網頁清單

2013年2月26日 星期二

新年Go糕糕

24 February 2012, Sunday

雖然冇人來我家拜年, 不過我都忍唔住粉飾一下...


每逢過農曆年, 我最怕嘅... 莫過於食糕!!! 連日被迫日糕夜糕, 苦不堪言... 今年見到糕界好多新力軍, 忍唔住大手入貨...

「大師姐」蔗汁百寶糕 $198
-- 江獻珠徒弟「大師姐」麥麗敏新出品, 用100%新鮮蔗汁制造, 加入蓮子、百合、杞子、豌豆等, 打開真空包裝, 即切即食, 好方便... 入口好重蔗汁味, 好清香, 但唔知係咪雪得太耐, 口感有點怪, 不爽不彈不煙韌...




「大師姐」薑汁黑糖年糕 $198
-- 入口薑味強勁, 似食薑糖, 味道不錯... 口感略為軟腍, 不夠煙韌...


「大師姐」蘿蔔糕 $228
-- 銀行職員強力推介, 混合了蘿蔔同蘿蔔蓉, 我期望極高, 有點失望, 唔係唔好味, 只係諗多咗... 蘿蔔味清香, 口感亦佳, 如蘿蔔再多一點會更好...
 
「西苑」純蔗糖年糕 $218
-- 飲茶時一試戀上, 好重蔗香, 微甜, 煙韌軟糯, 好好味, 即時買咗一盒...

「鑫」寧波麻蓉湯圓
-- 近年新歡, 中秋同農曆新年都必吃!!! 獨愛大粒裝, 皮薄, 餡超多, 勁香黑芝麻, 好味到暈...
 
今年見某大超市鋪天蓋地的廣告, 話咩小寧波, 仲以為佢講緊細粒裝, 原來個圓圈入面唔係「鑫」, 而係「小寧波」... 嘩!!! A貨到吖, 大家要高度提防呀!!!

2013年2月25日 星期一

香香燒 Pop Bar & Grill : 一「燒」解千愁

21 February 2012, Thursday

逢親過年, 都一定好多團拜要出席, 有時候仲要一日走兩至三轉, 都咪話唔攰... 今年一反常態, 初一初二同屋企人食過飯後, 一直閒賦在家, 唔通... 我變咗宅族?!! 好彩, 今晚終於開齋啦, 心野人終於有得出關, Yeah, 感謝台山四寶!!! 雖然今晚大家都冇飲酒, 但係所談及的話題及深度都好似有少少飲大咗咁, 仲越講越興奮, 講到手舞足蹈, 唔知有冇嘈親隔離左右呢, 哈哈... 以小吃充飢、暢飲狂歡本來就係日式居酒屋嘅特色之一, 燒烤店同日式居酒屋有異曲同工之秒, 同樣可以一燒解千愁...

KaKaMa想食韓燒, 但尖沙咀似樣嘅韓燒我地都食勻晒咁滯, 最後貓兄係網上面搵到呢間燒烤店, 網上訂座的話免費送家庭式老火湯, 佢個電腦搞極都搞唔掂網上訂座, 就叫咗我去搞... 一搞... 掂咗!!!

餐廳係大廈3樓, 我地一入到大廈就衝入電梯, 咦?!! 點解... 得1字同2字嘅?!! 走出電梯, 原來再入d的位置仲有2部電梯, 1部已熄燈, 我地入咗另1部, 終於上到3樓... 一出門口, 就被香香的黑板吸引住, 貼晒d招牌菜嘅相, 仲有好多用唔同顏色嘅粉筆畫上嘅彩繪, 又幾得意喎, 好似中學時期嘅壁報版呀...


入到餐廳之後, 我同職員講我地用網上訂位, 佢就帶我地去Bar枱前面張4人枱... 嘩, 呢張枱位置勁人來人往, 要求轉角落頭位, 初時話唔OK, 之後佢考慮咗一陣又話可以轉, 唔該晒, 麻煩晒...

牆上貼咗好多寶麗萊相片, 礙於我地要盡快決定食咩, 所以都冇時間深究相中人之誰... HeHe... 你地睇吓喇, 角落頭位係咪好坐好多呢...


