網頁清單

2013年10月6日 星期日

新斗記 Xin Dau Ji : 因美味而誘發的會心微笑

26 September 2013, Thursday


脫了智慧齒後的第一頓豐富晚餐, 是九月之星的第一頓壽宴, 想吃好一點, 又不想朋友們太破費, 不想中伏又想食物質數有保證, 又想大家都交通方便, 到底那裡好呢...

想來想去, 選了太子的銀杏館及佐敦的新斗記, 由於太子的銀杏館是供應素菜的, KaKaMa想也不用想便說去佐敦的新斗記, 哈哈...

預早一星期致電訂位, 星期一至四不用限制時段, 亦不用限時交枱...

早了15分鐘來到, 全場爆滿, 已開始有人等位... 雖然我訂了枱, 亦要等... 等候期間, 四處拍照...



佑大的價目表, 明碼實價, 紅底白字, 很有舊式酒樓的味道...



即燒乳豬的烤爐, 每位客人進入店內時都可以透過玻璃窗欣賞到香噴噴脆卜卜的乳豬誕生, 一排乳豬掛在烤爐上, 本想拍照, 但是要低抄才可拍到, 不知為何有點不好意思, 感覺像拍裙底, 所以放棄了...


樓梯旁設了大魚缸, 全是名貴海鮮...


樓梯轉角位有放置了古銅板, 與紅色的吊燈有點格格不入...



等候期間聽到帶位員與沒訂位的客人的對話, 7:15PM入席, 8:30PM要還枱, 嘩, 1小時15分, 未免太短促, 客人小妹妹努力爭取, 帶位員說沒有辦法, 客人早訂了8:30PM的枱, 一定要準時交枱給客人, 小妹妹最後成功爭取多10分鐘... 心裡慶幸自己一早訂了枱, 否則朋友到齊後可能已沒了半小時...

之前2次都係坐樓下, 今次可以到樓上坐了, 還要是僅有的卡位, 好幸福呀!!! 大家不要被照片騙了, 7:30PM時全店座無虛席, 這張照片是10:30PM時拍的... KaKaMa留意到旁邊的桌子客人已轉了3次... 店員很Nice, 席間不斷為我地Refill熱茶亦無任何不悅之顏...


公雞餐具是店方的Signature, 好有兒時味道, 哈哈, 忘了帶我的Miniatures來拍個合照, 想像一下我的公雞碗魚蛋粉及煎釀三寶與這套公雞餐具的Crossover是何等充滿玩味...


早上發生了小插曲, 龍媽話DD話新斗記又貴又細碟... 咁... 你即係想點?!! 如果臨時想改地點, 唔該自己搵埋訂埋位... 不過後來又不了了之, 咁就繼續新斗記...

KaKaMa同貓兄來到後, 大家討論了一會便決定好4餸1湯1麵, 待龍媽來到後Briefing一下便落單...

金牌即燒乳豬 (1/4隻) $178
-- 必必必必吃!!! 例牌$138, 加多$40就1/4隻, 貪心的我又點會肯慳果40蚊... 皮和肉是分開的, 皮烤至金黃色, 微微燒焦, 咬落嗦嗦聲, 超級香脆, 大家的瞳孔一齊放大, 大喊"好食呀", 雖然已用手遮掩著嘴部來說話, 卻遮掩不了因美味而誘發的會心微笑... 乳豬肉切好了一條條鋪底, 豬味香濃, 不油不膩, 部分連著豬軟骨, 一定要叫杯啤酒或汽水, 一邊飲一邊慢慢嗒, 分外滋味, 梳乎也...


粟米魚塊 $108
-- 必必吃!!! 職員話係用鯖魚做的, 最愛佢炸粉粉醬好薄, 魚柳真材實料, 肉質不會過老, 沒有半點多餘的油份, 粟米汁另上, 用心做的菜, 讚讚讚!!!


大澳蝦醬骨 $78
-- 新嘗試, 上桌時大澳名物蝦醬的香味撲鼻而來, 已教大家不禁瞳孔放大, 五層腩連少許骨, 每一片都非常大片, 份量絕不小家... 入口油份十足, 肉質軟腍, 蝦醬的鹹香加上五層腩的酥香, 非常惹味, 撈白飯一流...





