網頁清單

2011年6月24日 星期五

「兩餸套飯」の 涼瓜煎蛋 + 南乳雞翼

23 June 2011, Thursday

已經2個月冇試新o野... 今日一試... 又出事!!!!!!



南乳雞翼
-- 煎緊果陣, 見個鑊底迅速燶晒, 好驚個新鑊就咁就報銷, 落完一次油又一次油, 總共落咗3次... 之後D油好似走番晒出o黎咁, 唯有夾起D雞翼, 倒咗D油, 摌走D鑊燶, 落調味汁烚熟D雞翼... 不過最後都仲未熟晒, 要拎去叮1分鐘先食得...
係就係煮得'呢Hea'咗D, 不過味道都OK喎, 起碼都食到南乳味, 哈哈~



涼瓜煎蛋
-- 點解... 我D蛋... 咁碎嘅??? 係咪因為我落得太小油呀??? D蛋黐晒鑊底呀!!! 同埋, 落蛋汁時係咪要放係中間唔好推佢o架??? 我真係唔知點先可以煎到一個蛋餅嘅型狀呀!!! SOS...


切苦瓜時, 見到入面血淋淋嘅顏色, 嚇到傻!!! 即時狂Call大姊, 電話一通我就叫"救命呀!!!"... 哈哈, 唔知有冇嚇死佢呢... 哦... 原來D苦瓜太熟D籽就會變紅色... (果然係大鄉里入廚, 少見多怪)


大熱天時煮飯真係勁過焗桑拿, D汗BaBa聲咁標出o黎, 又冇冷氣, 又冇風扇, 仲要唔行得開, 真係辛苦過做Gym!!!

2 則留言:

  1. 拉姑,就係因為個五層鑊,你買嗰時無問人個鑊點用架?用五層鑊,開火要慢火,要慢慢燒到隻鑊出煙,先開始落油,跟住又要等啲油起碼有70 80度你先好落野煮,如果唔係,就會黐哂底架啦,所以我話我係心急人就唔用得五層鑊囉,如果煎野,我會用易潔鑊代替,唔使落咁多油,但係用易潔鑊都要小心,唔好大火自燃隻鑊,佢會好易打柴同有至癌物走出黎,細至中火就ok :)
    [版主回覆06/24/2011 14:38:00]冇呀, 個SALES剩係話凍鑊落油咋, 我聽完都覺得好奇怪~
    多謝你教路, 我下次煮時再試吓先~
    P.S. 易潔鑊我多數中火, 因為驚太大火會燶~

    回覆刪除
  2. 凍鑊落油真係無聽過,不過人地咁講,我估有原因啵,你上去佢個web site睇清楚好喎! 蛋碎開,會唔會太少蛋 or 瓜太大舊?啲瓜有無出水?
    [版主回覆07/13/2011 23:19:00]冇呀, 香港代理冇Web Site...
    我估太少蛋+太多瓜, 下次試吓買一個瓜, 仲要加細碼... D瓜出咗水啦~

    回覆刪除