網頁清單

2015年4月11日 星期六

大澳「食食食食食」復活節尋親一日遊

4 April 2015, Saturday

Yo~ 等到頸都長埋的復活節5天長假期終於來臨!!!

如果唔出去玩吓, 仲匿埋係屋企上網, 咁真係好對唔住自己同屋企人囉~~~

加上今日係4月4日兒童節, 點都要同D小朋友出去玩吓啦~~~

趁大家都去晒外遊, 我地就去人煙稀少(我地以為)的郊外吸吓新鮮空氣...

原本2姊提議去長洲, 但我話Plan緊去大澳, 結果... 3代同堂, 一行14人, 浩浩蕩蕩, 向香港著名水鄉 -- 大澳出發!!!

由於係我提議去大澳, 大家好似當咗我係領隊, 居然問我今日行程係咩...


細細聲同大家講, 其實我係第1次去大澳!!! 我細佬都係... 其他人竟然好似去過晒, 我大姊仲合埋眼都識行, 我講親邊間舖頭出名咩好食佢即刻講得出係咩位置... 勁!!! 即時放心晒...

10:30AM 大嶼山港鐵東涌站東薈城集合...


坐11號巴士由東涌入大澳車程需要50分鐘, 有老有嫩, 上車前捉晒佢地去東薈城方便完先去巴士站排隊...

嘩嘩嘩嘩嘩!!! 條龍打晒蛇餅呀!!! 好似加咗好多車, 唔似20分鐘1班, 不停開車, 結果都排咗足足1個鐘先上到巴士!!! 2姊一家被截龍, 要等第2架巴士先上到, 竟然早我地20分鐘到達大澳... 奇奇奇!!!


12:45PM 到達大澳

海堤畫上了七彩繽紛的圖案, 令我想起係沖繩拍婚紗相的點滴回憶...


十幾隻小肥羊步進看不見盡頭的土產街...


一大籬的鮑魚係無人看管無遮無掩之下, 放在人來人往的路邊, 香港郊區的治安真好...


大澳曾是香港的主要漁港, 漁民蜑家人的聚居地, 到處都是的海味店...


大澳地標之一... 橫水橋!!! 橋的中間位置是吊橋, 可收起比大型船隻駛過...


大澳獨一無二的真正地標 -- 建於水上的棚屋!!! 姪女話要坐呢隻黃色船去睇海豚... (天真的小孩誤信推銷員的謊言)



正值曬桔仔的季節, 到處都是...


太陽伯伯好熱情... 大澳區民都唔客氣喇... 鹹蛋黃、蝦乾、蝦膏、鹹魚...





荒廢了的建築物...


大家忙於造船...


1:05PM 我同Honey做先頭步隊, 由11號巴士站行到大澳文物酒店, 剛好20分鐘... 索晒氣...  



餐廳(Tai O Lookout)腳下的指示牌點咗我地去正門入, 兜咗好大個圈... 其實望到看守塔, 直行上去就係餐廳... 話就話有升降機, 但維修緊...


老嫩嫩曬住行咁遠水路來到(加埋剛才係巴士站排1小時隊, 再坐1小時車), 仲要行呢條樓梯上餐廳, 簡直係挑戰極限... 其實我都有D擔心佢地行唔到上來, 好彩佢地好勁, 粒聲都無出, 默默地行...


1:30PM 老老嫩終於行到來Tai O Lookout... 比D掌聲!!! 啪啪啪啪)))


餐廳係舊大澳警署60年代加建, 屋頂是玻璃天幕... 海天一色美景盡收眼簾... 



辛苦咗幾粒鐘, 有得食啦喂, 大家笑下啦~~~

大澳一品鮑魚炒飯 $98
-- 餐牌話主要材料有蝦仁、雞肉、瑤柱及蝦醬, 唔知點解上枱時有2隻鮑魚... 炒飯唔熱, 蝦醬唔均勻, 有成舊白色飯, 蝦醬唔夠香, 唯一優點係好乾身...


