網頁清單

2013年1月28日 星期一

[著數活動] Cooking in Korean Style! 韓國菜烹飪班 @ Towngas Cooking Centre

6 January 2013, Sunday


廚盲好耐冇出動啦啦啦~ 今日又走出o黎四圍嚇人啦啦啦~


第一次去Towngas Cooking Centre ( 煤氣烹飪中心), 嘩, 真係好High Class喎, 又乾淨, 又光猛, 地方寬敞, 難怪咁多濶太鐘意去啦~


今日的老師... 狎鷗亭老闆兼大廚Chef Lee!!! 旁邊的是翻譯小姐...


時間緊迫, 一講完開場白, 【Cooking in Korean Style! 韓國菜烹飪班】正式開始!!! Chef Lee即刻就以超高速示範宮廷炒年糕...


三兩下手腳就搞掂...


到我地實習啦...


今日係我有生之年, 第一次用中式菜刀同生鐵鑊, 起初都有d唔適應, 用落又幾好用喎...

先切好所有材料, 醃一陣... 逐一落鑊炒吓炒吓, 原來好易做...


DaDa... Kenmerry x Karriech 宮廷炒年糕!!! 點啫?!! 係咪有板有眼先?!! 真係食得落肚o架, 我晚餐都係靠佢...


好, 跟住又到大廚示範海鮮煎餅, 佢初時想一次過示範2個菜色先比大家實習, 所有人都嚇到V嘩鬼叫, 佢先無奈示範完1個, 比大家實習完1個, 先再示範第2個...

睇完示範, 到我地開工啦... 又係先切好晒所有材料先...


落鑊煎好一面先... 但我地個餅太厚, 反唔到, 結果要走去搵大廚救命... 到佢來拯救時, 我地已經跌跌踫踫地反好了...


DaDa... Kenmerry x Karriech 海鮮煎餅!!! 大家都係第一次煎餅, Not Bad啦!!!


最後, 大廚要用好短時間示範涼拌豆芽, 因為已經Overrun晒...


雖然言語不通, 而且食譜的份量同步驟與示範有出入, 依然玩得好開心... 原來亂咁煮都煮到o架, 做人即時信心大增...

多謝有關單位餽贈的韓國食品書, 令我可以更深入了解韓國美食文化~

2013年1月23日 星期三

小甜谷 Xiao Tian Gu : 好彩冇專程入大坑

18 January 2013, Friday

食完「
牛角」
, 去厠所時路過小甜谷, KaKaMa又話要再食...

Self-service形式, 要自行去收銀處落單...


我地坐呢張大長木枱, 睇落唔錯, 其實係正厠所門口, 不斷有人係身後穿梭...


草莓石榴冰 $36
-- 草莓味偏淡, 石榴味偏重, 清香怡人, 微甜, 勁冰凍, 飲完由個心入面震出來...

日本柿貝燉雪梨 $36
-- 貓兄的甜品賣相好吸引呀...

大家仲食咗紅豆珍珠涼粉泡冰 $38, 杏汁雪耳燉木瓜 $36, 鮮芒椰果涼晶晶 $35... 唔通今朝太陽由西邊升起?!! KaKaMa居然食熱o野, 鑽媽居然食凍o野?!! 謎...

價錢唔平, 味道冇驚喜, Service近乎冇, 好彩冇專程入大坑朝聖...


是次每人消費約 $36 元
味道: 3 環境: 3 服務: 2 衛生: 3 抵食: 2
###

地址 : 尖沙咀海港城海運大廈LCX 3樓7E1號舖
電話 : 2736 8881

2013年1月22日 星期二

香宮 Shang Palace : 尋找美食中的世外桃源

1 January 2013, Tuesday
香格里拉 (Shangri-La) 一詞源於藏語, 意為「心中的日月」, 被喻為世外桃源...

新的一年, 新的開始... 我的2013, 第一樣要做的事, 仍然離唔開食食食, 嘩咔咔咔...

試過金鐘的夏宮, 未有任何驚喜, 見到求學時期的好朋友, 經常都到香宮開餐, 真係咁好味?!! 趁今日係1月1日, 來食餐開年飯.. 


餐廳內的裝潢金碧輝煌, 古色古香, 樓底特高, 枱與枱之間有一定距離, 置身其中, 舒適呷意...

甫坐下, 服務員送上Welcome Drink... 荔枝釭茶!!! 茶色紅褐, 香氣濃郁, 荔枝的香甜味充斥整個口腔, 茶味甘醇, 太美味啦!!! 可惜每人只有1小杯, 飲罷才醒起未有拍照, 唯有加一點綠茶到杯內, 補拍照片, 哈哈... 顏色是比較淺了一些...

