2013年7月31日 星期三

澳洲「野生探索」の慎選Local Tours

March 2013

帶大家去Great Ocean Road同Phillips Island之前, 先講一講我出發前係香港隔山買牛嘔血實錄...

上網搵到1間"自稱"澳洲最大的華人旅行社之一... 雖然網上的評論非常負面, 但真係好平, 最重要嘅係, 我想去果3個地方, 偏偏只有佢一家做晒3個, 如果跟其他旅行社, 就要跟2間以上, 既然可以聯絡1間就攪掂晒嘅, 我真係好想懶吓囉... 而且佢的Local Tours係講中文的, 再加上見佢舊年仲搵埋TVB成班港姐去影大合照做宣傳品, 好似真係幾有規模喎, 搵得TVB成班港姐去, 可能改善咗呢...

嘿... 真係一廂情願的想法... Too Simple, Sometimes Naïve!!!

慶幸今時今日Internet真係好方便, 可以直接係Facebook同對方對話, 雖然有時問完問題後對方要1-2日後先答, 都叫有得問吓吖... 就係咁... 令我避過一刧...

話說... 出發前2星期唔夠, 我Send Message去長X旅行社的Facebook Fanpage, 打算Double Confirm一下長X旅行社的網頁上「3合1」的Promotion Price, 大洋路+Phillips Island+金鑛山3日加埋只係AU$183(約HK$1500)... 估唔到, 由3月1日問到3月4日, 對方都Keep住一直玩語言偽術...

Sorry囉, 我仲有10日就要飛, 無時間同你玩落去, 我唔係唔識英文, 只係想懶吓同埋想慳少少團費啫, 我真係唔一定要跟中文團囉...

以下係我地的100%清水房對話, 大家請用自己的眼睛去看, 用自己的腦袋去分析... 坦白講, 我從來唔打算係Internet攻擊任何人, 亦唔希望自己成為攻擊的對象... 大家清清楚楚, 無花無假, 自行判斷...


2013年7月30日 星期二

澳洲「野生探索」の墨爾本酒店篇Rendezvous Grand Hotel Melbourne

21-25 March 2013

由於行程計劃倉促, 同阿德萊德一樣, 都冇時間慢慢揀酒店, 只求其搵咗一間比較平(其實一點也不便宜)但又近Flinders Street Station的... (因初時一心諗住大車站機場鐵路一定到, 點知同同阿德萊德一樣, 墨爾本原來係冇機場鐵路的!!!)

見有Blog友話次次來墨爾本都係住呢間, TripAdvisor的Comment都不錯(浴室除外), 價錢又比較中規中矩, 所以揀咗佢...

住咗5日4夜阿德萊德的Mercure Grosvenor Hotel, 來到墨爾本的Rendezvous Grand Hotel Melbourne, 簡直好似由地獄上返人間一樣!!! 之前幾晚攰到爆都失眠, 今晚終於有教好瞓, zzzZZZ...

唔該睇返我係阿德萊德的Mercure Grosvenor Hotel有幾慘...
http://blog.yahoo.com/ken-merry/articles/1367889/index

原來我無影到Rendezvous 酒店的外貌, 因為一出門口就係免費電車站, 太方便, 而且對面馬路咩都無, 只係火車橋底, 完全無意欲行過去... 呢張相係o係Crown門口等免費巴士時影的, Victoria Universiry左邊的米白色就係Rendezvous Grand Hotel Melbourne, 相的右邊係Flinders Street Station, 原來Crown有條橋直接行到過去, 我地都唔知...

2013年7月29日 星期一

香港大學校友會 Hong Kong University Alumni Association : 蝦多士... 由討厭到愛上


13 July 2013, Saturday
今夜作客的地方還是第一次來... 香港大學校友會係私人會所, 要係香港大學的舊生仲要入埋校友會先可以Book位... 朋友係2個月前已經訂咗房, 廣發英雄帖, 聽講廚房係由陸羽的舊廚頂來做的, 在網上的評論不錯, 很期待呢...


