網頁清單

2013年7月25日 星期四

[拜師學藝] DIY全城熱搶「元祖」酥皮奶皇月餅 @ 望月

20 July 2013, Saturday 

去年半島酒店嘉麟樓迷你奶黃月餅「瘋搶」事件, 400人一早在店外排隊輪購月餅券, 一小時內售罄, 只有數十人成功購買, 要出動到警方到場調解, 擾攘七小時才告平息... 相信各位香港人應該仲記得啩...

當時同事買咗一盒半島酒店的迷你奶黃月餅請大家食... 嘩!!! 咁都買到, 咁勁?!! 後來上網做吓Research, 原來有d叫做半島酒店「非嘉麟樓」的奶黃月餅, 係半島精品店 (Peninsula Boutique) 出品, 其實我覺得有混淆視聽之嫌囉, 不過唔使錢有人請, 當然唔可以有咩投訴... 講真, 味道真係唔得, 奶黃味無咩之餘, 仲要乾掙掙, 要錢買的話唔好預我...

就係呢個時候... 竟然... 比我發現有朋友去咗長沙灣學整酥皮奶黃月餅, 由葉潤發師傅親自教授... 又上網做吓功課先... 嘩嘩嘩!!! 不得之了!!! 原來葉潤發師傅於1986年加入半島, 係前半島酒店嘉麟樓中式點心顧問, 亦係酥皮奶皇月餅始創人, 可謂「元祖」級人馬, 去年更以自家品牌「望月」www.wangyue.com.hk, 推出手造奶黃月餅, 全城熱搶!!!

但係... 當時的酥皮奶黃月餅課程竟然已經全部Full晒, 激死!!! 唯有係Calendar入定Schedule, 今年6月響Alarm提醒自己報名啦... 哈哈... 真係好鬼誇張嘅啫... 最後呢招成功咗, 比我報到, Yeah~~~


不過... 今年唔再係葉潤發師傅親自教授... 但係都仍然好想學...

話實, 第一次上$580得3粒鐘的烹飪班, 真係幾貴, 見有得報名時頭腦已經被衝昏, 冇理會價錢, 到朋友比返錢我時先驚覺原來咁貴... 不過又咁, 望月的迷你酥皮奶黃月餅1盒8件都賣成HK$208, 烹飪班有16個即係買都要HK$416, 咁即係加多HK$164已經可以學3粒鐘, 計落又好抵玩喎... (自我催眠-ing)

期待已久, 卻因剛病了一個星期, 身體抱恙, 尋晚痛到瞓唔到, 都好擔心今日上唔到堂, 好彩意志力頂得住, 不過就全程痛到講唔到o野同無咩笑容囉...

第1次來長沙灣的創意西點教室, 設備都幾齊全, 有2個大電視, 唔驚睇唔到老師的示範, 地方又寬敞, 有Locker擺o野, 有膠櫈仔坐, 仲有4-5個助手從旁協助, 一切都Feel Comfortable~ 


焗爐同蒸爐以開放式廚房形式分隔, 熱氣唔會走出來, 所以學習區冷氣非常強勁, 有別於一般熱到標汗的教室, 好爽呀!!!


周新師傅示範中...


示範完畢, 幾省鏡~~~ 得老師的餅模係「望月」標誌, 我地的餅模只是花花草草的圖案...


到我地獄廚神出馬!!! 首起, 將預先準備好的奶黃餡料分成16份, 壓成圓形, 將預先準備好的鹹蛋黃放入奶黃餡料中間, 慢慢推摺奶黃餡料將之封口, 制成品可以睇下一張相深黃色的圓波波...


第2步, 將預先準備好的酥皮分成16份, 用保鮮紙蓋住以保持濕氣... 包1個取1個...


將酥皮壓成圓形, 中間厚圍邊薄, 將奶黃餡放入酥皮中間, 慢慢推摺酥皮將之封口, 封口處摺成水滴形...


制成品可以睇下呢張相淺黃色的水滴形波波... 第3步, 壓模!!!


木模上拍少少麵粉, 月餅上又碌少少麵粉, 記得將多餘的麵粉拍走, 圖中的是錯誤示範... 將月餅放入木模, 水滴(月餅底部)向上..


用4隻手指將月餅向上下左右推, 直到月餅填滿花邊, 用掌心壓平月餅, 呢一下好重要, 要運勁d花紋先明顯o架...


木模打橫, 月餅向左, 木模頂部"亨"落砧板幾下, 至月餅離模, 再反轉木模, 月餅向右, 木模頂部"亨"落砧板幾下, 至月餅離模, 再反轉木模, 月餅向下, 左手放係木模下方準備接住"亨"出來的月餅... 重要關頭, 要好小心, 跌咗落地就冇o架啦... 我朋友就死咗2件...

7星陪月, 個樣唔錯呢... 只要放入焗爐, 280度, 焗10分鐘就大功告成o架啦~~~


老師示範的16個月餅已經焗好了, 好香呀!!! 老師將迷你月餅切開, 比大家試食... 嘩嘩嘩!!! 好正呀!!! 個皮超鬆化, 奶黃餡香到暈低, HK$580, 抵晒啦!!! 唔好講咁多, 食多2件先...


