網頁清單

2011年7月31日 星期日

「兩餸套飯」の XO醬炒豆角粟米豆乾菜脯 + 豉汁蒸排骨

28 July 2011, Thursday

自從開咗學之後, 都冇時間再入廚, 今日決定繼續我嘅學廚之路!!!

之前係蘇施黃個Blog (soszewongrecipe.blogspot.com) 見到炒玉米粒嘅食譜, 所以試下... 不過我將豬肉變咗豆乾, 同埋加咗XO醬, 第一次試煮都OK吖, 只係材料太多, 令到XO醬嘅味唔多出, 不過起碼食得落唔使倒呀, 哈哈...

2011年7月30日 星期六

秋山書店 Akiyama Bookstore & Cafe

27 July 2011, Wednesday


今日Honey想去我之前食過讚不絕口嘅「菖蒲亭 Sho Bu Japanese Restaurant」食Lunch... 行到去菖蒲亭門口, 拉晒閘嘅??? 個招牌都拆埋??? 唔係執咗笠呀嘛??? 佢D午餐平均都要150蚊, 仲要日日爆滿o架喎, 咁都要執??? 唔係呀嘛?!!! 裝修吓咋嘛?!!


咁就麻煩喇, 一時間諗唔到去邊樹食, 個太陽又鬼咁猛, Honey話試吓呢間開咗1年嘅秋山書店, 我就千萬個唔願意, 因為我覺得書店+CAFE, D食物一定唔會好食得去邊, 同埋呢間CAFE嘅午餐都唔平, 要成50-70蚊...


行到門口, 發現12:45PM前埋單有7折, 咁都好D...


餐廳內有一排梳化位, 都幾舒服...


是日餐湯--忌廉湯入面已經落咗黑椒, 仲有D細細粒薯仔蓉, 都幾好味...


西柚青蘋果配吞拿魚長通粉沙律--所有材料都極之新鮮, 味道亦都恰到好處, 外面條街度有成三十幾度, 食呢味沙律真係好涼快又清新...


香煎紐西蘭羊架配薯菜--嘩, 兩大件羊架, 好抵呀!!! 第一件火喉掌握得恰恰好, 第二件對我地o黎講就生咗D, 不過店方都肯幫我地整熟D, 再出番o黎時就好好味, 啱啱好... 青瓜煮熟咗都仲脆脆地, 薯格已經調好味, 唔使點茄汁都好好味, 而且一炸好就上枱, 好脆呀, 正!!!


餐飲--一般嘅咖啡茶檸茶檸水, 可以加錢轉西瓜汁/橙汁/朱古力/汽水...


食物好好味, 材料又新鮮, 份量都好足夠, 最重要係營養都幾均衡... 因為太早, 得我地一枱, 所以都幾好坐... 7折咗先40蚊1個人, 真係超超超抵呀(太古坊好難食又迫又趕嘅都過50蚊), 好後悔咁遲先發現呢間正o野呀!!!


服務都唔係好似D網民講得咁差, 因為冇咩人, 所以服務尚可...


是次每人消費約$42元
味道: 4 環境: 3 服務: 4 衛生: 4 抵食: 5
###
地址 : 鰂魚涌海光街11號1A號舖
電話 : 3102 9178


2011年7月29日 星期五

東匯海鮮火鍋飯店 The Orient Seafood & Hot Pot

26 July 2011, Tuesday


今日又晨早醒咗瞓唔著, 有咗上次晨運嘅經驗(落到街週圍D食肆一間都未開), 今次起身Hea吓先, 跟住上網搵吓邊樹有早茶飲... 搵到呢間東匯開7:30AM, 唯有係屋企繼續上吓網, Hea到夠鐘先出門口...


未夠7:30AM去到東匯門口, 見到入面已經坐滿老人家, 好辛苦先見到最入嘅柱後面有1張枱未有人坐, 但係個服務員竟然叫我地搭枱, 我地唔肯, 佢又話等陣有人o黎都係要搭枱...


坐低咗, 入埋點心紙, 先留意到... 咦... 點解全部人都係齋坐冇o野食嘅... 同埋... 點解好似冇冷氣嘅...


等等等等等... 等到7:29AM, D食物終於一次過湧出o黎啦... D冷氣都開始湧出o黎啦... 咦... 好多人都係食盅頭飯喎, 8蚊咋... 其次就係大包... 好少人叫一籠籠嘅點心...


