網頁清單

2015年3月25日 星期三

[博客活動] 霞飛會館 Xia Fei Society Shanghaiese Cuisine : 微粉參見點心皇后

27 January 2015, Tusday

佳節前後, 大家都忙於籌備/出席大大少少的晚宴, 要搵個適合良朋歡聚的好地方已經難, 想要環境同食物都要有質數的, 確係會令人幾頭痛...

早前獲邀前往霞飛會館品味新一系式的春季滋養時令菜式, 由被譽為中國十大名廚之一的周元昌師傅精心設計, 揉合傳統海派濃郁口味及創意, 呈獻嶄新形象色香味俱全的上海菜...

又可以名正言順暫停減肥1日啦, 好幸福哦, 呵呵呵~~~


餐廳的陳設古色古香, 像回到過去的上海... 枱與枱之間有相當的距離, 空間感不俗... 還想要多點私隱的, 可以訂Private Room...

甫坐下, 先奉上一杯寧神四寶茶, 能讓繁亂的心神一下子平靜下來... 我係八寶茶的忠實粉絲, 晚上飲了會睡得特別香甜, 以杞子、桂圓、紅棗和玫瑰沖泡的四寶茶倒是第1次嘗試, 寧神靜氣的效果不比八寶茶遜色...


打頭陣的3款涼菜, 外表平凡, 內裡卻不平凡...

醋椒野生秋耳 $58
-- 來自東北的野生秋耳, 外型有點像貓耳朵, 較一般木耳爽滑, 以冰水浸泡一晚後加入秘制醬料, 酸酸的, 很開胃, 偶爾遇到一點辣, 格外醒神... 黑木耳好有益, 除了含豐富鐵質及鈣質, 可改善貧血及預防骨質疏鬆之前, 曾有中醫教授Honey用黑木耳+紅棗+薑煲水飲, 可以降血脂, 多飲用對心血管非常有益...


椒麻北寄貝杏鮑菇 $78
-- 說實在, 我對菇菌類是特別有警覺性的, 此道菜用上日本北極貝及本地鮮杏鮑菇, 無論色澤與賣相, 杏鮑菇均與北極貝非常相像, 幾可亂真... 切成絲狀的杏鮑菇咬下時有輕柔的彈性, 吃了幾口都不知道自己在吃菇... 配以秘制的椒麻醬, 清新開胃...


泡椒爽口娃娃菜 $68
-- 3道前菜中最有驚喜的一道... 大白菜以上海鹵水浸泡1天, 造型平凡到極點, 有點回到童年時代的感覺(鹹魚+白飯+白菜已是一餐), 夾起放入口一咬... WoW... 真係估唔到咁爽脆!!! 又酸又辣, 好好味呀!!! 


以下熱菜的Size好似係12人酒席份量... 價錢應該係例牌的份量...

香邑金桔燜牛尾 $188
-- 嗯?!! 咁多鹹蛋黃?!! 哈... 原來係金桔, 好可愛呀~~~ 1年得1個月當造, 微酸, 沒有半點苦澀, 金桔獨特的果香, 好好味呀!!! 我前前後後食咗好多粒呀, 好滿足呀!!! 與板栗用紅酒一齊紅燜的牛尾非常軟腍, 入口即溶, 膠質豐富, 鹹鮮微甜, 份量十足, 食1件已好飽...


砂窩和味全家福 $668
-- 嘩嘩嘩... 材料好豐富呀!!! 有海參、花膠、鮮鮑、瑤柱、花菇、蝦、發髮菜蝦剁蛋卷、火腿、冬筍、娃娃菜等... 大家估下呢樣最受歡迎, 最快比人搶晒, 嘿嘿, 包你點估都估唔到... 係經慢火燉制, 將所有材料的精華集於一身的湯!!! 啖湯鮮味到不得了, 好味到大家係不斷搶住encore, 平時被搶慣的山珍海味今夜頓成閒角...


野生蒜油爆基圍蝦 $148
-- 上面2個熱菜已經好味到暈, 食到個肚就來爆開, 但呢道野生蒜油爆基圍蝦又係好味到震... 野生蒜本身並唔係我地熟悉的蒜頭 (Garlic), 香味獨特, 用來爆炒鮮味的基圍蝦, 風味絕佳, 蝦殼酥脆, 醬汁濃香, 甜中帶辣, 非常惹味, 我又食唔停口啦... 搵人阻止我喇, please...


