網頁清單

2012年4月13日 星期五

星巴克咖啡「冰室角落」 Starbucks Coffee 「Bing Sutt Corner」

6 April 2012, Friday

KO咗懷舊之路第一站「蓮香樓」之後, 隨即展開懷舊之路第二站--「星巴克咖啡 冰室角落」!!!

Starbucks Coffee美國o野o黎喎... 點懷舊法呀?!!

如果你咁唸就大錯特錯喇!!! 呢間Starbucks係全球首間設有冰室角落嘅星巴克咖啡, 開咗差不多3年, 仲要開係都爹利街(Duddell Street), 門口開正係被政府列為法定古蹟果4支碩果僅存嘅煤氣燈同埋花崗石樓梯側邊, 未入去就已經夠晒懷舊啦...


咖啡室入面分咗2個區域, 1個係現代化嘅, 而另1個就係「冰室角落」!!!


「冰室角落」係同G.O.D. Crossover搞出o黎, 真係每一個角落都充斥住好濃厚嘅50-60年代冰室風味...


座無虛席, 要守候一陣先有位...


呢種日曆細個時家家戶戶都緊有一個看門口, 都好耐冇再見過lu, 好懷念呀~


以前細個d電制真係咁o架!!! 好耐冇見過啦!!! 好有親切感呀!!!


雖然頭先係「蓮香樓」已經食滯咗, 之但係一場o黎到, 點都要Order吓佢個「冰室經典美食 Bing Sutt Classics」先至算係有o黎過嘛!!! 不過實在太飽, 影完一輪相, 最終都要問職員拎個紙盒打包走, 拎到返屋企當晚飯食~

咖啡蛋撻 Coffee Egg Tart -- 個撻皮淋嘅... 咦... 好唔習慣... 味道係濃郁嘅Mocha味, 如果酥脆d會好d囉...
紅豆砵仔糕 Red Bean Clay Pot Pudding -- 嘩... 陣味好怪... 唔慣...
厚切牛油菠蘿包 Rustic Bun w/ Thick Cut Butter -- 了走咗片牛油先食, 冇咩特別...
 
朱古力咖啡 Caffe Mocha -- 本人係Mocha嘅死實Fans, Grande Size都嫌太細杯!!!
榛子咖啡卷 Hazelnut & Coffee Roll -- 最好味嘅「冰室經典美食 Bing Sutt Classics」!!! 不過... 乜我地細個時d冰室有呢d咁西式嘅o野食嘅咩?!!
 
好鐘意地下d綠色磚仔, 影咗好多Close-up, 可以用係我個迷你燒爉店, 呵呵~
 
Hea吓Hea吓, 咁又Hea咗一個悠閒嘅下午喇~

是次每人消費約$40元
味道: 2 環境: 5 服務: 4 衛生: 4 抵食: 4
###
地址 : 中環都爹利街13號樂成行地庫中層
電話 : 2523 5685

2012年4月12日 星期四

蓮香樓 Lin Heung Tea House

6 April 2012, Friday

復活節長假第1日, Honey話帶我去嘆吓大班樓嘅行政午餐, 可惜個電話成朝一直都冇人聽, 唯有坐車去咗上環先睇吓點算... 11點半過d再打去終於有人聽, 不過原來今日冇行政午餐食, 要跟餐牌叫小菜... 計落唔抵喎, 散叫小菜仲貴過夜晚食套餐, 最後決定留番下次先再去...

好彩, 我地仲有Contingency Plan... 懷舊之路!!!

懷舊之路第一站... DaDaDaDa... 蓮香樓!!!


我同Honey第1次o黎, 我都估應該冇得Book位, 但我自己幻想應該係o係門口排隊輪侯入座, 真係萬萬想唔到, 竟然... 要好似吊靴鬼咁, 楝係人地身後面, 用餓鬼嘅眼神望住d食客, 渴望人地快d食完快d走快d比個位我... OMG!!! 我接受唔到囉)))


小學果時, 試過等足1個鐘先等到2個位, 我已經係貼實2張櫈嘅正後方, 正想坐低, 點知比個C9二話不說極速"得"咗落去, 同個C9理論, 佢裝聾作啞, 望都唔望你, 簡直欲哭無淚... 所以自從出現咗派籌嘅茶樓, 我都唔想再去呢D要自己搵位嘅茶樓...

3歲定80, 可憐我今日Mark果2張枱, d食客都自稱仲有人o黎緊, 有排都唔會走, 叫我唔好再等, 等唔到o架啦... (第2張到我食完都唔見佢有人o黎囉, 仲要比2個金髮少女塞咗落去, Honey話可能佢地同外國人溝通唔到, 所以比人夾硬坐咗落去喎)

都係Honey叻仔, 等咗好耐終於比佢等到半張4人枱!!! 同枱係年輕情侶遊客...
開茶時侍應好醒目咁比咗茶盅我地, 同枱嘅遊客係用茶壺... 究竟... 佢點睇得出我地係想要茶盅嘅呢?!!

