網頁清單

2013年3月3日 星期日

[著數活動] 制作美味麵包Pizza話咁易 @ Easy123 Dining & Cooking Studio

2 March 2013, Saturday

老友食家好利害, 經常係各類遊戲中勝出... 今日又贏咗「晴報 x Panasonic 健康麵包坊」, 可以帶1個朋友去Easy123跟著名營養師黃凱詩小姐學做麵包同Pizza... 我又可以跟埋去, 好開心, 呵呵... Thank you!!!

準時到達K11, 搵咗一陣, 終於搵到Easy123 Dining & Cooking Studio... 嘩... 企係店外可以一眼睇晒教室入面嘅情況, 好光猛, 好乾淨, 好企理, 好正呀!!! 仲有大電視直播導師的教學情況, 嘻嘻, 咁咪只要每日都企係店外面, 就可以唔使比錢上堂都學到o野囉...


夠鐘, 入得!!! 2人1組, 每組1部麵包機, 唔使同陌生人Share, 正... 店內裝修以白色為主, 係廚房或者教室o黎講, 實在罕見, 衛生程度可見一斑... 枱底有2張椅, 椅下面仲有櫃桶比客人放手袋同外套, 非常貼心, 第一次上烹飪班上得咁舒服...

未開始, 週圍影吓相先...


今日的主角, 麵包機!!!


好, 開始!!! 所有材料都已經磅好晒, 放好入密實袋, 仲Label晒, 真係超超超超好服務囉...


唔係賣廣告, 呢部麵包機真係超勁, 我地只係將材料放入桶內, 加水, 放入麵包機, 蓋好頂蓋... 掀起小蓋好頂蓋, 放入果仁及酵母, 蓋好小頂蓋, 按鈕, 2小時後食得... 容易程度近乎煮個公仔麵...

仲有2個鐘麵包先出爐, 營養師黃凱詩小姐教大家整麵包, 個粉團係由麵包機搓, 唔使落手搓...

示範咗幾款造型, 放入焗爐焗好後, 就分比大家試味, 剛出爐熱辣辣超鬆軟, Yummy~


餘下時間營養師黃凱詩小姐就開始教大家做Pizza... 以下係做Pizza嘅配料, 大家要比賽做出最有營養同最好味的Pizza... Ready... Set... Go!!!


做Pizza的粉團都係由麵包機搓, 唔使落手搓... 我負責壓平Pizza餅底, 老友食家出去揀「有營」配料... 佢揀咗茄膏、鹽水吞拿魚、洋蔥、菠菜、紅黃綠燈籠椒、車厘茄、低脂芝士... 我地避開晒鑵頭類、肉類、高糖類、營養陷阱牛油果, 以為咁就係最有營, 點知...

Pizza逐一出爐, 由營養師黃凱詩小姐逐一試食, 揀出最有營養同最好味的Pizza...


試食完畢, 係公佈結果前, 營養師黃凱詩小姐逐一講解各種材料的營養價值, 原來菠蘿係生果類, 要食得「最健康」, 不可或缺... 另外火腿屬於肉類, 在均衡飲食的環節中亦很重要... Oh... 咁我地一定贏唔到啦...

點知...

公佈「最好味」的Pizza時, 竟然係我地的枱號, OMG!!! 完全估佢唔到!!! 話晒我都係地獄廚神吖, 竟然會係「最好味」獎項中勝出?!! 咁我係咪可以摺埋對翼, 同地獄講Bye Bye, 做返個普通人呢?!!
咁... 大家又覺得我地呢個「絕版Kenmerry x Karriech花營Pizza」做成點呢?!! 唔係我賣花讚花香, 我真係覺得整得幾靚, 唔好噓, 唔該, 嘩咔咔咔... 正值晚飯時間, 等待麵包機完工仲有少少時間, 百無聊賴, 個Pizza又切好咗4份準備帶走, 食1份試吓先... 又幾好味喎... 索性食埋另外1份, 瞬間清枱...


「最好味」獎品係... 瑞士制水樽2個!!! 都幾好吖, 可以帶去行山...
叮叮叮叮... 課室內陸續響起叮叮聲, 自家製「無添加」麵包出爐啦... WoW... 好緊張呀!!! 個樣都幾靚仔呀, 帶返屋企同Honey分享, 用微波爐叮咗30秒, 都仲好鬆軟, 好好味...

我都好想要1部麵包機呀!!! 不過屋企連電飯煲都冇位擺, 仲邊有位比我放麵包機喎... 嗚嗚嗚嗚... 我唔制呀!!! 我想要個大d嘅廚房呀!!!

2 則留言:

  1. 上年買左部panasonic 105,真係好滿意,e+好少買街外麵包了
    [版主回覆03/12/2013 21:07:05]羨慕

    回覆刪除
  2. 其實個樣真係幾靚..起碼唔食得都睇得呀
    [版主回覆03/12/2013 21:06:37]多謝, 我整果層都係咁諗, 哈哈~

    回覆刪除