網頁清單

2015年8月29日 星期六

季季紅風味酒家 : 行衰運!!! 爸爸的生日飯敗興而回

21 August 2015, Friday

學咗車2個月, 今日終於到咗考試日...

爸爸的生日飯原本唔係今日食, 不過暑假大家都太太太忙喇, 講緊D細路, 冒住肥佬情緒低落的風險, 死就死喇...

肥就95%都會肥嘅喇...

阿Sir送我上路前補句, 加D LUCK就會成功... 噢... LUCK... 我從來都無... 聽罷自知死神來了...

只係勢估唔到, 霉運竟然強大到會影響埋晚上的壽宴!!! 我呢粒禍國殃民的黑氣石在古代應該已經拎咗去祭天...


尋日最後衝刺練習泊位時, 滂沱大雨, 落狗屎咁, 當然衰咗啦~ 天文台明明話天鵝今日都會送好大雨比我地, 尋日阿Sir仲話 : 你估聽日一定落雨咩, 唔一定o架喎~ 咁都比佢開口中, 激死~


好天到呢~ 曬到我對眼都張唔開~


仲以為上天有好生之德, 大發慈悲, 憐憫我呢片苦海浮萍, 點知... 都係... 肥!!!

邊個話香港島駕駛學院全港最易考o架?!! 你地唔好再害人啦!!! 可能10年前係嘅, But Not This Day!!!

我就話無得揀一定要來呢度啫, 你地吹到全世界誤以為真, 搞到有個後生仔明明住元朗都走來呢度考, 話諗住放工時入來學, 學完先返元朗, 點知原來呢個Centre果D阿Sir個個都話唔教夜晚, 雖然發票話上課時間係8:30-23:30, 佢結果要請假來學...

呢度嘅交通, 仲混亂過太古坊, 人多車多障礙物更多!!!

而家起緊MTR大樓, 又有成橦工廠大廈改做Outlet, 又有大型地舖裝修中, 整路工人+強國大媽+裝修工人不時當條馬路係自己屋企個廳, 係馬路上「自由行」!!! 再加埋路邊2邊都泊滿晒大型工程車, 得返半條路仲要雙線行車, 排晒長龍瘋狂爬頭, 有車牌都難行啦吓話!!! 所有彎位都泊晒工程車, 未轉完個彎已經要打燈爬頭...

路線2本身比路線1難, 今日盲彎仲泊咗部大工程車+行到S型瘋狂TAXI, 學車咁多日都未試過情況咁惡劣, 加D LUCK? 嘿!!! 去第2個Centre或者仲有少少LUCK嘅!!! MTR大樓仲要起多1年以上呀!!!

回到CWB, 食返杯聰嫂龍眼冰安撫下咁不幸嘅自己...


收拾心情去奧海城食晚飯... 預訂了原隻乳豬飯, 再寫咗9個餸, 15個人, 諗住差不多啦~


入定單先, 等到7:30PM未夠就齊人, 即上乳豬!!! 影大合照係指定動作啦~ 大家高高興興地食乳豬飯啦, 仲未知黑氣已濃罩大地~



之後只上了1碟難食到食剩75-85%的大蒜苗炒培根...

坐咗1小時, 都無再上過1碟菜!!!

講講呢度個環境先, 我地坐廚房門口, 身後係走火通道行2步就係外街, 15人坐張10人枱(呢樣佢電話有講話要坐迫D), 最離奇係唔知點解垂直放塊10人枱圓板係我細佬同姐夫肩旁, 我姐夫一移開個身少少塊板就想拍落o黎, 不過我地有更重要嘅事要投訴...

見到有個男人帶住個細蚊女係後門走入廚房, 滕出滕入十幾廿次, 之後仲拎個電壓計衝入廚房, 我已心知不妙...

搵經理問咗N次, 終於知道電爐壞咗, 整緊...

個有米豬都相當飽吓, 坐到悶悶地, 個腦自然多o野諗... 思考到剛才亂落單叫咗大多餸, 大家都表現出一個飽樣, 咁咪搵個職員想話CUT咗2個餸--雞煲同牛柳粒...

點知個職員仲話煮緊唔可以CUT... 煮緊?!! 你個電爐壞咗你搵咩o黎煮呀?!! 火都o黎!!! 即時開火 : 我叫你CUT就CUT, 唔CUT嘅就全部餸CUT晒去!!!

之後佢搵來經理, 經理話要去買零件要1小時, 要坐多1小時先有得食...

問題少婦來了...
第1, 五金舖向來太陽落山就收, 請問你農曆7月夜麻麻去邊度買零件呢?
第2, 1小時後唔保證一定維修成功o架喎...

結果, 阿經理幫我地埋咗張單, $850, 無收汽水啤酒茶芥...

但係我地成15人, Friday Night, 8點半, 去邊都無位食啦...

姨甥女QQ話有個地方肯定有大把位... Food Court!!! 我要寫個服字, 咁大張枱都比你地搵到...


我地呢家人真係好能屈能伸... 只係可憐生日果位啫... 不過一家人齊齊整整平平安安, 理應粗茶淡飯都一樣咁開心嘅...

隔離飯香果真是金石良言!!! 明明太古城都有大食代, 我偏偏無幫襯過綠豆沙同煎餃子, 今日一試驚為天人, 好好味喎!!! 下次要encore先~




是次每人消費約$60元
味道: 3 環境: 1 服務:1 衛生: 3 抵食: 2
###
地址 : 大角咀海泓道1號奧海城3期地下G22號舖
電話 : 2618 2316

2 則留言:

  1. 世伯生日快樂,
    衰運走哂架喇,
    意外嘅嘢,妳估唔到。

    回覆刪除
    回覆
    1. 代家父多謝你先 :)
      再衰的運都遇過, 只要堅強面對, 明天一定會更好 XD

      刪除