網頁清單

2014年1月2日 星期四

名家韓國餐廳 Myung Ga Korean Restaurant : 平安夜 韓燒夜 喜瑪拉雅岩鹽x無醃澳洲M7和牛=滋味滿腔

24 December 2013, Tuesday

近年的平安夜多是吃韓燒, 沒有最低消費, 沒有聖誕套餐, 以正常的價錢換來優質的食物, 這才是享受人生嘛... 要我付高昂的價錢去吃一些平時只值4分1價錢的食物, 比平時煮得難吃的東西, 何苦呢, 我又不是熱戀中的情侶, 哈哈, 這份傻勁早已煙消雲散...

唔付高昂的價錢去西餐廳比人略, 又唔代表我地要食得好Cheap... 


步入餐廳時見到隔離枱又大蝦又珍寶帶子, 勁吸引, 睇到流晒口水...

套餐B就有帶子, 套餐C就有大蝦, Oh No... 好難決擇呀!!! Honey話一係叫B餐, 再加大蝦... 嗯... 但係B餐無澳洲M7和牛喎, 同埋得C餐的牛夠膽無醃, 即係牛肉先敢唔醃啦... 睇來睇去, 都係C餐啦, 唔加帶子喇, 個C餐都多到食唔晒...

小二, 來一客 MG Set C!!! (2位用 $860)

落單後, 店員奉上走Kawaii路線的粉紅色喜瑪拉雅岩鹽... 嘩嘩!!! 呢隻鹽好貴嘅喎, 我都係第一次食韓燒用喜瑪拉雅岩鹽, 實在唔敢相信眼前所見!!! (悄悄話 : Kenmerry係屋企煮烏冬鍋都係用佢, 煮出來肉味真係特別鮮甜的)


店員奉上6款前菜及套餐的生菜盤(半份)... 跟生菜盤的甜麵醬好香甜好好味呀!!! 前菜中我最鍾意薯仔同南瓜, 好好味...


特級澳洲M7和牛 (無醃)
-- 脂肪分佈不俗, 閃電拍照後, 店員幫忙剪開為8-10片後隨即放了2片落烤爐... 吱吱... 烤爐不停發出噼嚦啪啦聲, 油脂與肉汁發出閃爍光芒, 烤爐中的和牛正在向我招魂呀... 呀!!!!!!
我的眼中只有你, 自從我們相遇的那天起, 無論現在還是永遠, 只要有你在我身邊我什麼都不要
澳洲M7和牛是無醃的, 略燒一會後, 蘸幾粒喜瑪拉雅岩鹽提鮮, 滋味得沒有話說!!! 肉質柔軟, 接近入口即溶, 肉汁豐富, 咀嚼時尤如在口腔中翻騰, 肉味充滿霸氣, 美味得沒有話說!!! 太幸福喇!!! 噹... 噹... 噹... 噹... 幸福的鐘聲響過不停...
為了好好享受呢一刻, 我每次只燒2片, 絕對唔可以燒過火, 浪費咁美味的牛肉... 

正所謂... 歡樂的時光過得特別快!!! 不消一會, 澳洲M7和牛已被消滅了!!! 呀.... 咁快食晒, 我唔制呀!!!

食牛食到欲罷不能, 繼續燒牛!!!




牛肋骨 (無醃)
-- 牛肋骨一向係我們的至愛, 以往吃的是醃得甜甜的, 今晚的牛肋骨雪花亦不錯, 同樣是無醃的, 沒想到... 會被澳洲M7和牛猛猛地比下去!!! 肉味與肉質已是相當不俗, 同樣是略燒一會後, 蘸幾粒喜瑪拉雅岩鹽提鮮, 本是無懈可擊, 可惜剛吃了澳洲M7和牛, 餘韻仍在口中徘徊, 頓時令到牛肋骨遜色不少...




店員幫忙煎開牛肋骨為10片左右... 今次我地4片4片咁燒, 加快進度...


鮮大蝦
-- 大蝦真係好大隻呀!!! 以生抽醃一醃已好夠味, 蝦肉鮮味十足, 爽脆彈牙到不得了, 真係超好味呀!!! 當然, 大前提係店員幫我地燒的, 可能佢叫我地雞手鴨腳, 驚我地浪費咗咁靚嘅大蝦...


有圖有真相, 大蝦巨型到差不多擺滿個燒烤爐...


傳統韓式辣炒年糕
-- 救命!!! 真係辣到無朋友!!! 但係食落又幾好味喎, 之後仲食到唔停得口, 哈哈... 魚餅好好味呀, 年糕軟糯煙韌, 隻蛋切開後仲要喪蘸辣汁, 我硬係辣傻咗, 哈哈...


石鍋雜錦拌飯 (可選牛肉, 雞肉 或 辣八爪魚)
-- 辣八爪魚石頭飯?!! 未試過喎, 好吸引呀!!! 上菜時, 見到有隻生蛋係飯中心, 好驚, H7N9大爆發呀, 仲食生雞蛋, 未死過?!! 驚魂未定, 店員已快手快腳拌勻個飯, 我連相都未影嘅呢... 唯有影拌勻後一點也不吸引的版本... 是否有點噁心, 哈哈...


等我挑出辣八爪魚來拍照給大家看看吧... 源自海洋的鹹鮮味充斥整鍋石頭飯, 好特別, 從未嚐過這種滋味, 可惜飯身太濕軟, 辣味亦不明顯, 有點扣分...


澳洲M7和牛加上喜瑪拉雅岩鹽, 真係無得輸!!! 足以回味上好幾天... 大滿足!!!

今晚限時1.5小時, 我地1小時已吃完, 利害!!! 

好飽, 勁飽, 超級飽!!! 埋單時送上酸橙2角, 可以幫助下消化... 秒殺!!! 轉頭店員又再奉上酸橙2角, 哈哈, 再食...

寒冷天氣警告生效中, 但我身心感溫暖, 決定慢慢散步回家, 幫助一下消化...

是次每人消費約 $470 元
味道: 5 環境: 4 服務: 4 衛生: 4 抵食: 5
###
地址 : 太古太古城道20號元宮閣G402-03舖
電話 : 2539 6398

2 則留言:

  1. 我多數响呢間食lunch, 但必定要book 位, 因為超full, 但好好食.

    回覆刪除
    回覆
    1. 我都鍾意食Lunch, 有時Book咗位都要等呀 T_T

      刪除