網頁清單

2013年4月29日 星期一

夜上海 Ye Shanghai : 「非食評」模糊夜宴

9 March 2013, Saturday
接近2個月前的米豬蓮夜宴, 菜式由主人家發版, 菜式名稱唔知, 埋單幾錢又唔知, 食物味道同口感都已經忘記得七七八八, 如果Submit去某搵食網站, 好肯定又會被打壓成「非食評」, 咁仲寫唔寫好呢?!!

答案係... 緊係寫!!! 咁有紀念價值的一夜, 如果都唔記錄低係自己的Blog入面, 咁我2006年開始寫Blog的初衷咪失去咗!!! 「非食評」, I Don't Care!!!

收到主人家的英雄帖後, 只聽到朋友話夜上海係米豬蓮, 當時仲以為只係米豬蓮推介, 點知... 2個月後的今日先知, 竟然係連續2年得到米豬蓮二星 (2013 & 2012 米芝蓮二星, 2011 & 2010 米芝蓮一星)... 咁猛?!! 呀哈哈哈... 我好「土包子」呀!!!

極具中國味道的裝潢, 透過落地玻璃門可以欣賞到1881 Heritage的景色... 昏暗的燈光, 好眼瞓呀...

6個前菜, 10個主菜, 2個麭點, 6款甜品, 一大群餓狼, 近乎光速的上菜速度, 轉盤堆到再堆唔入都仲繼續堆, 昏暗的燈光, 射燈射到相機上造成的黑影... 諸多因素(藉口), 出來的相片冇咩藝術感...

又白又滑又薄的豆腐, 灑上豉油, 好味!!!

肥美的醉雞, 強烈的酒味, 好味!!!

好香好脆好甜的脆鱔, 好好好味呀!!!

醉豬腳仔, 冇咩印象...

肴肉, 一向唔係我杯茶...

蒜泥白肉, 冇晒印象...

貓兄遲咗半個鐘, 人齊, 起菜!!!

片皮鴨, 又係冇晒印象, 皮好似幾韌...

清炒河蝦仁, 唔係我杯茶...

腰果蝦仁, 冇印象有食過, 哈哈, 死未...

原條魚魚切絲, 唔腥, 味道清淡, 肉質好滑溜...

咩骨都唔記得, 嘩咔咔咔...

三絲炒咩咩, 哈哈...

紅燒獅子頭, Not 賣飛佛...

炒豆豆, I like it~

津白, 金華火腿有d腥...

炸子雞, 有點乾, 但比坊間好...

食麭麭食飽...

生煎麭, 個個都咁靚仔...


小籠包...

甜品時間...

合桃露...

布甸伴雪糕...

燉雪梨...

冇酒釀味的桂花酒釀丸子...

香, 脆, 薄, 甜的八寶飯, 好好味...

慕斯...

席間的焦點話題, 除咗主人家的人生有所改變, 仲有嘅就係麵包機!!! 受我去玩麵包機玩到上咗報紙的影響, 居然成班C9約埋去主人家屋企睇佢部買咗N世耐的麵包機示範, 都幾搞笑...

8娘教子, 難得主人家全晚笑笑口, 唔嫌棄我地幾個墟的癈話, 冇話走咗去講電話或者玩電話, 全程投入, 果然, 心中幸福的人是最快樂的!!! 祝你地以後每一天都甜甜蜜蜜!!!

是次每人消費約 $N/A 元
味道: 4 環境: 5 服務: 4 衛生: 4 抵食: N/A
###
地址 : 尖沙咀廣東道3號馬哥勃羅香港酒店6樓
電話 : 2376 3322

2013年4月15日 星期一

[試食邀請] 馬來一菜館 Café Malacca : 星馬一夜遊

10 April 2013, Wednesday

較早前承蒙食友山區麵包王的引薦, 受到酒店方面的試食邀請, 是夜可與2位食友一同前往香格里拉集團旗下的Traders Hotel享用星馬美食, 感激感激~

今夜與PR一起進餐, 大家非常投契, 時而談談旅遊, 時而談談飲食, 有講不盡的話題, 4個女人果然不止1個墟... 進餐其間, 坐在附近的小妹妹經常走過來, 咬住毛巾同我地玩Give Me Five, 我地4人合力教佢講"哦~~~", "哦~~~"了好一會兒, 牙牙學語的小妹妹終於都"哦~"了, 但好聰明地用手拿住毛巾, 嘿嘿, 一眾黑心姐姐們的奸計居然連3歳小妹妹也不上當, 非常失敗...

馬來一的名字緣於馬來半島與蘇門答臘島之間的Straits of Malacca(馬六甲海峽), 於18世紀初期, Malacca海上商貿頻繁, 造就了馬拉菜的雛形, 揉合了中東、印度、中國、印尼的風味, 創造出獨一無二的口味...


