網頁清單

2011年6月19日 星期日

半島酒店大堂茶座 The Lobby

14 June 2011, Tuesday



多年前已經對半島酒店嘅High Tea好有興趣, 只可惜一直搵唔到腳夾啱時間一齊去, 直至今日, 終於可以同都係未去過嘅力仔一齊去一嚐佢嘅滋味...


金碧輝煌嘅Lobby... 配合Live Band演奏古典音樂, 好浪漫呀!!! 


唔好以為咁貴嘅下午茶, 仲要係閒日, 可以唔使排隊直入... 如果你咁諗就大錯特錯啦!!! 我地3點半去到, 都排咗半個鐘先有位坐...
(明明打電話去問都話冇得Book位, 都唔明點解有網民話自己Book咗位)


仲有千祈咪著拖鞋去呀, 佢真係有職員巡邏o架!!! 一見到有排緊隊嘅客著住拖鞋, 就會用英文問個客有冇Another Shoes... 冇就緊係冇得入啦~


主角出場啦... 半島下午茶(兩位) The Peninsula's Classic Afternoon Tea For two persons!!!


(頂層) 精製法式雜餅 Home-made Afternoon Tea Pastries
(中層) 雜錦手指三文治, 鹹脆酥餅 Assorted Finger Sandwiches and Savoury Pastries
(底層) 英式烘提子鬆餅配奶油忌廉及紅草莓果醬 Freshly Baked Raisins Scones, Devonshire clotted cream and Strawberry preserve


左一嘅Chocolate Tart最好味!!! 好有驚喜!!! 香脆嘅朱古力外殼, 包住微酸嘅果醬, 配軟滑無比嘅香濃朱古力慕士, 好正呀!!! 
左二嘅Chiffon Cake戚風蛋糕係我平時最憎食嘅, 不過佢都好味過出面果D好多...
中間嘅Rraspberry Tart紅莓撻唔食得, 所以唔知咩味...
左後方嘅White Chocolate Apricot Cake白朱古力杏脯蛋糕滲透出淡淡嘅奶味, 杏脯青香, 配紅茶最Match...


我第一啖就食右下角嘅鹹點, 竟然係... Mushroom Pie?!! 天呀!!! 唔係咁大整蠱呀嘛!!! 好彩我扮晒淑女, 只係咬咗一小啖, 唔係成舊放入口啫!!! 雖然只係一小口, 但係D餡超有菇味, 好菇嘅朋友一定鐘意!!!
右二嘅三文治, 由於腸胃不適, 有生菜, 唔可以食...
左二嘅三文治, 煙三文魚都OK, 冇咩特別...
左一嘅蛋批, 好重蛋味, OK啦, 都係冇驚喜...
右後方嘅Ham Panini個樣唔得, 反而味道係中層之中最好嘅, 個包好軟熟, 火腿好好味!!!


鬆餅好鬆呀!!!!!! 唔係講笑, 真係我人生中食過最鬆嘅鬆餅!!! 除咗鬆之外, 仲唔會乾到張住個口要即刻飲水果種, 配埋奶油忌廉同紅草莓果醬, 好好味呀!!!


荔枝紅茶--好濃郁嘅紅茶味, 不過冇荔枝味, 最奇係... 點解冇茶隔嘅??? 咁高級嘅傳統英式餐廳, 竟然冇茶隔???
Iced Cappucino--味道OK... 咖啡有咖啡味, 影射
DG Cafe, 哈哈哈...


Panna Cotta--食到尾聲, 侍應生會奉上凍嘅Panna Cotta, 奶凍好滑, 奶味香濃, 配杏脯醬加埋開心果碎, 味道好夾, 連唔鐘意食奶凍嘅我都覺得好好味!!!


Macaroons--埋單時侍應生會奉上Macaroons, 我食咗朱古力味, 嗯... 好香呀, 好重朱古力味但又唔會過甜, 仲好鬆脆, 一定係新鮮貨色, 好味過我自己整果D好多!!! 呵呵...


鬆餅的確係好好好味, 不過再好味都食唔落, 唯有打包2個走, 返屋企再嘆過...


演奏古典音樂嘅Live Band居高臨下...


整體食物好有水準, 環境更加冇得彈, 唯一係可能太爆滿, 服務員嘅服務並不貼心, 好幾次都要不斷揮手幾分鐘甚至十幾分鐘先有服務員見到...


當年獅子星號打鑼打鼓進軍香港, 最記得佢句口號--「一生總要豪一次」!!! 我今日... 豪咗啦, 好Hyper呀, 嘩咔咔咔!!!


是次每人消費約$275元
味道: 5 環境: 5 服務: 4 衛生: 5 抵食: 3
###
地址 : 尖沙咀彌敦道19-21號半島酒店大堂
電話 : 2920 2888


6 則留言:

  1. 我住過獅子星號,都唔知自已豪左tim
    [版主回覆06/20/2011 17:25:00]一d都唔奇吖, 因為你一向生在福中不知福嘛~

    回覆刪除
  2. 我都要去食 ;)
     
    [版主回覆06/20/2011 17:28:00]好!!! 記得慢慢嘆, 坐番佢兩個鐘先好走~

    回覆刪除
  3. 我都要豪一次
    [版主回覆06/20/2011 17:29:00]好!!! 人一世, 物一世, 點都要去試吓...
    之但係... 你會唔會帶埋阿女去呢??? 我驚佢唔夠食喎... 嘩咔咔咔...

    回覆刪除
  4. 拉姑,你第一次入半島時,有冇比佢一種氣勢吸引呀?
    因為我十幾年前岩岩出嚟做嘢時,就係半島做咗兩年,
    當時第一次踏入大堂就比佢既氣勢吸引,唔知你有冇同感呢?
    [版主回覆07/07/2011 21:37:00]Joanne, 多謝你嘅瀏覽同留言!!!
    我入到去咪好似大鄉里咁, 不停抬高頭望實個天花~

    回覆刪除
  5. so good
    [版主回覆08/08/2011 12:14:00]多謝你的瀏覽及留言~

    回覆刪除
  6. 請問坐邊個位置最靚最好呢?
    [版主回覆08/19/2013 22:05:36]其實都冇得揀位, 排到你時有邊張枱剛空出就係果張... 我地坐酒店大門邊, 得背後有人坐, 前面好空曠, 算開揚, 唔使4邊都比人夾實係中間~

    回覆刪除