網頁清單

2011年9月30日 星期五

君綽軒 Kwan Cheuk Heen

25 September 2011, Sunday


Honey早排o黎港島海逸君綽酒店食過西餐, 話幾好食... 真唔真呀...


今朝一瞓醒又要唸吓去邊樹搵食... Honey提議去呢間酒店嘅中菜廳「君綽軒」試吓...


我地12點唔夠去到, 查實大把位, 不過比人Book晒... Receptionist叫我地1:30pm翻番o黎... 吓?!! 咁我果個半鐘有咩做呀?!! 佢見我地咁大反應, 就話如果可以1點正還番張枱比佢, 就可以有位... 唉... 是旦啦, 都搭咗車落o黎喇... (有網民話星期日人影都唔多隻喎, 攪到我地好老定, 冇打電話去Book位)



餐廳古色古香, 海景仲出名好靚, 可惜我地被安排入咗房仔, 隔離張大枱仲好鬼嘈...


花雕話梅豬腳仔--話梅味唔均勻, 有D冇話梅味有D又好正話梅味... 口感彈牙... 份量不少... 唔錯唔錯...


合桃雞粒酥--入口熱辣辣出晒煙, 外皮香脆, 都OK喎...


甜梅菜叉燒腸粉--讚! 讚! 讚! 原來甜梅菜同叉燒腸係可以咁夾o架!!! 真係天作之合!!! 好有驚喜!!!


桂花烏龍馬蹄榚--個賣相都幾討好, 馬蹄清甜, 桂花甘香, 好味呀!!! 烏龍... 烏龍... 你去咗邊樹呀呀呀呀???


食物有新鮮感, 服務更係酒店級!!! 服務員1個鐘頭入面居然換咗4次碟, 仲不停幫我地斟茶, 仲不時留意住有邊枱客需要D咩... 有Heart之餘仲要有受過Training先做到...


大家會唸:「吓?!! 係酒店入面嘅服務就緊係酒店級啦!!!」... 大錯特錯!!! 上次我去同一集團, 同樣係北角嘅北角海逸酒店入面嘅中菜廳「海逸軒 Hoi Yat Heen」, 服務質數真係比美廉價茶樓...


唯一敗筆係酒店附近嘅環境都幾舊吓, 全部都係車房同舊樓... 不過遲吓呢個政府物料供應處重建之後, 應該會好D啩...



價錢又唔係傳聞中咁貴, 食物都唔錯, 服務仲咁好, 我一定會再o黎o架!!!


恆生卡有折... 唔記得帶... 嗚嗚...


是次每人消費約$130元
味道: 4 環境: 3 服務: 5 衛生: 3 抵食: 4
###
地址 : 北角油街23號港島海逸君綽酒店5樓
電話 : 2121 2691


2011年9月28日 星期三

和幸日本燒肉料理 Wako Japanese Yakiniku Restaurant

23 September 2011, Friday

又到咗奉旨食食食嘅週期啦啦啦!!! 第一擊... 「食力5人組」出動!!!

今次試食龍媽強烈推介嘅「和幸日本燒肉料理」!!!

和幸... 好熟悉嘅名字... 佢令我同貓兄不約而同唸起幾年前係台場食過嘅炸豬扒連鎖店... 有寫BLOG真好, 可以隨時RECALL MEMORIES... http://www.kenmerry.com/2007/03/2007_11.html 

由於龍媽經常幫襯, 所以我都唔使點睇餐牌, 可以坐定定等食, 一路食一路唸唔知下一味餸係咩嘅果種感覺, 真係食得興奮好多o架, 嘩咔咔咔!!!

餐廳裡面嘅裝潢都相當骨子吓... 充滿日式風味, 行人通道又好寬落, 空間感十足!!! 仲有大量卡位同梳化位, 坐得零捨舒服o架... 唔止咁, 呢度居然仲有TATAMI廂房, 可以坐2枱人, 咦... 我好想入去坐呀!!!