房內有大電視, 又有投影機, 朋友帶備了平板電腦接駁大電視, 播放充滿歡樂的照片與在場賓客分享點點滴滴...

朋友事前與餐廳溝通多次, 要求先將2張枱疊起, 騰出半間房的空間來讓賓客們影大大大合照, 服務員仲預先放好一排椅子, 方便大家分成2排影相, 服務都算不錯...

朋友事先已預訂咗數款必吃招牌菜 -- 杏汁豬肺湯, 鳳尾蝦多士, 古法鹽焗雞, 炸子雞, 八寶鴨... 到場後再由經理推介數款時令菜式, 朋友又再選2款時蔬...

皮蛋子薑
-- 經理推介的... 皮蛋流心冇怪味, 比福臨門更好味... 子薑爽脆冇渣, 酸度輕微, 好好味呀... 大家都對此子薑都讚不絕口, 更爭相打包走呢... 早有聽聞此頂級子薑只供應給福臨門及大班樓,

杏汁豬肺湯
-- 清甜唔油膩, 做得不錯, 杏味略淡, 好似華商銀行公會果便做得好d... 埋單時經理先講話有時令冬瓜盅, 又唔早講...

鳳尾蝦多士
-- 我之前好討厭呢個菜式, 因為係太子鳳X酒家食過, 入口油淋淋的好恐怖, 咬一口已要吐出來... 香港大學校友會的鳳尾蝦多士, 單睇賣相已非常吸引, 入口鬆化香脆, 無半點多餘的油分, 好好味呀!!! 從今晚開始, 我愛上蝦多士...

煎倉魚
-- 經理推介的, 起肉後咁大片的倉魚都係第一次食, 食得好爽呀, 唔驚有骨, 魚肉新鮮, 粉醬薄過米紙, 咬落超脆, 廚師的功力果然深厚... 仲有碗醬汁可以蘸來吃, 不過我原味已非常好味, 所以無蘸過醬...

金銀蛋莧菜
-- 嘿嘿... 我其實唔鐘意食莧菜, 不過又成日叫金銀蛋莧菜, 我自己都唔知點解, 可能純粹係鐘意"金銀蛋"呢3個字咋, 好無聊的理由, 嘩咔咔咔... 咁另一個原因應該係貪佢清淡又健康啦... (真正原因係鐘意食蒜粒)

南乳齋煲
-- 腐皮超多, 合晒河車... 南乳味道香濃, Yum Yum... But... 係油咗少少囉, 齋煲的通病, 無計...

古法鹽焗雞
-- 非常期待的菜式, 聽講係用新鮮雞做嘅呢!!! 師傅的刀功簡直神乎奇技, 我地要求每張枱要半隻鹽焗雞, 無諗過佢會幫個雞頭開邊囉, 勁!!! (啪啪啪) (掌聲) 第一次食鹽焗雞個皮係脆嘅囉, 雞皮薄到米紙咁, 零肥膏, 減緊肥都可以安心食用, 雞肉入口超有彈性, 滑溜緊緻, 新鮮雞即係新鮮雞, 好好好味呀!!! But... 席間竟然有人話淡, 實在離奇過X-Files, 可能佢食過果d係坊間粗製濫造的鹽醃雞, 並非鹽焗雞... 雞腎都好好味, 而家已經好少見酒樓會上埋雞腎...

炸子雞
-- 朋友訂位時, 電話入面的仁兄只係話鹽焗雞係用新鮮雞做嘅, 但服務員上菜時又話炸子雞都係用新鮮雞, 新鮮雞做炸子雞?!! 會唔會浪費咗少少呀?!! 炸子雞調味相對鹽焗雞更濃, 皮脆, 肉質都好好, 但相比之下, 我比較喜歡鹽焗雞... 病緊唔敢食炸蝦片, 但個樣睇落好得...

