網頁清單

2013年5月29日 星期三

[博客活動 安安燒 On On BBQ : 爆漿瀨尿牛丸個孖生細佬... 爆JAM士啤牛丸


26 May 2013, Sunday

非常榮幸獲到PR邀請前往位於旺角, 剛開業不足2個月的安安燒, 與廿幾位Bloggers一起試菜... 從旺角地鐵站銀行中心出口步行至安安燒, 只需10分鐘左右... 面向東鐵線, 旺中帶靜... 店內裝潢較為簡約, 大約有30個座位左右, 洗手間設在店外... Bloggers到齊後, 老闆雖然在廚房忙於準備, 亦不忘抽時間與各Bloggers分享飲食心得...

2013年5月28日 星期二

清進洞韓國餐廳 Cheong-Jin Dong Korean Restaurant : 少數傳統韓式風味

24 May 2013, Friday

原本一早約好咗食友今晚去西環試菜, 但係E5班友仔星期三先殺出o黎約食生日飯, 仲要得呢個星期五同下個星期五比我揀, 但係呢2日我都幾個星期前已經約好晒人, 跟手佢地話如果今個星期五唔得, 就要去到6月中甚至更後, 仲要急到要即時Confirm... 點解你地唔早d約人呢?!! 你地班C9明知自己只有星期五先放監, 又明知自己細路6月考試, 點解2日前先o黎約人?!! 唉... 幸得老友食家諒解, 同意將西環的試菜活動改為下星期二, 今晚的6月之星壽宴先可以順利舉行... C9們, 下次唔好再咁忟水喇)))

第2個問題來了... 壽星想食韓燒, 但我地成日食韓燒, 其實好多間都試過, 我想試新餐廳, 考起壽星... 辛苦晒, 多謝你搵到間咁好嘅餐廳!!!

今日中午只食咗一碗細細的河粉, 唔知係咪肚餓過籠, 居然去錯咗華懋金馬倫中心... 去到1/F LIFT門一打開, 烏燈黑火, 重門深鎖... 好恐怖... 成間Nightclub咁... 速閃...

落到LOBBY再上網查清楚, 原來係金馬倫中心, 無"華懋"2個字... 再行前幾個鋪位就到了... 到達清進洞時只有鑽媽一個耍大牌未到... 坐低講開先知, 原來唔只我1個去錯地方, 龍媽都去錯咗金馬倫"廣場"... 唉... 好心就唔好起咁多XX金馬倫XX來害人啦...

餐廳面積雖然唔係好大, 但空間感十足, 唔會迫夾... 你睇, 中間條路幾闊...


唔知壽星係咪仲餓過我, 都唔等鑽媽, 急不及待即刻Order咗1個泡菜煎餅食住先... 幸好泡菜煎餅未上, 鑽媽已到... 好, 可以Order埋個4人餐... (因為今日我同貓兄都不在狀態, 食唔到幾多, 所以平時食開6人餐嘅我地, 4人餐都夠o架啦)

泡菜煎餅 $80
-- 呢個泡菜煎餅做得唔錯, 煎得好薄, 入口香脆, 少少辣, 幾惹味, 仲唔會油淋淋, 唔使蘸醬汁都好好味... 以鐵板盛載, 放耐咗都唔會攤涼, Good...


Set Menu C $830 (4名)
頂級牛肋骨
牛肉
豬排骨
辣魷魚
海鮮煎蔥餅
石頭什錦飯
炒粉絲
韓式生菜包
* 包括伴菜、湯、飯、生果   <-- 寫Blog時先發現冇比湯同飯!!!
** 消費滿$190(每人)送是日美食  <-- 寫Blog時先發現冇送美食!!!

5人坐6人枱, 坐得幾鬆動... 上菜速度奇快, 服務員不停堆食物上枱, 只係好勉強先可以放得晒... 職員都算有禮貌... 唯一係熱茶茶壺係中段拿走了, 我同鑽媽冇Order凍飲, 渴死... 之後人潮漸散, 熱茶供應不絕...

伴菜非常認真, 5個人有多達10款共13碟!!! 煎豆腐好好味, 幾乎比我1個人食晒... 翠肉瓜天婦羅都係第一次見, 味道同口感都唔錯... 涼拌茄子都好惹味... 甜薯仔夠粉Yummy... 辣薯絲辣辣地, 爽脆惹味... 大豆芽爽脆飽滿... 泡菜睇落好辣, 唔敢試... 伴菜整體水準相當高...