係入口補完相返位, 店主就捉咗我去講故... 原來店內有2間廂房, 包辦私房菜, 菜單以中菜為主海鮮老火湯粵式小炒上海菜, 全部有得傾... 嘩, 咁Flexible?!! 返回座位後, 店員更放低iPad比我地睇吓私房菜的照片, 最誇張係大海星湯, 隻海星真係大到嚇死人... 店主又拎以往客人寫的菜單比我睇... Ummm... 點解... 要Show咁多o野比我地睇嘅?!! 我地o黎食串燒咋喎... 貓兄已經問我"係咪知道咗你嘅秘密身份?!!"... 點會呀?!! 我地都冇做過d咩啫... 而家d人拎相機出o黎影食物好Common啫... (答案係文章尾段揭曉)


寫Blog時上網搵料, 先知道呢間餐廳採用由法國引入的真空低溫烹調法, 先將肉類食物放入膠袋並真空密封,然後利用較低溫度而長時間加熱的烹飪方法將食物煮熟, 食用前在燒烤爐上輕烤, 既有串燒香氣亦保存肉汁... 餐牌列明所有燒烤都係用喜瑪拉雅山岩鹽調製... 聽落好High Class咁喎...

燒大元貝, 蒜蓉 (1隻) 時價 $52
-- 我掛住影相, 落單重任落係貓兄身上, 所以最後劃咗d咩我唔係咁清楚... 上菜時, 貓兄問呢個咩o黎? 阿夢職員妹妹答"蟶子"... 蟶子?????? 我地勁大反應, 阿夢職員妹妹再去廚房問清楚, 返來都係答蟶子... OMG!!! 蟶子唔係長形嘅咩?!! 呢舊o野點睇都係圓形喎!!! 呢鋪真係O晒嘴!!! 唯有搵返落單阿姐問吓, 原來係大元貝, 睇返我影咗嘅落單紙仔, 冇劃喎, 不過唔知係咪之前落單阿姐同貓兄傾計話未齊人都可以叫住少少o野食住先, 唔知係咪果時口頭溝通過... 帶子裙邊不見了, 只有帶子肉, 帶子頗新鮮, 肉質柔軟中帶韌度, 蒜味強勁, 鮮甜味欠奉, $52一粒仔, 好貴呀!!!


檸檬白酒煮花甲 $86
-- 賣相唔錯, 粒粒肉都好飽滿有光澤, 睇落好乾淨衛生, 明知自己腸胃唔好唔食得貝類, 都失去理智忍唔住放咗入口, 白酒檸檬汁好清新, 襯托出花甲嘅鮮味, 肉厚彈牙, 冇腥味又冇沙, 好正!!! 但貓兄話腥... 咁奇?!! 到我食第2隻, 真係腥呀!!! 到佢食第2隻又唔腥喎... 最好笑係KaKaMa, 佢酸到面容扭曲, 原來佢咬咗成舊檸檬, 笑死... 


避風塘海蝦 $148
-- 好金呀!!! 金蒜粒好香好脆又乾身, 蝦肉結實, 彈牙爽口, 貓兄話個蝦頭都食得, 我又唔記得自己唔食得, 食埋吞埋d內疚感即刻開始擁出o黎, 第2朝又要去醫生度懺悔, 醫生居然冇責備我, 仲係度笑話拜年冇辦法啦... 貓兄話好辣, 我又唔覺喎... 點知... 第1隻係唔係好辣呀, 第2隻勁辣囉... Yummy...

胡椒蟹 (1隻) 時價 $298
-- 招牌菜之一... 嘩, 個蟹拑好大隻呀!!! 我已經鎖定咗蟹拑做目標, 居然冇人同我爭, 呵呵, 好o野... 上碟冇咩汁, 但異常入味, 勁多胡椒粒, 都幾硬, 非常非常之香, 少少辣, 蟹拑啖啖肉, 肉質飽滿結實, 好新鮮, Yummy... 落單阿姐話蟹上面串新鮮胡椒都食得, 咬咗1粒, 好硬呀, 食唔到咩味, 反而蟹殼遮住嘅紅蔥頭好好味...



燒BB露筍 $20
-- 嘩!!! d露筍廋到吖, 好似營養不良咁呀, 陰公... 幸好入口幼嫩冇渣, 筍味略遜...