八寶鴨
-- 由於經理驚我地食唔晒, 所以提議將八寶鴨開邊, 每枱上半隻, 咁餘下的1隻都開邊, 直接入落外賣盒, 醬汁分開包, 所以導致上桌時八寶鴨有點其貌不揚... 鴨肉已經起清光, 鴨皮內裡9成都係蓮子, 雖然粉嫩, 但未免太多, 仲有切得很細粒的鴨肉及冬菇, 細粒程度大約係3mm x 3mm x 3mm左右, 唔知係咪我病到迷迷糊糊, 數唔出有邊8寶囉... 但係食落鴨味的確好濃, 席間有"好煮得"的朋友讚美此八寶鴨做得不錯...

子薑咕嚕肉
-- 經理推介的, 色彩鮮艷, 酸甜適中, 咕嚕肉鬆化, 最有驚喜係加入了開飯前人人爭住食的子薑, 頓成非常受歡迎的一道菜...

荷葉飯
-- 太多美食, 在座人士都有點吃不消, 荷葉飯原個未開封就已經拿去打包了...  (病到渾渾沌沌, 相都無影)

合桃露
-- 飯後甜品, 病緊, 無食... (病到渾渾沌沌, 相都無影)

加埋啤酒汽水, 包房2圍, 承為$4800, 食物好多, 多到食唔晒, 最後要包走1.5隻八寶鴨, 原個荷葉飯, 同埋濕濕星星的... 其實今餐都幾實惠, 咁嘅價錢, 出面的酒樓包房應該做唔到... 專責服務我地間房的服務員態度亦很親切, 不時搭訕, 對我地提出的要求有求必認, 仲會反建議, 非常有Heart...

去Toilet時見到歐陽應霽都係度食緊飯, 佢背住外面的客人坐, 如果唔係o係房入面行出來, 應該見佢唔到... 當時大家都只係蹹得出好似李純恩果個, 後尾第2日佢咁啱上了TVB的節目又咁啱比其中1位朋友睇到, 真相先至大白...

離開時見到蘭桂芳啤酒節好熱鬧, 可惜我病到死死下, 當時應該發緊燒, 只係幾步路都竟然無心情無氣力行入去趁熱鬧, 我應該真係好病囉...

是次每人消費約 $240 元
味道: 4 環境: 3 服務: 3 衛生: 3 抵食: 3
###
地址 : 中環德己立街2號業豐大廈101室
電話 : 2522 7968

2013年7月25日 星期四

[拜師學藝] DIY全城熱搶「元祖」酥皮奶皇月餅 @ 望月

20 July 2013, Saturday 

去年半島酒店嘉麟樓迷你奶黃月餅「瘋搶」事件, 400人一早在店外排隊輪購月餅券, 一小時內售罄, 只有數十人成功購買, 要出動到警方到場調解, 擾攘七小時才告平息... 相信各位香港人應該仲記得啩...

當時同事買咗一盒半島酒店的迷你奶黃月餅請大家食... 嘩!!! 咁都買到, 咁勁?!! 後來上網做吓Research, 原來有d叫做半島酒店「非嘉麟樓」的奶黃月餅, 係半島精品店 (Peninsula Boutique) 出品, 其實我覺得有混淆視聽之嫌囉, 不過唔使錢有人請, 當然唔可以有咩投訴... 講真, 味道真係唔得, 奶黃味無咩之餘, 仲要乾掙掙, 要錢買的話唔好預我...

就係呢個時候... 竟然... 比我發現有朋友去咗長沙灣學整酥皮奶黃月餅, 由葉潤發師傅親自教授... 又上網做吓功課先... 嘩嘩嘩!!! 不得之了!!! 原來葉潤發師傅於1986年加入半島, 係前半島酒店嘉麟樓中式點心顧問, 亦係酥皮奶皇月餅始創人, 可謂「元祖」級人馬, 去年更以自家品牌「望月」www.wangyue.com.hk, 推出手造奶黃月餅, 全城熱搶!!!

但係... 當時的酥皮奶黃月餅課程竟然已經全部Full晒, 激死!!! 唯有係Calendar入定Schedule, 今年6月響Alarm提醒自己報名啦... 哈哈... 真係好鬼誇張嘅啫... 最後呢招成功咗, 比我報到, Yeah~~~

[拜師學藝] 鬆弛熊馬卡龍 Rilakkuma Macaroon @ 循道衛理教育中心

6 July 2013, Saturday


之前同學仔去循道衛理學包稯, 佢之後又報咗鬆弛熊馬卡龍 (Rilakkuma Macaroon), 問我一唔一齊去, 我見$140就有得玩, 好抵喎, 緊係要預埋我啦!!!