頂級牛肋骨
-- 好大舊骨呀!!! 有個疑團我一直都解唔開, 相入面明明得1舊骨, 點解燒燒下會有3舊骨出現嘅呢?!!  頂級牛肋骨肉真係好好好味呀!!! 肉質柔軟, 牛味濃郁, 醬汁香甜, 切割的體積及厚度剛剛好, 輕輕烤好一邊, 再反轉烤另一邊, 鎖住肉汁, 烤好後仍很Juicy, 讚讚讚!!! 如果唔係病病地, 我真係要食多幾碟先夠喉呀!!!


牛肉
-- 好刀功!!! 厚薄均一, 大大片, 有D比掌心更大, 無肉碎, 貨真價實, 抵讚!!! 最憎坊間有D睇落好多肉, 但全部都係肉碎, 唔係黐底就係係烤爐隙縫溜走... 雖然不及頂級牛肋骨柔軟及濃味同埋甜, 但係都好好味, 最正係咁薄, 燒一陣已食得, FIT晒我地一班餓鬼...


豬排骨
-- 全晚最有驚喜!!! 我第一次食到咁好味的燒豬肉, 只係用鹽醃一醃, 已經好出味!!! 好重豬味, 唔好笑, 坊間好多豬都係冇味, 合埋眼唔知自己食緊咩... 肉質柔軟, 烤耐咗都仲好Juicy, 以鹽燒是最適合不過, 唔會掩蓋肉味, 甘香豐腴, 好想食多幾碟呀!!!


吱... 吱... 吱... 睇到留晒口水, 有得食未呀?!! 未得, 豬肉要徹底煮熟先食得o架, 燒燶少少都在所不惜...


辣魷魚
-- 中規中矩, 調味OK, 鮮味不足, 不夠彈牙, 沒有驚喜... 燒一陣已捲起, 露出切成菱形的花紋...


海鮮煎蔥餅
-- 全晚最失色, 冇味的!!! 而且太濕, 煎得唔夠香脆, 一定要蘸酸酸甜甜的醬汁同吃...


石頭什錦飯
-- 唔好味!!! 接近冇味, 接近冇餸, 而且少到離奇, 每人只分到半碗, 飯身都太濕, 糊仔咁...


炒粉絲
-- 好好味!!! 所以龍媽Order多1客, 粉絲入味又唔油膩, 火喉好, 柔軟中帶點韌勁, 而且炒得均勻, 遲咗食都唔會黐埋一團...


韓式生菜包
-- 生菜好新鮮, 麵醬又香又甜好惹味, 燒好D肉, 加埋生蒜青瓜, 捲起生菜大啖放入口, 另有一番滋味, Yummy!!! 十足十睇韓劇咁, 韓風十足!!!




生果 
-- 幾片橙, 有點酸, 多得龍媽幫手吃清光... 原來想廋, 首要條件要吃得落酸的生果, 難怪我屢創顛峰... 唉...

香口膠
-- 唔知咩味, o趙兩o趙吐得...


4人餐加1個煎餅再加多1個炒粉絲, 凍柚子蜜, 2罐汽水... HSBC 9折, 5個人折實$1050, 超值!!! 星期五喎, 尖沙咀喎, 冇限時段喎... 7點正食到接近10點, 食完都冇人趕你走, 我地繼續吹水, 又冇人迫你叫多d食物, 一切感覺好自在好舒服, 讚!!!

去Toilet冇指示牌, 我行到門口四圍望, 有個坐近門口的疑似韓藉男士, 好Gentlement咁幫我係Cashier取Key, 指示Toilet在門外, 再遞Key比我, 非常Gentlement, Thank you so much!!! 女厠有2格, 都好衛生...

進食至尾段時餐廳內有點烏煙瘴氣, 可能抽氣系統不勝負荷, 直至人潮略散, 空氣質數回復正常...

是次每人消費約 $210 元
味道: 4 環境: 4 服務: 4 衛生: 4 抵食: 4
###

地址 : 尖沙咀漆咸道南57-59號金馬倫中心1樓
電話 : 2369 1100 / 3488 5119

2013年5月27日 星期一

[試食邀請] Fiat Caffè : 「意」猶未盡 「蠍」宜不捨

23 May 2013, Thursday

數月前跟著老友食家到來到意大利汽車品牌 Fiat 及 Abarth 的全新概念陳列室 x 意式 Café, 大開眼界 x 大快朵頤... 今天受到餐廳的邀請與Honey前來試食, 入口的Fiat已換上蝦肉色的Fiat 500c...

