2017年11月9日 星期四

【嘉義+雲林+南投】3個文叔去旅行。尋覓阿里山咖啡王子(下)

24 October 2017, Tuesday

3日2夜行程:大同火雞肉飯(午餐)⇨檜意森活村⇨56號藍色公路咖啡(下午茶)⇨日日興現宰羊肉爐(晚餐)⇨承億文旅桃城茶樣子(留宿+早餐)⇨石桌羊肉店(午餐)⇨鄒築園觀光休閒農莊(下午茶)⇨玉山國家公園—塔塔加夫妻神木⇨山城小吃(晚餐)⇨沙里仙溫泉渡假(留宿+早餐)⇨鶯歌老街


吃過酒店的豐富早餐,驅車直闖阿里山玉山!

(全日在車上不斷食么鳳話梅,1粒駁住1粒,臨尾有一下噁胃氣真係差D嘔咗出黎)

第1餐:石桌羊肉店



睇黎大家尋晚食羊食得唔夠喉,今日急於再encore。可惜。。。呢一間D湯無咁鮮味,肉都無咁鮮,唯一勝出點係D皮咬得開。



羊佛,WHO ARE YOU?


羊肝膻到我差D嘔咗出黎,難怪大廚話有1千隻羊跑緊咁~


山野菜好吃!未見過咁巨型嘅荷蘭豆!嘩,碟筍好食到呢~




魷魚唔新鮮~ (都正常嘅,海拔1300公尺)


整體唔難食,只係尋晚太驚喜,搞到今餐有少許失望。


味道:★★★☆☆
環境:★★★☆☆
服務:★★★☆☆
衛生:★★★☆☆
抵食:★★★☆☆

石桌羊肉店
地址:嘉義縣 竹崎鄉 嘉義縣竹崎鄉中和村石棹21之39號
電話:+886 5 256-2506
網址:www.facebook.com/Alishanmutton/



飯後到對面7-11掃貨,D世界各地嘅朱古力齊到呢!好神奇,咁偏僻嘅地方,居然有齊瑞士德國加拿大最強嘅朱古力,加拿大ACAI都有先厲害~

繼續上山~


第1站:鄒築園觀光休閒農莊


亮點:阿里山咖啡王子!

天涯何處覓芳蹤?不知王子真面目,只缘身在此山中!


今天很榮幸,得到萬民(咖啡子民)景仰的咖啡王子親自接見,傳授絕世神功,嘔咩都值得!


一眾刁民直搗咖啡王子王宮的心臟地帶—炒豆機房!仲有磨殼機房,烘豆機房,全自動掛耳包包裝機房,整個流程,毫不吝嗇,任睇!


咖啡王子親自講解水洗日曬蜜處理各個方式!(想邂逅王子,記得要預約喔)


仲帶領大家落金庫—咖啡田!幾位小粉絲努力聽書中~


賊仔黨趁王子講TALK嘅時候,順手牽羊。。。嘩!好YUMMY!不禁嘆句「此果祇應天上有,人間那得幾回嘗」~


帶返香港種金先~


係咖啡金庫飽餐一頓,飽暖思床褥,一轉身唔小心正面迎擊特大蜘蛛網!!!

係成塊面撞入去大過我個頭嘅蜘蛛網!!!

OMG!!!

好驚呀))))))))1秒轉身走!!!好彩無比大蜘蛛噬!險過剃頭!隻蜘蛛長過我D手指,鮮黃色黑間,個樣好毒!!!

(咖啡樹與咖啡樹之間好多棵都有超大型蜘蛛網連繫住,每個網都有色彩斑斕大蜘蛛鎮守)

驚魂未定,急急腳爬返上路面。。。(偷食吖喇)

眾人下課後,回王子的寶典見識一下王子的咖啡豆與功力—阿里山日曬,居然有BRANDY的味道,神乎其技,重點係:好好飲呀!


一眾女士,唔等得幾位咖啡痴,一開始已ORDER了花茶,原本3個人叫3壺,係香港好正常做法吖~點知咖啡公主話你地叫1壺飲住先啦,唔夠先再叫啦~(O咀,唔係呀嘛,係香港會比人用𩑔頭掃把抨走)

你飲過茉莉花茶D茉莉花係一朵朵嘅未?仲要勁新鮮!我大鄉里出城,未飲過囉!花香茶香,香到離奇,勁勁勁好飲呀!!!好開心呀,好彩有ORDER咋!


一眾咖啡痴飲完都仲唔夠喉,仲要買咗幾KG豆走~

大家都唔係未見過世面未食過好野,均嘖嘖稱奇,不禁臣服於咖啡王子對咖啡的熱情與研究成果,有機會一定要再來!


味道:★★★★★
環境:★★★★☆
服務:★★★★★
衛生:★★★★☆
抵食:★★★★☆

鄒築園觀光休閒農莊
地址:嘉義縣 阿里山鄉 樂野村2鄰71號
電話:+886 5 256-1118
網址:www.facebook.com/ALS.CoffeePrince



好,完成此行最重要的一環,繼續上山!

第2站:玉山國家公園—塔塔加夫妻神木!


大家有眼見,天氣有幾咁完美,我地有再去D觀景台借廁所,影完都唔知自己影咩,嘿~

夠鐘落山囉~(繼續隨時嘔得出MODE)

未BYE得住,好戲會陸續上演喔~


沒有留言:

張貼留言