去到先知, 原來都係中式廚房入面學, 係雜物房搬咗4個焗爐出來... 仲要4人1組, 有點失望...

先將材料混和及打勻... 然後放入唧咀...



可以用曲奇模畫係牛油紙上...


又或者用矽膠模... 個個見到咁得意的矽膠模都爭住用, 不過得2片, 每組只可以輪流用1次... 矽膠模對新手會好D, 唧得唔好都唔易變形...


唧好第1轉, 由於趕時間, 要用風桶吹一陣...


焗好了, 好成功!!!



撇出來放涼備用... 就係呢個步驟, 令「不法之徒」之後有機會落手...



轉眼第2轉都唧好啦... 我自創的米奇頭(左上)之後亦被「不法之徒」拐帶...




第2轉都焗好啦... 要開始裝飾啦~~~ 「不法之徒」係此時落手...


導師Winnie為大家準備了野莓餡及朱古力餡, 裝飾用的朱古力就有黑白2色...


將餡料唧入Macaroon內再貼埋就可以啦~~~


「不法之徒」不停強調好趕時間, 想大家比佢裝飾先, 連老公同手抱囝囝都放埋入課室, 令人相信佢真係好趕... 之後, 佢竟然唔理d Macaroon係咪佢的出品, 揀晒d最靚嘅, 包括我的米奇、心心、傳統圓形, 全部入晒落佢的飯盒, 填滿晒都仲想塞, 走去塞入佢老公同囝囝個嘴, 飽餐一頓, 就氣急敗壞地溜走了...

到我地發現時, 只剩下一堆拼貼唔埋的Macaroon!!! 可惡呀!!!



我竟然只得5粒Macaroon, 粉紅色係問朋友施捨的, 佢都得2粒粉紅色, 仲要底面的形狀不一... 大家去學時要提防「不法之徒」扮趕時間呀!!!



大自然素食 Gaia Veggie Shop : 抵食新派素菜

4 July 2013, Thursday
我要減肥, 班死黨硬要捉我出來, 話出來志在聚吓, 又比我揀食咩, 即係唔出唔得啦... 咁食齋啦!!! Book咗位, 行到門口都冇人得閒理你, 朋友索性走去繼續行街, 過咗10分鐘左右, 忽然急Call我地, 原來想我地5個人坐4人枱!!! 嘩!!! 張4人枱前後左右都比人夾死硬, 根本坐唔到5個人, 緊係唔制啦!!! 最後又再等, 等咗半個鐘, 先有枱比我地, 其實都係4人枱, 之不過枱尾係梳化, 都坐得到1個人...


德國補血黑麥汁 $18
-- 職員大嬸推介黑麥汁, 話好飲過可樂, 又真係幾好飲, 酸酸咪咪, 又有黑麥獨有的香味, 正...



法式牛油果焗多士 $34
-- 好香牛油果味, 香肥美呀, 多士脆脆的, 好正!!! 不過班衰人話牛油果肥呀, 唔比我食咁多... 得1小角, 唔夠喉...


五彩雞絲粉皮 $42
--普通的 雞絲粉皮, 唔知有邊五彩, 味道不錯, 口感亦佳...


芝麻牛蒡絲 $42
-- 酸酸的有牛蒡香味, 好味, 雖然唔係食開的幼圓條型狀...


沙爹羊肉串 $46
-- 沙爹醬好香甜惹味, 羊肉串似酥炸雞排果片炸雞皮...


香酥炸大腸 $46
-- 幾彈牙又香口, 不過朋友們嫌棄佢冇豬大腸的膻臭味... 會唔會太奇怪呀, 鍾意食有膻臭味...