燒蟶子皇, 豆豉 (2隻) 時價 $104
-- 貓兄係點1隻蒜茸, 1隻豆豉, 可惜職員落錯單, 變晒2隻豆豉... 最後落單阿姐話呢隻送比我地, 再燒過1隻蒜蓉比我地... 嘩?!! 咁筍?!! 唔通又係因為秘密身份?!! 蟶子我一向都唔敢食, 觀乎朋友們極速食完, 應該唔錯...


燒蟶子皇, 蒜茸
-- 貓兄話豆豉味好D... 最好笑係, KaKaMa問龍媽"你返工未?", 我覺得好奇怪, 初十二喇, 仲問人返工未, 唔係呀?!! 咁我就問KaKaMa問咩, 原來佢話"另有一番風味"... 你返工未... 另有一番風味... 你返工未... 另有一番風味... 你返工未... 另有一番風味... 其實發音真係幾似, 大家試吓講快d, 睇吓係咪好容易會聽錯, 嘩咔咔咔...


汁燒白鱔 $62
-- 肉質細緻幼嫩, 微微的焦香, 唔蘸醬就冇咩味, 蘸酸醬都幾好味, 對我o黎講, 最重要係唔腥又冇骨...


鰻魚飯團 (2件) $28
-- d飯燒完個邊都幾硬, 外層口感似暴暴飯焦, 不過, 完完全全食唔到有任何鰻魚成份, 定係太大粒所以食咗都唔知呢?!! 極其量只可以叫做鰻魚"汁"飯團, 個味其實唔差, 咪好似鰻魚汁咁甜甜地咁囉...


燒尖椒 (1串) $14
-- 咬落好多籽, 椒味不重, 椒身太腍...


燒台灣腸 (蒜味) (2條) $38
-- 初時聽見叫燒腸有d反對, 因為腸仔有咩特別喎, 不過聽見係台灣腸, 誤會咗係我至愛嘅黑橋牌, 叫啦叫啦... 點知... 咁嘅... 唔似有2條囉... 同埋d味冇乜特別囉, 咪普通1條腸仔, 都唔重腸味嘅, 肯定唔係黑橋牌... 職員話連埋蒜片一齊食會好味d喎, Feel唔到囉...


燒煙肉蕃茄串 (1串) $28
-- 以為係煙肉包腸仔, 一咬, 嘩!!! 爆汁, 勁熱, 差d燙熟條脷, 辣死... 原來係煙肉包蕃茄, 呢個組合都幾特別, 煙肉包住蕃茄食落冇咁肥膩...

燒金菇肥牛卷 (1串) $28
-- 金菇個頭燒到濃晒, 一大堆黑色一點點的炭... 味道都OK...


和風牛舌沙律 $38
-- 查實... 用CitiB信用卡會送和風牛脷沙律, 不過我地諗住用網上訂座送咗湯, 應該唔會再送沙律, 所以比錢Order... 可惜唔多掂, 唔難食, 不過冇咩味, 同埋d蔥太生...


香香特飲 $38
-- 材料有海底椰、桂圓、紅棗、杞子, 幾甜, 幾好飲... 不過... Order咗1粒鐘先有得飲, 理由係要翻熱... 食物好熱氣, 又講得o野多, 又笑得大聲, 飲咗呢杯特飲再加多2杯水都唔掂, 喉嚨痛咗1晚... 寫Blog時睇返餐牌先知, 原來唔飲飲品的話, 茶水收費每位10蚊!!!

燒日本芝士年糕 (1件) $24
-- 好味!!!!!! 好煙韌, 芝士軟心, 拉好長先斷, 好有米香, 芝士淡香, 熱辣辣, 好好味!!! 其貌不揚, 估唔到咁正...

燒腩仔 (1串) $29
-- 招牌菜之一, 貓兄話唔係腩仔, 只係5層肉, Sorry, 我唔識分...

燒蒙古羊肉串 (1串) $28
-- 羊肉比較乾, 冇膻味, 食唔到孜然粉嘅味, 所以唔覺佢係蒙古羊肉串...



黑毛安格斯牛柳 (6安士) $108
-- 招牌菜之一, 肉質柔軟, 牛肉味不濃, 唯有蘸芝麻醬食, 香香甜甜, 易入口...


燒一口雞翼 (4隻) $46
-- 鹹鹹地加埋焦香, 熱辣辣, 我OK鍾意... 但龍媽話麻麻地同埋好細隻, 而且仲有骨都唔可以算係一口...


