網頁清單

2011年8月31日 星期三

師奶胡亂購物篇 の 十勝紅豆月餅

29 August 2011, Monday


早幾日同朋友食飯, 大家提到中秋月餅, 佢就勁推介東海堂十勝紅豆月餅好正... 我聽完即時雙眼發光... 紅豆呀... 十勝呀...


時不宜遲, LUNCH HOUR即買!!!


原先只係一心想買"1"個月餅咁大把... 唔想肥, 又想應節?!!! 只可以得1個月餅擺係屋企搞吓氣氛囉, 唔通玩層層疊咩... (以前細個成日數下有幾多個月餅罐疊起咗)


DEK米唔知價嘅我, 一問之下, 嘩!!!!!! 50蚊1個月餅?!! O咀-ing期間, 職員即力SELL東X咭優惠1盒4個就155蚊... 我同同事都冇喎, 正想轉身走人之際, 職員又力SELL任何CREDIT CARD都只係158蚊... 貴3蚊咋嘛... 早響啦...


腦海不斷催眠自己... "嘩... 即係唔使40蚊1個啦, 抵好多喎"... 最後...


又迷迷糊糊咁拎咗張信用卡出o黎找數啦!!! 我明明只係想要1個月餅啫, 點會攪成咁o架?!!


為咗慳10蚊, 結果使多咗110蚊!!! 呢條數真係用微積分都計唔掂啦!!!


以免自己失控食晒, 結果唔使2日已經送咗3個比人... 我一定要寫低呢篇BLOG, 得閒要拎出o黎警惕吓自己先得啦!!!


好搞笑地, 買完即刻響東海堂隔2個鋪位, 撞到勁推介呢隻十勝紅豆月餅果位朋友... 有冇咁橋呀?!!


是次每人消費約$160元
味道: 2 環境: 2 服務: 3 衛生: 3 抵食: 2
###
地址 : 鰂魚涌糖廠街1號英皇大廈地下G店
電話 : 2805 5296


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~


- 後記 -


話說... 好多BLOG友同朋友都即時問我好唔好味, 我見大家咁有興趣, 就將呢個本來留待8月15先食嘅珍品, 即刻開咗o黎食吓...


我以為自己味覺出咗問題, 點解紅豆月餅食落口, D味會咁似蓮蓉月餅嘅呢... 百思不得其解... 第2日忍唔住拎個盒o黎睇吓D成份... 哦!!! 原來真係有蓮子... 同埋唔係剩係用十勝紅豆, 仲有普通紅豆!!!



9 則留言:

  1. 係咪真係好好食?
    我送左1盒俾親戚,佢地話好食,搞到我都想買盒自己食
    [版主回覆09/01/2011 01:22:00]海棠, 多謝你的瀏覽及留言!!!
    欲知味道如何, 請看第5回應!!!

    回覆刪除
  2. 點解唔送比我?d又甜又肥既野我最like,唔係點keep fat,查實我唔食連蓉,月餅只食奶皇和紅豆蓉,你記住啦,咁我買東海堂定奇華呢?
    [版主回覆09/01/2011 01:21:00]點解你唔黎QB探我?
    欲知味道如何, 請看第5回應!!!
    未食過奇華, 比唔到意見!!!

    回覆刪除
  3. 好唔好食呢?
    [版主回覆09/01/2011 01:23:00]欲知味道如何, 請看第5回應!!!

    回覆刪除
  4. 上年買左奇華奶皇,都唔錯,今年就想買紅豆月餅,你下次記得預埋我啦!
    [版主回覆09/01/2011 01:25:00]預埋你一齊買? 定預埋送1個比你? 我唔送外賣o架喎... 想要, 要自己o黎QB拎喎!!!

    回覆刪除
  5. 原本想放到8月15先食, 見大家咁有興趣, 已經1AM都即時切開咗試味...
    唔知係咪我嘅錯覺, 我覺得D味勁似雙黃白蓮蓉月餅...
    同埋呢... 我買個時以為全個都係紅豆蓉先買, 原來有2個流晒油嘅蛋黃係入面o架!!!

    回覆刪除
  6. 搞笑,本來50$一個,依家變咗160$都係得一個 wakakaka,都話係呢方面,啲幾叻嘅女人都會變白痴 hahahaha,因為我都成日係咁架,本應買100$嘅野,比人家講講吓就會買500$........
    [版主回覆09/02/2011 23:55:00]RE 講講吓就會買$500 : 我又係咁o架, 哈哈哈哈!!!

    回覆刪除
  7. oh!no,我因為整個童年食左過百盒月餅,我對 蓮蓉既厭惡非筆墨可以形容,但我昨日係奇華奶皇和東海堂紅豆二選其一下,仲要十年無買月餅(一直係公司送),萬分期待下,竟然話覺得D味勁似雙黃白蓮蓉月餅...
    [版主回覆09/02/2011 23:59:00]咁你買奇華奶皇啦, 記得送1個比我試吓, 我會去你公司下面等你...

    回覆刪除
  8. 拉姑: 我都買咗 嚟食!其實佢喺豆沙月咋,喺咪 +勝紅豆無人知,因為攪到爛哂, 覺得佢地好甜。美心收購咗東海堂,而家啲嘢食好似無以前咁好,仲貴咗! Diy
    [版主回覆09/03/2011 00:05:00]路霸, 多謝你的瀏覽及留言!!!
    會唔會佢響應咗衛生署嘅呼籲, 落1:99(十勝紅豆:普通紅豆)?!!
    我都覺得而家嘅東海堂已經唔係以前嘅東海堂!!! 就好似而家嘅元氣已經唔係以前嘅元氣!!!

    回覆刪除

  9. 拉姑: 美心收購咗東海堂、元氣後,大集團 只求賺錢 ,將原本有嘅食物味道、氣氛完全改哂,而家得番個殼無咗靈魂! Diy

    [版主回覆09/03/2011 17:05:00]完全同意!!!

    回覆刪除