韓雅林 Han Ha Rum Korean Restaurant : 滋味行。濕辣甜

10 January 2014, Friday

Happy Friday!!! 早2日收到之前用信用卡幫朋友毛毛預訂的SoftHard演唱會門票, 急不及待要出來進行交收...

毛毛為答謝我, 今餐佢請, 咁我唔客氣啦, 呵呵呵呵...

搵咗韓國燒烤、日本燒烤、同上海菜比毛毛揀, 佢樣樣都想食, 最後揀日本燒烤, 點知訂好晒位間日本餐廳先打返轉頭話得水吧位仲要限食1.5小時, 即係迫我地去韓國燒烤啦, 雖然大家同樣都係限食1.5小時...


訂咗7:00pm, 我地6:45pm就去到... 門口已經企咗好多人, 不過似係排緊隔離間台式Cafe... 毛毛一馬當先, 叫都叫唔住... 唏, 你入咗鏡啦, 哈哈...


大家還記得2005年12月中, 香港主辦世界貿易組織第六次部長級會議，約2000名韓國農民來到香港示威的情況嗎?!! 當時雜誌訪問在維園扎營的韓農, 報導指韓雅林係全港最地道的韓國餐館, 連來港示威的韓國農民都係幫襯佢... 我睇完報導後都即時來一試, 印象中係幾好味&幾貴&真係太地道唔係好啱我口味... 當年仲未開Blog, 無記錄可以睇返...

原來餐廳門口個招牌都係得韓文無中文... 好韓呀!!!

我地被安排坐2人卡位, 都幾舒服, 係張枱面細咗少少囉... 間餐廳唔係好大, 裝飾非常簡約, 如果唔係有個爐係枱面, 都幾似茶餐廳, 哈哈...

限時1.5小時, 要燒烤的話時間實在不足夠, 還是點些可以即食的吧...

奉上前菜的一刻, 係食韓國菜最感興奮的環節... 每間餐廳每天的前菜款式均有不同, 2個人有8碟前菜, 太好了... 賣相看似平平無奇, 甚至有點倒胃口, 吃進口中卻又是另一回事... 眼前看到最近的綠色菜最不堪入目, 竟然非常美味, 只係用麵豉醬撈一撈, 即成美味上菜... 右邊的魚板好辣,但好美味... 再上少少的蔬菜煎餅, 有工序的呀, 不是隨隨便便一片醃菜... 左上的甜薯仔都好好味, 單吃前菜已夠忙了...


席間談及韓國飲食節目滋味行, 我今晚主持上身呀, 哈哈哈...

海鮮辣炒韓式年糕 $160
-- 好多料咁喎.... 青口、蜆、魚板、蝦... 先試年糕... 嘩!!!!!! 少辣都好辣呀!!! 年糕煙韌有彈性, 蘸勁多醬仲好食, 又香又辣, 好好味, 食得好過癮... 青口同蜆肉都幾有彈性, 蝦仔就差咗少少, 肉質鬆散... 魚板都好味...


回到家中, 剛巧還看到最後數分鐘滋味行, 主持人金成恩勁讚節目入面間餐廳好味, 佢舉出3大要素 : 濕、辣、甜... 原來係韓國人心目中, 呢3個元素係咁重要嘅, 我今晚親身體驗到...

事緣呢... 用來舀年糕的鐵匙沾滿醬汁, 咁我想用來舀海鮮鍋的湯來飲, 我笑笑口咁話放個鐵匙落海鮮鍋洗乾淨, 毛毛當然唔比, 最後我用咗最原始的方法, 放入口吮乾淨... 嘩!!! 好好味呀!!! 個年糕醬已經又凍又杰, 但係甜味比剛才熱辣辣時突出咗好多, 辣味依然勁, 有齊濕、辣、甜3大要素...

香脆泡菜煎餅 $100
-- 放低咗一陣先食, 都仲好熱, 放入口一咬, 我即時滋味行主持上身, 4份1個煎餅含住係口, 瞳孔放大, 大聲講 : "嘩, 好脆呀!!!", 哈哈, 其實自己都聽唔明自己講咩, 毛毛笑到肚痛, 話我個表情學到滋味行主持十足十... 表面煎得好香脆, 夠乾身, 泡菜少少辣, 好好味...


香辣海鮮鍋 $420
-- 全晚最大的挑戰!!! 落單時都無考慮過個鍋有幾大, 上枱時真係有WoW咗出來... 花蟹同大蝦同元貝都係堅大隻, 八爪魚腳又粗又大... 而家見到的只係表面, 無諗過最後會食唔晒... 隔離左右剛坐低剛/未落單的客人, 紛紛搵店員了解, 有4人行的遊客仲企埋起身望, 好似即時改埋Order...


有大辣、中辣、小辣、無辣選擇, 我地選了少辣, 好彩今次真係少辣... 上桌後蓋上鍋蓋滾一會, 蟹殼同蝦殼的顏色已轉紅, 店員開蓋幫忙剪開八爪魚腳...


隻花蟹堅巨型... 肉質鮮嫩, 蟹膏較少...


大蝦都堅巨型... 蝦肉唔係霉的, OK有彈性... 八爪魚腳好彈牙, 一點也不韌... 青口都有彈性...


巨型元貝好鮮味, 肉質柔軟有彈性... 洋蔥滾到半透明, 好甜, 我食咗大半個...


個鍋入面原來仲有好多材料... 大大舊魚... 蝦仔就唔得喇, 肉質鬆散...


仲有好多材料, 有蜆、豆芽、雞脾菇、紅蘿蔔、脆肉瓜、綠色蔬茶、金菇...


大家千祈唔好剩係掛住食餸, 忽略咗個湯!!! 個湯簡直鮮味到爆燈... 我地狂舀來飲囉... 如果唔係之前食咗年糕同煎餅填飽晒個肚, 真係好想叫碗白飯倒落個湯度撈來食, 如果可以打隻蛋就更Perfect!!!

香辣海鮮鍋材料實在太太太豐富喇, 我地2個人食極都食唔完... 食咗好耐好耐好耐... 經理開始走過來趕客, 佢個頭係望住大門講"時間都差唔多", 跟手熄咗我地個爐, 走咗去, 我覺得好無禮貌囉, 同人講說話唔望人...

同埋我地唔係齋吹水無幫襯, 2個女仔食咗$750, 都唔算平啦, 又唔係掛住講唔食, 我地係不停好努力地食食食...

過咗一陣經理又走過來, 要我地埋咗張單, 仲問我地個鍋入面食剩的需唔需要打包... 打包咗就唔好食啦, 同埋其實比多少少時間我地, 我地可以食得晒囉, 我地真係唔想浪費食物囉... 超級掃興...

我都知係食1.5小時, 所以已經專登唔食烤肉, 驚又燒又食好趕食唔切... 估唔到食熟食都會搞到咁...

店員9秒9清枱, 連生果都無, 香口膠都無片, 扣晒分...

行到出門口, 塞滿等位的人, 眼神好重怨氣!!!


是次每人消費約 $375 元
味道： 5 環境： 4 服務： 3 衛生： 3 抵食： 2
###
地址 : 銅鑼灣軒尼詩道489號銅鑼灣廣場一期6樓
電話 : 2877 7797