豉油皇銀芽炒油麵--好油呀!!! 同埋D麵淋PAT PAT, 仲冇咩味...


香煎蝦米腸--D腸粉唔使放入口都知道唔好食, 爛蓉蓉咁...


眉豆花生豬骨粥--D粥都煲得好棉, 不過冇咩味...


我地以極速食完走人, 避免有人搭枱...


客戶嘅年齡層平均60-80, 更加有超過90嘅, 我地坐係入面係超級格格不入, 好唔自在...


Honey話而家有咗最低工資, 好懷疑呢度早市咁平冇理由有錢賺, 可能都係蝕賣比呢班老人家當回饋社會...


是次每人消費約$18元
味道: 2 環境: 2 服務: 2 衛生: 2 抵食: 5
###
地址 : 鰂魚涌英皇道1010-1056號香港水族廣場地庫11號舖
電話 : 2561 1198 / 2736 8688


2011年7月28日 星期四

美國<時代雜誌>推介香港十大暑假好去處

16 July 2011, Saturday

今日睇頭條日報, 佢話美國<<時代雜誌>>推介香港十大暑假好去處嘅其中一個, 竟然係我同Honey十日前先去探過路嘅「樂茶軒 Lock Cha Tea Shop」?!!! 嘩, 乜我地真係咁有慧眼嘅咩??? 呵呵呵呵~

### 相關新聞 ###

http://news.hkheadline.com/dailynews/content_hk/2011/07/16/154859.asp







《時代》盛夏必遊推介 港10特色「景點」上榜
2011-07-16




香港貴為國際大都會,到處均是遊客值得「到此一遊」的景點!美國《時代雜誌》近日從全球六大城巿選出六十個夏季必去地點及必歎活動,當中香港共十個,包括五個餐飲地點、一個海上觀光旅程、一個水療服務及三大體育和影音節目上榜,當中不乏獨有特色,如乘仿古船「張保仔」號飽覽維港景色,在香港公園樂茶軒茶藝館品茗等,都在外國人眼中,塑造出別樹一格的東方香港。

        美國最新一期《時代雜誌》從六個國際大都會:香港、巴黎、曼谷、倫敦、紐約、東京選出六十個夏季必到地點及必歎活動,推介遊人計劃暑期外出旅遊時,應該首選到訪,當中香港共有十項入圍,囊括飲食、觀光旅程、享用服務及熱門節目四大主題。

        餐飲佔半 貫徹美食天堂

        香 港貴為美食天堂,在《時代雜誌》上榜的餐飲地點佔了一半,比例最大,例如它推介遊客可到灣仔正在試業的高質食店Madam Sixty Ate,豪歎新派歐陸菜;若要享受陽光與海灘,可在南灣海灘餐廳及長洲滑浪風帆中心露天茶座,拿特飲欣賞香港海岸線,後者甚至可揚帆出海;另外,亦可到坪洲酒吧Les Copains d'Abord邊吃法式小食,邊玩滾球遊戲;若要數到特色地點,便是金鐘香港公園內的樂茶軒茶藝館,該雜誌力讚茶館備有素食點心及多款茶葉外,茶客還可參加品茗賞識課,學習中國傳統茶藝。

        仿古帆船遊香江

        雜誌又推介多項本地服務及活動,包括乘仿古帆船「張保仔」號,遊歷維多利亞港和香港海岸一日遊、曾被「富比士旅遊指南」評為世界十八大五星評級水療中心之一的文華東方酒店水療服務、「夏日國際電影節」、美國樂隊RED HOT CHILI PEPPERS在本港巡迴演唱會,以及由英超球隊與港足較技的「巴克萊英超亞洲挑戰盃」。

2011年7月27日 星期三

恆河咖喱屋 Hin Ho Curry Restaurant (II)

25 July 2011, Monday


兩星期前o黎「恆河咖喱屋」食過一次之後, Honey好似迷上咗咁... 所以今晚又再o黎食過啦...


今次醒目啦, 提早打電話o黎Book定位, 講明要坐2樓...


一坐底, 服務員妹妹知道我地上次試食過「香料燴羊膝」同埋「蕃茄咖哩牛仔腩」之後, 就推介我地今次試吓「蔡瀾咖哩羊肉」同「白咖哩雞」...


