網頁清單

2016年7月20日 星期三

【烏來+林口】泰雅仙境奇遇記+林口Outlet

20 March 2016, Sunday

《續》烏來。泰雅仙境Spring+Spa 2日1夜溫泉之旅

行程:烏來老街 → 烏來泰雅民族博物館 → 雅各原住民山豬肉香腸 → 烏來台車(CLOSED) → 烏來瀑布 → 昇瀧泰雅珈琲館 → 烏來林業生活館 →  阿春小吃店 → Spring Spa溫泉山莊

完晒啦個行程,唔係咩?!

咳... 係咁嘅... 我都以為係... 點知第2朝係酒店食完早餐Buffet,車主話不如再出去逛多轉,我地2個行李都執好晒,都無打算再浸溫泉,緊係好啦~

出去逛完再返酒店會合2位女士後,佢地建議去新開嘅林口Outlet... 去,緊係去啦~

逛完林口Outlet,朋友約咗人食晚飯,唔知點解來到台灣我會變得咁厚面皮,居然2仔底死跟!OMG!

結果... 後加行程:烏來瀑布 → 林口Outlet →小江日本料理


話說... 尋晚我地係阿春小吃店食完晚飯,返酒店途中,見到吊橋好靚,就中途落車影張相。


嘩!仲會變色o架!


食完早餐Buffet,車主話不如再出去逛多轉,我地2個行李都執好晒,都無打算再浸溫泉,緊係好啦~

今次開車繞山路上,原來不一定要用腳行才能上山的。一路上都有不少櫻花,但經歷過落雪同大風雨的催殘,櫻花顯得份外凋零。



一轉眼就來到烏來瀑布~


這個角度更好看~


奇遇來了...

話說我其實好耐冇upload相上facebook個人戶口,尋日嚟到烏來瀑布,honey教我玩slow motion video,覺得好好玩,就狂錄。

返到酒店稍作休息嘅時候,upload咗段video上facebook個人戶口,跟住冇幾耐同我同一條村出世一齊玩大嘅好朋友就即刻message我,佢話有個好朋友喺瀑布開店,叫我行入去同佢打個招呼,但係我已經返咗酒店喇喎,又點打招呼呢?冇諗過今日有機會再來,當時看起來好像沒有機會來打招呼。

估唔到今日會重臨,咁一場嚟到,就鼓起勇氣行入去朋友講嗰間店碰碰運氣...

其實我份人都幾內向,好怕同陌生人講嘢,離鄉別井會讓人變得勇敢咗?

竟然... 真係夠膽拎住個電話行入去,用我接近零嘅國語,向住收銀櫃位女士問佢係唔係乜小姐,對方竟然無因為我嘅「白撞」而趕我走,反而好努力同我相認,大家用好有限嘅語言溝通講咗一輪,佢問我係咪香港嚟?講左一堆名字後,最後俾我哋搭通天地線!我仲隊個電話俾佢睇朋友嘅全家福!原來朋友嘅朋友係佢姐姐唔係佢本 人,就係咁兩個陌生人竟然攬頭攬頸走出去瀑布一齊影合照!我相信只有喺鄉村長大嘅人,先會對陌生人咁冇防範!

佢仲話要煮飯請我食午餐,我話唔得喇,趕住返酒店checkout,佢竟然話間酒店嘅老細佢識得,等佢打電話同酒店老細講叫佢唔使我哋checkout住,嘩,好利害呀!跟住問我尋晚去邊度食飯,我一講,又係佢識得嘅!從小在烏來長大,果然對所有街坊都瞭如指掌。

正所謂盛情難卻,如果唔係因為朋友嘅太太喺酒店等緊我地,同埋另一位朋友要趕住去機場搭飛機返香港,唔可以留低食飯嘅話,我估我地真係會好唔客氣地食埋飯先走,哈哈。

結果,佢都拿出了一大堆零食同埋幾個餐前小吃來招呼我哋。仲推薦抗抑鬱抗失眠嘅馬告茶請我哋飲。



我哋傾咗好耐好耐,都係小時候喺鄉村長大嘅美好回憶。今早呢2個小時,真係一次好特別又寶貴嘅旅程。我會永遠記住。

朋友嘅太太已經call爆再call爆佢個電話,係奪命追魂Call嘅追殺下,我哋只好依依不捨地離開!

返酒店拎行李checkout,之後就驅車直達林口 MITSUI OUTLET PARK。


人超多,好似開咗唔夠一個月,正值午飯時間,food court同餐廳多人得恐怖。餐廳嘅超長排隊人龍完全唔使諗,food court都係千辛萬苦先搵到戶外嘅座位。排隊買食物嘅人龍亦都好恐怖,我都唔敢慢慢揀,只係搵間最近嘅餐廳,求其買個拉麵食就算啦。




食飽就逛陣,店舖都冇咩減價貨,冇乜收穫。只係幫Honey買到1個皮嘅斜肩袋,堅抵100蚊港幣有成交。



與此同時,車主就車咗朋友去機場,再返嚟接太太返台北同朋友食晚飯。最估唔到嘅係,我哋竟然跟埋去黐餐!唔通我哋來到台北之後DNA已經mutant咗?點會變得咁厚面皮㗎?我地係香港從來都唔會咁嘅?

沒有留言:

張貼留言