明園 Ming Yuen : 純粹吃環境

16 September 2012, Sunday
今天專程跑到陽明山莊來喝茶, 真的很專程, 因為要乘坐Taxi... 如坐6號巴士, 從黃泥涌峽道下車後要步行900公尺的山路, 地圖說10分鐘, 但在未吃午餐前, 攝氏30多度的高溫之下, 再加上正午猛烈的太陽照射之下, 恐怕10分鐘是不可能, 亦不想行到身水身汗...

輕鬆到達Clubhouse, 乘升降機往Level 2, 甫步出升降機已被數十件藝術擺設吸引著... 還向著餐廳相反的方向不斷拍照, 哈哈... 結果越走越遠...
 

餐廳門外的裝潢很富中國特式...

步入餐廳內, 隨即被這件攝人氣魄的藝術品阻路, 考慮了一會, 向左走...

繼而見到這件更攝人的藝術品, 向右走...

餐廳極富中國味道, 滲透著優雅的氣息... 環境很寧靜, 空間很寬敞... 儘管後來坐滿了客人, 大家都刻意壓低聲線來交談, 我很享受這一份難得的寧靜...

就連餐具也有一種高潔傲的氣質, 以「四君子之首」梅花來作點綴...

我們先點了4個點心, 現場只有4枱客人左右, 大部分人已經在進食, 不明白為何部長也會弄錯, 胡亂奉上一碟春卷... 我奇怪之際, 問Honey為何會有春卷, Honey也表示奇怪, 部長未能成功放下那碟春卷, 唯有把它退回廚房...

菠蘿蜜汁叉燒酥 ($40) -- 怎樣也看不出它是一個叉燒酥, 外型是百分百的老婆餅... 菠蘿皮不太鬆化, 咬開水油皮, 內裡是豐富的叉燒餡料,可惜 味道偏鹹了少許...

翡翠玉帶豆苗餃 ($45) -- 綠色的餃皮, 有點嚇人... 豆苗像小麥草, 味道清新... 吃不到有帶子, 反而有蝦肉, 蝦肉爽口, 味道偏淡...

椒鹽脆豆腐 ($68) -- 滑嫩的豆腐切成粒粒狀, 炸得金黃香脆, 熱騰騰, 蘸醋吃特別滋味...

特色雜錦蒸腸粉 ($60) -- 鮮蝦腸、牛肉腸及叉燒腸各1條, 一次過滿足你3個願望, 絕對是為我這類貪心的人而設, 很貼心... 腸粉皮比較厚, 叉燒很足料, 牛肉腸與鮮蝦腸味道只是一般...

台式肉躁蘿蔔糕 ($40) -- 幹掉第一輪點心後, 雖然食物味道一般, 但仍想多試一點心... 在餐牌上發現這個台式肉躁蘿蔔糕, 居然還抱一絲期望... 賣相已不討好, 味道鹹得有點苦, 吃不出半絲蘿蔔... 可謂失望中的失望...

更甚的是, 明明是蘿蔔糕, 為什麼會有類似蟹拑的東西出現?!! 咬蘿蔔糕的時候, 還有點硬硬的物體, 吐出來是白色的蟹殼, 有3片之多...

吃了一小時左右, 部長已經問我們是否所有食物已到齊, 善解人意的我們決定埋單... 離開時原來已經全場滿座...

洗手間比美5星級酒店, 垃圾桶是紅外線自動開關的, 利害呀...

總結 : 環境一流, 味道平平, 價錢偏高, 服務一般...

離開前還到處參觀了一會...

連街站也古典過人人...

徒步下山, 途經衛奕信徑/港島徑, 下次如果再來的話, 可考慮步行回家, 哈哈...


繼續下山, 途經黃泥涌水塘公園, 赫然發現很多家庭在玩水上單車, 雖然水塘面積不大, 但對小朋友來說, 已經是香港難得一見的湖光山色, 置身其中, 仿如世外桃園... 晚上一定可以做一個好夢...