蝦醬豬扒包 $78
-- 完全無蝦醬味!!! 餐牌抺走蝦醬2隻字的話, 都可以算係合格的豬扒包... 最好味嘅係炸薯角, 粉嫩惹味... 好熱氣呀!!!


法蘭克福熱狗 $88
-- 賣相嚇人, 7"長, 配料有雞肉醬、白洋蔥、車打芝士、芥末、茄醬... 雞肉醬有腥味... 最好味嘅又係炸薯角...


意式鮮蝦煙肉白汁意粉 $98
-- 全餐最好味最有水準!!! 大蝦肉質結實, 白汁濃香, 滿滿的芝士粉沾在意粉上, Yummy, 瞬間被KO...


炸魚薯角 $98
-- 外皮香脆, 魚肉濕潤, 水準不俗...  


白松露油羅勒蕃茄汁長通粉 $88
-- 賣相不俗, 未有機會試味已被蒸發了...


食飽飽, 趁大家剛叉足電, 係餐廳門外影張大合照先... 自拍神棍今日剩係出咗場2下就匿埋了...


手機前置鏡頭質數真的不太好, 要認真考慮下轉部SONY RX100 M3...

大澳文物酒店於2012年3月21日起每天舉行免費導賞遊... 可惜我地人太多, 老老嫩嫩又行得慢, 唔想佢地咁辛苦, 加上大家個心都飛咗去食食食街, 所以無參觀酒店就回航...

正值潮退, 在大澳文物酒店對開的泥灘, 漁民正努力掘蜆, 遊人努力觀看+拍照...


大澳漁村內的主要交通工具...


大片紅樹林...有好多招潮蟹&擬蟹守螺... 條秋茄唔可以垂直插落泥的話, 係生長唔到的...



獨立屋, 背山面海, 門前一大片草地, 多美好的居住環境... (唔計假日數以萬計遊人湧到)


屋前擺地攤賣DIY小手作... My Dream Life...


大澳名物 -- 蝦醬 & 蝦乾!!! 必買吧...




離開酒店無幾遠啫... 人呢?!! 已經失散咗?!!



上演第1幕尋親記, 原來佢地已經入咗去棚屋坐低食緊豆腐花!!! 快到吖... 等我都飲返支檸檬薏米水降下溫先...


再次回航途中又影吓相... 嘩嘩嘩))) 姪女搶相機呀))) 雖然我部Sony RX100瓜咗一大截, 我都好想好想換部Sony RX100 III, 但係新機一日未到手, 部舊機唔瓜得住, 比佢影咗幾張姑媽就搶返部機, 哈哈... 下次要記得帶埋部SONY WX5出來比佢亂舞, 反正擺係書櫃入面都係等壞...





行唔夠幾步, 又去咗邊呀?!! 又要尋親?!! 又食?!! 好似離開餐廳1個鐘都未夠喎... O晒嘴囉!!! 我的喪食力應該源自DNA, 泊埋佢地度, 即時變得渺小, 簡直係蚊脾同牛脾...


我黐到1個免費冰菠蘿, 呵呵... 中間有圓孔的是罐頭貨, 無圓孔是新鮮菠蘿, 咁當然食新鮮菠蘿啦~~~ 甜味欠奉, 應該無浸過糖水, 果香欠奉, 可能呢幾日人多, 未熟透就要推出市面, 值得一讚的, 是好冰凍, 涼透心, 消暑一流... 另外買咗包雞屎藤返屋企慢慢嘆, 都係黐的, 呵呵...



轉個彎啫... 有人又食啦!!! 有Blogger話早2日排炭燒雞蛋仔排咗1粒鐘質數No Good唔值得... 咁啱有底雞蛋仔放係度, 咁啱又無人排, 咁啱我又路過, 咁啱我個荷包仔又有16蚊, 咪買來試吓囉... 都幾好味呀, 個邊夠晒脆, 咬落Lok Lok聲, 個心又滿晒, 成個Muffin咁, 好香班蘭味, 唔錯唔錯...