馬來一前身是西餐廳, 供應海鮮自助餐, 是老友食家的心水餐廳之一... 現改為供應星馬菜, 聽說遲些可能會進行裝修, 增添星馬氣氛...


(左起) 柑桔特飲、香茅特飲、涼粉冰 $23

香茅特飲 $23
-- 墨綠色的外表有點嚇人, 香茅獨特的味道清新醒神, 吸吮時夾雜了一絲絲用班蘭葉做成的果凍, 有點像兒時飲過的珍多冰, 很好玩...
薏米水 $23
-- 薏米水煮好後呈奶白色, 雪至冰凍才飲用, 不用加冰, 吸吮時啖到淡淡的薏米香, 煮熟了的薏米仍然煙韌有咬口... 薏米很有益, 能健脾去濕去水腫, 更有排毒功效, 姊妹們多飲有益...

沙爹雞肉/牛肉串燒 (6串) $72
-- 沙爹燒至焦香, 肉質柔軟不會太乾, 我自己1個人吃1打也沒問題... 花生醬香甜濃郁, 蘸肉串份外惹味... 米糕煙韌, 滲出淡淡的米香, 味道微甜, 伴濃味的串燒一起吃, 一濃一淡, 很搭配... 再吃一口爽脆的青瓜與辛辣的洋蔥, 可清一清味蕾...

星洲香辣烤魚 (2件) $32
-- 魚肉以香蕉葉包裹然後放在明火上燒烤, 香蕉葉的清香, 加上濃烈的星洲士生華人傳統辣醬, 香味非常強勁, 咀嚼時辣味適中, 但辣味後勁凌厲, 吞下後, 辣味在喉嚨中打滾, 噢... 吃1口已要飲下半杯薏米水來中和辣味... 烤魚的口感偏腍, 有點像魚餅...

馬來炸雞 (3件) $53
-- 將以香辣黃薑醬汁預先醃好的雞件, 炸得甘香惹味, 外脆內嫩, 調味剛剛好, 不會太鹹或太淡, 端上枱時仍然非常之熱, 咬第一口時還燙口呢...

馬拉盞炒通菜 $45
-- 通菜青翠幼嫩, 以特色辣椒及蝦醬炒, 香辣加上蝦醬的鹹鮮, 香濃惹味, 百吃不厭, 瞬間被清空...

咖哩香葉炒茄子 $45
-- 茄子?!! 不是酥炸生蠔嗎?!! 以香蒜、蔥、咖哩葉一起香炒, 看似酥炸生蠔的茄子, 炸漿味道香口, 與傳統酥炸生蠔的炸醬味道相同, 難怪外表如此相似... 茄子口感偏硬, 整體反而更Match... 放久了會油一點, 最好趁熱吃...


檳城亞參叻沙 $82
-- 馬來西亞叻沙與新加玻叻沙口味略有不同, 沒有加入椰奶, 香港暫時只有2間食店供應... 辣魚濃湯味道酸酸的, 加上新鮮菠蘿及青瓜, 在炎炎夏日時吃份外開胃, 不知是否拍照時間太久, 導致米線有點腍... 服務員還奉上檳城特色蝦膏, 唯香港人口味沒有星馬的濃, 對我來說不用蘸蝦膏也很夠味...

新加玻叻沙 $88
-- 在辣湯中加入椰奶, 濃烈的椰味, 辣中帶香甜, 非常惹味, I Like It~ 叻沙配菜非常豐富, 有豆卜、魚餅、雞蛋、蝦, 每款也很合我口味, 款式之多有點像吃港式車仔麵...

巴生肉骨茶 $98
-- 以多種中藥材熬製而成的排骨湯, 湯底味道濃郁, 比坊間的更濃, 傳統的肉骨茶一般會跟白飯, 但今晚太多美食, 我們選擇了"走飯"... 肉骨煮得軟腍入味,
伴油條吃頗特別... 可因應個人口味而蘸星洲黑豉油、蒜蓉、辣椒同吃, 風味更佳...


海南雞飯 $108
-- 雞肉已經去骨, 肉質嫩滑, 雞皮可輕易推開, 對於喜歡啖啖肉及不吃雞皮的我, 非常方便... 香飯軟綿甘香, 雞湯有點苦, 可蘸星洲黑豉油、蒜蓉、酸漿同吃... 
 
咖央多士 $22
-- 咖央醬不像坊間的呈綠色, 亦不見有整片的牛油在內... 多士表面烘烤至金黃, 口感香脆, 塗上牛油及特多咖央漿, 班蘭的香與椰子的甜, 不失為1客美味的飯後甜品...

香蘭椰絲卷 (2件) $28
-- 加入班蘭做成的薄餅皮呈翠綠色, 滲出陣陣的班蘭香, 以棕櫚糖混合椰絲作為餡料, 口感偏硬了一點...