胡椒薄脆(配香草辣醬&甜酸醬)--開胃前菜, 依然鐘意香草辣醬多D...


蔡瀾咖哩羊肉--嘩... 好辣呀, 辣過上次香料燴羊膝呀!!! 服務員妹妹話因為用香料炒過, 所以小辣等於其他餸菜嘅中辣級數... 洋蔥同青椒炒得好香甜, 羊肉份量好似少D, 上次個羊膝抵食好多...


白咖哩雞--嘩... 個白咖哩好甜甜甜呀!!! 一D都唔辣, 好多咖哩汁, 沾薄餅食一流!!! D雞肉用香草醃咗先, 入口好香呀... 呢味餸好正呀...


千層牛油薄餅--嘩... 好得呀!!! 每一層都好薄呀, 而且好香好酥, 上枱熱到辣手, 第一時間沾白咖哩好好食呀!!! 上次o黎, 整「千層牛油薄餅」部機器壞咗, 冇得食... 今次部機器整番好啦, 終於可以品嚐到呢個招牌薄餅啦~ 唔該, o黎多一客吖...


巨蜂梳打--食飽飽, 時間尚早, 見幾好坐, 又未有太多人客湧至, 叫杯特飲嘆吓, 順便拖延吓埋單時間先... 叫咗少冰嘅巨蜂梳打, 好大杯, 唔太甜, 仲有D蒟蒻粒粒o趙吓, 正...


2樓環境真係好過地下好多, 寧靜好多, 仲唔使驚D魚沸水出o黎, 感覺舒適D, 可以坐耐少少... 不過要影靚相就樓下光D...


服務員妹妹SERVICE非常好, 可能當時人少, 冇咁BUSY... 佢對菜式亦有一定了解度, 而且答問題好有熱誠, 仲好有禮貌... 真係想派封利是比佢, 不過而家唔係新年, 冇帶係身, 哈哈...


臨走幫襯咗佢個TOILET, 都幾乾淨...


今日呢餐終於有D米芝蓮FEEL啦~


Honey話, 只係要大X樂雙倍嘅價錢, 就可以享用到咁美味嘅米芝蓮級食物, 簡直係超值呀!!!


是次每人消費約$135元
味道: 5 環境: 3 服務: 4 衛生: 3 抵食: 4
###
地址 : 西灣河筲箕灣道90號地下
電話 : 2967-8348/ 2967-8545


2011年7月26日 星期二

蜂蜜紅莓菓仁枇 & 鳥結糖 @ 工聯會

22 July 2011, Friday


今晚係第四堂去工聯會學整蛋糕... 今晚係整「蜂蜜紅莓菓仁枇」同埋「鳥結糖」!!!


今晚對我呢講好重要, 我係因為鐘意食鳥結糖而報呢個Course...

我嘅制成品...

制作花絮...



阿Sir示範嘅「蜂蜜紅莓菓仁枇」, 我地每人分到一個批模同粉團, 壓好之後又交番比阿Sir落餡...


制作花絮...


聽日大暑, 課室竟然壞咗冷氣!!! 上課期間我忍唔住要撥扇, 有D缺氧嘅感覺, 好暈...


後來有個女職員拎把全新未開箱嘅電風扇上o黎, 把扇嘅零件散到一片片, 個女職員竟然叫個男同學幫手整把電風扇... 男同學整咗兩o野覺得唔對路, 都係走番去上堂... 結果... 到最後... 把電風扇依然係散修修一片片...


2011年7月25日 星期一

香港書展 BOOK FAIR 2011

21 July 2011,  Thursday


今年又收到書展嘅VIP飛, 可惜無人問津, 最後唯有比晒同事啦~


嘆完「蘇浙滙」嘅「海派美食任品嘗」, 就進入書展啦~


午餐時間, 場外未有人龍, 場內人流亦唔算太多, 仲行得郁...


一如以往, 第一時間衝去天地圖書嘅攤位買咗本馬仔先, 之後同馬仔個紙板影埋張合照就走得o架啦~


呢個攤位賣書賣到好似賣雞蛋咁, 仲有仿九龍皇帝塗鴉藝術品, 一定要影低佢...


呢個專賣微型藝術書嘅攤位擺咗好多微型藝術品係度, 呢個蛋糕西餅店好靚呀!!! 我幾時先可以整到咁靚嘅公仔屋呀?!!!