久違嘅點心車不停係場內穿插...


鳳爪--外貌有少少令人敬而遠之, 考慮良久, 鼓起勇氣夾起放入口, 味道比較清淡...
蒸蘿蔔糕--味道都OK, 不過蘿蔔唔多, 粉就好多...

鴨腿湯飯--招牌菜, 好大隻鴨脾, 個西洋菜湯底都唔錯, 係鹹咗少少, 碗飯超大碗, 38蚊實在超值...

馬拉糕--招牌菜, Honey食咗一啖就讚話得, 好似細個時食果d味道同口感... 我又試吓先... 嗯... 又真係幾鬆嘅...

蓮蓉包--招牌菜, Honey全程已經不停出去巡d點心車, 都搶唔到!!! 結果要等足1個鐘先有得食!!! 蓮蓉的確又滑又香, 個蛋黃都夠油, 唔錯, 係個包就實咗少少...
我地坐果張古董枱, 每次有人擦身而過都搖到好似地震咁, 個男遊客同我都忍唔住用雙手扶實張枱, 驚佢冧!!!

論價錢的確好抵, 冇加一, 1個湯飯+4個點心都唔使120蚊, 係中上環區都冇咩可能搵到平過佢o架啦...

侍應阿叔都好有禮貌, 好勤快, 好過好多後生仔...

衛生環境欠佳, 到處都濕淋淋, 侍應抺枱果塊白布先恐怖, 深黃色o架!!! 嘔...

都唔明, 點解仲要向外國遊客推廣呢間餐廳, 我真係好驚d外國人誤會我地香港到處都係咁Dirty囉, 平時又食埋d咁嘅質數嘅食物囉... 大家自己本土人懷緬吓過去就冇咩所謂啫...

食完呢餐, 我唸起廉署近期個廣告, 人人都討論緊「舊時咩都好」果個呢... 如果而家間間餐廳都要咁等位法, 我地真係冇命, 一定唔夠人爭, 點心又唔夠人地搶... 所以話, 那些年, 回憶總是美好的!!!

是次每人消費約$60元
味道: 2 環境: 1 服務: 2 衛生: 1 抵食: 5
###
地址 : 中環威靈頓街160-164號
電話 : 2544 4556

2012年4月11日 星期三

全互動機械人大博覽 Robots in Motion

3 April 2012, Tuesday
嘩嘩嘩!!! 個機械人唱緊歌呀!!! 個頭同個身同對手都識郁o架!!! 好利害呀!!! d皮膚同頭髮仲好靚添呀!!!


### 全互動機械人大博覽 ###

世界級機械人來自日本、韓國、中國、台灣和丹麥與您互動。展期內每日為您示範跳舞、踢足球、耍功夫、彈琴、賽跑、行迷宮等技能,令您大開眼界!此外,機械「美人」Geminoid F更首度訪港。

地點﹕2樓中庭及中橋
日期﹕3月29日至4月15日
網址﹕http://www.cityplaza.com/NR/rdonlyres/DA285655-98D4-41E3-B058-CF9BB4A8701D/24975/edm.jpg

2012年4月10日 星期二

富聲魚翅海鮮酒家 Fu Sing Shark Fin Seafood Restaurant

31 March 2012, Saturday

今日抽起條筋同Honey專程去銅鑼灣「富聲」一試馳名嘅雞粒酥...


前菜--大頭菜+豆腐粒, 都幾特別, 不過鹹咗d...

富聲叉燒--招牌菜, 都幾好味, 不過硬咗少少, 始終都係西苑最好...

富聲馬拉糕--都幾好味, 夠晒鬆...

合桃燒雞酥--原來冇鮑魚o架!!! 不過都好香脆, Honey好鐘意食...

煎釀百花蘿蔔糕--嘩... 咁燶咁嘅... 係軟綿綿嘅蘿蔔糕上面鋪一層彈牙嘅蝦膠, 再用麵包屑包住o黎煎, 第1件好好味, 好香好脆好彈牙, 之但係第2件就... 好油!!! 成口油, d龍井茶仲稀過水, 飲完都係成口油, 好辛苦先可以食得完...

敬送糖水--Honey話薑汁湯丸好好味, 飲完個胃好舒服... 楊枝甘露好足料又夠凍, 好得...
 
原本覺得質數都不至於令到朋友熱烈推介再推介, 不過埋單時發現個價錢都唔係太貴, 又覺得以咁嘅價錢計, d食物又OK喎~

不過d位好迫, d枱擺到迫到你唔信, 如果想坐得舒服嘅, 都係去「」同埋「君綽軒」好d...

