Ken & Merry 為食男女，遊走世界!!!

2008年8月21日星期四

美食博覽2008

上星期五即興同早兄去咗美食博覽... 會展擴建緊, 要經海旁行入新翼, 雖然太陽已經落咗山, 但係依然超辛苦... 排咗半個鐘先買到呢張飛, 未入場個身已經臭晒...

我地入去唔係抬柴米油鹽, 而係睇下有冇d特別d嘅食物... 首站食咗Pappagallo嘅意大利鮮果雪葩--新口味--菠蘿, 超超超好味...
(官方照片)

迫完雪葩又要去迫台灣雪梅娘... 我地試咗士多啤梨味同芒果味, 好味到吖, 連路人都忍唔住要問我地係邊度買... 仲食咗台灣腸仔, 勁好味...
最後買咗一檔類似士多啤梨冰粒嘅小食... 一盒5粒(3粒裝賣晒)... 嘩嘩嘩... 難食到吖...

由於唔係太多未見過嘅食物, 所以只係買咗好得意嘅一億Yen雪魚片比同事們... 仲有超級mama腸比自己... 可謂收獲不大...

早兄之前託朋友買比我嘅平安麭吸印仔... 勁鐘意... 感動-ing...

2008年8月20日星期三

渢竹自助餐 Bambu

買一送一"暴肥"... 我來也...

早兄同維記讚不絕口嘅脆脆燒肉同燒鵝脾... 嗯... 唔錯唔錯...

魚生同壽司... 嗯... 一般貨色... 食完冇肚痛, 衛生方面冇問題...

凍熟海產... 嗯... 蟹腳好鹹... 其他唔敢試...

Honey自制車仔麵... 嗯... Honey話好好食...

其他... 嗯... 見張相咁細, 各位冰雪聰明嘅讀者都估到咩料啦... 魚柳除外...

木糠蛋糕... 嗯... 食一件味道都OK嘅, 食多一件就會覺得唔好食, 大家千祈唔好貪心...

蛋撻... 嗯... 麻麻地, 聽Honey講個皮好硬, 咬唔開... 其他甜品都麻麻地... 除咗朱古力蛋糕, 因為好味到令早兄係不知不覺間, 食埋我個件... (秋後算帳-ing)
仲有紅豆雪糕, 味道都OKo架...

學DD話齋, 唔係有買一送一, 真係唔會食!!!

是次每人消費約$120元
味道： 2 環境： 4 服務：2 衛生： 3 抵食： 4

###
地址 : 氹仔澳門威尼斯人度假村酒店1樓1033
電話 : (853) 2882 8888

2008年8月19日星期二

澳門威尼斯人 Venetian Macao

呢排好多friends都相繼去咗威威享受人生... 上星期一(2008年8月11日)終於到我同早兄去踩場...

因為要用盡Package優惠, 所以迫住坐金光飛航過去, 一如多數網友所言, 非常混亂, 取票混亂, 入閘又混亂, 大家真係要預早小小去, 唔係實要同班船講拜拜...

到達氹仔碼頭個陣, 突然風大雨大

, 原定去皇冠飲茶兼參觀, 都要改為直接去威尼斯人... 有一樣好值得讚嘅係, 我地12點幾到達, 竟然可以預先Check-in(有房可以即刻上房, 冇房都可以拎咗房匙先, 然後一得就Send SMS比你通知房號), 我地之後去咗賭場入面嘅"喜粵"飲茶食點心, 2點半已經收到SMS可以上房...

間房真係好巨, 設備又齊全, 正到暈... 已經開咗一年都仲咁新淨, 算唔錯...

嘆完間房, 繼續用盡Package優惠, 去"渢竹"食買一送一自助晚餐... 由於十人以上先有得訂位, 所以排隊場面相當墟冚... (另有篇幅作詳細報導)

食飽飽都係Package優惠環節, 就係Gondola Ride(貢多拉船)... 我地好好彩, 個船伕表情多多超爆笑(私房相簿有佢嘅專輯)... 唱God Father仲好聽過D Actor... 連唱2首經典意大利情歌, 真係好似置身意大利嘅威尼斯一樣, 浪漫到暈...

跟手去玩一陣老虎機... 之後就係酒店入面游盪... 如果大家想好似我咁, 影D"人影都唔多隻"嘅靚相, 只要係晚上11時後或早上10時前, 都可以好盡情咁影...

早餐繼續Package環節, 我地8點半就去到"峰景"食免費早餐Buffet... (太難食, D食物又凍, 仲見到有印巴籍人仕拎住隻碟企係Buffet枱側邊用手進食中... Honey食咗小小仲即刻肚痛... 不作詳細報導)

Checkout後就去咗Wynn欣賞吉祥樹表演... 每30分鐘一次...

我地路過Wynn嘅表演湖個陣, 佢無端端開動, 我地又可以順便欣賞下, 哈哈... 每15分鐘一次...

旅遊書中提及嘅MGM"巨型"車站... 被騙了... 叫"微型"車站就差唔多...

參觀完就拿拿聲飛去食過番尋味嘅瑪嘉烈蛋撻(Margaret's Cafe e Nata)... 件Pizza... 麻麻地... 只係唸住食埋佢當Lunch會飽D咁啫...

第二日天公造美, 可以去松山燈塔試機... 影咗好多張相之後, 終於影咗張合心水嘅靚相... 我唸Honey對呢個

生日節目應該滿意啩...

臨上船仲未食午餐+晚餐, 見有小小時間, 去咗美食廣場嘅"大阪一番", 食咗腐皮烏冬同鐵板燒餅, Yummy!!!

終極Package優惠, 用"蝕D Bank"信用咭訂房送嘅貢多拉小狗... 要比錢嘅話... 小狗唔使旨意跟我返屋企, 哈哈哈哈...

號外: -
1) 背包被扒 -- 上咗去氹仔碼頭嘅Shuttle Bus個陣, 竟然發現自己個背包3格有2格比人打開咗, 超恐怖, 乜呢度D治安咁嘅... 好彩有1格係吉嘅, 另外1格得D垃圾(話梅, 縮骨遮, 腳架, 暈浪丸, etc), 零損失!
2) 收到假幣 -- 返到香港竟然發現一個從未見過嘅2蚊港幣... 激死... 下次我會望真D!
3) 手信失收 -- 因為截咗半個鐘都截唔到的士, 有車個陣已經要趕住去搭回程船, 去唔到手信街, 零收穫, 嗚嗚嗚嗚...
4) 死Notebook -- 返到屋企懶勤力, Check公司Email, 突然藍畫面, 竟然有人夠膽死Send D毒比我, 有NXX防毒軟件都中晒招, 之後幾日都要搶救... 我話過, 以後唔會再係屋企Check公司Email...