赤峰街一向係中山區飲食型店重地，每次路過都對各家特色爆燈餐廳行注目禮。今日係雙連站附近做完嘢，有感嗰頭附近冇咩好食，打算沿住赤峰街行去中山站果頭搵食，點知一開始行，離遠見到「港式養生煲湯」六個字，已經口水流。
行近啲睇，原來係之前喺唔知邊度見過關於呢間餐廳嘅報導，係講香港人係巷仔開餐廳無人幫襯，直至有記者食過，覺得好好食，報導過之後先開始多人去。
店主問我拎走定係度食，我只係答咗2隻字：這裡，就比佢發現我係香港人！哈哈，我的國語真是「有夠爛」！
花膠響螺烏雞湯純湯 NT$300
—500蚊會有花膠，但我唔係太好，有啖湯飲已經好滿足。店主話近醫院，唔敢落咁多鹽，比樽鹽我哋自行決定落幾多，好貼心。最後我同Honey都冇落，因為我慣咗食淡，同埋食太多鹽都無益，平時已經吸收過量。
套餐加NT$140可配「生滾薑蔥滑雞粥」，正到無朋友，好感動，可以係台灣食到碗咁綿嘅粥！
上次黏土老師極力推介話帶我去食粥，一睇，唉，只是湯飯一碗（對香港人而言），對台灣人來講已經係好唔錯嘅粥，呢方面有點落差。
蟲草花響螺雞湯 NT$240
—應該都幾唔錯，見Honey噓噓聲飲晒。
燙青菜加NT$40，雞翼加NT$50，份量少少，明顯針對我呢D貪食鬼。
雞翼好好食，香得來有點微辣。燙青菜清淡無油也好吃，很神奇。
店主好健談，仲推薦我去試銀戒指同手工皂體驗課程，都中晒我心事，好利害。
謝謝店主，呢餐好有親切感喔！
我回家即LINE黏土老師，推薦佢去試吓，過幾日佢真係去試咗，仲ＳＥＮＤ相比我睇，勁讚好正。上課時老師曾經講過，由一個香港人介紹台灣人台北有咩餐廳好食，好奇怪耶，哈哈！
⭐其他PO又話唔記得晒D味道，呢間又寫得咁詳細？鱔稿呀？哈哈，非也，其實我之前都知道自己有失憶問題，食記又積聚太多無力清理，我後期已開始嘗試食完就寫Ｄ ＤＲＡＦＴ係電話記事簿入面。。。點知電話死埋，渣都無。。。我終於開竅，寫完ＤＲＡＦＴ即ＣＯＰＹ去ＧＭＡＩＬ，ＳＥＮＤ個ＤＲＡＦＴ落自己ＥＭＡＩＬ ＢＯＸ，先得以保存一點點回憶咋。。。
味道：★★★★★
環境：★★★☆☆
服務：★★★★☆
衛生：★★★★☆
抵食：★★★★☆
原味湯廚
地址：台北市 大同區 南京西路25巷48號
電話：+886 2 2559-6356
網址：oursoup.com
沒有留言:
張貼留言