西歐「文藝復興」2012の遊遊蕩蕩, 巴黎, 法國 (Paris, France)

2 May 2012, Wednesday
 
10^oC, Rainy

~ 巴黎小檔案 ~

巴黎位於法國北部巴黎盆地的中央，是法國的首都和最大城市，全市分成20個區，人口超過1200萬。

巴黎三個最有名的地標分別是：巴黎聖母院、凱旋門，和艾菲爾鐵塔。

1:00PM 先開始食Lunch, 2:00PM就已經要鬆人, 食咗都唔消化...

冒雨離開Chez Edouard後, 沿Rue Edouard VII行番出Boulevard des Capucines, 轉左, 去到Rue Scribe再轉左, 行到咁上下會見到迦尼葉歌劇院 (Opera de Paris Garnier), 繼續行就會去到奧斯曼大道(Boulevard Haussmann), 巴黎最最最出名嘅2間百貨公司, 春天百貨(Printemps)同埋老佛爺百貨公司(Galeries Lafayette Haussmann), 就會出現係你眼前!!!

由於落住大雨, 人又激多, 扒手... 緊有1個係左近!!! 好彩有醒目又勇敢嘅小妹妹出手, 否則... 團友姨姨今晚就可能冇紙巾抺嘴o架啦, 咔咔咔!!! 大家要密切留意「治安篇」嘅詳細報導!!!

今晚要Meet返導遊食自費餐, 所以要跟住佢行咗老佛爺百貨同春天百貨一個圈先, 等團友了解咗退稅程序, 先再講幾點邊樹集合... 咁又比佢搞咗1個鐘... 早知就唔跟佢食自費餐啦!!! 原來又係頭先Lunch果間餐廳, 頂!!! 佢又唔早講!!! 如果比我知道要同一日內係同一餐廳內食2餐一樣嘅食物, 我一定唔會幫襯囉, 2個人加埋要80歐羅, 成千蚊港紙呀, 我大把好o野可以食到啦!!! 仲要間餐廳又迫又趕, 一d都唔Enjoy!!!

3:00PM 終於開展我地嘅半日自由行旅程啦!!!

迦尼葉歌劇院 (Opera de Paris Garnier)... 舊地重遊, 別有一番滋味... 落緊雨都要照影相, 如果部相機因此而壯烈犧牲, 我會買張法國國旗幫佢襟, 呀哈哈哈~ (當然係講緊部細機啦, 單反全程收起)

影完正面又影側面~

影完側面又再過埋對面馬路影張全相~


之後隨便亂行, 沿著Rue de la Paix行, 居然路經凡多姆廣場(Place Vendome)~ 當年英國嘅戴安娜王妃就係呢間麗池飯店(Ritz Paris)食完晚飯離開時發生車禍~ R.I.P.~

樹立於凡多姆廣場中央的拿玻崙雕像~ 

繼續向前, 沿著Rue Castiglione行, 轉左進入西弗里路(Rue de Rivoli), 基本上對面馬路已經係羅浮宮嘅花園, 穿過一大堆手信店, 只要見有斑馬線過對面就可以~

順利到達杜勒利花園 (Jardin des Tuileries)... 時間過得真係好快, 都差不多冇咗1個鐘啦!!!

10年前都冇留意到原來羅浮宮前面有個咁大咁靚嘅花園o架~

一日內2次到達卡魯塞爾凱旋門 (Arc de Triomphe du Carrousel)~ 你睇, 貝聿銘設計嘅金字塔出現係凱旋門中間呀~

我地又返翻o黎羅浮宮(Musee du Louvre)啦, Yeah!!!

嘩!!! 企鵝人特襲金字塔(Pyramide)呀!!!

我360度咁圍住Pyramide行咗1個圈... 超!!! 都冇Blood Line嘅!!! 原本達文西密碼條Blood Line係用特技Key上去嘅!!! 我真係... 好天真, 好傻呀!!!

大小Pyramide~

2003年果次自遊行, 我地就係坐呢架開蓬觀光巴士, 玩轉巴黎市中心~ 嘩!!! 想當年, 風大雨大, 得果幾度, 又冇帶羽絨外套, 仲要坐係上層第一排, 真係凍到呀入呀呀心呀呀呀~ 仲要手機響, 同事打電話o黎話有d事要我Make Decision... Roar!!! 我d Roaming Fee呀!!!


係巴士站側邊嘅通道離開, 出返西弗里路(Rue de Rivoli), 過對面馬路就係Rue des Pyramides, 會見到位於Place des Pyramides嘅聖女貞德鍍金像(Statue of Jeanne d' Arc)~ 好金呀!!! 威... 武...

轉左沿西弗里路(Rue de Rivoli)向前行, 就會去到協和廣場(Place de la Concorde)~ 風大雨大, 又趕時間, 加上我地對腳已經行到冇晒知覺, 唔行過去影相啦... 想當年... 因為係協和廣場影咗張相, 比火星人笑我似拉姑, 自此之後, 大家就叫我拉姑!!!