西米布甸 $28
-- 食友覺得棕櫚糖有點苦, 我反而頗喜歡, 味道有點像焦糖, 伴無味的西米布甸, 頗搭配...

榴槤布甸 (餐牌未有)
-- 外表平平無奇, 驟眼看像牛奶布甸, 合上眼吃的話, 就似是100%的榴槤濕包, 口感綿密幼滑... 

椰汁黑糯米 $28
-- 不是想像中的固體黑糯米, 椰漿配煙韌黑糯米, Yummy~

PR說馬拉菜並不像中菜或西餐, 沒有順序奉上頭盤、主菜、飯麵的概念, 店方已加強相關服務員的概念, 所以當馬拉服務員第一樣就端出海南雞飯時, 請大家不要動怒, 畢竟只是大家的文化差異...

是次每人消費約 $N/A 元
味道: 3 環境: 3 服務: 3 衛生: 4 抵食: 4
###

地址 : 西環皇后大道西508號香港盛貿飯店2樓
電話 : 2213 6613

2013年4月14日 星期日

[試食邀請] 八吉 Yakichi : 冷雨夜「暖」在你身邊

11 April 2013, Thursday

數星期也活在迷霧中, 偶爾下著毛毛細雨甚至傾盆大雨, 濕度不是100%也是90%, 納悶得令人做什麼也提不起勁... 是日氣溫更驟降至15度, 毛衣、大褸、稍為厚一點的長袖衫都已經通通被打入冷宮(床下底), 只剩下一件中袖的羊仔皮外套, 已經是手頭上最重型的... 放工後到尖沙咀與Honey會合, 冒雨前往尖沙咀潮流飲食集中地... 亞士厘道!!! 沿途感到有點涼意, Honey只穿了一件薄薄的外套, 未必有點冷...  

哼哼... 先來點Music搞搞氣氛吧...

♫ ♪ 在雨中漫步 藍色街燈漸露
相對望 無聲緊擁抱著
為了找往日 尋溫馨的往日 ♫ ♪

哈哈... 我知, 個Gag係好爛, 我地都係盡快返回正題吧喇... 

八吉喊住「天地旬鮮」的口號, 從日本的漁港搜羅多款新鮮的時令鮮魚, 直接送到客人面前, 大廚會隨客人的喜好煮理, 刺身、鹽燒、汁煮均可... 一踏入店內, 第一眼見到的, WoW... 好多時令海產呀!!!  原條做刺身, 都只係$200-$390, 好抵呀!!! 不過抵還抵, 我同Honey係唔食魚嘅, 服務員簡單2個字"嘥料", 道盡千千萬萬人的心聲, 相信好多朋友見到如此多來自日本的時令新鮮海產, 都會同服務員一樣, 情不自禁地講一句"嘥料", 呀哈哈哈...


八吉係日本有36間分店, 香港同日本的分店一樣, 都有提供私隱度極高的和風「個室」, 置身私人空間內, 不受外間騷擾, 盡情盡興享用盛宴... 這種充滿日本風的榻榻米, 其實是改良版... 想當年初出茅廬的我, 人生的第一次出差, 就係去個個同事都爭崩頭舉晒2隻手話想去的東京!!! 客人第一晚請我去食晚飯, 就係坐傳統的榻榻米!!! 我一直雙膝跪地臀部壓腳, 挺直腰小口小口地進食, 維持了1個小時左右, 雙腳由麻痺至完全沒有感覺後再開始刺痛, 天呀, 我投降喇!!! 面露尷尬的笑容向客戶表明"我支持唔住喇", 雙腳一伸, 哦... 舒服晒...


和風「個室」外的卡位亦相當寬敞舒適...


甫坐下, 服務員端上熱茶、熱毛巾及多款前菜供客人選擇... 枝豆、蟹膏、螢光魷魚、甜蝦...


花多眼亂, 最終選了枝豆和蟹膏... 我好享受眾目睽睽之下用手拎枝豆放入口咬果份無驅無策的感覺, 灰色的蟹膏又香又滑, 鮮味帶鹹香, 蟹味濃郁, 整隻蟹的精華匯聚在內...


自家制花生豆腐 $55
-- 嫩滑緊緻、亮白有彈性、零毛孔、恍如剝殼雞蛋... 以上的台詞, 並不單止適用於BB肌膚, 套用係自家制花生豆腐身上, 亦貼切不過... 用湯匙舀來吃, 黏黏的很有彈性, 拉開時難分難捨, 拉出的一絲絲豆腐絲, 就好似拉開加熱了的芝士... 入口很滑, QQ的, 很特別, 有豆香, 花生味較淡...