2011年9月22日 星期四

Outback Steakhouse

20 September 2011, Tuesday


之前同事同我講, Outback而家做緊Promotion, 可以係網上申請做VIP, 有9折之餘, 仲有50蚊儲值送... 咁抵??? 半信半疑之下, 我第一時間申請咗, 睇吓堅定流... 之後真係收到張VIP卡喎!!! 所以今日就去探吓路... 不過... 服務員話張VIP卡夜晚先用得... Oh...


帶位嘅職員話今日服務我地嘅係Exxxxx... 但係... 點解係男仔o黎嘅... 食咗大半餐, Exxxxx終於出現... 原來唔係頭先個男仔...


餐廳內環境都唔錯, 我地因為早, 仲有卡位坐... 正...


好奇怪, Set Lunch竟然係上餐飲先... 杯凍檸茶... 完全... 冇茶味...


是日餐湯--餐湯得一款... 忌廉蘑菇湯... 硬住頭皮飲咗一啖... 咦... OK喎... 好杰身, 好重忌廉味, 飲得"碗"落...
伴菜沙律--D生菜唔係太新鮮, 個沙律醬幾好味... 似千島醬, 但有少少紅點, 應該係辣椒粉...
蜜糖小麥包--個包其貌不揚, 但係... 好好味呀!!! 全餐最好味!!! 個包好鬆, 配忌廉牛油, 酸酸地, 好開胃!!!


燒烤肉排伴意大利飯及時菜--BBQ Ribs切開時仲有煙出o架, 正呀!!! 至於味道都OK, 如果再多少少燒烤醬就好喇... 份量以Lunch o黎講, 算好足料... 意大利飯落咗好多香草, 用白汁煮, 又香又甜又Creamy, 好正!!! 時菜有我最鐘意嘅南瓜, 仲有翠肉瓜, 紅蘿蔔, 菇菇... 即時變得好健康, Yeah!!!


黑椒牛扒粒--嗯... 個樣好唔吸引... 同埋冇晒煙, 食落唔多熱... 味道都OK嘅, 不過Honey話好似韌咗D...


整體味道唔講得上好味, 只可以講, 唔難食囉!!! 但係以咁嘅價錢, 食D咁嘅o野, 就真係差咗D... 唔怪得之中午時段, 呢度都得3分1客人... 而上一層嘅和民就一早已經爆到七彩, 遲少少去到都已經冇晒位...


食客嘅舌頭係雪亮嘅...


慘... 而家內心爭扎緊... 好唔好夜晚o黎食, 用咗佢送果50蚊儲值?!! 之但係夜晚貴好多o架喎應該... 咁嘅味道, 真係會蝕比佢喎...



是次每人消費約$85元
味道: 3 環境: 4 服務: 4 衛生: 4 抵食: 3
###
地址 : 鰂魚涌康山道1號康怡廣場地下1號舖
電話 : 2560 8246


2011年9月21日 星期三

3D Angry Bird 蛋糕 @ CakeDeli

17 September 2011, Saturday


今日約咗個小朋友一齊去學整蛋糕... 算係我人生第一次上親子班!!! 哈哈...


o黎... 大家睇睇我地嘅制成品先啦... 真的憤怒鳥!!! 係咪好憤怒呢... 嘩咔咔咔...


制作花絮...


