網頁清單

2011年7月24日 星期日

蘇浙滙 Jardin De Jade

21 July 2011,  Thursday


今日會去書展, 入場前係灣仔搵食... Honey極力推介近近地嘅「蘇浙滙」!!!


行到門口, 見到個名好勁... 「海派美食任品嘗」!!! 即刻唸起海派甜心, 哈哈~ 任點任食嘅午餐, 類似Buffet, 坐係自己個位畫紙仔等食, 唔使自己出去Buffet枱搶食物, 讚~


「海派美食任品嘗」包括10款精選冷菜, 12款精選熱菜, 5款精選湯羹, 12款精選點心... 一定可以搵到啱你心水嘅食物...


間餐廳嘅環境都幾好, 高樓底加水晶吊燈, 仲有卡位... 我地坐嘅櫈都好寬敞舒適... 坐滿客之後都唔會太嘈, 讚~


(前) 四喜烤麩--不錯~
(中) 上素鮑魚-- 好有鮑汁味, 仲好彈牙添呀, 聽講人多時係原隻鮑魚上o架, 好豪呀~
(後) 花雕醉雞--好好好入味呀!!! 雖然雞肉好實, 但好夠味, 依然讚~


(前) 本幫燻魚--皮脆肉稔, 都幾入味, I like it~
(後) 清炒河蝦仁--經理勁力推介!!! 查實我一向唔識欣賞河蝦, 不過佢D蝦肉都幾大粒, 同埋唔太淋, 點咗黑醋都幾開胃~


(前) 松鼠小黃魚--嘩!!! 成條o架, 抵食回本之選!!! 個汁酸甜度適中... 好開胃~
(後) 金鈎炒青瓜--清淡中見真味, 好得呀, 健康之選, 我一個人食咗大半碟~


(前) 秘製醬仔排--全餐最有驚喜!!! 甜甜地嘅醬汁入面滲出淡淡嘅黑椒味, 好特別呀~
(後) 傳統雞骨醬--麻麻地, 冇咩特別, 但係都OK嘅, 可能因為其他食物太好味~


(左後) 是日例湯:苦瓜燉唐排--初時我以為係佛手瓜, D湯未免太苦啦... 後尾Honey發現係苦瓜, 話D湯嘅苦味即時變正常~
(左前) 野生松茸燉雞--松茸味唔太重, 個湯都幾清淡~ 大大片松茸係湯入面, 好似好抵咁, 哈哈~
(右) 白玉燴魚蟹--嘩!!! 酸辣湯咁嘅... 我飲唔到... 經理好好人, 幫我拎走... 仲幫我轉例湯~

(中) 上海小籠包--好得呀!!! 皮薄, 湯多, D湯仲好熱, 比D熱湯辣到條脷都紅埋~


(左) 香棗椰拉糕--口感似年糕, 煙煙韌韌, 不過冇咩棗味, 味道似椰汁年糕多D~
(右) 酒釀小圓子--唔夠酒釀味, 淡淡嘅桂花香, 圓子唔夠煙韌, 不過仍然係不俗嘅甜品~

食物味道偏向清淡, 但係又幾好味, 唔錯!!!


我地2個人都試唔到一半嘅任點食物, 以咁嘅價錢, 可以任食咁多o野, 好抵食呀~


經理服務好好, 友善有禮, 其他服務員都好有禮貌, 而且人手幾充足... 女廁都好乾淨... 去開灣仔搵食嘅朋友, 可以o黎試吓~


是次每人消費約$170元
味道: 4 環境: 4 服務: 5 衛生: 4 抵食: 4
###
地址 : 灣仔港灣道30號新鴻基中心地下G3–4舖
電話 : 3528 0228


4 則留言:

  1. 蘇浙滙我鐘意呀,不過兩個人試唔多款,但呢個價錢有咁既環境和食物相當超值,查實我係對面返工,想試多幾款搵我呀
     
    [版主回覆07/26/2011 11:40:00]好!!! 下次搵埋你一齊去, 要喪試全部款式, 哈哈!!!

    回覆刪除
  2. BOOK咗星期日啦啦啦啦!我係澳門嗰間食過,好好味
    [版主回覆07/27/2011 00:44:00] 好o野~ 記得食多D, 食多D!!!
    P.S. 咁你又有冇問佢星期日係咪都有呢個放題?

    回覆刪除
  3. 有放題呀,138+10%
    [版主回覆07/27/2011 12:40:00]正呀!!!!!!

    回覆刪除
  4. 好想食燻魚......
    [版主回覆11/09/2011 15:25:15]燻魚... 賣飛佛 ^^

    回覆刪除