是次每人消費約$150元
味道： 3 環境： 5 服務： 3 衛生： 3 抵食： 2
###
地址 : 淺水灣大潭水塘道88號陽明山莊會所L2
電話 : 2812 3908

龍皇酒家 Dragon King Restaurant : 茶杯裡的嘈音

15 September 2012, Saturday

與朋友吃過數次位於銅鑼灣的龍皇酒家, 印象中是價格高昂但味道只是中規中矩...

今天破格來到觀塘覓食, 龍皇酒家算是頗接近地鐵站出口, 雖然網上的評價不太好, 也想一試...

店內陳設頗有中國味道, 只係沒有食客的只剩這一角最沒有中國味道的... 枱與枱之間極之擠迫, 坐下後是椅背貼椅背, 甚至沒有足夠空間坐下...


樓底低, 加上大部分食客都係與長者嘆茶, 大家都提高音量與長者對話, 導致現場環境非常嘈吵, 我們坐6人枱, 只見到坐對面的親友嘴郁郁, 完全聽不到對方說什麼!!! 吃完即走, 完全不想「再坐一會」, 失去了飲茶的意義...

安蝦鹹水角--好像深色了一點, 餡料出奇地多, 填滿了整個鹹水角, 而且豬肉並不是碎濕濕的, 味道不錯, 入口也不會滿口油..

 

蜜汁叉燒腸--外表相當吸引, 腸粉皮晶瑩剔透, 叉燒餡大大片的, 切成一口一件的大少, 好適合Share食...

香煎臘味蘿蔔糕--蘿蔔糕口感太粉, 不是我杯茶, 我喜歡特多蘿蔔的... 臘味炒的很香, 不錯...

沙巴海蝦餃--薄薄的澄麵皮, 包著2粒海蝦, 蝦肉頗彈牙, 味道也不俗...

店員推介至尊孖寶組合, 我地見有湯又有飯, 要了1客...

粉葛赤小豆鯪魚--魚湯煲得不錯, 材料很足, 味道濃郁... 可以分到8碗左右... 秋風剛起, 是時候滋潤一下...

飄香荷葉飯--口感好差, 飯粒不完整而且濕淋淋的... 味道卻不太差...


全餐最有驚喜的是茶!!! 龍井不是間間酒樓都有, 當然比較高級的都會有, 但即使5星級的酒店, 龍井的味道也不及這裡!!! 居然比我在家中泡的西湖龍井還要香濃上好幾倍, 忍不住打開壺蓋窺探究竟... 嘩!!! 有2個很巨型的茶包, 難怪茶味如此強勁!!! 多年前也曾購買這種茶葉包裝袋泡茶, 貪其茶葉不會走到杯子中, 洗茶壺時倒出茶葉時也很方便呢...

吃飽了, 想吃些甜品...

山水豆腐花--口感有點奇怪, 不滑溜, 但入口即化... 黃糖不太甜, 下多了也不用擔心...

生磨蛋白杏仁茶--大家好像很讚賞, 不停展示碗中的蛋白, 還研究如何烹調...

吃飽飽, 離開前當然要光顧一下洗手間... 通往洗手間的通道也很古色古香...

服務不錯, 價錢比銅鑼灣分店合理, 食物味道也比銅鑼灣分店好一點, 只是環境比銅鑼灣分店略遜一籌... 若不是環境太嘈的關係, 也許可以再來...

是次每人消費約$100元
味道： 3 環境： 3 服務： 3 衛生： 4 抵食： 4
###
地址 : 觀塘開源道64號源成中心2樓
電話 : 2955 0668

帕莎 Al Pasha : 一起新疆舞 讓痛快與困惱交換

14 September 2012, Friday

病咗幾星期, 我終於復活喇!!!

踏入生日月份, 第一餐生日飯我揀咗去帕莎食, 其實好耐之前已經想去, 不過次次都被選擇障礙症或者中人痴呆症所影響, 結果拖到今日...

