網頁清單

2015年5月21日 星期四

台北「尋找他鄉」2015の華華大飯店 x 劉山東牛肉麵

11 May 2015, Monday

對上一次來台北是2005年, 剛好是10年前,今天是人生第2次來台灣/台北,對台北的感覺是既陌生卻又有一份家的感覺,安心又自在。

上次Honey來台北睇展覽,我是抆衫尾跟著來。今次Honey來探望移居台灣多年的好朋友,我當然都是一樣... 死跟,不會放過任何有得「食玩買」的機會,哈哈。

Come some of the music... (背景音樂:喜多郎《Dance Of Sarasvati》)

旁白(King Sir Mode):拉姑版《尋找他鄉的故事》系列第1集... 天母爸爸!3日來走訪1位土生土長香港人,為了孩子學業,決心放棄名利留在台灣重新開始的好爸爸...

《第1集 ~ 完》


#####################################

很討厭坐早機... 雖說是10點機,但要早3小時到達機場,我已偷工減料7點先開始從家出發,咁都要5:30AM起床啦~~~ 好眼睏呀)))

7:40AM 到達香港國際機場

今次2件Hand Carry行李,唔使排隊寄倉,昨晚已用手機App預辦登機證,可即時入閘,好多時間剩。 


8:15AM 早餐時間

每年好努力地碌卡,是為了免費Priority Pass機場貴賓室會藉,食物不太好沒有半點留戀,休息環境的確很好,用埋今次應該短期內無福再消受,幸好還有免費Airport Limousine作為遠走高飛的一點慰藉。



9:30AM 登機時間

在Broading Gate前留倩影是常識吧... 排我後面的Aunt讚小虎好得意... Thank you~~~



第1次食咁簡單的飛機餐(指三文治以外的),沒有選擇,統一炒飯,幸好味道不賴,還暖的。


在飛機門關上後,呆坐了半小時,仍然頂天立地(在跑道上排隊等起飛),到達台北已接近1時...

12:50AM 抵達台北桃園國際機場

出閘後第一眼見到的... 是司機手中的名字紙牌。接著就是「機場限定」"For遊客Only"的Taiwan Mobile Prepaid Card,5天或以上的話,中華電信最貴,所以中華電信無人排隊,3天的話3間電信商都一樣價錢,Fit晒我呢個「3日2夜」「自由發揮旅行團」~

3 Day Pass NT$300 Unlimited Data + Airtime $100,為起港紙25蚊1日無限上網,抵到爛呀!


我訂台北車站附近的酒店,原意係坐機場巴士總站去總站方便D,出入又有捷運,但Honey的朋友太熱情,居然搵Airport Limousine來接我地去酒店,太體貼吧!(今次係台北3日都無坐過捷運,結果搵唔到臺北車站的洪瑞珍,亦去唔到臺北旅遊服務中心申請「TPE-Free」(Taipei Free 臺北公眾區免費無線上網)。

前往台北市中心途中,開始下起雨來。


今次我地好好彩,出發前有個超強颱風形成,一直都預測佢會影響台灣,誰知路徑1日低過1日,最後完全無掠過台灣,第2日仲出猛太陽,曬到黑炭咁。
又,出發前從新聞得知台灣遇上68年來最嚴重的旱災,台北情況更是非常嚴峻,台灣當局宣布實施制水,每星期供水五天、停水兩天,是當地13年來首次限制民生用水。出發前有點擔心係酒店無水沖涼唔知點算,到達後從朋友口中得知只是新北市及桃園市制水,咁都無咁驚。


今次因為航班時間問題,無自己上國泰網站訂機票(最早1PM/3PM機),走咗去永安(10AM機,再早都有)買Package,係無乜選擇情況下(只是住2晚頂硬上)選了華華大飯店,綜合了眾多Bloggers的分享,加了百多元住分館,聽講大少少又新少少。

酒店外觀同大堂無咩值得Share,一張相都無影過,好殘舊的賓館一間,像回到50-60年代的香港,雖然我果時未出世,哈哈。酒店房內的照片是晚飯後回來補影的,其實房間還可以的,不太細,雖然老土但頗新淨,蠻滿意的,來回機票連2晚酒店每個人才HK$1860,還想有要求?直至發現洗手盆及廁紙架全是霉菌,不期然反胃,再平下次都唔會再住。




1:50PM 劉山東牛肉麵

10點半仲係HKIA跑道上,未夠2點已經放低埋行李係酒店走返出來搵食,相信呢個正係港人喜歡去台北旅行的原因。

朋友話自己住咗幾年都好少來呢區,唔係好熟,劉山東牛肉麵係佢當地的朋友推介比佢。


創立於民國40年,即西元1951年,嘩,即係開咗65年的老年,勁!店面好細,只有好幾張枱,車水馬龍,別人都在進食,不好意思拍照,見諒。


清燉牛肉麵 NT$130 (約HK$30)


紅燒牛肉麵 NT$130 (約HK$30)
- 紅燒牛肉好軟腍,湯底顏色清澈,呷一口感受到一股深不可測的實力,超讚,平時勁怕青蔥的我,今天卻覺得它好香好香,混在湯中令湯頭更鮮更香,好好味。明明坐飛機坐到反胃,唔想再放食物入口,但食完呢碗麵,即刻舒服返晒。


朋友帶我地去找劉山東牛肉麵時迷路走了幾個圈,到第3天早上準備Check-out時發現原來酒店房對正店子(右圖是將左圖放大了的),根本係酒店直接過對面馬路小巷便是,我地Day 1行咗個大運。


味道:★★★☆☆
環境:★★☆☆☆
服務:★★☆☆☆
衛生:★★☆☆☆
抵食:★★★★☆

劉山東牛肉麵
地址:台北市 中正區 開封街一段14巷2號
電話:+886 2 2311-3581



更運桔的笑料一則:朋友叫我地不用在香港唱錢,強調在當地HSBC ATM機提款Exchange Rate是最理想的(人家在台北住了幾年,怎能不信),結果我倆帶著10年前用剩的3千台幣,浩浩蕩蕩來到台北。問題來了,一出示相中的紙幣,當地人即告之此紙幣已不通用,要去台銀更換。OMG,我無錢喎!正所謂出外靠朋友,要投靠別人的時候終於來臨!好安達!


大家都叫我唔好用留為紀念,可能第時更值錢咁話喎。

之後我地去了天母區拜訪朋友一家,順道去HSBC提款,個心先定D。

晚上朋友再帶我地去食台灣地道小菜。

《待續》


台北總匯 : http://www.kenmerry.com/search/label/└15台灣「尋找他鄉」

2 則留言:

  1. 我成廿年無去過臺灣喇,當年未有捷運,
    而家方便好多,妳有朋友帶著走,超正。
    有時當地人未必熟悉路向,我就喺路盲@@
    食到心頭好,一嘗心願,
    哩間牛肉麵,又多料,又平,一定好味♡♡

    回覆刪除
    回覆
    1. 我仲以為自己係異數, 香港人好鍾意去台灣食o野嘛, 我去得1次好似好奇怪, 哈哈, 估唔到一山還有一山高!!!
      有熟人帶路真係好好多, 3日食足咁多餐都好味♡♡♡

      刪除