Service就見人見至... d黑衫全程招呼實d富豪, 眼尾都冇望過我地... 對d富豪o黎講, d服務咪好囉... 對我地o黎講, d服務咪一般囉...

是次每人消費約$135元
味道: 3 環境: 3 服務: 3 衛生: 3 抵食: 3
###
地址 : 銅鑼灣怡和街68號1樓
電話 : 2504 4228

2012年4月5日 星期四

PizzaExpress

30 March 2012, Friday

貓兄吹雞開餐, 為食四人幫(已經由5人變成4人)定必二話不說飛身撲出啦!!! 呵呵... 今次鎖定嘅目標係... 龍媽未食過嘅PizzaExpress...

貓兄事前係某開飯網站試吓網上訂位功能, 見到呢晚餐廳Full咗, 大家正煩惱緊轉去邊樹食之際, 我死唔信邪咁打去餐廳試吓Book位... Oh... 比我Book到喎!!! 不過Book 7:15pm就要8:45pm還枱, 得個半鐘真係唔多夠喉!!! 想轉地步但又懶... 算啦, 食咗先, 到時再轉場食甜品囉...

因為要好早還枱比人, 所以我特別提醒大家要準時到, 攪到大家都好大壓力... 嘩咔咔咔...

幾年前同KaKaMa同貓兄食過亞士厘道分店, 印象好差, 又嘈又迫又唔好味... 海運呢間分店開咗半年鬆d, 間鋪大好多d位又多好多, 仲可以一邊食飯一邊欣賞維港夜景, 咁仲使唸嘅, 緊係過o黎海運呢邊食啦!!!


龍媽未到, 我地好抵死咁不定Whatsapp佢, 將揀o野食嘅討論全部放上Whatsapp, 最尾一句係"你可以揀自己杯o野食", 嘩咔咔咔...

討論期間, 我口快快咁話叫個6人餐, 不過比大家Band咗... 查實我係有先見之明, 知大家叫4人餐食唔飽, 結果真係... 大家都話未試過食完咁多o野, 竟然仲咁唔飽...

Dinner for Four有2款頭盤*+1款沙律+1款薄餅+1款意粉+甜品拼盤1客+飲品4杯, 咁多o野先HK$458, 其實都算好抵食!!!

Ginger Ale--凍檸茶係Unlimited Refill, 不過大家今晚一反常態, 4個一齊揀Ginger Ale, 加檸檬同冰一齊飲, 好飲過咩都唔加... KaKaMa第一次飲, 佢以為係薑汁湯丸果種薑水, 好好笑...

焗麵包球--必吃!!! 而且要趁剛出爐仲熱辣辣時吃!!! 浸個包入去我最愛嘅Genovese香草汁, 百吃不嫌!!!

焗蘑菇--都唔明, 餐牌明明寫焗蘑菇, 點解會有一半係焗麵包球嘅呢?!! 大家一致認為呢個焗蘑菇好味~


意大利火腿沙律--嘩!!! 又有焗麵包?!! 仲咁大舊?!! 齋食麵包都食飽啦!!! 沙律好新鮮, 配料又豐富, 好好味!!!


山羊芝士薄餅--有我最愛嘅山羊芝士, 好味!!! 乾蕃茄都好好味!!! 不過龍媽就覺得好膻, 難為佢喇...

意大利香草意粉--全晚最好味!!! 不過份量細咗d, 一個人食都嫌唔夠喉... 唔明點解龍媽又覺得好膻, 個醬汁剩係得羅勒葉同Parmesan芝士咋喎...


甜品拼盤--朱古力蛋糕最正, 香濃嘅朱古力味... 芝士蛋糕唔係我杯茶, 但係都OK好食...  Tiramisu好得, 夠重酒味!!!


VIP房內有自制Pizza活動, 我地食完佢地先啱啱整起拎去焗, 肯定已經好肚餓喇...


環境同Service都好好, 食物質數又高, 呢個價錢簡直係超值!!! 唯一美中不足係要早交枱...

是次每人消費約$125元
味道: 4 環境: 4 服務: 4 衛生: 4 抵食: 4
###
地址 : 尖沙咀廣東道17號海港城海運大廈地下OT G53號鋪
電話 : 2376 1182

2012年4月3日 星期二

譚魚頭, 我唔係豬頭!!!

18 March 2012, Sunday

一個月前初會「譚魚頭」, 對佢讚不絕口!!! 可惜, 此情不再!!!

話說, 較早前收到通函郵寄, 去譚魚頭食o野有9折!!! 當時冇為意"正價食品"呢4隻字, 不過呢個都唔係最重點...