擺放醬料的器皿亦精美過人...

茶芥中的小吃唔係花生, 而係腰果, 好重本... 酥香鬆化, 好味呀...

杯茶冇特別, 茶杯好特別...

蜜汁叉燒皇 $130
-- 甘香豐腴, 帶點焦香, 脂肪比例不高, 入口軟腍, Yummy!!! 可惜顏色有點奇怪, 太鮮紅...

燒鵝珍珠鹹水角 $48
-- 食唔出有燒鵝, 一隻平平無奇的鹹水角...

巴馬火腿煎腸粉 $50
-- 個名好嚇人, 煎腸粉都有巴馬火腿?!! 落單時超級期待, 入口即時謝晒... 根本2樣o野嘅味道就夾唔埋, 你有你, 我有我, 仲要2個都唔係話味道特出...

星洲炒蘿蔔糕 $60
-- 落蛋炒蘿蔔糕我第一次食, 又幾好味... 不過粉多蘿蔔少, 唔係"賣飛佛"...

帶子兔仔餃 $48
-- 個樣真係Cute到呢... 幾唔想食都好, 最後都要放落肚, 味道都唔錯, 帶子都幾鮮味...

黑椒和牛腸粉 $50
-- 好好味呀!!! 好彩有叫到啫!!! 好豪呀, 咁大片和牛係入面, 好有牛味呀, WoW...

阿拉斯加蟹肉芝士腐皮卷 $48
-- 個樣... 好唔得... 入口... 好得!!! 腐皮卷層皮脆到呢... 阿拉斯加蟹肉好新鮮, 蟹味香濃, 好正呀, Unexpected...

招牌合桃酥 $42
-- 嘻嘻... 個樣真係成粒合桃咁o架!!! Kawaii... 餡味唔太甜, 有提子乾, 外層酥化, Yummy!!!

香宮甜品三重奏 $60
-- 落單時好期待, 一見到果樣, 即時個心沉一沉, 幾粒生果, 1個細到無可再細的蛋撻, 加1杯慕斯, 咁就$60, 好唔抵呀!!!
環境6星級, 服務6星級, 食物賣相一流, 值得再來...

平時東亞白金卡有75折, 不過今日係1月1日, 不適用...

是次每人消費約 $140 元
味道: 4 環境: 5 服務: 5 衛生: 5 抵食: 4
###
地址 : 尖沙咀麼地道64號九龍香格里拉大酒店地下1層
電話 : 2733 8754

2013年1月21日 星期一

牛角日本燒肉專門店 Gyu-Kaku : Tips真係比唔落手

18 January 2013, Friday

食物要趁熱食, 寫食評原來都要趁熱寫... 1月1日去咗香宮食開年飯, 到今日都仲未寫, 已經唔係好記得d細節... 尋晚食咗1餐好經典的飯餐, 今朝一早起身早餐都未食, 就已經走去開電腦寫低, 驚隔2日又唔記得晒...
 
一月之星的生日會, 原本改咗去愉景新城Outback, 之前1日又戲劇性地可以改返去牛角, Yeah!!!

今日就利害囉, 我居然係金鐘地鐵站個超繁忙月台度等埋KaKaMa, 簡直係Mission Impossible吖~ 多人的程度係, 列車來到, 1個人都上唔到車, 勁~ 亦因為咁, 遲到咗幾分鐘, 影唔到Harbour City的「情.尋朱古力」之「皇帝的盛宴」朱古力藝術作品展... Oh No!!!

貓兄尋日打o黎Book位, 7:00pm入座, 8:45pm要交枱, 都幾趕頭趕命...


落地玻璃全海景, 正!!! KaKaMa話d位唔好坐, 坐另外半邊梳化位的3位女士激讚好舒服...


牆上面有幅牛牛解剖圖, 清楚列明每一種肉來自牛牛的邊個部位...


圖文並茂的日本燒肉方法... 仲有透明電話Zip-Zap膠袋仔供應, 比大家包住個手提電話...


牛角沙律
-- 材料新鮮, 味道清新, 係賣相差咗少少...


海鮮燒餅
-- 材料都幾豐富, 食到中蝦, 略嫌個皮唔夠香, 味道亦平平...


石鍋牛肋肉湯飯
-- 幾好味, 我鐘意佢d蛋圍邊熟, 都幾滑... 飯都好多, 好抵食... 牛肋肉好韌, 冇味...


野菜盛合
-- 燒粟米好味, 南瓜好甜, 洋蔥好香...


