【台北】富利得利歐式餐坊：豬手好德

16 January 2016, Saturday

週末的Late Lunch... 興致勃勃發掘一下新路線... 不經意的路過, 見餐廳內座無虛席, 嗯, 應該都唔會太差啩... 段估...

(好, 計數機!!! 段估指數 : 餐廳位置都幾僻, 20分... 價錢唔平, 20分... 繁忙時間過埋, 20分... 滿座, 20分... 加加埋埋段估都有80分, 應該真係幾唔錯先會咁啦)





(嘿嘿, 我地2點先入去食Lunch, 食到3點D客人走得七七八八先影到呢張相, 唔敢開閃光燈挑燈, 如果唔係應該影得靚D)

牆上掛了幾個牛鈴... 好有親切感... 我去瑞士時都買咗一個掛係屋企裝飾...


香烤脆皮豬腳 NT$520
-- 餐牌話人氣必點第一名, 雖然價錢唔平, 但眼見真係枱枱都食佢, 緊係要試一試啦~~~ 一放入口... Wow... 真係好得!!! 塊皮脆到嗦嗦性, 肉質軟腍, 皮肉之間的膠質仲好重好黐, 口感一流!!! (利申 : 鹹豬手我一向麻麻地好)


青醬蘆筍鮮蝦麵 NT$380
-- 好好好味!!! D青醬多到好似唔使錢咁, 我自己係屋企煮都無佢咁重手, 食到陰陰嘴笑, 好開心...


套餐包沙律, 湯, 麵包, 飲品, 甜點...


沙律菜好新鮮...


粟米湯正...


甜點就... So So啦...


加NT$20升級做德國花園水果茶... 嗯... 同印象中台灣的水果茶有點不同, 用莓乾煮, 飲唔慣, 唔係我杯茶...


價錢唔係話好平, 但豬手真係做得好好, 值回票價... 環境都好舒服... 推薦!!!


味道：★★★★☆
環境：★★★★☆
服務：★★★★☆
衛生：★★★★☆
抵食：★★★☆☆

富利得利歐式餐坊 Fulli's Deli
地址：台北市 士林區 克強路17號
電話：+886 2 2831-2741
網址：https://www.facebook.com/FullisDeli.MinShengE