10周年‬「A Happily Ever After Christmas」慶典 @ 香港迪士尼樂園 Hong Kong Disneyland

16 November 2015, Monday

唔經唔覺, 原來香港迪士尼樂園已經10歳喇!!!

想當年, 成班老友一齊入o黎為2粒11月之星賀壽, 連世伯伯母都來玩埋一份, 陣容如此盛大的大合照可謂經典中的經典...



10年後的今日, 感謝香港迪士尼樂園邀請我同Honey出席《Happily Ever After》幸福序幕, 一同分享10周年慶典的奇妙喜悅...



尋日睇天(氣預報)話今日會落雨... 唉... 去迪士尼先嚟落雨... 唔通連個天都唔中意我?!!

嘩嘩嘩!!! 今日好天到呢... 曬到眼都睜唔開... 我剩係帶咗雨傘咋, 零防曬準備, 斑斑雀躍地跳動-ing...


腦海裡面不禁浮現出經典廣告對白... 其實落雨又有咩好怕喎, 聽日一定會好天既, 希望在明天呀嘛... 你點知今日會好天o架?!!

是日亮點... 全新百老匯式音樂劇「迪士尼魔法書房」首映禮!!!


長達28分鐘的「迪士尼魔法書房」由米奇老鼠、高飛同快要溶化的雪人小白, 穿梭《小泰山》、《小魚仙》、《魔髮奇緣》、《勇敢傳說之幻險森林》、《阿拉丁》、《公主與青蛙》及《魔雪奇緣》後, 係完全溶化前成功回到自己的故事... 個人最喜歡是如幻似真的銅像... 有ELSA女王壓軸主唱LET IT GO, 小朋友們一定聽到如癡如醉...








欣賞完令人拍爛手掌的「魔法書房」首映禮, 係繼續我地嘅奇妙旅程之前, 要去一去維多利亞式的Plaza Inn嘆一嘆粵菜先... 「邁向10周年」紀念系列熊啤啤對米奇包"熊"視眈眈...


好感動... 廸士尼終於有Free WiFi... 我終於可以瘋狂Upload相片啦, 嗚嗚嗚嗚... (無線網絡服務 “Guest-Free-WiFi” 指定地點包括商店、餐廳、巡遊路線、樂園正門及所有室內賓客服務地點)

餐後到美國小鎮大街的聖誕樹打卡... 個天靚到我想喊... 好感動... T_T


剛好遇上換上閃亮新裝的「米奇與好友 10 周年出巡」, 當然唔可以錯過啦...






Donald同Daisy換咗靚靚新衫...


聞說近年大家好鍾意將"開心到飛天"掛係嘴唇邊, 就等我來個"錯誤"示範啦!!! (唔係因為我重所以飛唔起吖, 係手提袋內的2隻Duffy太珍重咋)


工作人員正忙於為今晚睡公主城堡上演的「星夢奇緣」煙花表演作準備...


趁呢個空檔, 去金礦山發一轉大財... (千秋大夢)




有人係無時無刻都要進食的...


仲要慢慢嘆, 就係咁... 遲咗一步... 美國小鎮大街已經人山人海...


好不容易擠到閃亮聖誕樹附近, 個子不高的我, 擠在人群後如何努力踮高腳都係完全睇唔到前面的情況...


提提大家, 一定要早D去霸定頭位, 見證愛莎女皇同安娜公主主持的《魔雪奇緣》聖誕亮燈禮!!! 唔好好似我咁慘...


慢人幾拍... 唯有(合法地)借官方照片一用...


♫ 又見雪飄過 飄於開心記憶中 讓我再想你 卻掀起我心愛 ♫ (改下歌詞先... 而家唔改遲D無得改)


聖誕節入來樂園玩真係特別忙... 趕完呢場, 又要準備趕下一場... 「星夢奇緣」煙花表演!!!

車, 煙花不嬲都有啦, 有咩好睇呀?!! No No No No... 此言差矣... 今晚呢個煙花係加咗影像投影技術, 一邊放煙花, 一邊有迪士尼朋友投影係公主城堡上... 今晚仲有阿Kay謝安琪來高歌一曲為「10周年 A Happily Ever After 閃亮城堡慶典」助慶, 全場氣氛High爆...



欣賞完煙花, 原來仲有10周年慶祝派對... (Errrr... 我淨係掛住玩, 都無睇清楚份時間表)




即燒原隻乳豬超好味... 源源不絕供應... 好想狂食, 但剛才食了漢堡包, 有心無力了...



近距離欣賞旋轉木馬同時品嚐美食, 別有一番滋味... (進食期間, 好多明星搭過枱, 簡直星光熠熠耀木馬)



現場仲有好多令人垂涎欲滴的美食, 長腳蟹、日式刺身、西班牙炒飯、烤羊胺... 但吸引力絕對比唔上一班廸士尼朋友...



由朝到晚都好受歡迎的10周年‬「Happily Ever After」Backdrop, 3位星媽同星二代都影得如癡如醉, 好彩周家蔚好好好好人比我個檔期我影1張相... 其實我都唔好意思同小朋友爭...



玩飽又食飽, 係時候講Bye Bye... 不單止10周年, 無論係15周年、20周年、25周年、30周年、50周年, 我都一定會再來...



臨走影多幾張聖誕卡Upload呃Like先...





而家香港居民有「4人樂遊HK$1,616聖誕套票」優惠, 仲有酒店住宿同年票續期優惠, 詳情可瀏覽香港迪士尼樂園網站：www.hongkongdisneyland.com。