行完1樓就殺去3樓兒童天地睇吓馬仔教畫畫... 現場係爆晒之餘, 仲要企滿晒人囉~ 好犀利呀~


真係走得!!! 行咗個半鐘咋, 幾快手!!!


年年入去書展之前, 都實牙實齒話剩係買一本馬仔... 結果年年出o黎都係會買咗一大堆書囉...


好彩今年暑假吉豬島同太古坊都有回收舊書義賣行動, 我同Honey已經搬咗廿幾卅本書去回收, 如果唔係, 個書櫃仲邊有位擺新書呀~


2011年7月24日 星期日

蘇浙滙 Jardin De Jade

21 July 2011,  Thursday


今日會去書展, 入場前係灣仔搵食... Honey極力推介近近地嘅「蘇浙滙」!!!


行到門口, 見到個名好勁... 「海派美食任品嘗」!!! 即刻唸起海派甜心, 哈哈~ 任點任食嘅午餐, 類似Buffet, 坐係自己個位畫紙仔等食, 唔使自己出去Buffet枱搶食物, 讚~


「海派美食任品嘗」包括10款精選冷菜, 12款精選熱菜, 5款精選湯羹, 12款精選點心... 一定可以搵到啱你心水嘅食物...


間餐廳嘅環境都幾好, 高樓底加水晶吊燈, 仲有卡位... 我地坐嘅櫈都好寬敞舒適... 坐滿客之後都唔會太嘈, 讚~


(前) 四喜烤麩--不錯~
(中) 上素鮑魚-- 好有鮑汁味, 仲好彈牙添呀, 聽講人多時係原隻鮑魚上o架, 好豪呀~
(後) 花雕醉雞--好好好入味呀!!! 雖然雞肉好實, 但好夠味, 依然讚~


(前) 本幫燻魚--皮脆肉稔, 都幾入味, I like it~
(後) 清炒河蝦仁--經理勁力推介!!! 查實我一向唔識欣賞河蝦, 不過佢D蝦肉都幾大粒, 同埋唔太淋, 點咗黑醋都幾開胃~


(前) 松鼠小黃魚--嘩!!! 成條o架, 抵食回本之選!!! 個汁酸甜度適中... 好開胃~
(後) 金鈎炒青瓜--清淡中見真味, 好得呀, 健康之選, 我一個人食咗大半碟~


(前) 秘製醬仔排--全餐最有驚喜!!! 甜甜地嘅醬汁入面滲出淡淡嘅黑椒味, 好特別呀~
(後) 傳統雞骨醬--麻麻地, 冇咩特別, 但係都OK嘅, 可能因為其他食物太好味~


(左後) 是日例湯:苦瓜燉唐排--初時我以為係佛手瓜, D湯未免太苦啦... 後尾Honey發現係苦瓜, 話D湯嘅苦味即時變正常~
(左前) 野生松茸燉雞--松茸味唔太重, 個湯都幾清淡~ 大大片松茸係湯入面, 好似好抵咁, 哈哈~
(右) 白玉燴魚蟹--嘩!!! 酸辣湯咁嘅... 我飲唔到... 經理好好人, 幫我拎走... 仲幫我轉例湯~

(中) 上海小籠包--好得呀!!! 皮薄, 湯多, D湯仲好熱, 比D熱湯辣到條脷都紅埋~


(左) 香棗椰拉糕--口感似年糕, 煙煙韌韌, 不過冇咩棗味, 味道似椰汁年糕多D~
(右) 酒釀小圓子--唔夠酒釀味, 淡淡嘅桂花香, 圓子唔夠煙韌, 不過仍然係不俗嘅甜品~

食物味道偏向清淡, 但係又幾好味, 唔錯!!!


我地2個人都試唔到一半嘅任點食物, 以咁嘅價錢, 可以任食咁多o野, 好抵食呀~


經理服務好好, 友善有禮, 其他服務員都好有禮貌, 而且人手幾充足... 女廁都好乾淨... 去開灣仔搵食嘅朋友, 可以o黎試吓~


是次每人消費約$170元
味道: 4 環境: 4 服務: 5 衛生: 4 抵食: 4
###
地址 : 灣仔港灣道30號新鴻基中心地下G3–4舖
電話 : 3528 0228


2011年7月21日 星期四

合時小廚 Hop Sze Restaurant (II)

18 July 2011,  Monday


前文提要, 2星期前專程去「合時小廚」, 試食朋友極力推介嘅「生炒骨」, 可惜「生炒骨」要預訂, 撲空一場...