香炸翠瓜蝦球 $88
-- 頒個「最神不知鬼不覺」獎比佢實在當之無愧... 表面係一粒炸咩咩丸, 有邊個會估到, 入面係小朋友最最最憎食嘅... 蔬菜!!! 將翠肉瓜加蝦蓉做成小丸子, 炸至金黃香脆, 蝦的鮮味中和了翠肉瓜的草青味, 又係好味到唔停得口... 雖然係炸的, 但感覺上好Green...



黑松露焗明蝦 $118
-- 點解... 點解樣樣都咁好味... 雖然我唔食菇菌類, 但呢道黑松露焗明蝦真係好香好好味, 明蝦肉嫩, 爽甜彈牙, 我唔記得自己食咗幾多隻, 太飽啦~~~


砂窩膏蟹煮雙笋 $468
-- 終於...來一道清淡一點的... 膏蟹的膏多到溜出來, 萬綠叢中一點紅, 誘人的色澤... 冬笋+窩笋入口爽脆, 湯頭清醇, 吃了多道味濃的菜, 正好清一清味蕾...



黑松露野米蒸排骨 $168
-- 將本地新鮮豬肋骨加入黑松露醬調味, 沾上泰國糯米及野米一起蒸熟, 肉香菌香滲入米中, 讓米身叨上一重光澤... 


有幸由周師傅親自解說每道菜色, 已感到十分光榮, 更令我內心激盪的是, 是我十分欣賞的國家級點心師傅--人稱「點心皇后」的葛賢萼師傅就坐在我面前, 全晚保持慈祥的笑容, 只要見到大家喜歡她做的點心, 食到停唔到口的樣子, 葛師傅就開心到露出笑如蜜的笑容, 人生最大的滿足感莫過於此...

我係講真的, 2003年09月中我專程去葛賢萼師傅主理的狀元樓朝聖, 當年的花生酥及如意卷如今想起依然食指大動...

今晚得以重溫點心皇后的精緻美點, 感動之餘好想問佢攞簽名呀~~~ (冷靜, 冷靜) 


灌湯生煎包 $45
-- 灌湯生煎包, 包底煎得香脆, 包面全部都脹卜卜, 皮薄多汁, 餡料鮮甜, 咬開時要高度提防熱騰騰鮮味湯汁像火山泉水般噴射出來... 利申 : 我唔鍾意食生煎包的, 坊間做的又油又濕淋淋, 但點心皇后做的真係寧捨不同, 好想再食...


五福臨門
-- 嘩嘩嘩... 好靚呀!!! 甜八寶飯係我至愛, 我係Crazy到會去銅鑼灣老三陽買返屋企蒸來食的... 用黃酒浸過的黑棗, 酒香加上棗香讓人樂得如癡如醉, 非其他棗可比美, 加上陳皮、圓肉、紅糖、糯米、桂花糖, 美味得令人忘記自己個胃已經飽到快要爆開... 召喚術... 第2個胃, 出來啦!!! (悄悄話 : 八寶飯可以外賣的)
點心皇后的得意之作 -- 花生酥及如意卷比回憶中更美味, 花生酥味道濃郁, 紅豆蓉更是比坊間香甜10倍, 糯米皮柔韌軟糯, 好好味呀!!! 順風葉造型與花生酥相若, 包著菠菜、芝麻、椰子, 頗特別的... 南瓜糕又是另一傑作, 包著南瓜及棗泥, Yummy!!!
(認真mode) 要我自己1個食晒成碟五福臨門都無問題...


我個肚真係要爆啦~~~ 

好開心有機會出席今晚的博客活動, 大部分菜色都非常美味, 就算要我減多幾個月肥去消耗返呢一餐所帶來的卡路里, 我都心甘情願, 絕對值得...

是次每人消費約 $N/A 元
味道: 5 環境: 4 服務: 4 衛生: 4 抵食: 4
###
地址 : 中環德己立街1-13號世紀廣場4樓
電話 : 2522 7611

沒有留言:

張貼留言