黑熊亦變成火辣辣的紅色蠍子綿羊仔...

餐廳旁的陳列室亦已換上新裝... 黑白Fiat x Abarth 595C Turismo... 型格十足...

上次上層陳列室有2架跑車, 今次只擺放了1架, 騰出了的空間, 讓餐廳的座位也增加了...



在汽車陳列室發現了一個小雪櫃, 我的目光被內裡的杯裝雪糕吸引住... Gelato Italiano (Special Designed by XTC), 有Toasted Almond同Sweet Strawberry 2種味道, 今次無緣一試...


今日好幸運, 可以坐係全店唯一的汽車座位, 坐上三色紅白綠跑車後, 未開始享受意大利美食, 人已感到飄飄然... 下一站, Italy~
 
和藹可親的店員詳細介紹了是夜的推介美食... 饑腸轆轆的我凝望著光潔明亮的Open Kichen, 廚師們都有條不紊地為食客準備美食...


Honey Figs Margarita $50
-- 店員推介的Mocktails, 混合了蜜糖、檸檬汁、紅莓汁、梳打水及每天新鮮運到的無花果... 沉醉於每一口清香的無花果肉, 加上蜜糖的甜、檸檬汁及紅莓汁的酸、以及梳打水的氣泡, 幻想一下自己置身意大利的尉藍海岸, 享受著Honey Figs Margarita, 輕輕鬆鬆就將炎炎夏日的悶熱一掃而空... 吸吮的時候, 無花果與薄荷葉就仿如驚濤駭浪中的帆船, 載浮載沉, 非常有趣...


正當我地陶醉於意國風光之際, 一陣腥味湧至...

Fried Sardines with Capers, Lemon and Dill $95
香煎沙甸魚、水瓜柳、檸檬
-- 沙甸魚, 係我的飲食記錄中, 就只有罐頭茄汁沙甸魚, 香煎沙甸魚倒是第一次食到!!! 沙甸魚泛指體形較細小的鯡魚, 之所以得名, 皆因最初係意大利Sardinia島捉到... 小時候對沙甸魚有偏見, 誤以為佢只係廉價Junk Food, 真係大錯特錯!!! 其實沙甸魚含有豐富的維生素、礦物質、DHA, 能預肪膽固醇及心臟病、血栓病, 能活化腦部、提高記憶力及學習能力... 咁有益, 趕快趁熱食先... 放下時嗅到的腥味, 食用時反而嗅不到... 香煎的沙甸魚外皮香脆, 魚油甘香, 肉質不太幼嫩, 當然離不開沙甸魚的特色, 好多軟骨!!! 灑上新鮮檸檬汁, 不用太多調味, 簡簡單單, 已很美味, 好有驚喜, 從此對沙甸魚徹底改觀...

Artichoke Hearts, Broad Beans, Olive Oil, Sour Dough Croutons and Pesto $65
朝鮮薊、蠶豆、橄欖油、麵包粒、香草醬
-- 被視為奢侈品的朝鮮薊, 義大利語發音亞枝竹, 原產於地中海, 於9世紀開始在那不勒斯地區種植, 可食用的底部非常細小, 稱之為朝鮮薊心, 味道獨特, 在香港只有比較高級的意大利餐廳才可食到... Fiat Caffe的朝鮮薊做得不錯, 沒有苦味, 而且非常軟腍... 與蠶豆及麵包粒構成多重口感, 橄欖油與香草醬帶來油香, 酸酸的醬汁非常開胃...  

"Cacio e Pepe"
Spaghetti, Black Pepper, Pecorino, Cheese and Olive Oil $110
羊芝士意粉
-- 拉姑強烈推介這款意粉...... 下面的雀巢!!! 以用Pecorino羊奶做成的意大利硬芝士, 炸成雀巢, 香、酥、脆、奶味濃厚、芝味無窮, 非非非非常美味, 食到唔停得口!!! 不說不知, 大部分Pecorino羊奶芝士都係於沙甸魚之鄉Sardinia生產... 意粉只以橄欖油及黑椒粒作簡單的調味, 再灑上芝士, 簡單而味美, 更能襯托出Pecorino的美味!!! 進食時好無儀態咁掉咗少少Pecorino到桌面, 我居然罕有地有惋惜的感覺, 由此看來, 美味的程度不言而諭...


