La TASCA

9 December 2011, Friday

11月之星嘅壽宴終於排到期食啦!!! 今次貓兄搵咗西班牙菜... 原本打算去諾士佛臺食, 點知打去Book位時先知間餐廳已經變咗日本菜... 最後轉戰La Tasca!!!

KaKaMa由12點幾開始打電話打到3點幾先有人聽, 仲同佢講Full咗要Walk-in... 我因為唔知KaKaMa已經打通咗, 3:45pm心血來潮又試吓打去, 有人聽喎, 講咗幾句, D職員叫我講英文, 結果比我Book到位喎... 即刻Call KaKaMa先知佢早過我打咗去, 但係話Full咗囉... 呢單真係十大奇案一宗!!!

查實我好驚自己聽錯咗, 好驚去到D職員同我講原來我係Book唔到位嘅囉... 好彩, 最後都真係有留枱比我地... 原來間餐廳得幾張枱o架咋, 好多人Walk-in都撲空...

我地7點正去到, 正值Happy Hour (4-8PM), Sangria同Tapas都會平D...

難得咁高興, 一於飲番杯先!!!

Traditional Sangria Tinta (1 Liter Jar)--餐廳用紅酒加入自己嘅特制配方同埋新鮮蘋果炮製而成嘅西班牙國酒「血紅雞尾酒」, 大家都一致認為好飲!!! 滴酒不沾嘅我都忍唔住湊吓熱鬧飲咗一杯, 好彩第二日唔使去睇醫生啫... 唔知係咪酒精影響, 大家吹水都吹得特別放... 餐廳方面又播放超大聲嘅音樂, 咁我地幾大聲講o野同喪笑都唔驚嘈到隔離枱啦...

遲咗20分鐘都未見人嘅KaKaMa, Send Message話仲要遲多15分鐘先到... 佢嘅好友鑽媽今日破格準時出席, 大叫肚餓, 唯有叫住D Tapas(西班牙小菜)比佢食住先啦...

我比較少食西班牙菜, 所以好多字都唔識, Order前都要查吓字典先... 好鬼大鄉里呀, 哈哈哈...

Serrano Ham and Melon--哈密瓜超甜呀!!! 不過D Ham一味得個鹹字, 冇咩肉香...

Potato and Chorizo Tortilla--煎蛋餅好好味呀!!! 整多幾舊o黎都食得落呀!!!

Serrano Ham w/ Crusty Tomato Bread--呢個Tapas都好味呀!!! 個包好脆, 加埋D蕃茄粒, 好清新呀!!!

食完晒3個Tapas, KaKaMa都仲未見人, LaLa聲叫D職員收走晒D碟扮冇事發生過啦, 嘩咔咔咔... (當然, 我地明知KaKaMa睇Blog都會見到我地嘅惡行啦, 正所謂天理昭昭, 真係有做過嘅事又點可能隱瞞到呢... 不過咁, KaKaMa, 冤有頭債有主, 都係鑽媽嘈住話肚餓咋, 你要搵就搵佢啦, 哈哈哈哈)

食完一輪又再Order第2輪, 落完Order, KaKaMa終於都現身喇!!!

Mussels Vinaigrette--我覺得好好味喎!!! 大大隻青口上面鋪滿蕃茄粒洋蔥粒青椒粒, 配埋白醋醬汁, 好清新, 食落開胃又醒神!!! 不過鑽媽話青口冇咩青口味喎... 又真嘅...


Beef Nachos--呢個芝士玉米片好好味喎!!! 同平時食過果D唔同, 呢個玉米片暖暖地, 好脆口, 芝士都幾香, 食到唔停得口, 我比個"讚"佢!!!


Lamb Ragout--呢個蔬菜燉羊肉都好正, 雖然好細碟!!! 羊肉好淋, 一D都唔酥... 配埋熱辣辣脆Pop Pop嘅麵包, 正!!!