第2日食個蛋糕, 個樣引死人唔在講啦, 味道仲出奇地OK喎, D芒果甜到你暈... 最後清晒碟... 噓... 鬆一口氣...


~~~ 題外話~~~


話說... 我地嘆完下午茶, 早咗幾分鐘上到個課室... 嘩!!! 人山人海... 咁多人整3D Angry Bird Cake嘅?!! 真係咁受歡迎?!!


之後見到D男同學不停追問D女同學做咩職業有咩興趣blah blah blah... 吓?!! 乜整蛋糕要比人查家宅嘅咩?!! 再睇真D... 張張枱嘅男女比例都係50/50... 咁奇怪嘅?!! 平時9成都係女仔學o架喎... 之後見到有個攪手吹佢地快D做埋D功課交比佢... 吓?!! 交功課?!! 攪咩呀?!!


嘿... 我穿過人群走去洗手, 終於比我發現佢地D Notes唔係教整蛋糕, 而係有個心心入面有1男1女, 我好肯定, 佢地係玩緊Matching Party!!! 天呀!!! 點解會比我遇到D咁嘅事o架?!! 我o黎整蛋糕啫... 我D Firends又會再話我成日遇到D"奇人奇事"o架啦!!!


(註: 最左手邊個哥哥仔係同我地一齊上堂)


同我一齊去嘅小朋友, 第一次上蛋糕班, 見到呢個景象, 問我係咪所有蛋糕班都係咁, 真係問到我口啞啞!!!


呢班人應該Over run得好緊要, 攪到我地遲咗30分鐘先可以開始上堂... 最後我地又超時30分鐘... 原本6:30落堂, 結果搞到7:30先走得...


D人散晒後先發現, 查實得5個人整3個Cake... 過咗冇耐, 仲見到有1個女仔o黎整綠茶蛋糕, Miss又走o黎走去, 教下果邊, 教下呢邊... 嘩... 我覺得好混亂... 學整蛋糕咁多次, 第一次遇到D咁嘅情況, 之前次次都係準時上堂, 而且唔會有其他閒雜人等, 係整果個Cake就全班都係整果個Cake...


我地遲咗上堂, 都冇話比面色Miss睇... 反而唔知Miss係咪比呢班人攪到一頭煙, 我帶去嘅小朋友係我監控底下打緊個餅底, Miss居然粒聲唔出衝埋o黎搶咗個打蛋器, 發晒狂用蠻力反方向打咗幾圈, 係冇熄機嘅情況下掉底個打蛋器走咗去, 我固然睇到O晒咀, 跟手就係比小朋友再問到口啞啞...


跟住, 到小朋友係我監控底下打緊個Cream, Miss又係咁, 衝埋o黎搶咗個打蛋器, 發晒狂用蠻力反方向打咗幾圈, 係冇熄機嘅情況下掉底個打蛋器走咗去... 嘩!!! 搞咩呀?!! 好彩我2次都即刻伸手去熄咗個打蛋器啫, 唔係嘅話, D Cream飛到週圍都係, 入邊個數先?!!


之後Miss同其他學員講, 話我地D餅底同Cream打得唔夠, 所以份量睇落小好多... 我心諗, Miss你搶咗我地果兜反方向狂打, D氣泡走番晒出o黎啦, 緊係小過其他學員啦...


果堆人散咗大概30分鐘之後, 可能Miss終於冷靜番落o黎, 見佢正常番晒, 有講有笑咁, 仲開始好有心機咁睇住我地整蛋糕, 我都終於鬆一口氣... 因為... 我都希望個小朋友可以有一個美好嘅回憶o架嘛...


2011年9月14日 星期三

香港世界貿易中心會 World Trade Centre Club Hong Kong

13 September 2011, Tuesday


今日同Honey嘅朋友即興飲茶, 週圍都Book唔到位, 最後去咗世貿中心頂樓嘅世貿會(只招待會員)...


嘩!!! 呢度個景好正呀!!! 今日天色真係好靚, 對面海嘅景色一覽無遺!!!