食完晒串燒, 終於有湯飲... 網上訂座送湯, 晚晚不同, 今晚係木瓜湯, 清淡無味精...


飲埋湯, 就到上甜品...

毛里糖燒啤梨 (1串) $18
-- 上菜時, 貓兄問咩o黎... 好, 即check相... 原來係燒啤梨, 貓兄落單時睇錯係士多啤梨... 微甜, 爽口, 比生啤梨好味, 果香濃縮咗...


燒菠蘿 $16
-- 右面第一舊, 勁鹹!!! 中間果d正常返, 少少酸, 有菠蘿香, 多汁, 外面硬身少少...


燒香蕉 $16
-- 可以選朱古力醬或牛奶味醬... 朋友話太少醬, 冇味, 結果職員幫我地添咗一碟醬, Oh, Thanks!!! 朱古力醬一般, 牛奶味醬好味D, 朋友話燒香蕉的口感同味道都似蕃薯, 我又唔覺喎, 我食到香蕉味喎, 少少甜, 好香軟, 好過生食, 冇青味...

食飽晒, 傾陣計, 店主行埋o黎, 仲以為佢想趕我地走, 原來唔係... 佢問我地食得飽唔飽, 我地話好飽, 跟住佢話"好飽啦, 仲想送個茄子請你地食添"... 嘩!!! 咁著數?!! 我地即刻你眼望我眼, 跟住我答"Ummm... 都食得落嘅"... Arhahahaha... 好貪心呀!!!

燒蒜茸茄子 (1條) $39
-- 茄子Size好大, 中間有d硬, 店主解釋坊間淋好多油係茄子面, 令茄子甩皮, 茄肉一夾即開, 咁我寧願硬d啦, 少d油健康d嘛... 蒜茸醬味香濃, 同茄子好夾...

店方都幾細心, 又提供酒精濕紙巾抺手, 又有藤籃比客人放手袋... 離開時仲送咗2張Coupons比我地, 1張係$100 Coupon, 下次食滿$500可以使用... 另1張係Wedding化妝Set頭Coupon, 原來同層隔離單位間Salon同餐廳係同一集團...

食物味道都唔錯, 大家都食得好開心, 仲笑到喉嚨痛... 朋友們覺得價錢略貴, 因為主要都係小吃, 除咗蟹都冇咩主菜食過...

離開時探一探Toilet, 都非常之狹窄吓, 一入到Toilet, 腦海突然靈光一閃, 终於明白我嘅Blogger身份點解會離奇曝光啦, 咪就係皆因網上訂座囉!!! 因為我用Kenmerry戶口Login, 店方應該可以去到我Profile度睇返我寫過d咩食評... 唔怪得成晚都好似咁怪咁啦, 又帶我去睇VIP房又比私房菜Menu我睇, 仲放低部iPad走咗去, 好似唔驚我地偷咁, 仲要請我地食o野... 唔怪得人地成日話"屎坑橋"啦, 去到屎坑真係所有疑點即刻諗通晒, 嘩咔咔咔...

是次每人消費約 $380 元
味道: 3 環境: 3 服務: 4 衛生: 3 抵食: 2
###
地址 : 尖沙咀山林道17至19號山林中心3樓
電話 : 2302 0943

2013年2月20日 星期三

[著數活動] Koh Thai : 下一站,幸福

13 February 2013, Wednesday

較早前有幸在UFood著數活動的「UFood x Koh Thai 泰式情人品味」中勝出, 可以係大年初一至大年初四期間, 與摯愛一齊到Koh Thai享用「四道菜泰式情人節2人晚餐」(總值$660), 實在「泰」讚啦, 對Honey o黎講實在「泰」著數, 我倆都「泰」感動啦, 「泰」期待啦, 「泰」...「泰」...「泰」... (篇幅太長, 下刪一千字)

咳... 咳... 言歸正傳... 2月10日至2月13日, 到底揀邊晚好呢?!! 年初一就冇可能o架喇, 年初二同年初三又驚會臨時甩唔到身, 都係初四穩陣d, 順便當慶祝埋情人節, 反正我地近年都係提前一日慶祝, 唔使同人迫嘛, 正日就留返比熱戀中嘅情侶啦...

情人節食泰菜慶祝我地都係第一次, 心裡嘀嘀咕咕, 情人節理應甜甜蜜蜜, 泰菜辣到飛起嘅喎, 做情人節晚餐到底Work唔Work o架?!! 好, 等我帶大家去深入了解吓先...

