網頁清單

2015年12月29日 星期二

【台北】阿美飯店:異鄉做冬, 錯入團餐店

22 December 2015, Tuesday


新聞一則 : 台北氣象站22日冬至來到30.5度高溫,創下67年來冬至最高紀錄,中午時分走在街頭一點也不冷,彷彿又回到夏天。

今朝朋友著短袖衫來接我地, 搞到我地著抓毛好似發冷咁, 後來先發現, 我地真係發冷, 中午時熱到脫剩長袖薄T都好似中暑咁...

今日除咗特別熱, 仲有更特別的... 首次唔係香港做冬+首次同朋友做冬!!!

朋友話原本唔係訂阿美飯店, 搵咗2間餐廳都Full咗, 搵到第3間(阿美飯店)先有位... 懷著興奮的心情去... 

阿美飯店旁有一家好記擔仔麵, 大排檔的格局, 門外放了幾十碗小炒SAMPLE, 裡面超級熱鬧的... 看到阿美飯店的餐牌才知道是姊妹店, 日賣2000碗擔仔麵...

阿美飯店內放置了大量古畫飾品與古董傢俱, 古色古香的懷舊飯店...



大部份店員都不太禮貌, 向大門口收銀櫃檯職員表示有訂位, 佢迫我地坐樓下大門口旁的大枱, 我地得4個人, 唔想浪費佢張8人大枱, 而且實在唔鍾意坐係人來人往+大門不斷開開閂閂的入口側 (貼實果隻), 我話想坐樓上, 收銀櫃阿姐話樓上張張枱都係咁大, 迫我地坐呢張, 無奈坐下, 結果... Honey被蚊咬得腫腫的!!!

身後的2張枱其實位置已比我地好, 但一直無人肯坐, 個個入到來望兩眼討論一陣又出返去...


朋友未到, 去一去洗手間先... 得2格, 1格是坐廁, 頗乾淨的, 另1格是蹲廁, 嘩... 好Ugly呀, 黃甘甘, 好嘔心... 真係咩人去咩廁所!!!

朋友來到後, 佢地熟行當然由佢發板... 原本朋友的太太推薦肝"月連", 不過朋友驚叫太多食唔晒, 所以我地擱置咗...

擔仔麵 NT$40
-- 日賣2000碗的擔仔麵, 當然要試下啦... 嘩!!! 湯頭好甜, 麵身有咬口, 肉燥好香, 真係好味!!! 度小月太難食... 下次過隔離食碗麵算啦...

 
鳳梨苦瓜雞湯 NT$120
-- 香港人食飯係鍾意飲啖湯嘅... 用菠蘿煲湯真係諗都無諗過... 淡淡的菠蘿果味, 淡淡的苦瓜甘味... 好味講唔上, 唔難飲, 夠特別...
煎菜脯蛋 NT$150
-- 鬆鬆厚厚的菜脯蛋, 略為濕潤, 表面有一陣薄衣, 蛋香不足...


燙山蘇野菜 NT$100
-- 青草味去得差不多... 沒有什麼味道, 只是在香港沒吃過此菜, 所以感覺特別...


甘蔗煙燻雞 NT$160
-- 古早爐灶煙甘蔗皮來燻, 有煙燻的香味, 除此之外沒有其他, 雞肉冷冰冰, 其他人都不願吃, 只有我自己不斷吃到最後... 並非喜歡, 只係不想浪費食物...
桃園客家五香豬肉 NT$150
-- QQ軟軟, 口感像啫喱糖, 甘香帶甜, 真的好吃...


食物份量少, 吃罷幾道小點後, 大家都沒意思再Order... 其實大家都意猶未盡, 但環境實在不適合詳談, 加上Honey又比蚊咬到腫晒, Honey的朋友建議轉場食甜品... 贊成!!!


寫Blog時上網Search一下, 駭然發現餐廳官方網站首頁全是簡體字, 不禁打個冷震... 再睇埋呢句"团体旅游餐.零晨12点也有。来台旅客的超值团体餐。", 心寒不已, 令人想起上次中伏於欣葉台菜雙城會館 (做團餐做壞招牌)...


深夜迷思... 去錯地方做冬?!! 係!!! 我認, 我份人好膚淺!!!



味道:★★★☆☆
環境:★★★☆☆
服務:★★☆☆☆
衛生:★★☆☆☆
抵食:★★★☆☆

阿美飯店
地址:台北市 中山區 吉林路81號
電話:+886 2 2523-5115
網址:www.hawji.tw

沒有留言:

張貼留言