DaDa... 到我地的制成品出爐啦, Yo Ho~~~


好熱呀!!! 要放係鐵架上面攤涼... 咦?!! 點解... 我會有1個「望月」標誌嘅月餅嘅?!! 又話師傅獨家嘅?!! 嘻嘻... 其實係咁嘅... 話說呢, 我個Friend呢, 咪離模時跌咗2件落地嘅, 咁師傅切佢的示範月餅比大家食時, 切剩咗幾件, 我見朋友咁慘, 咪開聲問師傅可唔可以比2個佢補數, 師傅好好人, 一口答應, 個一刻好開心呀, 我地2個即刻不停多謝師傅啦... 咁朋友有2個, 問我要唔要1個, 我就用1個自己的制成品同佢交換囉... 嘻嘻...


攤涼咗就可以落紙模入盒, 見到自己的制成品隻隻都咁靚仔, 1隻都冇爆餡, 真係有少少感動到想喊... (又或者係意志力消失, 痛到想喊)


再等第2批月餅焗起時, 師傅就示範埋點樣做奶黃餡, 又講解點樣處理鹹蛋黃, 又示範埋點樣做酥皮, 最後講解埋點樣開木模同保養...

Copy自「望月」Facebook Fanpage : 新買的木模在使用前要做點功夫:先把木屑清理乾淨,然後拿濕布從頭到尾抹一遍,切忌浸水,然後用油浸透模心,浸過夜後用廚房抹手紙索走剩油,月餅模就用得啦! 月餅模要入好油,D月餅先會聽聽話話咁跌出黎架!

距離農曆八月十五仲有個幾月, 由於呢批月餅不含防腐劑, 都等唔到中秋o架喇... 師傅話, 新鮮做起的月餅, 3日內食最好, 因為椰汁的香味仍在, 吓?!! 咁3日後點算呀?!! 師傅加咗椰子粉, 所以都仲會有椰子味, 但香味會略遜一籌... 咁放係雪櫃可以放1星期都冇問題, 拎出o黎食時, 用焗爐翻熱, 焗6分鐘至牛油散發香味, 咁就最Wonderful喇!!!
果晚返屋企, 未雪前急不及待叫Honey試吓味, 佢咬一啖已經話好好味, 佢仲食完1件又1件... HK$580, 抵晒啦, 嘩咔咔咔~~~

拉姑出品, 迷你酥皮奶皇月餅 -- 大成功!!!

你都想學?!! 明年請早!!! 因為今年最後的堂係7月27日, 已經一早Full了~ 師傅話舊年報唔到的同學, 舊年已經報定今年5月的堂, 勁呀!!! 

### 課程資料 ###

內容: 製作 16 件酥皮奶黃月餅
日期: 20/7/2013 (星期六)
時間: 15:00 – 18:00
地點: 創意西點教室 The Institute Of Baking Arts
地址: 長沙灣道681號貿易廣場G/F 3號
導師: <<望月>>周新師傅
名額: 20
價錢: $580.00

8 則留言:

  1. 我都食過一次,感覺唔錯
    [版主回覆07/26/2013 20:33:18]Yeah~

    回覆刪除
  2. 見到都想食
    [版主回覆07/26/2013 20:34:05]堅好味~

    回覆刪除
  3. 吳獅皇(Assemby)2013年7月26日 下午7:36

    ~~~謝謝分享。
    [版主回覆07/26/2013 20:34:20]謝謝來訪~

    回覆刪除
  4. 好勁呀~~月餅你都識整~~
    [版主回覆07/28/2013 00:45:39]嘻嘻, 唔係我勁, 係師傅的30年做月餅經驗勁, 我咁渣佢都教得識, 個個同學臨走前都爭相同師傅合照~

    回覆刪除
  5. Dear Blogger,

    We are the PR company and would like to invite to join

    預告片﹕http://www.youtube.com/watch?v=Jyv1hcMDM2Q

    微電影在29/7有分享會,火火導演同泥鯭會分享拍攝心情等事,

    日期:29/7/2013

    時間:1530-1630

    地點:Backstage Live Restaurant

    地址:1/F.,Somptueux Central中環威靈頓街52號

    出席嘉賓:火火/泥鯭/稻香代表

    主持:李漫芬(TVB)

    Gift: 稻香精美月餅一盒!

    名額10個, 有興趣可發email: henry@zoapcon.com or 90419925 聯繫

    http://blog.qooza.hk/fcxvvt03?eid=26597673
    [版主回覆07/28/2013 00:43:32]很多謝你的邀請, 我也很想出席, 但真的對不起, 我感冒咳, 不想到來傳染給大家~

    希望下一次可以參加~

    回覆刪除
  6. 月餅似模似樣
    [版主回覆07/30/2013 22:05:39]HeHe... Thank you!!! 無爆開真係萬幸~

    回覆刪除
  7. 我記得去年看過報章介紹葉師傅。
    [版主回覆07/31/2013 22:17:43]係呀, 佢網頁有好多剪報~

    回覆刪除
  8. 嘩 超勁啊!! 看到都好想食
    [版主回覆08/03/2013 21:51:48] Thank you ar~

    P.S. 真係好好味, 只食剩2個, 唔捨得食~

    回覆刪除