網頁清單

2013年2月9日 星期六

[試食邀請] Fiat Caffè : 遊車河 嘆意菜

5 February 2013, Tuesday

嘻嘻... 今晚老友食家約埋我一齊去車行睇車...


嘩!!! 守門口嘅黑熊好古惑呀!!! 居然穿上白雪雪超可愛扮嘅公仔衫扮北極熊!!! 攪咁多o野, 使咩咁麻煩吖, 等我下次介紹支美白Lotion過你啦, 即刻又白又滑...


可愛的Fiat 500同埋Ferrari x Abarth 695, 大家有冇睇啱邊架呀?!! 唔使怕羞, 可以上車試吓坐得舒唔舒服o架喎...


咦... 咦... 唔通拉姑轉咗Channel學人寫車Blog?!! 哈哈... 非也... 請大家繼續睇落去, 睇吓咩葫蘆賣咩藥...

老友食家接受了餐廳的邀請, 約埋我一齊前來試食意大利菜, 感謝...

意大利汽車品牌 Fiat 及 Abarth 的全新概念陳列室, 以意式 Cafe 為設計理念, 無論係車迷或者係為食鬼, 都可以一邊欣賞各款新車, 一邊享受意大利美食...

店內的Signature Chair, 酷似古董車, 好Kawaii呀!!! 全店只有1張, 想坐?!! 就要睇吓你當天嘅運氣啦...


為配合多架名車的Style, 餐廳內裝修走簡約現代風格, 以黑白紅為主要色調...


開放式廚房設計, 整潔衛生, 每道菜送到食客的面前之前, 均由大廚嚴謹檢視及畫龍點睛式添上各式香草...


廚房內整齊地展示出餐廳內的主要食材... 好大隻Ferrarini Parma Ham呀!!!


海鹽及黑胡椒都係意大利貨...


餐單係12月更新過一次, 再加上每天不同的廚師推介, 唔驚悶親食客...

望一望餐單... 全球最貴的咖啡... HK$799,888?!!! 嘩!!! 80萬1杯咖啡?!! 唔係呀嘛?!! 睇真d, 原來係1杯Espresso加1架Abarth 695 Tributo Ferrari... 嚇死...

餐廳的Signature Dish係Risotto Pasta, 佢表面係1粒飯, 實際係1粒意粉... 好「零零漆」Feel呀, 嘩咔咔咔...
 
服務員好Nice, 一早為我地選好了餐廳的招牌菜, 每碟菜上菜時更詳細講解, Thank you~

Ricotta, Figs, White Truffle Honey and Olive Oil $95
無花果拼乳清芝士伴白松露菌蜜糖
-- Ricotta cheese 芝士味不太濃烈, 奶味好重, 入口非常滑溜, 無論味道同口感都有點似大良炒鮮奶... 芝士只係沾到數滴白菌油就已經超勁菌味... Parma Ham肉質柔軟, 油潤甘香, 鹹香略有不足, 估計是風乾過程過程不夠長所致... 無花果清甜軟腍, 有清新味蕾之效...

Seared Tuna, Cauliflower, Almonds, Hazelnut Oil, Lemon Dressing $110 [Fiat Caffe Signature]
火炙吞拿魚、椰菜花、杏仁、榛子油、檸檬
-- 吞拿魚略炙, 受熱均勻, 呈粉紅色的魚肉質感柔軟, 不會有吃生肉的血腍腍感覺, 加入大量迷迭香(Rosemary)去除魚腥味, 再沾上檸檬汁同吃, 酸溜溜的, 非常開胃... 伴碟仲有我最愛的夏威夷果仁, 但濕濕腍腍的多士口感好奇怪, 像麵筋...

Seabass, Zucchini, Capsicum, Balsamico $145 [Daily Special]
-- 海鱸(Seabass)係唯一我食西餐時會主動點的魚類, 因為唔會腥骨又少肉地又夠厚, 可以大大啖肉係放入口, 切合食肉獸精神, 呵呵... 海鱸伴上意大利瓜(Zucchini)及燈籠椒(Capsicum), 灑上義大利黑葡萄陳醋(Balsamico), 再以百里香(Thyme)作點綴, 造型無懈可擊, Perfetto!!! 魚肉非常結實, 魚味清淡, 與黑醋的濃厚陳香對比強烈... 最美味的要數顏色奪目的燈籠椒, 又甜又香, 並無坊間的燈籠椒的青澀味, 入口異常柔軟, 好好味呀!!! 鋪在魚肉下的球狀Pasta Di Semola Di Grano Duro, 口感QQ的, 好可愛...

Blue Mussels, White Wine, Onion and Parsley $125
藍青口、白酒、洋蔥、香草
-- 以白酒煮藍貝幾乎係指定動作, 加入洋蔥及洋芫荽同煮, 令白酒汁更香更甜, 青口肉質非常嫩滑, 好好味呀... 咦... 等一等... 嘩... 好辣呀!!! 舌頭上只有白酒汁的香甜美味, 估唔到去到喉嚨竟然辛辣無比... 咳咳咳... 咳咳咳... 我要先飲半杯水先可以繼續食落去... 哈哈, 係呀, 又唔食得辣, 又要繼續食, 因為好味嘛... 麵包麥味香濃, 煙煙韌韌, 好味...
Peaches, Galliano Syrup, Whipped Vanilla, Cream and Almonds $60
香桃、雲呢拿忌廉、杏仁杯
-- 飽餐後, 服務員推介甜品杏仁杯, 2個人Share 1個... 初時我地仲以為好大Portion, 一睇... 嘩... 1人得1啖!!! 茴香酒Galliano滲出淡淡的酒香, 雲呢拿Cream好似雪糕一樣咁滑溜, 香桃香甜, 不俗的飯後甜品...

Roasted Hazelnut Piccolo Latte $40
-- 餐廳的Signature Drink, 榛子味香濃, 好飲唷... 咖啡味略淡... 面對可愛的心心拉花, 不捨得飲呢...

Ginger and Lemongrass Tea by Tea Forte $30
-- 拉姑推介!!! 精緻可愛的茶包, 望住小葉子已經讓人身心愉快, 打開包裝, 將茶包浸泡後, 三角椎的形狀絲毫不變, 簡直係一件完美的藝術品!!! 如果比我係意大利旅行時遇到佢, 我一定會大手入貨, 以佢o黎做手信肯定人人歡喜... 香茅薑茶茶色清, 茶味香, 呷一口, 感覺像瞬間轉移到了泰國, 百份百泰國Feel...


餐廳方面仲送咗小禮物比我地... 意式曲奇!!! 太客氣啦... 又食又拎... 呵呵呵呵... 


餐後同MarCom傾談之下, 先知道呢間餐廳係太古集團係香港酒店業務以外的第一間餐廳, 開業接近一年, 餐廳的員工都係由Feast同Sugar調派過o黎, 難怪烹調風格似曾相識...

回家後聽到一大堆Terms... 主題式(Thematic), 多元化(Diversification), 品牌延伸(Brand extension), 國家文化氛圍(National-cultural atmosphere)... 即時覺得滿天星斗... 我去食o野啫, 唔係去考狀元呀!!!

是次每人消費約 N/A 元
味道: 3 環境: 4 服務: 4 衛生: 4 抵食: 3
###

地址 : 銅鑼灣禮頓道77號禮頓中心G5-G6號舖
電話 : 2960 9222

1 則留言:

  1. kenmerry^0^/新年快樂!!
    [版主回覆02/12/2013 10:40:56]Circle, 萬事如意, 身體健康!!!

    回覆刪除