招牌雀巢三色骨 $168
-- 三色乃士多啤梨骨, 沙拉骨, 九制陳皮骨!!! 沙拉骨最惹味, 士多啤梨骨酸酸甜甜, 陳皮骨麻麻地, 似酥炸椒鹽骨, 略Dry...


香草牛油野菌卷 $78
-- 唔係叫比我食的, 賣相不俗...


燒汁蘆筍牛柳卷 $88
-- 味道偏濃, 都幾似食緊午餐肉, 得我一個鍾意佢...


軟殼蟹卷 $58
-- 第一次食素壽司, 賣相吸引, 味道亦不俗, 是今夜最受歡迎的菜式... 雖然唔知點解個職員會Double落單, 但都食得晒...


價錢好實惠, 5個人叫到成枱都係餸, 擺都冇位擺, 埋單都唔使$200一個, 尖沙咀喎, 美麗華喎...


是次每人消費約 $165 元
味道: 3 環境: 3 服務: 3 衛生: 3 抵食: 4
###
地址 : 尖沙咀彌敦道132號美麗華商場2樓2005號
電話 : 2376 1186


2013年7月24日 星期三

「呂珍九」韓式辣醬牛肉炒辛辣麵

30 June 2013, Sunday 

韓式辣醬牛肉炒辛辣麵!!! 尋日跟呂珍九學的!!!

睇 J2「與星同行」(I'm Real 여진구 in Italy) 時, 呂珍九到米蘭米芝蓮二星餐廳的廚房, 向主廚學做橄欖油清炒意粉, 最後他做咗韓國炒拉麵當謝禮~


唔知Honey邊樹來的勇氣, 竟然叫我呢個「廚盲」試吓整... 好... 試吓囉...

材料有... 辛辣麵, 牛肉, 韓式辣醬, 黃椒, 蔥...


2013年7月23日 星期二

化妝班 @ LANEIGE Water-Beauty Centre

11 June 2013, Tuesday

已經好多年冇化過妝, 對上果次, 係做姊妹, 人地個女而家都上小學了, 哈哈...

出席Bloggers活動, 大部分Bloggers都化晒妝, 影大合照時我總是左閃右避, 因為怕我個黃面被攝入鏡, 唔想留低可怕的印記... 最慘烈的一次, 應該是做Pizza做到上報紙, 個攝影師仲選了我做大特寫, 果真大整蠱!!!

決心要係以後的Bloggers Event堂堂正正地影大合照, 再加上為了Honey的大日子, 我決定要重執化妝之手...

首先要做的, 係買過晒所有化妝品!!! 舊果d, 應該都過晒期, 都唔敢再塗上面...

第二要做的, 上返個堂重溫一下技巧... 以前學的, 已全數退還...

上網做了資料搜集, 坊間比較便宜又有保證又不會強迫購物又真係化妝教室的, 暫時搵到LANEIGE...

LANEIGE Water-Beauty Centre 的化妝班, 只需HK$150, 學完2小時仲比返張HK$150的Coupon你落Shop選購化妝品, 再加張85折劵, 計落真係有So, 因為我本身係佢地Member但購物都冇Discount, 反正學完都要買化妝品, 到時有折仲平d, 個Couese仲等於免費, 一舉兩得, 於是落咗Shop比錢報名...

今日專程來尖沙咀上堂, 落起大雨, 好狼狽...

個化妝教室都幾大, 1次可容納16人... 以白色為主, 感覺好乾淨...

課程為3段 -- 潔面, 底妝, 眼妝/胭脂/唇妝, 每1段都會搵1個學員上去做示範單位...
需要用到的潔膚品同化妝品一應俱全, 整齊地擺放於每個座位...

實習期間導師會到每位學員身邊睇吓進度, 如有需要, 會施以援手...

完成整個妝後, 課室內的一幅牆突然打開了, 嘩!!! 遊樂場呀!!! 好搞笑呀!!! 每位學員都可以影一張即影即有留念, 好有心思呀!!!


今次的學習過程都幾輕鬆, 好自在, 因為冇人迫我買Product, 導師同職員都好友善, Beauty Centre比想像中更貼心, 讚~~~

我以後可以化個靚妝去Bloggers Events啦~~~ Yeah!!!