手抓羊排 $98
-- 好大粒的辣椒呀, 單看已冒汗... 貓兄率先品嚐, 認為味道很棒但太濃烈, 吃了它後其他餸菜會變得淡而無味, 所以我先吃掉其他東西, 最後才吃它... 夾了一小片羊排放入口, 好膨湃的羊味呀!!! 好好味呀!!! 完全不膻呀!!! (不吃羊的看了便算)... 吞下後... 嗯... 開始冒汗... 救命呀!!!!!! 水呀!!!!!! (咕嚕咕嚕)... 呀... 飲咗杯茶, 仲係好辣, 但係身體不受控制, 右手又伸手夾羊排... (呢個人, 無得救的了, 靈魂已妄顧肉體的承受能力)... 食呀食, 食呀食, 其實都幾鹹, 同埋羊排都幾硬身, 但真係好羊味, I Like It~
 

招牌豉油皇炒麵 $68
-- 必必吃!!! 出自一個最最最憎食炒麵的人口中, 好有說服力... 炒麵沒有怪味, 味道恰到好處, 麵條炒得條條均勻, 閃閃發光, 卻一點也不油膩, 真的很棒...


胡椒豬肚大蜆湯 $88
-- 以大瓦鍋奉上, 但枱面已擺滿東西, 唯有在小桌子分湯, 所以拍不到照片... 半透明呈奶白色的湯底, 看似沒有殺傷力, 沒想到, 呷一口... 咳咳咳... 好辣呀!!! 胡椒味好重... 原本我的碗內有4-5隻大蜆, 但腸胃不好, 不敢吃太多, 分了給龍媽及KaKaMa, 自己只吃了一隻, 蜆肉鮮嫩, 為此湯生色不少...


今晚所有食物也很美味, 我很少重複幫襯同一間食店數次, 除非是既美味又價錢合理... 此分店已是我第3次來了... 5年後重臨, 吃罷後仍然心癢癢想再來第4次, 真是很難得...

大家可回顧一下以往的食評, 雖然很不濟, 哈哈... 
2007年佐敦食記 http://www.kenmerry.com/2007/11/blog-post.html
2011年銅鑼灣食記 http://www.kenmerry.com/2011/10/xin-dau-ji.html

近來屯門也開了分店, 不知道質數如何呢?!!

4個人, 4餸1湯1麵, 埋單也只是7佰元多, 除開不用2佰元... 離開時我問龍媽覺得如何, 佢好大反應話"好抵, 初時仲擔心要4佰元以上"... 我終於鬆一口氣... 龍媽數天後還聲明要Encore...

今次都無食乳鴿, 又無食瀨尿蝦, 又無食薑蔥焗蠔, 仲無食啫啫生菜, 我點可能唔再來呀?!! 


是次每人消費約$190元
味道: 5 環境: 4 服務: 4 衛生: 4 抵食: 5
###
地址 : 佐敦長樂街18號18號廣場地下及1樓
電話 : 2388-6020

6 則留言:

  1. "....魚柳真材實料, 肉質不會過老, 沒有半點多餘的油份, 粟米汁另上, 用心做的菜, 讚讚讚!!!"

    我巳為只有我先這樣 serve. 我因不喜歡"軟冧冧的 batter, 粟米魚, 古佬肉也分開汁來 serve.

    回覆刪除
    回覆
    1. 有些店落太多獻, 變成軟冧冧的漿糊是最可怕的 >.<

      刪除
  2. 你好, 銀杏館太子店不只是供應素菜, 而是中式小廚加入素菜元素, 招牌菜有農家砵仔鵝, 梅菜扣肉, 冰梅醬香酥骨, 老師傅蜆芥鯪魚球及懷舊三豉蒸方利等。星期一至四晚市有優惠燉湯每盅$18, 原盅燉足四個鐘。
    銀杏館小記上

    回覆刪除
    回覆
    1. Oh, 原來我地誤會了~ 有機會一定來試試 :)

      刪除