Blue Mussels, White Wine, Onion and Parsley $125
藍青口、白酒、洋蔥、香草
-- 以白酒煮藍貝, 加入洋蔥及洋芫荽同煮的青口香甜嫩滑, 肥美飽滿, 不會過辣, 比起上一次更美味, 看來廚師的手藝又再進一步了... 麥味香濃的麵包煙煙韌韌, 蘸香草白酒醬汁非常滋味...

(前) Peaches, Galliano Syrup, Whipped Vanilla, Cream and Almonds $60
香桃、雲呢拿忌廉、杏仁杯
-- 上次都有試香桃杯, 今天做的比上一次美味... 杯底的Peach香甜, 酒味強勁, 混和軟滑的忌廉一起吃, 加上香脆的杏仁片, Yummy~

(後) Affogatto, Italian Lady Finger Biscuits, Orange Mascarpone $60
意大利芝士杯
-- 杯底放入意大利手指餅, 中層加入以Mascarpone意大利忌廉芝士(Tiramisu的主要材料)加入橙皮汁及Liqueur和糖粉攪拌至光滑即成的Orange Mascarpone... 頂層加上以意大利濃縮咖啡Affogatto打成的沙冰, 最後灑上濃郁的可可粉... 3種味道, 3重口感, 挑戰你的味蕾極限,
勁有驚喜!!! 索飽了Orange Mascarpone的Lady Finger Biscuits, 酒味香濃, 軟軟泡泡, Affogatto咖啡味香濃, 甜度極高, 口感細滑, 配以可可粉的微苦, 好好好味呀!!!

Tea by Tea Forte $30
Jasmine Green, Raspberry Nectar
-- 拉姑上一次推介的餐後飲品!!! 精緻可愛, 讓人身心愉快的茶包藝術品, 相信任何人看到它也會滿心歡喜... 有機的Jasmine茶色清淡, 茶味清香, 呷一口, 齒頰留香, 是抗氧化佳品... Raspberry茶色像紅寶石, 茶味充滿果香, 酸酸甜甜的, 飯後飲用可以幫助消滯, 天然無咖啡因...

Menu轉了, 與數月前有點不同, 聽說6月會再轉新Menu, 到時一定要再來看看有什麼新驚喜...

感謝PR的邀請及餐廳方面的款待, 好一個充滿意大利風情的晚上...


是次每人消費約 N/A 元
味道: 4 環境: 4 服務: 4 衛生: 4 抵食: 3
###
地址 : 銅鑼灣禮頓道77號禮頓中心G5-G6號舖
電話 : 2960 9222

2013年5月24日 星期五

吉豚屋吉列豬扒專門店 Ca-Tu-Ya : 過江吉豬

15 May 2013, Wednesday

早前受到Pizza Hut的邀請, 招待聽障人士及員工及一眾Bloggers觀看電影「勝利人生」(The Hammer), 電影詳情可瀏覽 http://blog.yahoo.com/ken-merry/articles/1427576, 欣賞電影前要先醫一醫肚... 我好耐都冇到淘大花園搵食, 上搵食網站搜料, 餐廳很多, 有質數的似乎不多, 呢間新開的日本過江龍吉列豬扒專門店是唯一比較多"笑面"食評的, 位置貼近戲院, 非常便利...


餐廳內的裝修非常簡樸...


最最最值得一讚的是... 芝麻醬... 任落!!! 平時日式超市一支細細的芝麻醬都賣幾十蚊, 其他日本餐廳都只係比少少你, 呢度真係好豪呀!!!


吉列咖喱豬扒飯 (梅) $55
-- 吉列咖喱豬扒飯分梅、松、竹3個等級, 梅的豬扒重80g, 松的豬扒重120g, 竹的2塊豬扒共重160g... 其實80g的豬扒份量已不少... 咖喱汁味道偏辛, 濃厚適中, 唯一不足之處是只有汁, 完全沒有配料如紅蘿蔔、薯仔之類... 白飯用珍珠米, 濕度適中, 粒粒飽滿... 豬扒炸得不太乾身...

