網頁清單

2012年6月5日 星期二

西歐「文藝復興」2012の凡爾賽宮, 法國 (Versailles, France)

1 May 2012, Tuesday
 

5oC - 19oC, Cloudy 
~ 凡爾賽宮小檔案 ~

凡爾賽宮位於法國巴黎西南郊外,1979年被列為聯合國教科文組織的「世界文化遺產(UNESCO World Heritage)」。花園覆蓋約800 公頃土地。

凡爾賽宮所在地區原來是一片森林和沼澤荒地。1624年,法國國王路易十三在這裡修建了一座二層的紅磚樓房,用作狩獵行宮。1682年路易十四宣布將法蘭西宮廷從巴黎遷往凡爾賽。主體部分的建築工程於1688年完工,而整個宮殿和花園的建設直至1710年才全部完成,隨即成為歐洲最大、最雄偉、最豪華的宮殿建築,並成為法國乃至歐洲的貴族活動中心、藝術中心和文化時尚的發源地。路易十四還修建了大特里亞農宮和馬爾利宮。路易十五和路易十六在凡爾賽宮花園中修建了小特里亞農宮和瑞士農莊。1789年10月6日,路易十六被民眾挾至巴黎城內,凡爾賽宮作為王宮的歷史至此終結。直至1833年,凡爾賽宮才被修復為歷史博物館。
凡爾賽宮的建築風格引起俄國、奧地利等國君主的羨慕仿效。聖彼得堡的夏宮、維也納的美泉宮、波茨坦的無憂宮、以及海倫希姆湖宮都仿照了凡爾賽宮的宮殿和花園。


我地終於都有今日啦!!! 凡爾賽宮係今次歐洲之旅嘅1級重點, 最核心嘅核心價值!!!

何解咁緊要?!! 皆因冇去過凡爾賽宮, 又點算去過法國呢!!! 10年前法國自由行咗3日2夜, 齋玩市中心都唔夠時間喇, 仲點去咁遠吖... 10年o黎對凡爾賽宮念念不忘, 報2次都去唔成嘅法國深度遊, 今年再報前睇真d, 嘩!!! 原來冇得去凡爾賽宮o架!!! 走難團都係得KUONI有去, 翠明走難團都冇去... 冇得揀, 唯有試吓跟KUONI, 反正d朋友跟完埃及團都讚不絕口, 應該冇乜大問題啩~

講返波恩呢間酒店(Mercure Beaune Centre)真係驚喜連連~ 繼尋晚上4道菜要個半鐘、房門開極都開唔到、行李箱都唔見埋之後... 今朝又再創新猷!!!

早餐係好似豐富過之前幾日, 有齊果醬、蜜糖、朱古力醬, 不過我地準時到達餐廳, 仲有半團團友未到, d炒蛋已經冇晒!!! 其實好少事, 叫服務員Refill咪得囉~ 點知... 服務員拒絕Refill!!! 唔係呀嘛?!! 唔肯Refill?!! 炒蛋咋喎?!! 我地仲有半團人未到餐廳喎?!! Cheap到咁, 咩酒店自助餐o黎o架?!!

呢鋪真係「冇叉用」喇!!!
坐低個位嘅Setup得刀同湯匙, 有冇怪到咁呀!!! 問個服務員拎叉, 佢點我去出面Buffet枱拎, 但係果度一早比人拎晒啦, 有得拎嘅我仲使問你咩!!! 同佢講"No More Outside"幾次, 佢仲唔信, 走去望吓, 望完都隔咗好耐先拎d叉入o黎... d叉一到, 係Buffet枱拎緊食物嘅團友一擁而上, 好彩我行到出去仲有幾隻剩咋, 唔係又要搵果個服務員拎得o黎, 架旅遊巴都開喇~

8:30AM 食飽飽就出發啦!!! 要坐成4個鐘頭旅遊巴先去到凡爾賽宮o架!!!