繼續回航... 穿越時光倒流30年的手信街...




回到吊橋... 姪女較早前路過時推銷員言之鑿鑿話一定睇到海豚, 聽到佢雙眼發晒光, 食飯時同我講要坐船, 我話唔坐佢即刻頭耷耷好失望... 好啦, 你地去坐船啦, 我地繼續食食食, C U Later... (細佬話一上船船長即刻話今日1隻海豚都無見過, Hey, 我一早就估到啦)...


回到大街, 見到傳聞中的炭燒雞蛋仔, 約有10人在排隊...



有人又食啦... 好大粒墨魚餅呀!!! 白色個粒煎到金黃色, 好吸引呀!!! 墨魚哥哥個笑容仲吸引, 不發一言, 擺晒Pose比我地影相, 唔推介下點對得佢住... 心情好食咩都特別好味, 墨魚餅好鮮甜好彈牙, Yum Yum!!! 大家一定要試試...




姨甥女至愛... 人頭湧湧的炭爐燒雞翼!!! 嘩嘩嘩!!! 炭爐燒龍蝦呀!!! 好想食, 但堅飽, 等待家人期間入隔離雜貨鋪買咗把Handmade紙扇... 同埋身後的棚屋模型店參觀...





繼續前進, 終於來到盡頭, 其實可以向2邊走, 但時候不早, 與細佬一家會合後就離開... 路過海味店, 2位阿姊最後衝刺, 買了魷魚乾同鴨腎返去煲湯...



差不多去到巴士站, 路過隱姑茶果, 明明好飽, 係都要買2個返屋企慢慢嘆...


轉個彎就係巴士站, 呢家人係都要繼續食, 食力驚人!!! 最後唔知買咗幾多串特大魚蛋, 數唔到... 平時唔敢食街邊o野嘅Honey, 居然搶食, 我咬咗2啖仔咋, 比佢食晒囉!!! 嘩, 好鬼辣呀!!! 但好好味喎, 好惹味, 又彈牙... 正!!! Must Try!!! 大墨魚係好吸引, 但真係食唔落啦...




5:00PM 見唔見前面11號巴士站呀...


見唔見後面條龍尾呀... 呢度只係龍中, 龍尾仲有幾百米...


7:00PM 排咗1小時, 坐咗1小時, 終於返回現代世界 -- 港鐵東涌站東薈城...

2姊分頭行事去咗攞蛋糕, 我地就去餐廳攞位, 就係地面落到B1呢個Moment, 細佬個仔唔見咗!!! (O口O)

巧彩起爽一層搵得返啫, 嚇C人唉, 巧驚驚呀... 喎地!!! 佢太細(讀緊K3)仲未識驚囉...

2姊有和民卡, 一早訂了16人枱, 唔使等就有得食... 太好喇!!! 門口勁多人等緊位囉... 姪女真係好鍾意影相嘅呢, 但係你叭完地下唔好掂我, 唔該...


1枱4椅係路邊攤買的, 30蚊, 啱晒我間微型茶樓用... 隱姑甜茶果未至於好好味, 不過都比市區做的好... Honey讚雞C藤好味...


試唔到財叔糯米糍有少少失望...

今日行咗萬5步, 勁!!! 夜晚探耳仔體溫升至華氏99.6度, 日間已經不斷狂灌各式凍飲都出事, 貼塊退熱貼係額頭兼早抖... 瞓醒第2朝都有少少暈...


亂飲亂食咗1整天, 居然... 無肚痾又無嘔, 肚仔連少少痛都無, 勁!!! 証明大澳的街邊小吃非常衛生!!!

2 則留言:

  1. 除佐长洲,我最中意大澳,到香港有时间都会揾平日去行下 (游客都少 d )~
    乜 Tai O Outlook 的电梯坏佐甘耐都未维修?其实,另一面都有个入口,好行 d 但无正面甘靓风景睇 :P

    回覆刪除
    回覆
    1. 長洲我都好多年無去, 都想搵日去掃下街 :p

      刪除