吉列豬柳定食 $75
-- 餐廳除咗供應豬扒, 其餘的都係豬扒... Order了吉列豬柳, 外型與吉列豬扒無異, 不乾不濕, 不硬不軟, 唯一的缺點是... 有點油膩!!! 唔係講笑, 你可能會話吉列豬扒緊係油啦!!! No No 唔一定的, 我有2間心水吉豬店真係唔油的... 而且呢度的炸醬味道總是欠缺了一點點什麼的, 伴咖喱汁還可以, 但清食就不夠惹味... 可能因為呢個原因, 燒汁同芝麻汁都係任落, 落多一點點口味會更佳...
 
定食跟的麵豉湯不錯...

定食跟的白飯亦有質數...

定食跟的飲品... 加$6的巨蜂乳酸特飲最可怕... 像喝小時候1個4方小盒有4粒圓圓的吹波糖, 味道很吹波膠, 有點Worry吞下後腸臟會否結膠, 想吐...

服務都OK, 環境就... 可能我坐橫樑底, 有點不自在, 後來的客戶全部拒絕坐橫樑下的枱... 衛生看來不錯, 但受到小飛飛的騷擾, "不自在"感增加...

若以順路計, 可以一試!!! 但若要專程千里迢迢來探究就...

是次每人消費約 $80 元
味道: 3 環境: 3 服務: 3 衛生: 3 抵食: 3
###

地址 : 九龍灣牛頭角道77號淘大商場三期地下G286-288號舖
電話 : 2351 1899

2013年5月22日 星期三

打吡餐廳 Derby Restaurant : 觸不到的戀人 Summer Berries Consommé



8  May 2013, Wednesday

傳統英式會所外型古典、富殖民地色彩, 馬會會員更是身份的象徵, 就算有錢都唔一定可以成為會員, 申請入會需要有2位遴選會員提名及附議、三名會員支持... 位於山光道的馬會會所, 除了提供多項消閒設施及中西餐飲服務... 對於平民如我來說, 予人感覺神秘、高不可攀, 好奇心悠然而生... 多年前曾獲親友邀請前來食火鍋, 當時的情況已經忘記得一乾二淨, 只記得地點非常隔涉, 並無公共交通工具可以到達, 我屬於無車階級, 唯一的選擇是坐Taxi... 是夜Honey的朋友訂了位與大家共進晚餐賀喜, 我有幸「扯衫尾」出席, 多日來懷著既興奮又期待的心情, 等待今夜的來臨... 

正所謂「貴人出門招風雨」, 呢句俗語, 向來與我們有不解之緣, 剛係上星期五又試過一次咋嘛... 今日黃雨 + 放工 + 跑馬日 + 跑馬地 = 勁勁勁勁勁塞車!!! 慶幸放工時順利搵到Taxi, Taxi司機出奇地非常熟識地形, 穿梭於迂迴曲折的山路, 全程毫不塞車, 竟然可以比預定時間7:00PM早10分鐘到達... 早咗10分鐘, 餐廳仲未開門營業... 坐係門外等待期間, Honey又遇到朋友, 山旮旯到咁都遇到, 利害!!!

咳... 咳... 請大家先關掉你的手提電話!!! Club House內係嚴禁講手提電話的!!!

朋友特意訂咗Derby Restaurant內的打吡房(Derby Room), 好讓出席的賓客不會受到外界騷擾, 全情投入, 享用醇酒佳餚... 廂房走傳統英式風格, 充滿古典色彩, 寬敞舒適的私人空間, 置身其中, 非常寫意...

咁高興, 大家今晚一於不醉無歸!!! 人人都好聽話唔揸車, 坐的士做乘客... 只係難為了從九龍區過來的朋友, 塞車都算喇, 仲要由上車到落車全程受到(唔願意去跑馬地的)Taxi司機冷言冷語, 睇得出非常勞氣!!! 終於人齊, 唔好激心啦, 忘記一切煩憂, Let's Party!!!

朋友獨力携帶4支美酒(2支香檳 + 2支波爾多紅酒), 好臂力!!! 他買的每1支酒都經過精挑細選, 購買時都不是太昂貴, 但極具潛力, 將來應該會不斷升值... 在場只有我1個唔好杯中物, 上菜前要來個祝酒儀式, 我也被安排了一小杯香檳, 待主角完成一個簡短的Speech後, 眾人興奮地舉杯暢飲... 不想浪費, 喝了一小口, 暗嘆"好酒呀"... 香醇順喉, 層次及味道均非常豐富...