服務員伯伯話今日未算最靚, 最靚嘅時候真係好似一幅畫咁靚喎, 不過一年冇幾多日... 我地笑佢話佢就好啦, 每日返工有咁靚嘅景睇... 佢話佢係度燃燒咗好多青春喎!!! 難為我地係個密室度燃燒咗好多青春...


煎臘味蘿蔔糕--賣飛佛... D蘿蔔有手指尾咁大條, 好足料呀!!!


蔥花炸兩--都OK喎...


蟹子蒸燒賣--都幾好味!!!


古法馬拉糕--呢個我鐘意呀!!! D顏色好靚!!! 夠晒鬆, 仲食到蔗糖嘅甜味...


蜜汁叉燒包--好多叉燒, 個蜜汁都好香甜, 好好味!!!


南瓜粟米肉碎粥--煲得好綿, 好得!!!


油鹽水菜芯--菜芯OK喎, 仲加咗D冬菜絲, 好爽口...


食完晒點心, 傾傾吓計, 服務員就奉上2碟甜品... 咦??? 我唔覺有人落過Order嘅??? 不過見大家都不以為然咁食落肚, 我都冇問... 埋單時先知係送嘅, 仲要冇加一... 嘩!!! 好抵呀!!!


合桃酥(送)--又鬆化又脆, 仲好香合桃味, 細細塊啱啱好一啖一塊, 正!!!
杞子桂花糕(送)--好清香嘅桂花味, 微微嘅甜味, 正!!! 個Packing攪到個樣好似黑朱古力咁, 好矜貴呀...


中茶部大約有20張枱, 如果FULL咗係唔會再加枱... 枱同枱之間有一定嘅距離, 座位好寬敞, 環境寧靜, 傾計一流... 服務又好, 加埋個靚景, 真係傾到唔願走...


是次每人消費約$75元
味道: 3 環境: 4 服務: 4 衛生: 4 抵食: 5
###
地址 : 銅鑼灣告士打道280號世貿中心38樓
電話 : 2808 2288


2011年9月13日 星期二

「自煮中秋」

12 September 2011, Monday

「自煮中秋」2人套餐
頭盤 : 煎鵝肝配蘋果片伴蜜糖黑醋汁
主菜 : 煎牛扒配露筍新薯伴黑椒汁
甜品 : 8星伴月




活咗幾十年, 今日係我人生第一次係中秋節親自下廚!!! 之前幾十年都係有人煮好晒等我返去食, 今年居然破天荒提早做節... 正日出街食, 肯定又多人又貴又趕又唔好味, 所以決定買餸返屋企自己煮...

2011年9月9日 星期五

男女煮角 Ladies & Gentlemen Restaurant

5 September 2011, Monday

前排放工路過華蘭路, 見到呢間新食肆開張, 好似幾企理咁喎, 又多小菜選擇, 價錢都幾相宜咁... 今晚放工再度路過, 就入去試下啦...


餐廳入面都係靠邊有D卡位, 中間就係好多可以隨意移動嘅長方型木枱木櫈, 估計中午時段又係供應迫+趕午餐...


入到去先知, 小菜嘅價錢原來剩係包小菜, 轉套餐(白飯&湯)要加15蚊... 嘩... 咁嘅...


是日例湯--今日係節瓜湯... 嘩... 咁大煲嘅... 1人分到2碗... 不過... 少少鹹之外, 食唔出咩味...


鮮豬膶啫啫滑雞煲--第一啖覺得味道都OK, 之後越食越鹹... 再飲番個湯已經唔覺個湯鹹... D豬膶片片都切到薄到0.3mm厚, 莫非廚神出馬?!! 雞肉都係D雞翼位同轉角骨位, 冇咩肉... 紅蔥頭竟然一D都唔熱, 簡直為呢味餸增添上神秘嘅面紗...


麵醬炒唐生菜--嘩!!! D麵醬用個匙羹嗶係中間完全冇推開都得嘅?!! 個大碼唐生菜仲要原條1開為2, 個梗大到放唔到入口, 乜切一切開條菜要好多時間嘅咩??? 我眼見得唔夠5枱客, 廚房忙極有限喎...


埋單都要120蚊?!! 係, 佢係已經好食過美X快餐少少, 之但係咁嘅價錢配咁嘅食物, 應該短期內都唔會行開華蘭路呢頭...