星期五六日要分2個時段食, 第一段係6:00-8:45PM, 6:00PM實在太早啦, 最後我地Book咗7:00PM...

今晚Minimum Charge每人$250, 原來係計加一服務費之前, 即係加埋一每人Min Charge $275...

見有網民話間餐廳好難搵, 蕩失路, 所以我係MTR N4 出口一出, 就去CS問路... 原來好方便o架, CS直望Misocool側邊條路, 行到尾去霞飛, 側邊條巷盡頭搭Lift上4樓就係...

一出Lift門, WoW... 燈光好昏暗, 新疆菜嘅神秘面紗正在等你掀開... 接近入口的梳化位比較有特色, 我地被安排坐係大廳之中冇咩特色的圓枱...


進入餐廳前, 要洗3次手, 會為你帶來好運...


落單前, 大家都叫番杯特飲先, 我要芒果乳酪蘆薈梳打... 嘻嘻, 原來唔記得影相, 因為又要揀菜又要同迷路者講電話實在大忙啦... 外型似Smoothie, 飲唔到乳酪味, 又飲唔到梳打味, 食到有芒果粒粒同蘆薈粒粒, 味道係OK嘅, 甜甜地嘅芒果Milk Shake咁囉...

落單後, 有職員埋o黎Sell VIP Card, 原來係景樂集團(King Parrot)經營, 之前睇電視又話係新疆人開嘅?!!

小饟包配橄欖醬&雞肝醬(免費)--餐前奉上的麵包, 可以蘸橄欖醬或者雞肝醬一齊食, 麵包有點酥但又好紮實, 口感都幾特別, 鑽媽激讚雞肝醬好好味, 貓兄就話橄欖醬好好味... 我自己就2樣都鍾意, 雞肝醬味道似淡咗鴨肝醬, 橄欖醬嘅香草配搭得好香...
烤包配中東三重奏[雞心荳茸配菘子, 青爪乳酪, 茄子茸配杏仁]($88)--外型似沒有餡的Pizza, 熱辣辣的, 蘸青瓜乳酪很清新, 蘸雞心荳茸也不錯, 忘記了蘸茄子茸...


手撕香梨椒麻雞($78)--嘩!!! 好好好好好鹹呀!!! 打瀉鹽呀?!! 太鹹, 食唔出有香梨, 剩係食到好多青瓜...
烤鴨釀烤餅($85)--嘩!!! 過多甜麵醬, 只吃到滿口都係甜麵醬, 其他甚麼也吃不到...


酥皮特選[雞肉薄荷雪茄, 菠菜角, 牛尾乾果]($98)--雞肉薄荷雪茄說穿了即是春卷, 春卷皮很脆, 很香口... 酥皮菠菜角真的很酥, 菠菜餡填得滿滿, 很好吃...

 

烤牛肉串(2串)($50)--全餐最好味!!! 火喉掌握得恰到好處, 肉質柔軟, 香料提升了牛肉的味道, 5個人Share 2串實在太少了, 到喉唔到肺...
烤乳羊(例)配薯菜($230)--有點失望, 羊肉猶如乾柴, 沒有半點羊味, 只吃到微微的膻味...


醬爆駝峰肉露荀($115)--好辣呀!!! 露荀好嫩, 駝峰肉口感似豬肉... 除咗好辣, 仲幾鹹, 食唔真駝峰係咩味...
馬腸抓飯($88)--抓飯甜甜的, 味道OK... 馬腸又係鹹的, 口感似潤腸, 與抓飯一同吃味道又OK喎...


原先我地想試孜然粉小黃牛, 可惜今晚暫定供應...

接近8點左右開始肚皮舞表演... 表演者頭上點著好多爉燭, 繞道跳咗一Round, 之後除下頭套再跳一Round, 第二Round比較勁歌熱舞d.... 之後又再出現, 播送生日音樂, 為一枱客人再跳一會... 原本以為跳完o架啦, 點知佢捉咗個女客人一齊跳, 嘩, 個女客人都跳得好投入喎... 之後捉完一個又一個, 越o黎越近我地張枱喇, 好驚呀!!! 我地全部人即時耷低頭扮晒狂食o野囉, 場面好攪笑, 嘩咔咔咔...