轉右入皇家路(Rue Royale), 行2個街口就會到達瑪德蓮廣場(Place de la Madeleine), 隨即被迷人嘅瑪德蓮教堂(Église de la Madeleine)吸引住~ 巴黎真係處處都係寶呀!!! 相比之下, 我地果個中環街市, 我都真係唔知留o黎做咩囉~

5:00PM 話咁快又返到o黎Opera啦~

準時去到集合處, 但有部分團友失蹤... 等呀等... 等呀等... 終於最後1個團友現身啦!!! 嘩!!! 佢抽住3個大大大紙袋, 唔講得笑喎!!! 佢老公頭先食完Lunch就話腳痛, 要自行坐的士返酒店先, 睇怕佢見到呢3個超特大紙袋, 應該會連肉都痛埋!!! 嘩咔咔咔~

6:00PM 食晚飯啦!!!

「Chez Edouard」-- 呢餐自費, 唔食海鮮都要每位40歐羅!!! 同枱團友食海鮮餐都只係50歐羅, 抵到爛!!! 可惜... 我同Honey都驚腸胃不適, 聽日仲要坐十幾個鐘頭機返香港, 真係唔敢博!!! 唯有借佢地個海鮮拼盤(3人份)影張相啦~


又係中午果支紅酒, 來自波爾多(Bordeaux)酒區, 2008年嘅出品, 酒莊Château Haut Vallée網上搜尋結果只得2頁, 仲要好多Click到入去係無料嘅!!! 唯一搵到嘅係, 佢支Rouge Red Wine 2008 只售€1.99... 嘩... 咪仲平過飲汽水同果汁?!! 食杯雪糕都貴過佢啦!!!

又係中午果片鵝肝醬, 幾好食都係假, 總之就係Dislike同1日係同1間餐廳食同1樣嘅o野, 仲要呢餐係自費, 2個人大拿拿80歐羅... 好無癮... 仲要浪費晒d時間呢!!! 跟佢地去百貨公司了解集合時間地點又冇咗1粒鐘, 返去集合又冇咗1粒鐘, 早知自己週街食冇咁嬲!!! 早一日有問導遊間餐廳係邊樹, 答得好含糊, 提都冇提係同中午團餐同一個地方, 中晒招!!! 加上早一日係未Confirm到羅浮宮嘅Schedule, 攪到我地都Plan唔到點玩, 所以咪報名食自費餐...

香草法國蝸牛味道OK, 但係好難叉d肉出o黎, 蝸牛叉都搞唔掂!!! 最後... 我要出動國寶喇... 牙... 籤!!! 一拮即中!!! 好婆仔呀, 牙籤都袋埋係身, 我自己都頂唔緊, 呀哈哈哈~

牛扒同羊扒味道都OK嘅, 冇驚喜囉!!! 貌似牛奶公司家庭裝迷你版雪糕全餐最好味~

呢個什麼金叉獎... 可以不理... 又迫又趕又貴又唔係好味... 唉... 我果80歐羅...

呢個超好味咖啡慕斯蛋糕, 係同枱媽媽先有~ 我有幸試咗一啖~ 

事緣全世界都食緊Main Course, 得同枱媽媽未有得食, 佢好勞氣, 不斷追問服務員都冇結果, 等咗好耐, 佢碟牛扒終於出場!!! 服務員好抵死, 整鬼佢, 比咗Honey先都唔比佢, 佢果碟就係佢面前專登扮拎走, 激死佢, 哈哈!!! 查實Honey同佢都係全團最後2位未有Main Course, 佢後來發現自己唔係唯一, 好似冇咁勞氣~ 事後上甜品時, 服務員又再專登整鬼佢, 全部人上晒雪糕都唔比佢, 佢想拎服務員手上碟雪糕時, 服務員示意話No, 居然係雪糕碟下面收埋咗碟咖啡慕斯, 同枱媽媽超Surprise!!! 同枱囡囡想拮o黎試吓時, 服務員用手阻止, 話"No, Only for her!!!"... 嘿!!! 好搞笑!!! 法國男士原來真係好浪漫o架!!!

8:00PM 紅磨坊(Moulin Rouge)飲飽食醉嘅團友們, 有3分2以上都參加自費活動--紅磨坊夜總會歌舞表演!!! 聽聞係Topless... 我地冇去睇, 唔係錢嘅問題, 皆因出發前上網做過Research, 大部分睇過嘅Blog友都話表演者屬Uncle Auntie級, 與美艷表演之名完全掛唔到鉤!!!

導遊陪同團友去睇表演, 我地就繼續坐旅遊巴返酒店休息, 見埋司機最後呢一面o架咋, 佢係意大利人, 好Nice, 車足我地咁多日, 辛苦晒~ Thank you!!!

落車後同尋晚一齊開香檳嘅澳門女團友o黎個Good Bye Hug先, 後會有期啦~ 保重啦~ 佢地聽日會繼續行程, 坐歐洲之星去倫敦, 而我地就要坐飛機返香港喇~

今日真係攰到爆, 10PM已經瞓到豬咁啦~

巴黎嘅戰利品!!! 全球最出名嘅法國薰衣草制成嘅香包!!! 同埋五光十色嘅巴黎鐵塔鎖匙扣!!!

西歐「文藝復興」2012 の 總匯 http://www.kenmerry.com/2012/08/2012.html