我都係去搵番摩斯先生同胡椒先生好D, 起碼又平D又好食D, 雖然係唔多健康嘅快餐, 之但係我係用條脷o黎唸o野嘅, 所以... 最緊要好味!!! 其他o野都唔重要!!!


是次每人消費約$60元
味道: 2 環境: 2 服務: 2 衛生: 2 抵食: 1
###
地址 : 鰂魚涌華蘭路惠安苑12A-12H號地下
電話 : 2813 9636


西苑酒家 West Villa

4 September 2011, Sunday

又又又又又又西苑??? 唔厭嘅咩??? 係!!! 真係食極都唔厭o架!!!


今日早咗起身, 冇訂位, 又即興想飲茶, 結果係... 等餐死!!! 仲以為自己早咗出門口, 點知間間酒樓都已經勁多人, 鐘菜果便要等50張枱, 西苑呢邊都要等25張... 等到正想放棄轉去食韓燒之際, 佢又即刻有位... 不過係D位置冇咁好嘅枱, 唉, 有得食就算啦, 唔敢要求咁多...


黃沙豬膶燒賣 -- 必食!!! 食極都咁好味!!! 今日仲好似大粒咗添呀!!!


大哥叉燒--近期喊緊"減肥"口號, 好耐冇o黎西苑食晚餐, 冇見叉燒大哥一排, 真係好想大啖大啖咬落去呀!!! 肉嫩汁甜, 真係唔捨得咁快吞落肚呀!!!


鮑汁荷葉飯(1位)--雖然話1位, 但係都分到4個碗仔... 荷葉飯都幾香, 如果再乾身D咁就Wonderful喇!!!


梅菜肉崧蒸豆腐--嘩!!! 果塊豆腐細到咁嘅?!! 雖然好滑, 而且梅菜肉崧嘅味道啱啱好, 但係成48蚊, 比多2塊豆腐o黎都得啩!!!


今餐茶2個人要接近300蚊?!! 好貴呀!!! 好貴呀!!! 好貴呀!!! 點解近排週圍D食肆都貴咗咁多o架...


是次每人消費約$140元
味道: 4 環境: 3 服務: 3 衛生: 4 抵食: 2
###
地址 : 側魚涌太古城中心二期二樓208號
電話 : 2885-4478


2011年9月8日 星期四

香芒朱古力大樹蛋糕 @ 工聯會

2 September 2011, Friday


今晚係第十堂去工聯會學整蛋糕, 亦即係最後一堂!!! 好o野!!! 終於上完唔使再上啦!!! Yeah!!! 今晚係整「香芒朱古力大樹蛋糕」!!!


今日竟然第一個到課室, 鬼咁無聊, 影吓個上課環境先...



上星期去咗玩團購嘅Art Jam, 又走咗堂... 今堂D同學話上堂太多時間剩, 阿SIR送咗個牛油曲奇嘅DEMO同試食...


今堂嘅制成品係十堂之中最見得人o架啦!!! 不過D芒果有D怪味, 唔知係咪因為太熟呢...


我嘅制成品...


制作花絮...




今堂阿SIR又送o野啦!!! 雞尾包同扭紋包應該係佢最拿手嘅, 因為睇得出佢整包D手勢係經歷過唔少個寒暑先可以做到嘅...



制成品味道都OK... D包好軟, 軟得o黎有D唔係好慣...



2011年9月7日 星期三

一台.台食 Perfect Match Taiwanese Cuisine

31 August 2011, Wednesday

同朋友探完B, 就去咗附近新開嘅「譽港灣商場 Mikiki」八掛吓兼搵食... 聽聞遲吓會開一田呀... WoW... 正呀...

落到LG好似入咗地盤咁, 好混亂呀!!! 加上指示不清, 我地係一步一驚心嘅情況下向前摸索... 哦... 原來好近就有幾間新開嘅食肆... 有泰式, 有韓式, 有台式... 朋友問我想食邊間, 我話好簡單, 邊間最多人就入邊間... 就係咁... 揀咗「一台.台食」!!!

定食唔包飲品, 所以我地一人叫一杯特調特飲...