中途站外面嘅油菜花田靚到爆, 團友們都爭相留倩影~


12:30PM 食完早餐, 坐足4個鐘頭車, 一落車又食午餐喇, 想唔肥都難啦~

「Mandarin Royal 富豪酒樓」--呢餐味道真係Super Good!!! 每次去到歐洲都極之掛念嘅叉燒, 呢度居然有得食, 仲OK好食添, 太太太感動喇!!! 香草燒雞實在太好味啦, 牛"月展"都得, 紅燒豆腐好搶手, 冬菇生菜同煎蝦碌都可以, 唔係因為要減肥, 真係好想添飯呀!!! (呵呵, 我果碗飯都唔細o架啦) 

食飽飽, 服務員高度推崇佢地d橙係「西班牙橙」, 話呢隻橙靚過我地食開嘅"新奇事"多多聲, 香港冇得食o架!!! 團友們聽到如癡如醉, 居然叫佢賣幾個o黎食下... 要50蚊3個, 團友們都話抵照買, 仲話"私私縮爬"d生果都要咁嘅價錢啦~ 原來團友們咁識食嘅, 失敬失敬!!!

步近凡爾賽宮, 好興奮呀~

凡爾賽宮正面入口嘅大理石庭院, 好大呀, 使唔使咁大呀?!! 冇遮冇掩, 仲要暗斜, 想攰"屎"人兼曬"屎"人咩~ 有團友腳痛, 索性唔入去, 嘥料d囉~


今日係五一勞動節, 係法國假期, 凡爾賽宮(The Palace of Versailles)休息一天, 關門大吉!!! 嗚嗚嗚嗚... 冇得入世界聞名嘅鏡廳(鏡廊 The hall of Mirrors), 我唔制呀!!!

硬食閉門羹嘅, 又何止我地呢... 你地睇, 金閘外堆積咗幾多遊客...


好彩花園冇閂, 繼續開放比遊客入內參觀... 好, 我地入去啦!!!

拉托那噴泉 Latona fountain~ 天呀!!! 點解d法國皇帝咁識嘆o架?!! 個花園靚到咁嘅?!!


好Lucky地, 沿途都有團友互相幫忙拍合照... 影吓影吓... 就影晒d時間lu... 搞到之後要上演一幕「奪命狂奔凡爾賽」~


呢d係咪就係康莊大道?!!


雕塑 Sculpture~ 勁多~ 勁靚~


阿波羅噴泉 The Apollo Fountain~ 領導建議大家到此拍照後就打道回府...


大運河 The Grand Canal~ 遊客可以泛舟河上, 可惜我地連行埋去嘅時間都唔夠...


阿波羅噴泉 與 皇家大道 與 凡爾賽宮 The Apollo Fountain & The Royal Walk (also called the “Green Carpet”) & The Palace of Versailles~

感謝天公做美, 藍天白雲綠林倒影皆盡納入水天一色嘅阿波羅噴泉之中, 實在靚到爆!!! 不枉此行!!!


沿皇家大道勁跑返去停車場, 跑到出晒汗, 喘晒氣, 都不忙回眸一笑~


碧水園 The Water Parterres~


南園(又稱百花園) Southern Parterre~


得90分鐘時間, 根本連花園都行唔到10分1, 我唔制呀!!! 如果自由行就可以玩足朝9晚5... 再見啦, 凡爾賽宮!!!


臨走唯有同金閘影多1張合照, 以解單思之苦~


繼續跑跑跑... 好彩趕得切, 冇遲到!!! 領導離遠見到我跑到上氣唔接下氣, 叫我唔使跑, 我答佢"唔得, 我唔可以做最後果個"~

雖然今日冇得入凡爾賽宮係有d可惜, 不過凡事係冇絕對嘅!!! 咁我地就可以有藉口, 10年後再o黎過啦!!! 到時我地一定要入鏡廳見識吓咩叫奢華, 仲要去大運河撐吓船仔, 係美食廣場食吓薯條(French Fries), 咁先叫做o黎過凡爾賽宮o架嘛~

有興趣去凡爾賽宮嘅朋友, 建議你咪吓個「凡爾賽宮御花園互動地圖」先, 計劃定路線圖, 咁去到就唔使慢慢摸~
http://en.chateauversailles.fr/templates/versailles/map/MapMain.php



西歐「文藝復興」2012 の 總匯 http://www.kenmerry.com/2012/08/2012.html



沒有留言:

張貼留言