干煸湯丸--落單半個鐘先有得食!!! 黑芝麻湯圓, 伴埋D辣椒蔥粒肉鬆一齊炒, 好惹味, 叫碗白飯撈D辣椒蔥粒肉鬆一齊食仲正!!!


拔絲咕嚕肉--等多半個鐘先出第2道菜, 已經冇心情影相!!! 碟餸一上枱, 只係用目測都已經覺得唔同咗, 2月尾食時係睇得出咕嚕汁d拔絲, 今次只係一Pat糊!!! 一放入口, 嘩, 喪酸, 同之前嘅酸甜適中差天共地!!! 仲要大部分都係肥豬肉, 有2舊仲係純炸粉漿, 好辛苦咁食咗半碟, 已經唔想再食!!!

埋單走人!!!

平時唔多睇單嘅我, 住睇吓係咪比咗9折, 點知... 點菜總數係$214, 折扣唔係$21.4, 竟然係$11!!! 真係點睇都唔知果$11點計出o黎, 問吓個黑衫, 佢唔知係怕我嘈到其他客聽到, 定係趕住比第2枱客入o黎, 所以隊咗我出去收銀處~

去到收銀處, 另一個黑衫竟然要用計數機逐個Item乘0.9睇吓係幾錢~

我心 : 唔係呀?! 咁都要用計數機?! 9折已經係最易計, 你只要將個小數點向左推1格咪係囉!!!

結果佢計咗好耐, 都係計到折扣係$21.4~ 但我問咁點解得$11折扣, 佢就Hea答話8大名菜冇折, 茶芥白飯全部冇折!!!

: 嘩!!! 唔係呀嘛?! 落單時都冇人講過!!! 我地2碟都係8大名菜, 張9折劵咪等同垃圾!!!

但係奇就奇在, 咁個$11折扣又點o黎?!! 我地食果2個都係8大名菜, 如果根據黑衫嘅講法, 我地嘅折扣應該係$0!!! 問極個黑衫都答唔到!!! 查實如果你係冇折扣, 我比埋個$11冇問題, 我只係要個公平公正公開嘅答案, 得個知字, 下次再食果陣可以提防吓, 我唔係要拎你著數!!!

之後收銀又話特價菜冇折, 但係明明枱面張宣傳單張根本冇講過8大名菜係特價!!! (大家可以睇睇, 右上角係拔絲咕嚕肉, 右下角係干煸湯丸)


黑衫最後以為自己好豪, 話比夠88折我!!! 已經好過9折!!!

我聽到呢度已經對佢好失望!!! 其實我係一直都冇嘈過, 只係重複問佢條數點計出o黎, 佢都答唔到, 一味講埋d錯嘅答案!!! 我腦海就只係重複咁"到底你有冇學過加減乘除o架?!!"

我最後放棄喇!!! 無謂浪費自己嘅寶貴時間教識佢咩叫加減乘除, 我當時腦海就只係, 我就當豪果$8比你, 我一定要拎張單走, 公諸於世, 等各位Blog友自行判斷!!! 以免各位Blog友睇咗之前我勁讚「譚魚頭」果篇Blog, 去到食就變咗另一件事, 誤會我係打手寫鱔稿!!!

呢張係改咗做88折嘅單!!!


我返到屋企用試算表模擬咗d折扣嘅計算, 終於比我搵到最初果$11折扣係點o黎o架啦!!! 原來係咕嚕肉同白飯先有折!!! 我就係要呢個答案之嘛!!! 如果當時個黑衫解釋得到, 我使鬼佢豪果2個Percent Discount比我呀!!!




個黑衫當時好強調話8大名菜冇折, 茶芥白飯全部冇折!!! 咁拔絲咕嚕肉又係8大名菜, 干煸湯丸又係8大名菜, 點解拔絲咕嚕肉有折, 但係干煸湯丸就冇折?!!

如果根據收銀所講, 特價菜冇折, 咁點解枱面張宣傳單張, 拔絲咕嚕肉同干煸湯丸嘅價錢標示格式係一樣, 完全冇提過特價2個字, 點解1碟係特價而另1碟又唔係特價呢?!!

搞埋d咁混亂嘅Promotion, 如果比幾多折扣係黑衫嘅個人喜好, 鐘意比幾多折扣就比幾多, 激到d客以後都唔想再幫襯的話, 咁呢d Promotion就真係唔攪好過攪囉~ 

總結 : 出菜速度奇慢無比(25-30分鐘先上1碟菜), 食物味道大不如前, 價錢拍得住西苑, 折扣計算混亂... 等於短時間內唔會再幫襯!!! 幾時再幫襯? 咁就要睇吓我道氣要幾耐先下得到喇!!!

是次每人消費約$110元
味道: 2 環境: 3 服務: 1 衛生: 2 抵食: 3
###
地址 : 太古康山道1號康怡廣場3樓
電話 : 2870 0238