Paella (Spanish Fried Rice with Sea Food)--呢個西班牙海鮮炒飯就麻麻地啦... D飯唔夠濕, 乾硬咗D, 香料味亦不足, 偏淡... 蝦冇了走D黑蚊蚊嘅蝦腸, D蝦肉都唔彈牙...

Pata Crujiente (Crispy Pork Knuckle "Spanish Style" served with crust potato and white cabbage salad)--呢隻西班牙烤豬手真係最晚最差嘅一味, 肉質比美乾柴... 配菜薯蓉就幾好食, 好香牛油味... 嘩, D酸菜真係酸到打冷震, 不過聽貓兄指示將酸菜同豬手一齊放入口, 又即刻冇咁難食喎真係...

餐廳入面嘅燈光極之昏暗, 加上門口2張枱不停煲煙, 我地又飲咗酒, D音樂又嘈到頭都爆, 所以一食飽咗個人就開始暈吓暈吓...

鑽媽個女又發燒, 老公又出Trip, 所以大家一食飽就要散水...

一步出餐廳, 寒風澟澟, 即時成個人醒晒!!! 同貓兄&龍媽散步去永安Shoppong... 行完一陣成個人舒服晒... 餐廳入面真係太焗啦... 

行到永安都閂門, 我地仲落西鐵站飲o野繼續吹水, 吹到11點幾先散水, 好Crazy... 不過好Happy!!!

後話 : 鑽媽叫我一定要寫低D咩係Blog, 以防佢忘記咗... 之但係... 我未趕得切寫Blog記低就已經忘記咗啦... 哈哈哈... Sorry呀鑽媽, 請你原諒我呢個比你更"老人痴呆"嘅人...

是次每人消費約$220元
味道： 3  環境： 3 服務： 3 衛生： 3 抵食： 4
###
地址 : 尖沙咀河內道8號地下
電話 : 2723-1072

悅香飯店 Yuet Heung Restaurant

8 December 2011, Thursday

今日落灣仔做完o野, 順便食埋晚飯... 朋友推介「悅香」, 見近近地, 咁我就去試吓啦...

金牌香妃雞(半隻)--雞脾打人牙骹軟!!! 食完呢隻又滑又彈嘅巨型雞脾, 副牙骹好難唔軟... 淡淡嘅鹹味, 好適中... 呢隻雞果然係招牌貨, 讚!!!

土魷蒸肉餅--食落好似唔係熟透咁, 土魷有D軟殼未清, 肉餅切粗粒, 口感好過免治肉餅, 正所謂有咬口!!! 仲有... 食肉餅有肉餅味, 哈哈哈~


餐廳裝修似60-70年代, 仲有樓上, 一層唔係好大, 10張枱左右...


個收銀阿毛唔知係咪唔開心, 定天生係個嘴向上彎, 鎮守係大門口... 如果唔係朋友推介, 我真係唔敢入o黎食...

服務員都係上咗年紀一族, 食完半隻雞都冇換過一次碟, 我都冇怪佢地嘅... 起碼我覺得佢地都OK有禮貌嘅...

個厠所就真係倒胃口... 得1格, 似係好多人用過都冇水沖厠, 堆積咗好大堆嘅厠紙同液體, 餐廳方面亦冇提供水桶比客人自行沖水, 可能因為個厠所細到放水桶嘅位都冇... 而家諗起都仲有少少反胃...

是次每人消費約$130元
味道： 3  環境： 2 服務： 2 衛生： 1 抵食： 2
###
地址 : 灣仔譚臣道105-107號地下
電話 : 25747110 (上層) / 2575 5367(下層)

輝哥海鮮火鍋 Fai Seafood Hot Pot Restaurant

3 December 2011, Saturday

好凍呀... 今日!!! 著咗抓毛外套都唔夠暖, 點算好呀?!! D溫度又會DROP得咁急嘅??? 唔係啦, 搵個邊爐打吓, 暖吓身先... (我同Honey 1年都打唔夠5次邊爐, 今日緊係凍到傻咗定喇)

諗住CALL埋太古之友一齊食, 點知佢地已經BOOK咗位, 利害!!!

