網頁清單

2012年8月8日 星期三

[博客活動] 星級食家飯局 の U Food x 富豪香港酒店「招牌‧海鮮極級自助晚​餐」

1 August 2012, Wednesday

今晚又有食神啦!!! 呵呵呵呵~ 有幸出席是次「招牌‧海鮮極級自助晚​餐」星級食家飯局, 要多謝U Food同富豪香港酒店嘅邀請!!!


去富豪香港酒店簡直係為我而設, 勁方便我, 搭幾個站地鐵, 出咗站行2個街口就到喇~

平時o黎富豪香港酒店, 多數都係食連續3年榮獲米芝蓮一星嘅「富豪金殿」, 食自助餐今次應該係第2次... 一出Lift第一眼見到嘅唔係間餐廳, 而係有音樂家為你現場演奏鋼琴, WoW... 好Surprise呀!!! 入到餐廳, 好光猛喎, 好似同以前唔同晒咁喎, 同埋點解好似大間咗咁嘅... 個天花好靚呀!!! 仲有不停轉換顏色嘅花樹都好靚好浪漫呀!!!




原先諗住早d去到, 可以去Buffet枱慢慢影吓d食物... 嘩, 點知6:30PM 已經勁多人啦!!! 唔想滋擾到其他食客拎食物, 所以我只好快快手影幾張就收手...

今晚嘅主題係「招牌‧海鮮極級自助晚​餐」, 咁呀緊係要影吓d海鮮啦~ 仲要試真d早幾日Honey為咗慶祝我成為星級食家而買嘅「專業級傻瓜機」--Sony Cyber-shot DSC-RX100, 嘻嘻!!! 鏡頭F-1.8大光圈, 1吋感光元件, Carl Zeiss鏡, 大家睇完d相係咪覺得好有大機Feel呢?!!

[主廚推介] 滋味焗蠔及帶子 -- 個樣好吸引喎, 仲放係鐵板上面保溫, 保證入口熱辣辣~


忌廉香草汁煮青口 -- 個樣靠得住喎, 留口水-ing...

鮮蝦配熱情果沙沙醬 -- 用雞尾酒杯盛載, 好貴氣喎, 唔知點解我腦入面不其然會奏起007嘅主題音樂, 哈哈~

法式馬卡龍 -- 超搶手嘅Macaroon, 影完張相都已經冇咗3分2!!! 唔係呀嘛?!! 唔得喇, 我唔可以再淨係排住影相喇, 我要爆(發食力)啦!!!
係咪好想知我今晚食咗d咩呢? 大家唔好咁心急住, 都等我講一講今晚個Tasting Menu先...

阿拉斯加蟹腳 Alaskan King Crab
龍蝦蟹子釀芒果 Lobster and Crab Roe Stuffed with Mango
鮮蝦配熱情果沙沙醬 Blue Prawn with Tropical Fruit Salsa
火焰壽司 Flaming Sushi
酥皮三文魚 Salmon Wrapped in Pastry
中東烤肉串 Shawarma
印度天多里烤肉 Indian Tandoori
即制梳乎厘 (多款口味) Freshly Made Souffle
朱古力火鍋 Chocolate Fondue
火焰雪山 Baked Alaska

好, 開動引擎, 「起錨」!!!

~ 第 1 Round ~

Macaroon!!! 吓?!! 一開始就食甜品?!! 唔係化?!!

冇錯, 連我自己都覺得有d奇怪, 不過冇計啦, 見有食家一個人拎十幾粒, 我再唔拎真係驚等陣一粒都冇得剩~ 朱古力味同綠茶味都好出, 好味, 如果個外皮再脆d咁就Very Good喇~

黑加侖子啫喱 -- 入面有什果, 用白朱古力條同木莓做裝飾, 仲用個靚靚玻璃碗裝住, 旁邊加咗奇異果汁圍邊, 好靚呀!!! 一個平民家庭出身嘅啫喱, 即時化身成為貴族!!! 黑加侖子啫喱味道好難走樣得去邊, 加上佢係我啫喱味之中嘅至愛, 我實覺得好食o架~

~ 第 2 Round ~

[主廚推介] 滋味焗帶子 -- 原個帶子連殼上, 廚師將佢放係鐵板下面個盤度保溫, 食落口仲暖o架, 賣相都OK, 醬汁味道都OK, 帶子都幾大隻, 如果肉質可以再鮮嫩d甜美d咁就Perfect喇!!!

