網頁清單

2012年2月22日 星期三

譚魚頭火鍋 Tanyoto Hotpot

19 February 2012, Sunday

又係太古之友飯局~ 原定去北京樓, 不過FULL咗... 跟手住去西苑, FULL埋... 個市有冇咁旺呀?!! 無奈之下, 轉去康怡廣場新開咗一排嘅「譚魚頭」, 之前試過幾間新開嘅餐廳都唔多掂, 所以今次都有D擔心...

朋友BOOK咗6位, 但係臨時有D事要遲D到, 叫我早D去拎枱... 去到先發現, 居然比間8人房我地?!! 有D驚... 即刻問帶位嘅職員有冇MINIMUM CHARGE, 不過佢冇答我...

個個o黎到見到係房都覺得又驚又喜, 喜係覺得傾計一流, 驚係唔知有冇MINIMUM CHARGE, 個個都話等陣問下, 點知落晒單食晒o野都冇人記得問!!! 最後... 好彩... 係冇嘅!!! 5個人食咗700蚊啫... 不過都幾貴, 價錢拍得住西苑...

原本以為川菜一定好辣, 不過餐牌都有好多唔辣嘅餸可以揀...

拔絲無骨咕嚕肉--剩係睇個名已經好好奇, 上菜時一睇, 嘩, 個樣好得喎!!! 味道一樣好得!!! 拔絲脆脆地, 咕嚕肉酸甜適中, 伴碟嘅蜜桃都好好味, 呢個餸真係好得!!! 可以列入拉姑推介系列!!! (於18/03/2012再次品嚐, 已經完全唔係果回事!!! 拔絲不再, 咕嚕粉漿多過肉, 個咕嚕醬仲喪酸!!!) 


鹹蛋黃大蝦球--鹹蛋黃炸漿好惹味, 炸漿都好脆, 唔係太油, 大蝦球都幾爽口, 如果想濃味D, 可以點下碟底嘅鹹蛋黃漿(比D蝦球遮住咗), 好有心思...

樟茶鴨(半隻)--味道都唔錯, 皮都好脆, 不過好似D肉少D, 唔係啖啖肉果種...


上素粗齋--OK喎, 蔬菜款式多, 味道濃淡適中, 同埋唔太油...


薑汁酒炒芥蘭--嘩, D薑好大粒喎!!! 芥蘭頭批咗皮, GOOD!!! 冇咩渣, GOOD!!! 唔太油, GOOD!!!

 

白飯--平時唔會影, 不過見佢原碗蒸, 仲落咗幾粒粟米, 幾特別, 就比佢上吓鏡啦... 但係個碗太深, 搞到面頭D飯太乾, 個底又積晒水, 唔係好平均...

金瓜糯米棗--好好好味呀!!! 紅棗香甜又大粒, 糯米煙煙韌韌, 食落先食南瓜, D南瓜即刻冇晒味... 拉姑誠意推介!!!


今餐飯好有驚喜, 希望佢KEEP到~

是次每人消費約$140元
味道: 4 環境: 4 服務: 4 衛生: 4 抵食: 3
###
地址 : 太古康山道1號康怡廣場3樓
電話 : 2870 0238

1 則留言:

  1. 拉姑:我未去過,以為譚魚頭只喺食魚頭~~Diy
    [版主回覆03/03/2012 11:43:42]路霸, 我以前都有同一唸法, 哈哈哈

    回覆刪除