BOOK咗7點, 我地早咗10分鐘到, 原本帶位要我地坐入口路邊位, 我唔肯, 明明大把好位, 又未有客, 點解要比張最差嘅枱比我?!! 最後安排咗梳化位, 仲有私人掛牆電視, 5個人可以圍埋一路打邊爐一路睇電視, 咁先係o架嘛~


7:15PM 都仲未見人嘅?!! 好少可咁遲喎... 服務員突然走埋o黎問我地用咩名BOOK枱, 答完佢就人影都唔見埋, 都唔知發生緊咩事之際, 朋友就出現, 仲大發雷霆!!! 原來個帶位帶咗佢上3樓之後, 隔咗十幾分鐘, 竟然鬧佢做咩坐咗人地張枱!!! 吓?!! 十幾分鐘前你帶佢上去叫佢坐低o架喎!!! 失憶呀?!!

終於人齊, 仲未有o野食... 混醬!!!

招牌清湯--仲以為清湯係得2粒X樂牌雞粉開水, 原本都有D材料o架喎... 呢輪真係睇得太多廣告啦, 洗晒腦, 哈哈哈... 嫌呢個湯底太清??? 唔緊要, 仲有16款比你揀, 緊有1款啱你口味...

手切鮮肥牛--D肥牛個樣都幾得, 雪花分佈唔及和牛, 但係都還可以啦... 肉嘅色澤都唔錯, 絕對新鮮... 仲一開二咁切到好似大大片咁, 好刀法!!! 食落口都唔韌喎, 都有少少牛肉味, 唔錯, 唔錯...


什錦餃子盆, 手打墨魚丸--餃子皮超薄, 睇D皮似係新鮮整, 唔似街外貨, 味道都OK... 手打墨魚丸好膠呀, 都幾彈牙, 仲好新鮮, 總之就係好味啦!!!


鮮付竹--OK呀...


野生黑木耳--點解... 係啡色嘅??? 切得好大塊吓喎... Honey話都食落都OK...


哎呀!!! 最好味嘅超甜粟米冇影相添!!! 我地仲食咗生根, 白菜仔, 手打烏冬... 飲埋幾支啤酒, 再加1 JAR酸梅湯1 JAR竹蔗水... 埋單210蚊1個人, 都唔算平, 不過食物質數都OK, 坐得都幾舒服, 再食都無妨~

吖... 個厠所先經典!!! 入去見到2個鐵水桶扮洗手盤, 厠枱係用鐵皮分隔, 木門嘅鎖係古時一條木打橫"恤", 稱唔上係鎖, 好攪o野~

是次每人消費約$210元
味道： 3  環境： 4 服務： 3 衛生： 3 抵食： 2
###
地址 : 灣仔謝斐道313-323號1-2樓
電話 : 2832 2836/2832 2062

華麗銀幕聖誕 Silver Screen Christmas Delights

2 December 2011, Friday

踏入12月, 到處都開始佈置好聖誕裝飾, 太古城亦唔例外... 華麗銀幕聖誕 (Silver Screen Christmas Delights)... 好華麗嘅主題!!!

我要做冰雪女巫!!!

獅子...


皇宮...

### 華麗銀幕聖誕 小檔案 ###

http://www.cityplaza.com.hk/eng/hot_promotions/event_calendar.htm

搜羅國際知名奇技藝人、音樂劇團及魔術師連續三星期帶來幕幕精彩演出！

日期 : 1/12/2011 - 2/1/2012
地點 : 2樓中庭

香港海防博物館 Hong Kong Museum of Coastal Defence (III)

27 November 2011, Sunday

今日天氣實在超正!!! 晴空萬里, 香港真係一年冇幾多日, 一定要去行吓山舒展吓身心... 不過夜晚要返學, 唔可以玩得太攰, 幾好呢...

嗯... 可以去筲箕灣嘅海防博物館喎, 我地張年票又就o黎到期, 唔好蝕比佢嘛...

我地之前已經o黎過2次, 想睇多D相可以睇番我嘅舊BLOG...