麻油燒蒜粒
-- 用錫紙盤裝住, 燒咗好耐, 夾起上面的蒜粒o黎食, 嘩!!!!!! 救命!!!!!! 激辛, 舌頭麻痺, 唔敢吞, 驚胃痛... 問題應該出係... 我冇撈吓佢, 所以浮面個d根本係100%生... 就燒耐d之後, 就幾好味啦, 好香好腍, 不過口氣強強強強強勁, 到第2日都仲好大陣味... 吸血彊屍都怕咗我!!!


厚切牛舌(鹽醬)
-- 牛吞我一向都唔太喜好, 只可以講, 幾有o趙頭...

特上和牛牛肋肉(燒肉汁)
-- 好好味呀, 肉質細嫩, 牛味香濃, 燒汁甜甜地, 一人分得一塊咋, 咁少, 我唔制呀!!!


腹胸肉(燒肉汁)
-- 都好好味, 肉質柔軟, 牛味香濃, 冇牛肋肉咁甜...


網燒一口牛(燒肉汁)
-- 哈哈, 掛住傾計, 燒到濃晒, 多咗一份焦香, 燒濃咗都唔韌, 不過切得好細粒, 試唔真d味...


香蔥辣油牛肋肉
-- 當然冇特上和牛牛肋肉咁正, 但都OK過得去, 我怕辣, 冇點香蔥辣油...


大腸(鹽醬)
-- o趙香水膠咁, 咬唔斷, 冇膻味, 都OK...


海鮮盛合
-- 我掛住傾計, 隻青口燒到乾晒, 味道尚可... 生蠔燒完縮到好細... 帶子味道冇特別... 魚柳大家食完冇Comment... 蝦又係比我燒乾晒, 燒到個殼同肉黏埋一齊分唔開...


豐富的畫面...


燒烤一定要配凍飲... 柚子梳打, Strawberry Makgeolli... 龍媽的什果酒最經典, 要自己榨鮮果汁, 哈哈, 謀殺咗唔少菲林...


白桃乳酸梳打
-- 清香甜美的白桃, 配乳酸同梳打, 味道好好, 酸酸甜甜的有汽凍飲, 正...


食完晒o野, 叫完甜品, 隔咗10分鐘都冇人執枱, 捉到唔願做小妹妹服務員, 叫佢比d餐具我地食甜品, 佢話等陣d甜品來到時, 自然會有人拎餐具o黎...

再等, 再叫...

再等, 再叫佢執枱, 勁唔願意執, 只係執咗我坐緊個4份1隻枱角, 竟然夠膽問"仲有咩要執?"... 唔係呀嘛?!! 你第一日返工呀?!! 仲要以前未出過街食飯呀?!! 我今次好叻, 冇發火, 好淡淡然咁手指指剩下4分3的垃圾堆, 答佢"全部!!!!!!"... 部分80後同人的溝通方式, 真係好冇禮貌, 佢自己唔覺得有問題, 我都已經麻木晒, 唔打算點醒佢地...

執好張枱之後, 甜品來了, 第3次叫服務員比餐具, 等咗10分鐘都冇人拎來, 好, 第4次叫, 疑似經理定Supervisor的男士終於搵人比碟仔&叉比我地, 其實個銅鑼燒入面d雪糕係室溫放咗咁耐, 已經溶咗, 教我如何欣賞它...

雪糕銅鑼燒 (抺茶)
-- 大家都覺得銅鑼燒好味過鯛魚燒, 關鍵係抺茶雪糕, 同個餅皮無關...

鯛魚燒 (吉士)
-- 我冇食, 吉士唔係我杯茶...
 
鯛魚燒 (紅豆)
-- 紅豆略乾, 紅豆味淡, 味道平平...
 
哈哈, 已經對錶先開始燒, 先燒鯛魚燒45秒, 再放銅鑼燒燒15秒, 反轉銅鑼燒已經裂開咗...

過咗交枱時間10分鐘, 都未有人來追交枱, 仲以為冇客等緊, 埋單走人時見到門口好多人等緊位...

DBS信用卡有優惠, 不過在座人士都冇...

埋單時考慮咗3秒, 決定唔比Tips, 因為佢地咁嘅服務質數, 我自問比唔落手...

味道平平, 服務趕客, Sorry, No Next Time...

是次每人消費約 $195 元
味道: 4 環境: 4 服務: 1 衛生: 3 抵食: 3
###
地址 : 尖沙咀廣東道17號海港城海運大廈3樓309R1號舖
電話 : 2153 1686