2013年7月22日 星期一

澳洲「野生探索」の白行一趟墨爾本Queen Victoria Market

21 March 2013, Thursday
 

Min 18oC, Max 25oC, Heavy Rain, Mostly Cloudy, Mild

今日的溫度下降了, 昨天的溫差有16度之多... Motion Sickness + 呼吸道不適... 1點瞓, 7點半已醒了, 8點半已Ready Check-out...

酒店幫手Call Taxi, 冇叫我地出街上等候, 到Taxi司機入來Lobby搵我地時, 非常不禮貌... 司機係1個白人後生仔, 車尾係鐵籠, 似係載動物的, 同我地坐的座位相通, 一陣怪味, 坐完覺得全身都痕... 呢個司機唔單止唔找錢, 仲要唔幫我地搬行李, So Bad...

Qantas全自助登機櫃位... 想搵個人幫手都冇... 好彩我地早咗好多, 慢慢摸下摸下, 最後部機印咗行李貼紙同登機證... 貼好件行李就拎去Drop, 都係全自助, 好勁, 咁都搞得掂!!!



2013年7月20日 星期六

澳洲「野生探索」の阿德萊德酒店篇Mercure Grosvenor Hotel

17-21 March 2013






由於行程計劃倉促, 都冇時間慢慢揀酒店, 只求其搵咗一間比較平(其實一點也不便宜)但又近Adelaide Railway Station的... (因初時一心諗住大車站機鐵一定到, 點知原來冇機鐵的!!!)

住咗幾日, 有好有唔好, 都少少後悔, 下次應該唔會再入住呢間酒店...

2013年7月19日 星期五

澳洲「野生探索」の阿德萊德North Tce的日逛夜逛

幾日來o係阿德萊德市中心遊遊蕩蕩的綜合觀光篇... 出發前要先去Adelaide Metro下載Free City Loop Bus同Free Tram (South Terrace <> Entertainment Centre) 的路線圖...
http://www.adelaidemetro.com.au/Timetables-Maps/Special-Services/Free-City-Services


從Mercure Grosvenor酒店行出來, 只要越過小巷, 再過半條斑馬線, 已經到達Tram Stop, Free Tram平均10分鐘1班... 再過埋果半條斑馬線, 已經到達Adelaide Railway Station Tram Stop同埋Free City Loop Bus Stop, 其實都算方便, 可惜除咗位置同服務比較好, 其他的水平令我地有後悔冇加多少少住隔離間酒店, 稍後會有詳細酒店篇出爐...

2013年7月13日 星期六

[試食邀請] Amina Modern European : 當法蘭西遇上西班牙

9 July 2013, Tuesday

上月收到餐廳的邀請時非常高興, 本應第一時候赴會, 唯本月初有重要宴會要出席, 需要緊急減磅, 可以稱得上係十萬火急, 哈哈... 感謝餐廳方面的配合, 重要宴會完滿結束, 我同老友食家第一時間到來試食...

餐廳位於食肆林立的金馬倫道, 找到龍記大廈, 在大廈鐵閘外需按樓層單位的門鐘, 待餐廳開閘... 乘電梯往5樓, 深啡色的木門有點像住宅, 餐廳內只有數張桌子, 以黑白灰色系為主的用餐區, 簡潔而沉實, 從外而內散發著私房菜的氣息... 坐在任何一個角落, 都可以看到紅酒櫃及生蠔吧, 每當有客人點蠔, 服務員即席開蠔的一舉一動, 盡入眼簾... 餐廳內還燃點著香氛, 幽幽的香氣, 閃爍的燭光, 浪漫醉人, 很適合情侶們來談心...

店主推介的Bordeaux Supérieur Red在橡木桶中發酵了12個月後, 呈現徹底的現代紅色, 濃縮水果味, 柔順平衡... Château Argadens 位於頂級葡萄酒生產地--波爾多, 白酒及紅酒出品的第一個年份是2002年, 雖然酒莊非常年輕, 但擁有人卻是由1883年已於波爾多進行採購的Sichel家族...  