死心不息, 決定再去... 早一晚致電預訂... 結果...


拉姑 : 唔該... 訂位o架... 聽晚X點兩位, 要預訂埋「生炒骨」o架...
男侍 : 嘩!!! 你兩個人學咩人食「生炒骨」???
拉姑 : (愕然) (忍住度火) 我D朋友話好食嘛...
男侍 : 唉... 我比老細同你講...
老細 : 我地呢度冇「生炒骨」...
拉姑 : (更愕然) (堅持+忍住) 上次你話要Book位時訂埋嘅...
老細最後幫我留位兼留埋「生炒骨」...


查實收咗線之後, 越諗越把幾火, 佢地居然咁樣同客人講o野... 不過Honey話唔怪得人, 人地餐牌真係冇「生炒骨」... 好, 我就忍你, 食埋你個「生炒骨」先, 睇吓有幾巴閉...


到咗第2晚...


我地被安排係角樓最盡頭張枱度座... 角樓同樓面差不多大, 都係2排枱, 每排4張枱左右...


落單時表明預訂咗「生炒骨」, 但男侍應講極都話「千層咕嚕肉」, 佢見我咁堅持話唔係咕嚕肉, 係生炒骨, 佢就話去問吓先...


跟手, 老闆娘走上o黎So So, 佢解釋生炒骨係要去街市買新鮮豬肉整, 75蚊一D都唔貴... 我心諗"個生炒骨整得好食嘅話, 75蚊就緊係唔貴"... 之後老闆娘了解咗我係熟客介紹o黎, 就閃咗...


生炒骨--傳說中嘅「生炒骨」終於呈現係我面前... 放入口係好鬆化, D肉都好Juicy, 同埋個糖醋汁甜酸度啱啱好, 而且D炸粉都好薄... 係好好食, 但係未至於好好好好好食... 所以以後都唔會再企圖食呢味「生炒骨」...


請大家忘記呢味傳說中嘅「生炒骨」!!! 千祈唔好意圖甚至嘗試去預訂!!!


都係因為我嘅朋友極力推介, 我先會傻吓傻吓咁走去試食, 我又點知呢味餸查實係唔供應嘅啫... 我下次見到個朋友一定要詳詳細細咁講清楚佢知, 叫佢唔好再週圍向人推介呢味「生炒骨」!!!


懷舊炸子雞(半隻)--皮脆肉嫩, 冇咩肥膏, 上枱時熱辣辣, 好好食... 而且份量好足...


因為第2次去, 而且冇咩Mood, 所以偷懶冇影到前菜同糖水...


查實佢價錢一D都唔平, 拍得住太古城嘅王家沙, 小菜味道係好, 可惜服務真係有好大嘅改善空間...


是次每人消費約$130元
味道: 3 環境: 2 服務: 2 衛生: 2 抵食: 2
###
地址 : 西灣河筲箕灣道39號麗灣大廈地下
電話 : 2569 0862


2011年7月19日 星期二

終於成功回收玻璃樽啦!!!


16 July 2011, Saturday


一月中果陣, 環保署宣佈係6個公屋試驗12個月回收玻璃樽, 當時鬼咁興奮, 一心諗住好快可以清咗屋企D堆積如山嘅玻璃樽...


點知等到頸都長, 都仲未有新消息...


轉眼都已經過咗6個月, D玻璃樽依然堆積如山, 唉...


上個月又發現其他團體都開始回收玻璃樽...


其中一個係香港泥頭車司機協會嘅「玻璃再生璀璨」項目, 雖然包括太古城, 可惜只限屋苑居民, 激死, 俗語話近廚得食, 但係我咁近太古城都唔可以拎D玻璃樽去回收...


除咗太古城, 就要去到灣仔盧押道垃圾收集站(近修頓球場), 好遠呀, 同埋佢一星期得2日會回收, 仲要係朝早, 我驚搬完D玻璃磚去到, 佢地收咗檔, 我都唔知點算... 所以一直未有行動...