位於灣仔的J Senses, 是以保育及修復一排四座的戰前唐樓而成, 包括當年享負盛名的和昌大押, 極富歷史色彩, 法式大窗及註有「和昌大押」和「香港余氏宗親會」之牌匾依然保存下來, 經翻新後成為潮流熱點, 各國美食雲集其中, 當中包括連續5年在米豬蓮摘星, 以古老的食譜加入特別的材料和烹調技巧做出Fusion中國菜的廚魔 (BO Innovation)...  

入口設於船街, 極具泰國風味... 施主, 怕行樓梯的話, 唔使擔心, 樓梯旁係有電梯可以直達餐廳嘅... 喃嘸阿隬陀彿...


電梯門外放置咗好多泰式擺設, 泰國風情濃厚... 佛像可以令人心境平和, 蠟燭可以令人放鬆心情, 讓人帶著輕鬆舒暢的心情去享用美食...


正面是酒吧區, 左邊係連接J Senses的通道...


右邊的露天用餐區環境優雅, 椰林樹影, 流水淙淙, 恍如置身Resort其中, 遠離煩囂...


Koh Thai集團行政總廚Ben Korsem是泰國人, 曾在泰國酒店Ayara Kamara Resort&Spa Resort出任行政總廚, 是夜有幸得到Ben親自主理以香料入饌, 芳香撲鼻的泰菜, 實在「泰」有口福啦~ 仲「泰」有眼福, 全賴有呢個開放式廚房, 可以用眼睛去品味Ben對食物的熱誠...


餐牌好多玫瑰花呀, 好靚靚呀!!! 到底「Koh Thai 泰式情人品味」晚餐有咩佳餚呢?!!


睇睇先...
< 前菜 > 鮮炸豬肉蝦餅串配泰式甜辣醬, 蛋包香炒鮮蝦鷄粒
< 湯品 > 椰青椰汁鷄湯
< 主菜 > 燒三文魚配紅咖哩汁及白飯, 泰式炭燒羊架配青檸汁及藏紅花飯
< 甜品 > 紅梅奶涷, 炸香蕉配椰子雪糕
< 餐酒 > 特色石榴汽酒

嘻嘻... 好豐富嘅呢... 開餐啦, 快d帶定口水肩先啦... 

特色石榴汽酒
-- 用餐前先來1杯餐前酒清新一下味蕾... Sparkling Wine泡沫濃郁, 口感細膩, 味道偏Dry, 入口順喉, 石榴汁味道酸酸甜甜, 果香中和酒精的濃度, 較適合女士飲用... 據講石榴週身都係寶, 石榴汁含有多種氨基酸及微量元素, 可幫助消化、抗胃潰瘍、軟化血管、降血脂和血糖及降低膽固醇, 有健胃提神、增強食欲、益壽延年的功效, 更可解酒...



置身J Senses呢個潮流熱點之中, 旁邊卻為歷史建築, 船街18號戰前唐樓, 新舊交融, 正係香港吸引人的地方...

鮮炸豬肉蝦餅串配泰式甜辣醬
-- 泰式炸蝦餅真係食得多, 未食過咁Kawaiiiiii嘅炸蝦餅嘅呢!!! 好似Donuts呀!!! 又好似Lollipops呀!!! 唔捨得食呀!!! 咬開炸蝦餅, 嘩, 好熱呀, d煙係咁標出o黎, 味道甘香, 鮮味多汁, 爽口彈牙, 唔使蘸泰式甜辣醬都好好味... 蘸咗泰式甜辣醬又係另一番滋味, 酸酸甜甜好開胃, 仲減低咗油膩感, Yummy~ 

蛋包香炒鮮蝦鷄粒
-- 精緻小巧的造型, 讓人怦然心動... 以蛋汁煎成的蛋網, 包著與大量香料同炒的鮮蝦及鷄粒, 香味濃烈, 鷄粒炒得乾身, 我覺得味道同口感都有少少似鹹魚鷄粒炒飯...

