網頁清單

2012年6月7日 星期四

燒肉牛蔵 Yakiniku Gyukura

25 May 2012, Friday

今晚「為食五人幫」為KaKaMa賀壽, 終於由四人幫變返五人幫喇~ 鑽媽唔知係咪收監太耐, 居然一早就到咗!!! 人地Book 7:30pm, 佢6:50pm未夠已經到咗?!! 自己驚遲到走去Book 7:30pm嘅KaKaMa居然6:55pm都到埋?!! 搞到我地7:30pm準時到達嘅好似大遲到咁, 慘~

正所謂「越遲越見鬼」!!! 門口帶位嘅女服務員居然話冇我地Booking, 仲耍我地去同一集團隔幾個鋪位嘅「牛陣」~ 我地轉身企係門口Check返Whatsapp嘅Record, 明明係呢間, 再拎返轉頭, 嘩!!! 點解帶位度排晒長龍o架!!! 唔理得咁多喇, 如果再排過, 以佢頭先嘅速度, 起碼要等多10分鐘!!! 我走埋去排第一嘅女士身邊同佢講"唔好意思, 我地頭先排過o架"!!! 佢喵一喵我, 冇出聲, 即係比我打尖啦, 好彩啫!!! 今次輪到經理出o黎帶位, 我投訴佢女同事頭先亂點我地話冇Booking, 經理問我地Booking用咩電話, 講完即刻Check到, 頭先個女職員真係離晒譜...

未坐低, 已經見到好大客海膽放咗係枱面... KaKaMa好強調讚媽今晚好豪, 380蚊1客海膽都叫, 380蚊1客海膽喎... (Repeat咗好多次, 哈哈哈)

我話380蚊1客海膽有幾豪啫, 係要豪嘅, 就開支Sake添啦!!! 鑽媽竟然讚同... 佢真係收監收得太耐, 哈哈哈~ 頭先KaKaMa先投訴鑽媽唔比佢叫o野飲, 而家開Sake又話好?!! 咩道理呀?!! 最後我地都係Order飲品, 冇開Sake, 因為大家都唔係好酒之徒~

北海道海膽刺身--好欣賞佢個Presentation, 紫菜垂直插係個壺仔度, 仲用白蘿蔔批咗個風車出o黎, 好有創意, 仲好靚!!! 個個都讚d海膽新鮮, 貓兄慫恿我搵粒最細嘅試吓... 的確係一d都唔腥, 不過有D苦, 嗯, 唔鐘意!!! 即刻飲茶沖走d味~

貓兄即時提起上次係築地市場, 我用海膽壽司換佢舊甜蛋壽司, 佢勁抵!!! 不過我都覺得自己好抵, 因為我鐘意食甜蛋, 哈哈哈...
KaKaMa份人好鬼均真, 居然話使唔使分開計數, 唔使我夾海膽錢... 唏!!! 咪鬼咁肉酸啦, 大家出得o黎食飯, 緊係跟人頭計o架啦, 邊有可能計得咁足喎~
好記得十幾年前出差, 人生路不熟, 係品川叫咗客5000Yen得8粒嘅壽司盛合, 我挑走d海膽, 剩係食粒白飯同紫菜, 睇到坐隔離嘅日本人眼都突埋, 拍吓我手臂問我"Are you come from Hong Kong???", 哈哈哈... 咁唔識食, 唔知咁樣算唔算係影衰香港人呢?!!

櫻花蝦豆腐--埋單見到前菜要12蚊1位?!! 嘩!!! 乜而家食日本菜都要收茶芥?!! 櫻花蝦冇味, 豆腐都OK滑嘅~


未坐低KaKaMa已經講要Order呢個承為$1388嘅「南之夢4人餐」!!! 4人餐... 夠唔夠食呀?!!

(餐) 大盛三文魚刺身 -- 好新鮮, 脂肪分佈均勻, 都幾正~




(餐) 海膽壽司 --冇再試, 唔知咩味~


(餐) 炸蝦天婦羅 -- 冇乜油, 炸得幾脆, 唔錯~


(餐) 牛油焗雜菌 -- 原包放係爐上燒, 等個包裝燒到脹Pop Pop就食得, 所有精華都鎖晒係入面~



食物都未o黎齊, 大家已經瘋狂地話要加單!!! 原本想加多一個7折咗都$516嘅「究極九州佐賀牛七式拼盆」, 落Order時服務員話我地個燒肉盛合都未o黎, 驚我地食唔晒, 叫我地食完先再Order啦!!! 我當時仲大佢話一定食得晒, 不過見佢咁老實, 就照佢意思做啦, 哈哈哈~

荔枝梳打, 荔枝乳酪梳打, 白桃乳酪梳打, 巨峰乳酪梳打 -- 一開始燒o野食, 就會好想飲凍飲!!! 巨峰乳酪梳打好好飲呀!!! 巨峰味濃, 乳酪嘅中和咗巨峰甜味, 再加埋梳打嘅氣泡, 飲完嘔埋啖氣, 爽爆~