宇治金時--嘩!!! 中招!!! 全杯都係碎冰o黎嘅?!! 餐牌都冇講!!! 仲要好專心都只係飲到好虛弱嘅抺茶味, 杯底有少少紅豆, 不過冇紅豆味... 唔通又玩1比99???
黃金歲月--朋友果杯都唔好得幾多...



定食包王功蚵仔湯或台南豬血湯... 朋友同我都接受唔到呢2種湯, 落單時講明唔要, 上菜時都夾硬每樣拎1碗出o黎... 搞咩呀?!! 我地又冇要你退番碗湯嘅錢, 你可唔可以唔好夾硬o黎呀, 你知唔知浪費食物好拆墮o架?!!

原來定食仲包台灣黑白切豆腐, 滷鵝翼, 頭份醋溜木耳... 我而家寫BLOG睇番個餐牌張相先發現咋... 除咗滷鵝翼係食咗落肚, 真係見唔到有豆腐同木耳囉... 唔通魚蛋係台灣叫黑白切豆腐??? 酸瓜係台灣叫頭份醋溜木耳??? 當時掛住雞啄唔斷, 真係咩都冇為意, 蝕底晒啦!!!

三杯雞定食--份量唔細, 三杯雞味道都OK, 滷鵝翼都入味, 粒魚蛋都可以... D酸瓜見到個樣已經決定放棄... 碗湯就更加唔會掂啦...


四季麻油雞定食--朋友都食得晒, 應該唔難食嘅... 碗湯同D酸瓜都係冇掂...


服務員都OK有禮貌嘅, 由得我地傾到10點, 佢地都收工先提醒我地離開...

當時都冇為意幾錢... 而家拎張單出o黎一睇... 嘩!!! 好似貴咗D喎... 好食就話幾貴都抵啫...

雖然2邊有SOFA位同卡位, 但係我地都係座中間一排排嘅長枱, 我當食快餐咋... 冇估過會過佰囉... 未體驗到個商場有幾貴氣(裝修-ing), 已經體驗到D餐廳好貴!!!

是次每人消費約$110元
味道: 2 環境: 3 服務: 3 衛生: 3 抵食: 1
###地址 : 九龍城新蒲崗太子道東638號譽港灣商場(Mikiki)LG7號鋪
電話 : 3579 4248


2011年9月6日 星期二

曲奇四重奏 Cookies Quartet

31 August 2011, Wednesday


久仰由謝寧開設的「曲奇四重奏」嘅大名, 可惜平時冇咩機會去九龍城, 所以一直冇機會品嚐...


今日約咗識途老馬黃毛仔去九龍城附近探B, KeKe... 仲唔捉住佢帶路咩?!!


黃毛仔話曲奇四重奏搬咗鋪位, 新鋪位隔舊鋪位2條街... 呵呵... 真係冇搵錯人... 如果我自己搵, 可能又"中"咗去舊鋪位撲個空...


店內陳設簡潔而優雅, 寬敞而舒適...


一步入店內, 店員好熱情咁叫我地試食蝴蝶酥, 唔係剪到碎晒咁試, 而係比半塊你試!!! 嘩!!! 好大方呀!!! 攪到我鬼咁唔好意思, 話唔使咁大塊... 但係店員依然熱情地叫你試食半塊...


試食完蝴蝶酥, 我就叫黃毛仔介紹吓有咩曲奇好食, 另一個店員即時熱情地叫我地試食曲奇...


呢個就係試味CORNER, 有十款曲奇以上可以試食... 每一種味道係比半塊你試, 試多幾隻味真係晚飯都唔使食, 飽晒... 我食咗2-3隻味已經覺得好尷尬, 好似好貪心咁, 但係熱情嘅店員依然好落力咁叫你試試試試... 最後好似試咗6隻味以上...


店員建議首先試口感... 曲奇供應多款口感, 由最鬆化開始試, 逐層逐層上, 最後試到最脆口, 緊有一款啱你口味... 我以前冇為意自己鐘意咩口感, 今日一試, 先知自己原來唔鐘意太脆口(硬咗D), 又唔鐘意太鬆化(淋咗D)...


試完口感, 然後就試味道... 咖啡味好香濃... 開心果味好特別... 藍梅味有點... 果仁味都唔錯... 牛油味好香濃... 好似仲有試其他味, 不過試咗太多, 已經記唔到咁多...


最後我買咗蝴蝶酥, 咖啡味曲奇, 同開心果曲奇!!! 呵呵呵呵... (黃毛仔買咗十包以上, 我地勁似自由行落o黎香港搶奶粉)