忌廉香草汁煮青口 -- 個忌廉汁味道都唔錯, 青口都幾肥美...

炸魚伴薯條 -- 為慶祝倫敦奧運而加設嘅主題「味遊英倫 (A Taste of Britain)」, 於7月27日至8月12日期間供應多款精選英國菜, 包括煙肉焗生蠔... 初時見到一碟淨薯條, 覺得有d奇怪, 正在猶豫之際, 廚師捧出一大盤新鮮熱辣嘅炸魚... 哦... 原來係太受歡迎, 比人夾晒... 魚肉鮮甜多汁, 加咗香草嘅炸醬味道都幾好~

~ 第 3 Round ~

(前) 鮮蝦配熱情果沙沙醬 -- 鮮蝦開邊, 蝦肉爽脆, 熱情果味道清新, 炎炎夏日作為頭盤實在唔錯~
(後) 龍蝦蟹子釀芒果 -- 芒果微酸, 好醒胃, 龍蝦肉不多, 蟹子同青瓜絲有d日式Feel~

~ 第 4 Round ~

自選沙律 -- 材料新鮮, 選擇又多, 健康嘅好朋友, 多吃有益~

煙三文魚 -- 好搶手, 油份充足, 味道不錯~

~ 第 6 Round ~

[主廚推介] 阿拉斯加蟹腳 -- 好好味, 回本首選, 充滿海水嘅味道, 肉質略嫌唔夠幼嫩, 不過冇計, 係北海道食嘅冰鎮阿拉斯加蟹腳都係咁上下質數, 要鮮嫩幼滑就一定要即劏即食嘅先得~

冰鎮青口 -- 肥大肉厚, 味道不錯~

冰鎮藍貝青口 -- 好重海水味, 好正, 可以食一打~

睇吓, d阿拉斯加蟹腳幾咁啖啖肉... WoW... 爽呀~


翡翠螺 -- 查實我就唔食翡翠螺嘅, 不過見到入面有隻寄居蟹, 好Kawaii呀!!! 反正都唔食得落肚o架啦, 咁我拎佢返o黎, 都唔算浪費食物啫~


~ 第 5/7 Round ~

鵝肝多士 -- 見到有食家拎返o黎, 原來廚師開始煎緊, 想食就要排隊, 老友食家U0578出開去幫我拎埋, 唔該晒呀, Thank You!!! 第一碟鵝肝煎得香脆, 燒汁偏淡, 鵝肝味濃, 好正!!! 之後部長又拎比我地, 今次係黑醋汁, 黑醋汁味道偏酸, 掩蓋咗鵝肝嘅香味, 但係就抵消咗鵝肝嘅油膩感~ 回本之選!!!
~ 第 8 Round ~

[主廚推介] 中東烤肉串 -- 有驚喜!!! 一睇d菠蘿個樣就知好食!!! 燒完嘅菠蘿特別香甜味美~ 豬肉吸收咗菠蘿嘅果酸, 肉質變得柔軟, 而且調味適中, 香草味發揮得淋漓盡致, Ichiban!!!