(餐) 燒肉盛合 -- Order咗1個鐘先o黎, 好彩我地鬼咁多八卦o野要講, 都唔記得咗呢碟o野~ 反而係服務員不停提我地"好快到, 整緊o架啦", 我地都冇催過佢~

(左起) 香草羊扒, 厚切牛舌, 佐賀牛柳, 日本岩鹽牛肋骨, 櫻花赤豚肉, 美國西冷...
香草羊扒 -- 如果人生只可以食一種肉, 我會揀羊!!! 服務員一放低隻碟, 我已經用閃電手搶閘夾咗1件羊扒... 件羊扒咁厚肉, 要燒耐d嘛, 緊係要快, 哈哈哈哈~ 燒咗好耐, 依然肉嫩, 香草味不足, 加少少青檸汁, 好正!!!
厚切牛舌 -- 牛舌我一向避之則吉, 不過佢呢度好好味, 肉好嫩, 好正~
佐賀牛柳 -- 牛肉味濃, 脂肪分佈又平均, 入口香嫩, 點埋日式燒汁, 正到暈, d牛肉汁仲係個口入面週圍走~
日本岩鹽牛肋骨 -- 牛肋骨好勁牛味呀!!! 牛有牛味, 哈哈哈~ 肉質軟腍, 燒完都仲好Juicy, 好好味, 讚讚讚~
櫻花赤豚肉 -- 見到五層腩佈滿肥肉已經驚一驚!!! 一放入口, 一d都唔肥喎, 仲好香豬味, 肉又嫩, 好好味喎, 真係豬不可以貌相~
美國西冷 -- 相對比較失色, 但係都好味~



(餐) 宮崎雞腿肉, 味噌豚肉腸 -- 雞肉香草味超濃, 肉質鮮嫩, 正!!! 平生未食過豬大腸, 冇打算食, 但鑽媽不停勁讚, 其他人都勁認同, 令我忍唔住想試吓... 一試... 嘩!!! 好好味喎!!! 完全冇臭味, 好爽好脆好彈牙, 有一種獨特嘅香味, 同我心目中嘅嗱喳麵成員完全唔同, 勁有驚喜~


(餐) 迷你芝士蕃茄鴨胸烏冬 -- 好強勁嘅蕃茄味, 湯底係好好味, 不過同烏冬唔夾, 如果配米線會更Perfect~


終於KO晒「南之夢4人餐」, 都飽飽地, 不過仲可以食得落, 哈哈哈~ 好, 咁高興, 唔好比佢停, 再Order!!!

黑鮪大拖羅手卷 -- 原本大家只Order中拖羅, 驚大拖羅太肥美好難哽, 但係服務員極力推銷, 咁大家就Order咗3件大拖羅... 鑽媽食後感係... 大拖羅都唔夠肥...


香芒軟殼蟹卷 -- 我想食雪場蟹腿手卷o架, 不過冇晒雪場蟹, 我唔制呀!!! 改為Order呢個香芒軟殼蟹卷, 芒果好香甜, 軟殼蟹好硬, 同埋有d苦, 麻麻地~


(餐) 日本雪糕 -- 我地問服務員有咩卡有Discount, 服務員話"廣發", 咩o黎o架?!! 原來係大陸銀行, 唓... 最後服務員好好人, 送多1個雪糕比我地(4人餐得4個雪糕, 我地有5個人)!!! 豆腐味雪糕好正, 好香豆腐味, 唔太甜, 口感近似雪芭~ 用木桶仔上, 勁Kawaii~

吹水期間, 唔知點解搭錯線, 鑽媽以為服務員答嘴... 貓兄笑笑口叫服務員一齊傾囉~ 服務員話"做緊o野, 唔得, 男人坐埋都係講女人, 女人坐埋講得咁開心就緊係講緊男人啦"~ 我即刻更正佢"你錯啦!!! 女人講女人(是非)先最開心, 你真係唔了解女人!!!"~

食完都10點喇, 我地隔離左右都走晒, 都係時候鬆人, 雖然唔想走...

是次每人消費約 505元
味道: 4 環境: 4 服務: 4 衛生: 4 抵食: 3
###
地址 : 尖沙咀彌敦道63號iSQUARE 國際廣場7樓701號舖
電話 : 2628 0993

3 則留言:

  1. 當晚好開心,難得你鑽媽出現帶來驚喜啊!
    [版主回覆06/20/2012 19:29:44]YES!!! 真係LONG TIME NO SEE 鑽媽~

    回覆刪除
  2. 日本雪糕個款好有特色!!>V<
    [版主回覆06/25/2012 00:10:15] Yes!!! 個雪糕即時升Lev 10倍~

    回覆刪除
  3. 哇, 碟海膽刺生好吸引呀...d 和牛都好正
    [版主回覆06/27/2012 21:41:14]和牛的確好正!!!

    回覆刪除