返咗香港幾日咋, 離開咗2星期, 返到來忙到九彩, 相信只有佢可以令我地提得起興趣同時間去... 講緊嘅係由香港旅遊發展局舉辦, 一年一度嘅「香港美酒佳餚巡禮」...
忙得失魂落魄... 用嘉賓卡換領完品酒証禮券同儲值卡, 拍照後居然遺失在枱上, 行咗好遠先發現, 好在現場人士路不拾遺, 我先搵得返咋...
入場第一站... 當然係Riedel Grand Tasting Pavilion!!!
行了一圈, 選了1974年釀製的Kopke Colheita Port, PORTUGAL... 非常香醇甜美, 口感順滑, 連平日滴酒不沾的我都可以飲到, 好適合女士飲...
Kopke Colheita Port 1974
產地: 葡萄牙
年份: Before 1991
葡萄: Red Port Blend
甜度: Sweet
簡介: 顏色呈淺琥珀色，充滿乾果, 淡淡朱古力及咖啡的香氣, 散發出其優雅的個性，口感柔和, 酸度平衡, 餘韻悠長。
配搭推介: 黑巧克力, 杏仁
所需品酒劵: 1
得獎獎項: Rating 91, Wine Spectator
即場Like Facebook Fan-page仲送開瓶器...
見到有我最愛的燒魷魚筒, $60/隻, 買了來送酒...
配wasabi sauce又幾特別...
見到在場人士用禮券換贈品, 我又去換埋1份...
今年呢個Parma Ham麻麻地, 油香一般, 豬味亦較弱...
呢檔檔口送的贈品真係不知所謂... 垃圾一堆咁放入雞皮袋... 味道同包裝的質數一樣水平... 放棄... 呢度唔係Grand Tasting Pavilion咩?!! 咁外面的檔口我仲食唔食好呀?!!
太陽終於落山, 係時候離開全場唯一有冷氣的Grand Tasting Pavilion... (外面攝氏3十幾度, 大家都躲進來, 很擠迫)
繼續換贈品...
攞完贈品, 開始搵下有咩好食先...
見呢間品味香江嘅分子料理好似幾特別, 就試下黑毛豬火腿哈密瓜晶球 $20... 職員話餵我食... 細路仔咩... 我雙手又唔係Disable, No Way!!! 賣相精緻, 塊火腿都幾油潤, 哈密瓜淡咗少少, 抵玩...
行緊去日本街... 嗅到香味... 來自呢檔「老饕食品行(澳門)」的黑椒澳葡豬手炒... 好香但好肥, 我平時唔鍾意食豬手, 望住佢係鐵板上吱吱喳喳地彈動, 太香的原故, 最後忍唔住買來食, 仲買了水牛雞翼...
付款的時候, 比$500佢找, 店員話無得找, 仲要繼續冷嘲熱諷：「呢度果然個個都係貴賓, 比親都$500蚊」, 我只係剛回港未回魂先無帶碎紙包出來, 忍唔住贈佢一句：「我有八達通」...
跑去問Honey借錢... 比完錢, 秒速影張相, 當時全個檔口得我1個客人, 無阻佢做生意, 同埋我真係只係按咗手機的快門一下, 剛才冷嘲熱諷的職員呼喝我：「影咩相呀?!!」... 沒想到剛才努力去借錢回來買食物會落得如斯對待, 難得佢好清醒, 知道呢段係「非對外開放」的貴賓時段... 香港好客之都的攝人氣魄, 靠晒你發揚光大啦... 咦?!! 唔係喎... 招牌寫住... (澳門)... 好似係...
帶著充滿殺氣的黑手... 呀... 唔係... 係黑椒澳葡豬手炒... 進入日本街, 氣氛截然不同, 我決定唔去其他地方啦...
放低D黑手先...
我都未動手, 美少女職員就飛身撲出, 推介岐阜縣無添加農藥的柚子釀製的舩坂 ゆず兵衛 柚子酒, 清香微酸的柚子味很重, 卻沒有完全掩蓋酒香, 超好飲呀!!! 平日滴酒不沾的我都顧不了咁多, 皮膚敏感?!! 飲咗先算啦... 咕嚕咕嚕... (之後幾日都無出疹, 睇來清酒安全, 無致敏原)
舩坂 ゆず柚子兵衛
產地: 日本
年份: 2015
甜度: Extra Sweet
簡介: 採用岐阜縣無添加農藥的柚子和代表品牌「甚五郎」清酒混合而釀製的柚子酒。享受到清爽的柚子香味和酸味，除了冷飲，亦可溫熱飲用，在寒冷的冬天也能溫暖地度過。
配搭推介: 任何料理
所需品酒劵: 1
得獎獎項: 第一位, 春季全国酒類コンクール
飲完柚子酒, 剛才的美少女職員又Sell我試埋梅酒... 橫掂都飲開, 皮膚敏感?!! 死就死啦...
第一次飲梅酒, 都幾好飲!!! 甜甜酸酸, 但梅味比柚子味霸道, 都係柚子酒略勝一籌... 吖... 下次姊妹淘飯聚可以考慮買來飲下喎... (咦?!! 有人想大開酒戒?!!)
已經開始飄飄然, 要趕緊係外面飢餓的大軍殺進來之前離開...
下年有機會的話, 當然要再來...
香港美酒佳餚巡禮 2015
日期︰2015年10月22至25日
地點︰中環海濱
網址︰http://www.discoverhongkong.com/tc/see-do/events-festivals/highlight-events/wine-dine-festival.jsp
沒有留言:
張貼留言