** 末段轉載酒評Bordeaux Index & Robert Parker給大家參考, 還有酒莊的Tasting Notes...

朋友專程收集2支紅酒的木塞放在Honey的麵包碟上, 我當時打算帶回家留為紀念, 可惜服務員誤以為係垃圾, 以超光速收走了... 噢... 係咪我酒後反應遲鈍, 居然連2個酒塞都保護唔到, 嗚嗚... 大家別誤會相片中的酒是我喝剩的, 這份量已是我的全部, 哈哈哈... 在懷疑醉醺醺的情況下, 忘記為Margaux紅酒瓶拍照, OMG!!!

識飲識食的朋友, 訂座時已預先寫好菜單, 餐廳方面很貼心, 每位客人面前都有1份預先印制的菜單, 我地唯一需要煩惱的, 係主菜吃牛還是吃鴿, 同埋餐後的飲品... 朋友對Food & Wine Paring亦非常有研究... Champagne Dom Pérignon配前菜, 由香轉醇的Château Pichon-Longueville配Pigeon, 由烈轉香的Margaux配Beef... 在座每客賓客都非常Enjoy...

Chef de Cuisine -- Eyck Zimmer出生於前東德的, 曾在瑞士、德國、英格蘭和葡萄牙最負盛名的酒店工作, 倫敦期間曾親自為英國皇室成員做菜... 飲食格言是"A Cook is the only artist where nothing of his creation remains... but memories of the palate can last a lifetime"... 大家一起來欣賞他的藝術創作吧...

Sautéed Foie Gras
Cider Jus and Apple Brioche Toast
-- 一般人見到Foie Gras都會認為係鵝肝, 其實Foie Gras解作肝, 未必一定係指鵝肝, 而且鴨肝的味道不遜鵝肝... 今夜餐廳選用的, 正是鴨肝!!! 鴨肝2邊略煎至外脆內滑, 豐腴甘香, 膻而不腥, 不用咀嚼, 慢慢在口中溶化, 配以以蘋果醋、香料及雞湯煮成的蘋果汽酒醬, 果香減輕了油膩感, 再一口解決鋪上蘋果粒粒的多士藝術品... 單是一個頭盤, 已教人非常滿足!!!

Velouté of Haricot Blanc
Black Perigord Truffle and Chives
-- 將白扁豆浸泡一晚煮一會再磨成蓉, 加入奶油煮成湯, 質感濃稠, 上桌前一刻灑上韭菜和黑松露油... 法國的「佩里戈爾松露」(Black Périgord Truffle), 被譽為「料理黑鑽」(The Diamond of The Kitchen), 生長於橡樹及榛樹上, 產量稀少價格昂貴, 味道濃郁, 放到熱湯上, 將其獨特的香氣發揮得淋漓盡致... 以味道偏淡的白豆作為畫布, 讓Perigord Truffle在畫布上增添無限色彩, 手法含蓄而優雅...

Roasted Boston Lobster
Noilly Prat Sauce, Baby Ferrels, Girolles
-- Honey知道我鐘意食龍蝦, 專登要求朋友加入的... 將波士頓龍蝦拆殼起肉烤熟, 龍蝦肉呈誘人的紅色, 鮮艷奪目, 朋友特意取其色來賀喜, 雖然大家都係接受西方教育, 但卻離不開中國人的傳統... 灑上以Noilly Prat苦艾酒煮成的醬汁, Noilly Prat被廣泛用於烹調調味醬, 尤以伴魚為最佳, 應用在龍蝦上, 能帶出龍蝦的鮮甜味, 龍蝦肉爽脆彈牙, 不消1分鐘, 半隻波士頓龍蝦已被鯨吞, 實在太太太美味喇, 幸福的鐘聲再次在腦中響起, 噹... 噹... 噹... 噹... Baby Ferrels幼嫩清甜, 雞油菌則轉贈Honey...


Peach Sorbet
-- 不得不讚賞法國人對飲食的要求同研究, 主餐前後都會以新鮮果汁加糖制成冰點, 清理味蕾上殘留的味道, 好待舌頭迎接下一種美味... 以小湯匙盛載, 迷人的粉紅色, 活像少女的臉頰, 好可愛呀!!! 清新香甜的白桃雪葩, 果味濃郁, 冰凍的感覺很爽呀!!! 舌頭上的鵝肝同龍蝦已隨風而去... I'm ready for main course now!!!