今日主力用部 iPhone 4S 試機... 可能太陽實在太猛, 所以影出o黎D相質數都唔錯... 哈哈哈... 我自己覺得啫...

千奇百趣煙囪樹... 封咗維修, 唔入得去, 激死...

魚雷呀~

海呀~ 哈哈哈哈... (低能-ing)

避風塘呀~


對上2次o黎都係爆多人, 今次就人都唔多隻... 唔知係咪同館內過半數設施都維修中有關... 乜D人咁醒o架, 識一早CHECK定... 好彩我地今日都係志在行上行落當行吓山運動吓啫... 如果一心想參觀嘅就真係撲空啦~

安利魚蛋粉麵 On Lee Noodle

27 November 2011, Sunday

舊年由小西灣行到大浪灣, 然後坐小巴到筲箕灣東大街搵食, 朋友想食安利, 不過我地排咗半個鐘都冇起色, 另一個朋友已經走咗去酒樓攞位... 唉... 乜咁o架... 冇機會試新o夥添...

今日晴空萬里, HONEY好好興致咁話早D去應該冇咁多人排隊...

11:45AM到達... 等咗5分鐘左右就有位... 比預期中快... 好彩...

其實天氣已轉涼, 不過餐廳入面實在太多人, 攪到好似冇冷氣咁, 連我都標晒汗... 仲要同4個陌生人坐埋一張枱, 佢地刻意"呀"開對脚同手o黎坐, 迫到我同HONEY要縮埋一齊食, 好辛苦... 唯有快D食完快D走...

餐牌右下角有米芝蓮公仔, 唔知係找咗米芝蓮咩名堂...

切腩魚片撈粗--招牌菜!!! D撈粗用豉油撈斗咗, 好好好味呀!!! 我本人係唔鐘意食撈麵, 但係佢呢個撈麵真係好正!!! 牛腩都幾入味, 又夠淋, 可惜薄如蟬翼, 有少少美中不足~

魚蛋魚片河--招牌菜!!! 魚片爽口, 魚蛋又滑又彈牙, 河粉都滑過人, 難怪咁多人排隊...

菊花蜜--糖水一杯...


12:15左右離開, 門口已經堆滿人, 同我地上次食唔成果時一樣... 呢度起碼要等45分鐘啦最少...

服務員態度友善, 值得一讚~

價錢唔算貴, 不過都唔算平, 最慘係... 我食唔飽囉...

食完就出發行去香港海防博物館 (Hong Kong Museum of Coastal Defence)...

是次每人消費約$35元
味道： 3  環境： 1 服務： 2 衛生： 2 抵食： 3
###
地址 : 筲箕灣東大街22號
電話 : 2513 8398

微型公仔屋 の 西瓜爆炸新聞 (Dollhouse Miniature)

19 July 2011, Tuesday

近期西瓜自爆係熱烘烘嘅新聞, 無良農民落咗膨大劑落西瓜度, 想佢大隻D, 結果爆開晒, 真係天有眼~ 如果比人食咗呢D化學品, 容咩易個人都爆開埋o架~

不過唔知係咪我D用樹脂黏土做嘅1:12迷你西瓜糖都落咗膨大劑, 結果係糖果櫃度爆晒出o黎, 哈哈哈~

實情係... 第一次做, 唔係好識預D份量啫... MISS叫我整5條西瓜切開, 我就真係整5條... 而家唸番, 應該整3條乜都夠啦~

後記 : 幫襯咗小蜜蜂糖果店之後, 先知道西瓜糖唔係切薄片嘅, 而且長條三角形, 激死...

微型公仔屋 の 迷你朱古力店鋪 (Dollhouse Miniature の Chocolates Shop)

29 October 2011, Saturday

DaDaDaDa... 大家快D o黎睇吓我嘅「第2間」1:12微型公仔屋啦喂!!! 
 
「微型公仔屋 の 迷你朱古力店」(Dollhouse Miniature の Chocolates Shop) 隆重登場!!!