今日終於諗到籍口去灣仔, 臨出發之前, 再上網Check真D先... 呀)))))) 魚則魚涌終於有公眾回收點啦!!!!!! 仲要係英皇道東匯中心, 近好多呀!!!!!!


雖然未至於方便到係屋企樓下咁, 但係已經好過灣仔好多啦...


我今日已經成功回收咗10個玻璃樽啦, 下星期六要再拎多D玻璃樽去回收先得...


呵呵呵呵... 我個廚房好快就可以展示「零玻璃樽」嘅美態啦!!!!!!


### 回收機構小檔案 ###


環保署及房委會の「玻璃樽回收試驗計劃」(Glass Bottles Pilot Recycling Programme)


http://www.info.gov.hk/gia/general/201101/15/P201101140099.htm


環保署及房委會合作, 係2011年1月15日推行「玻璃樽回收試驗計劃」, 為期十二個月, 佢地係6個公屋設立回收點, 包括彩盈村、順利村、順安村、順天村、牛頭角上村及油麗村...


香港泥頭車司機協會の「玻璃再生璀璨」(Green Glass Green)


http://www.greenglass.org.hk/


香港泥頭車司機協會係環境及自然保育基金資助下, 係2010年9月展開「玻璃再生璀璨」項目, 佢地係灣仔盧押道垃圾收集站(近修頓球場)及太古12個屋苑設立回收點, 包括太古城(只限屋苑居民)...


匡智會の「玻璃樽回收行動」(Glass Bottle Recycling Campaign)


http://www.hcfc.org.hk/gbrc/b5_points.php


匡智會係馬會慈善信託基金捐助下, 係2010年4月20日展開「玻璃樽回收行動」, 佢地係全港設立65個回收點, 包括匡智服務單位、公眾回收點、私人屋苑、商業機構、非牟利機構...


2011年7月17日 星期日

薑味芝士蛋糕 & 甜薯餡切餅 @ 工聯會

15 July 2011, Friday


今晚係第三堂去工聯會學整蛋糕... 今晚係整「薑味芝士蛋糕」...


我嘅制成品... 依然... 好...... 醜樣呀!!!!!!


返到屋企又再睇番同學期唔同地區嘅BLOG友整嘅蛋糕, 人地係整得好靚好正常o架囉!!!


我地阿Sir 6組人加埋佢自己先整3組忌廉芝士, 根本連鋪餅面都唔夠, 竟然完全冇預忌廉芝士比大家鋪餅邊, 仲叫大家用埋焗餅底張紙, 又濕又梅咁包走個Cake返屋企... 好核突呀...


個制成品真係一次衰過一次呀... 上完堂好唔開心呀...


制作花絮...


嚴重貨不對辦嘅「甜薯餡切餅」... (阿Sir示範, 我地冇得實習)


你地睇下... 根本就係一個鬆餅!!! 阿Sir示範時, 好多同學都有疑問, 大家不約而同認為餡餅應該係有塊餅皮包住D甜薯餡, 究竟阿Sir識唔識整餡餅o架???


哈哈... 吸到成個蓮蓬咁...


全新粉團... 仲Keep到紫芯蕃薯嘅顏色...


半新粉團(蓮蓬+全新粉團)... 嘩... 好恐怖呀D色... 成碟藍精靈咁... 食完會唔會Short Short地o架...


全新粉團都仲鬆鬆地, 半新粉團就已經發唔起...


焗好即刻食... 嘩... 陣味好臭... 好大陣梳打粉味... 嘔...


拎咗3粒返屋企比Honey食, 佢話都OK... 可能D梳打粉味已經散咗...


2011年7月16日 星期六

《哈利波特 - 死神的聖物 2》 HARRY POTTER AND THE DEATHLY HALLOWS PART 2

14 July 2011, Thursday


終於...


最後一集Harry Potter...


上畫啦...


睇咗一集又一集, 冇理由唔睇埋最後一集...


就睇佢第一日上畫嘅第一場...