 
原本Honey同我都係Order牛里脊, 不過朋友極力建議Honey冒險嘗試水準不太穩定的鴿肉, 做出水準的話將會非常美味, Honey最後改單由牛轉鴿...

Grilled Beef Tenderloin
Beurre Café de Paris, Fondant Potato, Grilled Green Asparagus and Ceps
-- Beef Tenderloin我要求"Well Done"(全熟), 一般餐廳都會搬出一件如石般堅硬的牛肉出來, 但這裡的大廚火喉拿揑得準, 切開牛里脊沒有滲血, 內部呈棗紅色, 肉質柔軟富彈性沒有半點筋, 朋友的5成熟更是超級柔軟, 肉味濃厚, 香而不膻, Yummy!!! 我曾經因為一次吃到超級膻的牛肉而不再吃牛10年以上(火鍋的肥牛除外), 之後也只是偶爾吃少量牛肉, 如果早點遇上這裡的牛里脊, 相信我一早已經重生化身牛魔王了... Beurre Café de Paris是以牛油混合多款香料, 最重要是加入Ansjovis沙甸魚熬制而成的醬汁, 名字像法式, 但卻源自瑞士日內瓦, 主要用以伴紅肉同吃...  圓筒形的Fondant Potato做的非常出色, 表面煎至金黃色, 入口香脆, 內裡的薯肉粉嫩甜美, Yummy... 烤露荀亦是一絕, 選取不大不小的新鮮露荀, 大的太硬不夠幼嫩, 小的不夠清甜爽脆, 削去外皮, 烤至少許焦香, 沒有半點青澀, 非常可口... 色香味俱全的Grilled Beef Tenderloin, 我非常滿意...


Roasted 'Bresse' Pigeon
Madeira Sauce, Pommes Mousseline, Broad Beans and Trompette de la Mort
-- 烤鴿選用來自法國東部布雷斯(Bresse)地區的鴿子, 當地以飼養雞隻而聞名於世... 曾見過西方少女在香港的酒店中菜廳拿著餐牌聞鴿色變, 相信在西方國家懂得欣賞及會食用鴿子的, 就只有法國人... 朋友大讚今晚大廚做的鴿子非常出色, 肉質柔軟細緻, 帶點膻香, 正所謂鴿有鴿味, 哈哈...「唔講得笑 」(夜間一個廣告內重複幾十次的對白), 真係好有鴿味!!! 伴以葡萄牙的馬德拉酒(Madeira Wine)加牛肉高湯煮成的馬德拉醬汁, 味道濃厚稠密, 與鴿子形成絕配... 鋪底的Pommes Mousseline說穿了其實是薯蓉, 做出來的效果竟然滑溜得像慕斯, 實在嘆為觀止... 這道菜式我還是第一次嚐到, 今夜真是大開眼界...


吃罷主菜, 朋友還特意為主角訂了黑森林蛋糕慶祝, So Sweeeeeet!!! 來一個簡單的切餅儀式後, 服務員為我們每人分發了一小角, 剩下了半個蛋糕讓主角帶回家慢慢享用... Hmm...我當時心裡面有個疑問, "個Cake都幾好味呀, 又唔係好大個, 點解只係切半個Cake, 唔切晒1個呢?!! 其實9個人都應該食得晒吖?!!"... 原來...好戲在後頭!!!
 
DaDaDaDa... 今夜的重頭戲... 隆重登場!!! 前大廚的得意之作, 主菜單內是找不到的, 餐廳方面亦不太願意做, 因為制作步驟繁複, 更需要安排專人照顧, 若非朋友為了要以紅噹噹的菜式為主角賀喜, 強烈要求餐廳方面供應, 我真的不可能有機會與它相遇, 猶如「觸不到的戀人」...