麵包配自制特式醬 (Bread w/ Homemade Sauce)
-- 鬆軟的麵包, 塗上自家制的茄子醬, 口感油潤柔順, 像茄子牛油, 越塗越多, 欲罷不能... 


(由右至左)
美國的Kumamoto, 原產自日本九州熊本地區, 生長緩慢, 體型細小, 味道濃郁, 回味是甜的...
美國的Pacific Rock, 原產自日本, 生長速度快, 入口滑溜, 清新, 海水味淡, 味道簡單直接帶鮮味...
法國的White Peral, 產自法國西南部, 海水味適中, 入口不太鹹, 肉身爽滑, 像滑入喉嚨般, 蠔味豐富...
澳洲的Angels, 正值當造期, 海水味濃, 帶點甜味, 肉質鮮嫩...


Starter有2種選擇, 帶子及和牛他他...

帶子, 蘋果薄荷沙沙 (Scallop, Apple Mint Salsa)
-- 帶子味甘, 清甜爽滑, 肉質細嫩, 伴以酸酸的蘋果薄荷沙沙醬, 份外醒胃...  


和牛他他 (Kobe Tartare)... 


餐湯亦有有2種選擇, 包括來自法蘭西的代表--法國牛肝菌清湯(Porchini Consomme), 及來自西班牙的西班牙蕃茄凍湯 (Gazpacho)...

西班牙蕃茄凍湯 (Gazpacho)
-- 蕃茄去皮後, 浸在橙汁內中和酸甜味, 加入荷蘭西芹煮成, 上桌前再加點西班牙蕃茄乾, 夏日清新之選... 


香煎鵝肝, 金巴利汁 (Foie Gras, Cranberry)
-- 甘香豐腴的鵝肝, 表皮煎得香脆, 伴以小紅莓煮成的金巴利汁, 以日本珍珠提子作裝飾, 灑上蝦籽, 儼如藝術品一樣... 唯沒有以多士鋪底吸油來, 吃罷後所剩的鵝油有點... 


水果雪葩 (Sorbet of the day)
-- 石榴雪葩呈粉紅色, 顏色取自石榴(Pomegranate), 味道卻是香港人熟悉的番石榴(Green Apple Guava ), 奉上桌時已嗅到番石榴的香氣, 入口更是100%濃縮番石榴的味道... 用「色香味俱全」來形容絕不誇張...


廚師每日精選 (Chef Daily Specials)
-- 法國春雞的雞脾煎完再焗, 皮薄香脆, 肉質彈牙, 鮮甜細嫩, 伴以醇香甜度都恰到好處的意大利陳醋, 美味非常... 雞胸則煎完再慢煮浸泡, 不至於過熟, 才不會浪費法國春雞...

廚師精選 紅酒燴牛面肉(Chef Specials Beef Cheek)
-- 牛面以紅酒燴煮至軟腍, 酒香醇厚, 非常入味... 紅酒汁混和墊底的英國薯餅一起吃, 又香又綿... 


特式花茶 (Special flower tea)
-- 茉莉花茶加入桂花, 入口清香甘甜, 幽幽茶香在口腔內歷久不散, 茉莉花的花芯載浮載沉, 簡單中見心思...  


是日甜品 (Dessert of the day)
-- 餐廳自家制的士多啤梨雪糕, 加入了新鮮果肉, 濃郁的士多啤梨味, 酸酸的果香, 甜度不太重, 在嗅覺及味覺上均得到大滿足...


服務貼心, 吃掉每一道菜後店員才會上下一道菜... 洗手間很光潔, 而且設備齊全, 上至潤手液下至牙線, 一應俱全, 細心程度直迫6星級酒店...

餐後有幸細聽主廚Jason的烹飪心得, 獲益良多...

是次每人消費約 N/A 元
味道: 4 環境: 4 服務: 4 衛生: 3 抵食: 3
###
地址 : 尖沙咀金馬倫道54-56號龍記大廈5樓A號舖
電話 : 6018 0244