今次又冇睇清楚價錢就亂買o野... 以為全部都係$48... 而家寫BLOG睇番張單... 嘩... 原來開心果曲奇要$70, 咖啡曲奇要$62... 好貴呀!!! 不過真係好好好味呀!!! 個包裝仲好吸引!!!


蝴蝶酥--酥, 脆, 鬆, 化... 果然名不虛傳!!! 連食幾包都絕對冇問題!!!
咖啡味曲奇-- 咖啡味好香濃... 濃到... 我醉啦!!!
開心果曲奇--美味嘅開心果碎+朱古力碎配上鬆脆曲奇, 簡直係完美呀!!!


店員話用密實盒可以保存30日... 乜... 佢地可以生存到咁耐咩響我屋企... 唔使三兩下手腳就比我同HONEY塞晒入肚啦, 嘩咔咔咔...


是次每人消費約$180元
味道: 4 環境: 4 服務: 4 衛生: 4 抵食: 3
###
地址 : 九龍城獅子石道9A地下
電話 : 2382 2817


2011年9月2日 星期五

峇里園印尼餐廳 Bali Garden Indonesian Restaurant 1968

30 August 2011, Tuesday


今日過海攪D野, 順便食埋飯... 朋友話想試呢間... 去到門口... 吓??? 米芝蓮??? (返屋企CHECK番, 應該唔係星級亦唔係精選食肆) 見到1968呢個數目字, 就醒起幾年前同食力四人組係尖沙咀食過一次...



12點鬆D仲未有客... 一排長長嘅玻璃窗, 景觀好開揚, 坐係SOFA望住窗外嘅景色, 心情好舒暢, 好RELAX...



我地5個人SHARE 4個悠閒午餐... SET LUNCH包餐湯, 餐前小吃, 主菜, 餐茶...


是日餐湯--嘩!!! 好好飲呀!!! 真材實料!!! 有粟米紅蘿蔔栗子南瓜同埋... 唔記得咗... 一D味精都冇, 好健康呀!!!



餐前小吃--可以揀特色沙律或者印尼春卷... 印尼春卷好多紅蘿蔔, 味道一般, 個皮淋咗D... 特色沙律真係好特色!!! 有豆腐POP同炸蝦片!!! 仲有酸辣沙律醬, 都幾開胃...



印尼特色炒飯--嘩!!! D串燒個醬好好味呀!!! 好香花生味!!! 塊炸蝦片使唔使咁大塊呀?!! 仲有炒蛋, 個飯用葉包成雪糕桶咁, 好KAWAII呀!!! 唔好以為D飯得好少, 原來好大分量o架, 差D食唔晒呀!!!



馳名海南鮮雞配椰香飯(去骨)--朋友平時好嘴刁, 竟然都食得晒仲冇彈過, 肯定好味啦~



豬肉炒金邊粉--試咗一羹, 嘩!!! 好好好味呀!!! 酸酸甜甜, D金邊粉炒得啱啱好, 仲要好均勻, 仲好食過印尼特色炒飯, 我下次如果再o黎都要食呢個...



印尼椰汁雞飯--朋友話個汁夠"傑", 同埋好香咖哩味, 讚好食!!! 呢個朋友平時仲嘴刁o架... 都讚好食, 應該得啦~



印度薄餅--食咖哩又點少得佢呢... 上枱時熱到辣手, 都幾香...



餐飲除咗檸茶奶茶汽水唔使加錢, 就連青檸/荔枝/西柚梳打都唔使加錢, 剩係意大利得寶沙香濃熱咖啡先要加3蚊咋, 好抵呀!!!


價錢一D都唔米芝蓮嘅米芝蓮餐廳, 我一定要再o黎!!!!!!


午飯時段都唔FULL, 唔使咁嘈, 又唔使趕住交枱, 服務員又唔會忙到冇時間理我地, 食得好舒服呀!!! 咁好味嘅食物, 都唔係收得好貴... 如果佢係太古坊開分店就好啦~


是次每人消費約$70元
味道: 4 環境: 4 服務: 3 衛生: 3 抵食: 4
###
地址 : 旺角太子道西193號新世紀廣場6樓601號舖
電話 : 2619 1926