Summer Berries Consommé
-- 上菜時大家都WoW一聲... 驚艷!!! 讓人有窒息的感覺!!! 定神一看, Strawberries, Raspberries, Blueberries, Blackberries, Melon, 像一顆顆紅寶石和藍寶石般, 在仲夏の夜發出閃爍耀眼的光芒... 各式各樣的漿果色彩鮮艷, 大紅大藍, 100%純天然!!! 合上眼睛, 幻想一下, 人就像置身盛夏的漿果園之中, 抬頭看到的, 除了蔚藍的天空之外, 就只有紅紅藍藍的漿果, 將鼻子湊近一點, 可以嗅到仲夏夜の莓所散發出的陣陣莓香, 清新、純正、充滿夏天的活力氣息... 未知是否我表現得太喉擒, 朋友的太太不禁按住我的手, 溫柔地說這個甜品還未完成的, 最重要的東西仍未出場...


登登登登... 鮮紅色的莓湯!!! 服務員拿著一壺壺的凍湯, 先為各位Ladies斟滿碟子, 然後才為各位Gentlemen斟滿碟子, 果然是傳統英式貴族來的地方, Ladies First的禮儀維持至今...

神秘的Summer Berries Consommé艷壓全場, 面對如此美艷的甜品, 縱然在場人士見慣風浪, 亦不禁驚嘆, 有賓客更笑言要為此甜品命名為"Sweet Eighteen"!!! 一語道破, 貼切不過的名字, 按捺不住的甜蜜、美麗、可愛、羞澀, 會有人捨得將它吃掉嗎?!!

今日Kenmerry大鄉里出城, 為大家解究一下漿果清燉湯的秘密...

混合各式仲夏漿果, 切成小角, 放入碗內, 加少許水, 用保鮮膜密封, 放在一煲滾水上數小時, 靜待漿果的汁液慢慢提取出來, 最後篩走漿果, 放入冰箱冷藏, 食用時取出, 加點檸檬汁及新鮮的薄荷葉即可... 由於漿果清燉湯加了西瓜, 西瓜本身的果糖含量非常高, 所以不用額外再加糖, 清燉湯已經很清甜... 再伴以Vanilla Sorbet, 白與紅, Vanilla含蓄的香甜與Summer Berries Consommé奔騰的香甜味, 視覺上與味覺上均形成強烈對比, 是一道最完美的仲夏甜點!!! 原汁原味, 每一滴都縕含漿果的精華, 吃得津津有味是理所當然的...


漿果含有豐富的花青素(抗氧化黃酮類), 有效降低高血壓及心臟疾病和癌症的風險, 對維持血管健康非常適合... 漿果亦是最好的消炎藥, 對於老年癡呆症、糖尿病和骨質疏鬆症有很好的防護... 嘻嘻... 咁就有藉口再搵機會捲土重來喇, 不過唔知到時餐廳仲肯唔肯再做呢道甜品呢...

歡樂的時間過得特別快, 又係時候講Bye Bye...

接近10時, 朋友不時提醒馬場的夜馬會於10時45分散場, 為免人多擠塞而導致Taxi上不了Clubhouse, 大家需要早點離開... 哈哈... 但係一眾賓客今夜實在太高興, 依然滔滔不絕, 不願離開... 飲過咖啡或英式茶, 吃過精緻的朱古力, 是時候離開了...



離開時下著雨, Taxi不多, 等了好一回, 仍無損大家的雅興, 各位賓客離開時都帶著滿足的笑容...

是次每人消費約 $1250 元 
味道: 5 環境: 5 服務: 5 衛生: 5 抵食: 3
###
地址 : 跑馬地山光道香港賽馬會會所一樓
電話 : 2966 1310

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Champagne Dom Pérignon Vintage 2003
 
Bordeaux Index score : 96+
Bordeaux Index note : Pale gold/yellow. Rich, nutty, smokey nose with a touch of citrus and tropical fruit. Quite closed initially. Amazing focus. Lovely rich, silky texture in the mouth. Incredibly well structured and in no way fat or flabby. A lovely bitter, savoury edge. Absolutely delicious but needs time.

酒莊網址: http://www.domperignon.com/image/vintage2003-tasting-notes/

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Château Pichon-Longueville 2001

Robert Parker score : 93
Robert Parker notes : A very successful effort for this vintage in the Medoc, this deep ruby/purple-colored Pauillac exhibits class/nobility/breed along with black currant liqueur, licorice, and incense notes. Sweet, expansive, fleshy, and medium to full-bodied, with good structure, ripe tannin, and a long, 30-35 second finish, it can be drunk now, but will be even better in 2-3 years; it will last for 12-15 years. I had this wine three separate times out of bottle, and it is performing significantly better than it did from cask.

酒莊網址: http://pichonlongueville.com/

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~