酥皮三文魚 -- 廚師原個捧出o黎時, 果樣勁似一個巨型酥皮麵包, 切開一片片就見到三文魚, 廚師發現三文魚差少少先熟透, 就幫我係鐵板度辣一辣, Perfect~ 配埋香草白汁一齊食, 味道都幾好, 三文魚雖然煮熟咗, 但係肉質仍然保持鮮嫩, 完全冇腥味... 查實我好怕食熟嘅三文魚, 不過佢都整得唔錯~

~ 第 9 Round ~

即制梳乎厘 (多款口味) -- 部長好好人, 幫我地拎埋... 我地食呢個係檸檬味, 係好強勁嘅檸檬味, 原本d梳乎厘升得好高o架, 不過比我地影完又影, 玩到扁晒~ 玩完之後食都仲幾鬆軟, 口感唔錯~

~ 第 10 Round ~

火焰雪山 -- 全場焦點所在!!! 大廚專登走出o黎為大家點火!!! 大家見唔見到d藍光呀?!! 唔好噓啦, 好難影到o架, 火光一瞬即逝!!! 咁啱有食家過幾日生日, 大家為佢合唱生日歌, 壽星女仲切埋蛋糕, 都幾Sweet Sweet o架...

個海綿蛋糕入面包住雲呢拿雪糕, 外層鋪上以蛋白同砂糖打成嘅蛋白霜, 拉花後用火槍將蛋白霜表面烤焦, 再放入冰格冷凍, 好花功夫!!! 食次前淋上Rum酒, 點火, 等酒精燒盡之後, 就留有酒香焦糖, 超正!!!

~ 第 11 Round ~

印度烤魚 -- 今日冇印度天多里烤肉, 換咗做印度烤魚, 咖哩味好強勁, 係乾身咖哩, 都幾辣... 胡椒薄脆幾好味, 都係辣咗d...

火焰壽司 -- 表面輕輕灼熟嘅三文魚壽司, 味道都唔錯, 細細粒, 可以試多幾樣...

~ 第 12 Round ~

(前) 朱古力蛋糕 -- Brownie朱古力味濃, 食1件都飽晒...
(中) 木糠布丁 -- OK喎, 幾好味喎...
(後) 栗子布丁 -- 食唔出咩味, 除咗面頭d栗子蓉...

~ 第 13 Round ~

綠茶紅豆蛋糕 -- 綠茶味濃, 海綿蛋糕較為乾身, 紅豆Cream紅豆味可以再重d...

朱古力火鍋 -- 哦... 朱古力火鍋配料係泡芙?!! 雪米糍?!! 好特別喎!!! 以前好貪心, 食親朱古力火鍋都要100%浸滿朱古力, 後來發現醮少少先最好味~

~ 第 14 Round ~

雪糕 -- 足本HD雪糕, 有4隻味, 朱古力味同士多啤梨味係不二之選, 仲有多種配料, 我最鐘意杏仁片, 健康又美味~ 配埋甜美水果, 為今晚星級食家飯局畫上完美句號!!!

睇返相先知自己大戰咗14個回合, 好勁呀, 嘩咔咔咔!!! 我可以拎「非凡食力」獎啦, 實至名歸o架!!!

同枱有首次見面嘅食家, 問我同食家U0578係咪本身係朋友一齊o黎星級食家飯局, 當佢知道我地都只係識咗幾個月, 係星級試食會見過幾次面, 大表驚訝!!! 有時人夾人緣嘅, 我都覺得好奇妙, 只係見過幾次面, 就已經好似識咗幾十年咁... 或者... 呢d就叫做緣份啦!!! 成為U Food會員之後, 除咗可以有著數飲飲食食之外, 仲可以向各位食家前輩偷師, , 最意外係可以認識到志同道合嘅好朋友先係最大收穫!!! 咁你地仲等咩呀?!! 快d加入成為U Food會員啦!!!

最後, 再次感謝U Food同埋富豪香港酒店嘅邀請及款待!!!

是次每人消費約 N/A 元 (價值$408/位)
味道: 3 環境: 4 服務: 4 衛生: 4 抵食: 3
###
地址 : 銅鑼灣怡和街88號富豪香港酒店1樓
電話 : 2837 1772

1 則留言:

  1. HIHI~~我係STAGE兜呀,果間都有係試食會架~~
    [版主回覆08/08/2012 22:37:48]歡迎光臨!!! 我記得呀!!! 希望下次有機會傾吓計啦~~

    我剛成立了Facebook專頁, 請幫忙Like一Like吖~~
    http://www.facebook.com/ken.n.merry

    回覆刪除