椰青椰汁鷄湯
-- 個湯我比10個讚!!! 從來食泰國菜個湯我都係冇份飲嘅, 因為冬蔭功太辣, 我頂唔順... 但係呢個椰青椰汁鷄湯, 除外表吸引之外, 內涵亦都十分之足夠!!! 廚師預先將椰肉起咗, 我可以輕輕鬆鬆, 好有儀態咁將大大片椰子肉排放入口, 好滿足呀!!! 平時要好似掘路工人咁掘呀掘, 掘呀掘, 真係有筍盤都嚇走, 哈哈... 而且加入咗椰汁, 令到個湯好清甜, 一d都唔辣, 仍然保持住冬蔭湯的香, 好好飲呀!!! 雞肉起晒皮, 食咗唔怕肥... 哈哈... 好壓韻...


冬蔭湯小檔案: -
冬蔭湯係泰國菜著名的湯品, 以南薑、酸子、香茅、青蔥、酸檸檬、辣椒和魚露烹煮而成的酸辣湯... 咁大家又知唔知, 冬蔭湯唔一定係冬蔭功呢?!! 
 
原來... Tom Yum Kung嘅Kung, 泰文係指蝦, 所以一般香港飲到嘅, 加入蝦同草菇做配料嘅, 就係冬蔭功... 如果加入雞肉做配料嘅, 就係Tom Yum Gai, 加入白魚做配料嘅, 就係Tom Yum Taleh, 加入椰子汁的, 就係Tom Yum Goong Je Nam Khon...

好, 講完估, 又到咗主角出場嘅時候啦~~~

燒三文魚配紅咖哩汁及白飯
-- 全晚最大的挑戰終於來了!!! 熟三文魚... 暈-ed... 畢生最唔願意食的食物之一, 但本著食家精神, 冇辦法, 都要食, 唯有大叫三聲「冒險王」!!! 壯膽後, 考驗要開始啦!!! 冒汗-ing... 一邊手震震用叉吉起d魚一邊放入口, 咦?!! OK喎!!! 唔腥喎!!! 唔通係因為d咖喱汁?!! 咖喱汁加咗椰汁, 香而不辣, 好好味呀, 送飯一流呀!!! 結果我KO晒全部三文魚, 勁!!! 比d掌聲自己先... 啪啪啪啪...


泰式炭燒羊架配青檸汁及藏紅花飯
-- 呢一刻... 我真正感受到... 咩叫幸福!!! 哦呵呵呵呵... 好幸福哦... 炭燒羊架好好味呀!!! 肉質柔軟, 肉地好厚但係受熱均勻, 輕徑咀嚼已經可以吞落肚, 泰式香料將羊膻味辟除咗, 羊肉獨有的香味得以昇華, 漿汁香甜惹味, 非常之有水準, 唔係誇張o架, 我同Honey好鐘意食羊架, 一放入口就知係咪好o野, 好羊者絕對唔會失望!!! 伴碟的心心相印藏紅花飯都好好味呀, 好香呀... 整體造型同味道都非常出色, I LOVE IT!!!


紅梅奶涷
-- 外表平實, 鮮紅梅果香馥郁, 紅梅果漿酸甜度剛好, 微酸微甜, 很合我口味... 奶涷我一向麻麻地, 但Koh Thai比坊間做的結實, 不及坊間做的幼滑, 但係反而啱我胃口... 呢個飯後甜品, OK吖...


炸香蕉配椰子雪糕
-- 炸香蕉外表好似炸過火了, 咬開又OK喎, 炸皮唔會太硬, 裡面熱辣辣的, 勁噴煙, 香蕉青澀味消除咗, 又香又軟, 好味!!! 椰子雪糕好香椰子味, 唔錯...


今晚一頓美味的晚餐, 消除咗我多年來對泰菜的誤解, 以為泰菜同浪漫二字大纜都扯唔埋, 好一個美麗的誤會!!! 我唔係太食得辣, 其實好多女士比我更加唔食得辣, 食親泰菜好多食物都會因為太辣而食唔到, 都幾掃興, Koh Thai做的泰菜非常之出色, 不會太辣, 但不失泰菜用上大量香料的傳統, 非常適合怕辣但又想食泰菜的朋友們... 

環境浪漫又舒適, 食物美味有質數, 我同Honey都好Enjoy今晚的晚餐, 離開時已經講好咗下次要再o黎...

是次每人消費約 N/A 元
味道: 4 環境: 4 服務: 4 衛生: 4 抵食: 5
###
地址 : 灣仔莊士敦道60號嘉薈軒1樓
電話 : 3160 8535