肚皮舞表演完畢, 當我地差不多食完, 店員通知我地未Meet到Min Charge, 仲差2百幾蚊... 吓?!! 仲未Meet到?!! 我地仲諗住今餐一人要$350喎...

原先打算轉陣再擦甜品, 咁而家唯有係度食埋啦...

拔絲士多啤梨($85)--好有驚喜!!! 我係第一次吃拔絲士多啤梨, 以前只吃過拔絲香蕉及拔絲蘋果, 男店員將士多啤梨逐一放入冰水內, 將所有士多啤梨拔絲後, 本以為已經完成, 誰知男店員繼續將餘下的糖漿繼續拔絲, 慢慢拉出一絲一絲的糖絲, 好有Heart!!! 第一次見到咁認真嘅拔絲!!! 論味道, 士多啤梨比香蕉及蘋果有過之而無不及, 因為士多啤梨的酸中和了糖漿的甜, 酸酸甜甜, 連唔多食甜品的讚媽都食到唔停得口...


桃仁蛋卷($55)--滿載合桃碎的蛋卷很鬆化, 充滿合桃的香味, 而且不太甜, 樣子也討人歡喜, 值得一試...
八達木紅棗糕配石榴雪糕($65)--石榴雪糕係今晚最具話題嘅菜式, 不但好味, 更勾起大家的童年回憶!!! 只要吃一小口, 就好似放咗熟透而甜美的新鮮番石榴入口, 整個口腔充滿果香, 我比10個讚!!! 但八達木紅棗糕只吃到很強勁的杏仁味, 很奇怪, 不是我杯茶...

紅豆綠茶桂花糕($50)--顏色漂亮, 味道很夾, 唯紅豆味不足...
杏甫蜜餞雙色糕($55)--天呀!!! 打瀉了超濃縮糖嗎?!! 喪甜味來自頂層的紅棗糕, 甜得太可怕, 比日本羊羹更甜得多... 號稱甜品怪的我, 認輸了!!! 吃1件已太難...

 

整體評價係氣氛好好, 味道一般...

服務亦很好, 吃完頭盤會換上比較大隻的主菜碟, 很細心...

是次每人消費約$280元
味道： 3 環境： 3 服務： 3 衛生： 3 抵食： 5
###
地址 : 尖沙咀河內道18號K11購物藝術館401舖
電話 : 3122 4444

「你睇!! 多啦A夢嚟啦！誕生前100年祭」

30 August 2012, Thursday

今日趁暑期就完, 帶姪女去海港城大門口睇叮噹!!! 講叮噹時佢冇咩反應, 係喎, 佢地淨係識「多啦A夢」咋喎, 哈哈~

12點前去到, 已經好多人!!! 掛住睇實個細嘅, d相都係求其影, 冇時間慢慢拎角度... 帶咗相機都冇時間拎出o黎, 用iPhone影咋...

初時好驚姪女對「多啦A夢」冇興趣, 好彩去到佢都好開心, 自己揀鍾意嘅叮噹合照... 後尾影到唔想走...

有d叮噹唔使等就影得, 有d熱門d嘅要等3組人左右, 好彩無論大人同小朋友都好守秩序, 自發排隊...

係有幾隻叮噹, 有單身大朋友離遠拎緊角度影緊齋叮噹, 姪女唔知道, 以為冇人影緊, 標咗埋去, 同佢解釋都好似聽唔明, 冇計, 唯有同大朋友講聲唔好意思, 然後9秒9影完帶姪女走, 哈哈..

影咗50隻以上, 揀幾張角度正常d嘅Post出o黎...

影到標晒汗, 好辛苦!!! 不過都好開心!!!