哈哈... 唔係因為我為「哈利波特」而瘋狂, 而係因為咁啱放假, 13號晚路過戲院, 見到14號早場唔係3D, 有得諗... 而家好唔鐘意睇3D, 個眼鏡又唔啱Size, D戲嘅3D特效又唔係多, 搞到我睇住副3D眼鏡睇到頭都暈... 而且仲有位揀吓... 同埋只係$35, 係超超超超抵囉~ 好耐冇試過睇咁平嘅戲啦~


睇完真係一身鬆晒, 我終於都得到解脫啦, 唔使再追落去啦~ 太好啦~


前幾集都比人笑嘅奈威·隆巴頓(Neville Longbottom)今集終於發威啦~ 好英呀~


臨尾幾分鐘嘅「佬」造型同「師奶」造型先襯返D演員嘅實際外表, 要佢地繼續扮細路真係好難頂~ 好懷念第一集嘅哈利波特(Harry Potter)同妙麗·格蘭傑(Hermione Granger), 果時佢地仲係好得意, 而家就...


2011年7月15日 星期五

恆河咖喱屋 Hin Ho Curry Restaurant

11 July 2011, Monday


幾個月前知道筲箕灣出咗一間米芝蓮餐廳, 都想去試吓好耐, 不過有一次星期日下午去到門口, 見到大排長龍, 所以冇機會試...


今日去開西灣河, 就試吓佢間分店啦... 由於佢地中場休息幾粒鐘, 所以打電話o黎Book位冇人聽, 唯有試吓Walk-in, 諗住如果冇位先走去第二度食...


我地6點半去到, 所以冇訂位都有得食, 之不過要坐係門口個魚缸隔離, 全程好唔自在, 好驚D條條都幾呎長嘅魚一擺尾我地就成身水, 又驚D魚缸水彈咗出o黎會污染D食物... 一心諗住快D食完快D走... 呢個諗法竟然會出現係拎到米芝蓮一星嘅餐廳身上??? 唔係吖嘛...





胡椒薄脆(配香草辣醬&甜酸醬)--一坐低就會奉上... 我地落單後, 阿老闆話我地應該落單前食... 我問點解, 佢答話我地食完開咗個胃, 落單時就會ORDER多D野... 嘿... 好爛嘅GAG, 唔識笑... 一咬落去, 好薄好脆, 帶少少燶味, 唔太辣, 配香草辣醬好正...






個個網民都話D食物要等成個鐘, 點解... 唔使10分鐘就o黎晒??? 攪到我失晒預算, 之後要係西灣河魂遊太空幾個圈...


蒜蓉薄餅--嘩!!! 好熱熱熱呀!!! 辣死我隻手啦!!! 好好味呀, 好鬆化呀, 又唔油, 好香好酥呀!!!





香料燴羊膝--招牌菜!!! 好好味!!! 我地揀咗小辣, D咖哩偏向乾身, D汁唔多, 味好香濃, 傑身, 羊膝好多肉, 多肉到我地食唔晒... 配菜都好好味, 全碟清晒, 剩番條骨...





蕃茄咖哩牛仔腩--好好味呀!!! 呢款菜係冇得揀辣度, 只有"唔辣"!!! 食完一啖辣到爆火嘅羊膝, 用薄餅點蕃茄咖哩同食, 即時消晒D辣味, 快過打針, 好神奇呀!!!





食剩D蕃茄咖哩汁, 明明好飽, 都叫多個牛油薄餅... 之但係老闆娘話"千層"果款部機壞咗, 冇得食... 唉... 咁o架... 唯有轉另一款試吓啦...


香蔥薄餅--都幾好味, D蔥味好香濃... 又係好鬼熱, 辣死我隻手... 不過... 我鐘意蒜蓉薄餅多D, 因為我係蒜怪...





食物味道的確係好, 不過同其他米芝蓮一星級餐廳比較, 都仲有段距離... 不過以咁嘅價錢計, 佢算非常抵食同好食... 而且以印度菜計, 佢都屬於出眾...


可能我地早到, 餐廳內得4-5枱客, 所以其他網民講嘅缺點, 例如等候食物上枱時間好耐, 服務員不禮貌等問題, 我地今次都冇面對到...


唯一係D枱真係太太太窄, 放2碟餸已經冇晒位, 仲要放埋薄餅, 真係大D動作都驚會推跌晒枱面D野, 又驚個手肘會撞到隔離枱嘅食客... 真係坐得好辛苦, 坐到全身僵硬...


男厠尚算乾淨, 但係太窄, 好迫夾...


是次每人消費約$135元
味道: 5 環境: 2 服務: 3 衛生: 3 抵食: 3
###
地址 : 西灣河筲箕灣道90號地下
電話 : 2967-8348/ 2967-8545