蘆筍豬肉卷 $78
-- 以五花豬肉薄片包住新鮮蘆筍來燒, 豬肉薄片被烤至脆身, 帶點焦香, 豬油滲進爽脆的蘆筍內, 令蘆筍帶有油香, 只需灑上少許鹽來調味, 香口美味, 佐酒一流... 這種粗幼的蘆筍個人來講比較喜歡, 削皮後清甜爽脆有咬口, BB蘆筍絕對比不上...


沖繩餃子 $68
-- 餃子的餡料使用沖繩縣產豚, 6隻餃子包含6種不同的味道, 實在少見, 一次過可以滿足你6個願望, 對花心鬼如我來說, 實是喜訊!!! 餃子皮超薄, 底部煎得脆脆的, 填滿了各式各樣的餡料,  包括紅蘿蔔味、苦瓜味、原味、芝士味、墨魚汁味、島唐辛子味... 沖繩縣產的新鮮紅蘿蔔, 沖繩最具代表性的苦瓜, 沖繩縣產的嫩滑多汁豬肉, 沖繩縣產的新鮮墨魚汁, 沖繩縣產的紅辣椒, 噢... 沖繩呀, 我好掛住你呀, 呢幾粒餃子唔單止無減輕我對你的思念, 反而令我更想你呀!!!


沖繩和牛拼AGU豬肉壽喜火鍋 $480
-- 嘻嘻... 今晚的高潮... 沖繩紅牌阿姑(AGU)壓縮登場!!! 和牛脂肪分佈均勻, 超大片的, 未吃入口單是看看已經知道好味, 在湯內輕輕一灼, 牛肉不會散開, 肉質柔軟, 牛味香濃, 不用蘸麻醬或酸汁已很美味... 五花AGU油份高, 甘香豐腴, 油而不膩, 沒有豬肉的腥臊味, 不吃肥肉的我也能接受... 沖繩島豚AGU同樣很大片, 肉片灼後不會散開, 肉質幼嫩, 甘香而不臊, 肉味不遜於黑豚肉,比我係沖繩食到的AGU更美味, 單竟我是跟團, 給團友吃的應該不會是什麼上等貨色...


隨火鍋附上大量新鮮蔬菜, 冬菇、大蔥、金菇、茼蒿、海苔、紹菜、豆腐, 合乎健康原則... 冬菇的花紋切得很美, 豆腐挻身有豆香, 放入火鍋內也不會散開...


火鍋吃至尾聲時, 店員會奉上沖繩麵, 這種沖繩麵的厚度有點似稻庭烏冬, 煙韌彈牙... 


猶記得我係沖繩旅遊時, 遇到12級颱風「圓規」, 被困在Marriott Resort的下午, 就只能靠在酒店便利店購買的杯麵充饑, 打開杯麵時感到很愕然, 點解杯麵會變成烏冬?!! 後來先知道沖繩麵就是這個模樣... 「圓規」(KomPaSu)
掠過接近暴風中心的沖繩地區時達到頂盛, 風速為185公里/小時, 颱風經過沖繩縣所挾帶的強風暴雨, 造成約32000萬戶住宅停電...

吃罷熱騰騰的美味火鍋, 剛才飽受「冷雨夜」煎熬的身軀已經回復溫暖... 嘻嘻... 吃飽飽, 又到第二個胃出動的時候!!! 服務員再次奉上熱毛巾, 及為我地更換一杯熱騰騰的綠茶, 很貼心...

沖繩紅芋雪糕 $35
-- 在沖繩吃過雪鹽軟雪糕、鹽味曲奇雪糕、白桃與紅芋Gelato, 唯獨鐘情白桃與紅芋Gelato... 八吉的紅芋雪糕質感很特別, 軟滑得來帶點煙韌, 是可以咀嚼的雪糕, 紅芋淡香, 不會過甜, Yummy~

Honey與我均非常滿意今晚的晚餐, 食物真係好好味, 而且店內提供日文報紙, 客人以日本人為主, 猶如置身日本的居酒屋內, 形神俱備... 回程時發現, 原來八吉係En Group旗下的餐廳, 想當年Honey生日, 我地去尖沙咀文化中心睇完歌劇「歌聲魅影」(The Phantom of the Opera ), 跟住就去「彩食酒宴」(En)食晚飯慶祝, 當年的美味, 至今難忘...

哈哈哈, 絕無誇大, 千真萬確, 大家唔相信的話, 可以到我的Blog搜尋"En", 只有3個Blog Results出現, 第3個就係喇... 無花無假, 唔係作故仔... 不過當年的食評完全無詳細形容食物的味道及口感, 只有好味、好好味同好好好味, 請大家睇完唔好見笑... 嘩咔咔咔... (自己忍唔住笑先)

是次每人消費約 400 元
味道: 4 環境: 4 服務: 4 衛生: 4 抵食: 3
###

地址 : 尖沙咀亞士厘道27號2樓
電話 : 3105 8950