煙, 勁!!!
庶蝦--唔錯

食飽飽, 循例吹下水... 吹吹下又叫我地埋單... 再吹吹下, 個女侍應竟然同我地講廚房要噴剎蟲水, 叫我地即刻走, 費時焗親我地, 下次請早咁話... (但當時現場仲有其他食客, 咁嘅趕客功夫, 真係大開眼界)

是次每人消費約$90元
味道： 3 環境： 3 服務： 1 衛生： 3 抵食： 4

戰鬥指數

###

地址 : 尖沙咀寶勒巷26-36號
電話 : 2739 7688